Biblica® Open Lao Contemporary Version
ເອເຊກຽນ 11
ການພິພາກສາອັນແນ່ນອນຂອງພຣະເຈົ້າຕໍ່ອິດສະຣາເອນ
ແລ້ວພຣະວິນຍານບໍລິສຸດໄດ້ຍົກຂ້າພະເຈົ້າຂຶ້ນ ແລະ ນຳຂ້າພະເຈົ້າໄປທີ່ປະຕູທາງທິດຕາເວັນອອກຂອງວິຫານຂອງພຣະເຈົ້າຢາເວ. ຢູ່ທີ່ປະຕູທາງເຂົ້ານັ້ນມີຊາຍ 25 ຄົນ ແລະ ຂ້າພະເຈົ້າເຫັນຢາອາຊານີຢາ ລູກຊາຍຂອງອັດຊູຣະ ແລະ ເປລາຕີຢາ ລູກຊາຍຂອງເບນາອີຢາ ເຊິ່ງເປັນຜູ້ນຳປະຊາຊົນກໍຢູ່ທ່າມກາງພວກເຂົາ. ພຣະເຈົ້າຢາເວໄດ້ເວົ້າກັບຂ້າພະເຈົ້າວ່າ, “ບຸດມະນຸດ, ຄົນເຫລົ່ານີ້ຄືຄົນທີ່ຄິດແຜນຊົ່ວ ແລະ ໃຫ້ຄຳປຶກສາອັນຊົ່ວຮ້າຍໃນນະຄອນນີ້. ພວກເຂົາເວົ້າວ່າ, ‘ໃກ້ຈະເຖິງເວລາທີ່ເຮົາຈະສ້າງເຮືອນຂຶ້ນແລ້ວບໍ່ແມ່ນບໍ?1 ນະຄອນນີ້ເປັນເໝືອນໝໍ້ ແລະ ພວກເຮົາກໍເປັນເໝືອນຊີ້ນທີ່ປອດໄພຢູ່ໃນໝໍ້ນັ້ນ’. ເຫດສະນັ້ນ ຈົ່ງທຳນວາຍກ່າວໂທດພວກເຂົາ; ບຸດມະນຸດ, ຈົ່ງທຳນວາຍ”.
ແລ້ວພຣະວິນຍານບໍລິສຸດຂອງພຣະເຈົ້າຢາເວ ກໍມາເທິງຂ້າພະເຈົ້າ ແລະ ພຣະອົງໄດ້ບອກຂ້າພະເຈົ້າໃຫ້ກ່າວວ່າ: “ນີ້ຄືສິ່ງທີ່ພຣະເຈົ້າຢາເວກ່າວຄື: ພວກເຈົ້າເປັນຜູ້ນຳໃນອິດສະຣາເອນ, ພວກເຈົ້າກຳລັງເວົ້າເຊັ່ນນັ້ນ ແຕ່ເຮົາຮູ້ວ່າພວກເຈົ້າກຳລັງຄິດສິ່ງໃດຢູ່. ພວກເຈົ້າໄດ້ຂ້າຄົນຈຳນວນຫລວງຫລາຍໃນນະຄອນນີ້ ແລະ ມີຄົນຕາຍເຕັມຖະໜົນ.
“ດັ່ງນັ້ນ ພຣະເຈົ້າຢາເວ ອົງເຈົ້ານາຍ ກ່າວດັ່ງນີ້ວ່າ: ຊາກສົບທີ່ພວກເຈົ້າໄດ້ໂຍນໄປທີ່ນັ້ນກໍຄືຊີ້ນ ແລະ ນະຄອນນີ້ກໍຄືໝໍ້, ແຕ່ເຮົາຈະຂັບໄລ່ພວກເຈົ້າອອກໄປຈາກນະຄອນນີ້. ພວກເຈົ້າຢ້ານດາບ, ເຮົາກໍຈະນຳເອົາດາບມາຍັງພວກເຈົ້າ, ພຣະເຈົ້າຢາເວ ອົງເຈົ້ານາຍໄດ້ປະກາດໄວ້ດັ່ງນີ້. ເຮົາຈະຂັບໄລ່ພວກເຈົ້າອອກຈາກນະຄອນນີ້ ແລະ ມອບພວກເຈົ້າໃຫ້ແກ່ຄົນຕ່າງຊາດ ແລະ ເຮົາຈະລົງໂທດພວກເຈົ້າ. ພວກເຈົ້າຈະລົ້ມຕາຍດ້ວຍດາບ ແລະ ເຮົາຈະພິພາກສາພວກເຈົ້າຢູ່ທີ່ຊາຍແດນອິດສະຣາເອນ. ເມື່ອນັ້ນພວກເຈົ້າກໍຈະຮູ້ວ່າເຮົາຄືພຣະເຈົ້າຢາເວ. ນະຄອນນີ້ຈະບໍ່ແມ່ນໝໍ້ສຳລັບພວກເຈົ້າ ແລະ ພວກເຈົ້າກໍບໍ່ແມ່ນຊີ້ນທີ່ຢູ່ໃນໝໍ້ນີ້; ເຮົາຈະພິພາກສາພວກເຈົ້າຢູ່ທີ່ຊາຍແດນອິດສະຣາເອນ. ແລະ ພວກເຈົ້າກໍຈະຮູ້ວ່າເຮົາຄືພຣະເຈົ້າຢາເວ, ເພາະພວກເຈົ້າບໍ່ໄດ້ປະຕິບັດຕາມດຳລັດຂອງເຮົາ ແລະ ບໍ່ໄດ້ຮັກສາກົດບັນຍັດຂອງເຮົາ ແຕ່ພັດປະພຶດຕາມແບບຢ່າງຂອງຊົນຊາດທັງຫລາຍທີ່ຢູ່ອ້ອມຮອບພວກເຈົ້າ”.
ຂະນະທີ່ຂ້າພະເຈົ້າກຳລັງທຳນວາຍຢູ່ນັ້ນ, ເປລາຕີຢາ ລູກຊາຍຂອງເບນາອີຢາກໍຕາຍໄປ. ຫລັງຈາກນັ້ນ ຂ້າພະເຈົ້າຈຶ່ງກົ້ມໜ້າລົງ ແລະ ຮ້ອງສຽງດັ່ງວ່າ, “ໂອ, ຂ້າແດ່ພຣະເຈົ້າຢາເວ ອົງເຈົ້ານາຍ! ພຣະອົງຈະທຳລາຍຊາວຊົນອິດສະຣາເອນທີ່ເຫລືອຢູ່ນີ້ໝົດເລີຍບໍ?”
ຄຳສັນຍາຂອງການກັບຄືນມາຂອງອິດສະຣາເອນ
ຖ້ອຍຄຳຂອງພຣະເຈົ້າຢາເວໄດ້ມາເຖິງຂ້າພະເຈົ້າວ່າ: “ບຸດມະນຸດ, ຄົນໃນເຢຣູຊາເລັມໄດ້ເວົ້າເຖິງຍາດພີ່ນ້ອງຮ່ວມສາຍເລືອດດຽວກັນກັບເຈົ້າ2 ແລະ ຊາວອິດສະຣາເອນທັງໝົດວ່າ, ‘ພວກເຂົາ3ຫ່າງໄກຈາກພຣະເຈົ້າຢາເວ ດິນແດນນີ້ຈຶ່ງຕົກເປັນກຳມະສິດຂອງພວກເຮົາ’.
“ເຫດສະນັ້ນ ຈົ່ງກ່າວວ່າ: ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ເຖິງແມ່ນເຮົາໄດ້ສົ່ງພວກເຂົາໄປໄກໆ ໄປຢູ່ໃນທ່າມກາງປະຊາຊາດຕ່າງໆ ແລະ ເຮັດໃຫ້ພວກເຂົາກະຈັດກະຈາຍໄປຢູ່ທ່າມກາງປະເທດຕ່າງໆ, ແຕ່ອີກບໍ່ດົນເຮົາກໍຈະເປັນສະຖານນະມັດສະການສຳລັບພວກເຂົາໃນປະເທດທີ່ພວກເຂົາໄປນັ້ນ’.
“ເຫດສະນັ້ນ ຈົ່ງກ່າວວ່າ: ‘ພຣະເຈົ້າຢາເວ ອົງເຈົ້ານາຍກ່າວດັ່ງນີ້ວ່າ: ເຮົາຈະຮວບຮວມພວກເຈົ້າ ຈາກປະຊາຊາດຕ່າງໆ ແລະ ນຳພວກເຈົ້າກັບມາຈາກບັນດາປະເທດທີ່ເຮົາໄດ້ເຮັດໃຫ້ພວກເຈົ້າກະຈັດກະຈາຍໄປນັ້ນ ແລະ ເຮົາຈະຄືນດິນແດນອິດສະຣາເອນໃຫ້ພວກເຈົ້າອີກຄັ້ງ’.
“ພວກເຂົາຈະກັບມາ ແລະ ກຳຈັດຮູບເຄົາລົບອັນຊົ່ວຊ້າ ແລະ ຮູບເຄົາລົບອັນໜ້າກຽດຊັງໃຫ້ໝົດໄປ. ເຮົາຈະໃຫ້ພວກເຂົາມີໃຈດຽວ ແລະ ມີຈິດວິນຍານໃໝ່ ເຮົາຈະກຳຈັດໃຈຫີນຂອງພວກເຂົາ ແລະ ມອບໃຈເນື້ອໜັງໃຫ້ແກ່ພວກເຂົາ. ແລ້ວພວກເຂົາຈະປະຕິບັດຕາມດຳລັດຂອງເຮົາ ແລະ ຈະເອົາໃຈໃສ່ຮັກສາກົດບັນຍັດຂອງເຮົາ. ພວກເຂົາຈະເປັນປະຊາຊົນຂອງເຮົາ ແລະ ເຮົາຈະເປັນພຣະເຈົ້າຂອງພວກເຂົາ. ແຕ່ສ່ວນຜູ້ທີ່ມອບໃຈໃຫ້ຮູບເຄົາລົບອັນຊົ່ວຊ້າ ແລະ ຮູບເຄົາລົບອັນໜ້າກຽດຊັງນັ້ນ ເຮົາຈະຕອບແທນໃຫ້ສົມກັບທີ່ພວກເຂົາໄດ້ເຮັດລົງໄປ, ພຣະເຈົ້າຢາເວ ອົງເຈົ້ານາຍປະກາດໄວ້ດັ່ງນີ້”.
ຫລັງຈາກນັ້ນ ເຄຣຸບທີ່ມີກົງລໍ້ຢູ່ທາງຂ້າງຕົນນັ້ນ ກໍກາງປີກອອກຂອງຕົນ ແລະ ສະຫງ່າລາສີຂອງພຣະເຈົ້າແຫ່ງອິດສະຣາເອນກໍຢູ່ເໜືອເຄຣຸບເຫລົ່ານັ້ນ. ສະຫງ່າລາສີຂອງພຣະເຈົ້າຢາເວ ໄດ້ເຄື່ອນຂຶ້ນຈາກໃນນະຄອນນັ້ນ ແລະ ຢຸດຢູ່ເໜືອພູເຂົາດ້ານທິດຕາເວັນອອກຂອງນະຄອນ. ໃນນິມິດທີ່ພຣະວິນຍານບໍລິສຸດຂອງພຣະເຈົ້າໄດ້ມອບໃຫ້ນັ້ນ ພຣະວິນຍານບໍລິສຸດໄດ້ຍົກຂ້າພະເຈົ້າຂຶ້ນ ແລະ ໄດ້ພາຂ້າພະເຈົ້າໄປຫາບັນດາຊະເລີຍໃນບາບີໂລນ.4
ແລ້ວນິມິດທີ່ຂ້າພະເຈົ້າເຫັນກໍຂຶ້ນໄປຈາກຂ້າພະເຈົ້າ, ແລ້ວຂ້າພະເຈົ້າຈຶ່ງໄດ້ບອກທຸກສິ່ງທີ່ພຣະເຈົ້າຢາເວໄດ້ສະແດງແກ່ຂ້າພະເຈົ້າໃຫ້ບັນດາຊະເລີຍຟັງ.
Source notes (4)
- Footnote ຫລື ນີ້ບໍ່ແມ່ນເວລາທີ່ຈະສ້າງເຮືອນ
- Footnote ຫລື ຜູ້ຕົກເປັນຊະເລີຍເຊັ່ນດຽວກັບເຈົ້າ
- Footnote ຫລື ຈົ່ງຢູ່
- Footnote ຫລື ຄານເດອາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.