Biblica® Open Lao Contemporary Version
ເອເຊກຽນ 10
ສະຫງ່າລາສີຂອງພຣະເຈົ້າຖືກອອກຈາກວິຫານ
ຂ້າພະເຈົ້າກໍໄດ້ເບິ່ງ ແລະ ຂ້າພະເຈົ້າກໍເຫັນບາງສິ່ງຄ້າຍຄືກັບບ່ອນນັ່ງແກ້ວໄພທູນ ຢູ່ເໜືອຟ້າກວ້າງທີ່ຢູ່ເໜືອຫົວຂອງບັນດາເຄຣຸບ. ພຣະເຈົ້າຢາເວໄດ້ກ່າວກັບຊາຍທີ່ນຸ່ງຫົ່ມຜ້າຝ້າຍລິນິນເນື້ອລະອຽດດີນັ້ນວ່າ, “ຈົ່ງເຂົ້າໄປທ່າມກາງກົງລໍ້ທີ່ຢູ່ລຸ່ມບັນດາເຄຣຸບ ແລ້ວເອົາມືຂອງເຈົ້າກອບຖ່ານໄຟທີ່ລຸກຢູ່ ເຊິ່ງຢູ່ທ່າມກາງບັນດາເຄຣຸບມາ ແລ້ວໂຮຍໃສ່ທົ່ວນະຄອນນີ້”. ຊາຍຄົນນັ້ນກໍເຂົ້າໄປຂະນະທີ່ຂ້າພະເຈົ້າເຝົ້າເບິ່ງຢູ່.
ບັນດາເຄຣຸບຢືນຢູ່ທີ່ດ້ານທິດໃຕ້ຂອງວິຫານ ເມື່ອຊາຍຜູ້ນັ້ນເຂົ້າໄປ ແລະ ກໍມີເມກປົກຄຸມຢູ່ທົ່ວເດີ່ນຊັ້ນໃນ. ແລ້ວສະຫງ່າລາສີຂອງພຣະເຈົ້າຢາເວກໍເຄື່ອນຂຶ້ນຈາກບັນດາເຄຣຸບນັ້ນ ໄປທີ່ປະຕູວິຫານ. ເມກປົກຄຸມວິຫານ ແລະ ທົ່ວເດີ່ນວິຫານເຕັມແມ່ນໄປດ້ວຍແສງສະຫວ່າງແຫ່ງສະຫງ່າລາສີຂອງພຣະເຈົ້າຢາເວ. ສຽງຂອງປີກຂອງບັນດາເຄຣຸບແມ່ນໄດ້ຍິນໄປໄກຈົນຮອດເດີ່ນຊັ້ນນອກ, ເໝືອນກັບສຽງຂອງສຽງຂອງພຣະເຈົ້າຜູ້ມີລິດອຳນາດຍິ່ງໃຫຍ່ ເມື່ອພຣະອົງກ່າວ.
ເມື່ອພຣະເຈົ້າຢາເວສັ່ງຊາຍທີ່ນຸ່ງຫົ່ມຜ້າຝ້າຍລິນິນເນື້ອລະອຽດດີນັ້ນວ່າ, “ຈົ່ງໄປເອົາໄຟຈາກທ່າມກາງກົງລໍ້ທີ່ຢູ່ໃນບັນດາເຄຣຸບນັ້ນອອກມາ”, ຊາຍນັ້ນກໍເຂົ້າໄປ ແລະ ຢືນຢູ່ຂ້າງກົງລໍ້ກົງໜຶ່ງ. ແລ້ວເຄຣຸບຕົນໜຶ່ງກໍຍື່ນມືຂອງຕົນອອກໄປທີ່ໄຟ ເຊິ່ງຢູ່ທ່າມກາງພວກຕົນ. ເຄຣຸບຕົນນັ້ນໄດ້ເອົາໄຟອອກມາສ່ວນໜຶ່ງໃສ່ໃນມືຂອງຊາຍຜູ້ນຸ່ງຫົ່ມຜ້າລິນິນເນື່ອລະອຽດດີ, ຊາຍຜູ້ນັ້ນກໍຮັບໄຟໄວ້ ແລະ ອອກມາ. (ເຫັນສິ່ງໜຶ່ງທີ່ຄ້າຍມືມະນຸດຢູ່ກ້ອງປີກຂອງເຄຣຸບ).
ຂ້າພະເຈົ້າກໍໄດ້ເບິ່ງ ແລະ ເຫັນກົງລໍ້ສີ່ກົງຢູ່ຂ້າງເຄຣຸບເຫລົ່ານັ້ນ, ເຄຣຸບໜຶ່ງຕົນມີກົງລໍ້ໜຶ່ງກົງ; ກົງລໍ້ນັ້ນເປັ່ງປະກາຍຄ້າຍຄືກັບບຸດສະລາຄຳ. ກົງລໍ້ທັງກົງສີ່ນັ້ນມີລັກສະນະຄືກັນ; ແຕ່ລະກົງເບິ່ງຄ້າຍຄືມີກົງລໍ້ຊ້ອນຂວາງຢູ່ຂ້າງໃນ. ກົງລໍ້ສາມາດເຄື່ອນໄປຫາທິດທາງໃດທິດທາງໜຶ່ງໃນສີ່ທິດທາງຕາມແຕ່ເຄຣຸບຈະມຸ່ງໜ້າໄປ; ກົງລໍ້ນັ້ນບໍ່ໄດ້ລ້ຽວເມື່ອເຄຣຸບເຄື່ອນໄປ ບັນດາເຄຣຸບມຸ່ງໜ້າໄປທິດທາງໃດກໍໄດ້ໂດຍບໍ່ຕ້ອງຫັນໂຕເລີຍ. ທົ່ວຮ່າງຂອງເຄຣຸບ, ລວມທັງຫລັງມືຂອງເຄຣຸບ, ປີກຂອງເຄຣຸບ ແມ່ນມີຕາເຕັມໄປໝົດເຊັ່ນດຽວກັບກົງລໍ້ທັງສີ່. ຂ້າພະເຈົ້າໄດ້ຍິນວ່າກົງລໍ້ນັ້ນຖືກເອີ້ນວ່າ “ກົງລໍ້ກັງຫັນ”. ເຄຣຸບແຕ່ລະຕົນມີສີ່ໜ້າຄື: ໜ້າທີໜຶ່ງເປັນໜ້າເຄຣຸບ, ໜ້າທີສອງເປັນໜ້າມະນຸດ, ໜ້າທີສາມເປັນໜ້າໂຕສິງ, ໜ້າທີສີ່ເປັນໜ້ານົກອິນຊີ.
ແລ້ວບັນດາເຄຣຸບກໍເຫາະຂຶ້ນໄປ. ນີ້ຄືສິ່ງມີຊີວິດທີ່ຂ້າພະເຈົ້າໄດ້ເຫັນຢູ່ທີ່ແຄມແມ່ນ້ຳເກບາກ. ເມື່ອເຄຣຸບເຫລົ່ານີ້ເຄື່ອນໄປ, ກົງລໍ້ທີ່ຢູ່ທາງຂ້າງ ກໍເຄື່ອນໄປນຳ ແລະ ເມື່ອເຄຣຸບກາງປີກຂອງຕົນອອກເຫາະຂຶ້ນຈາກພື້ນ, ກົງລໍ້ນັ້ນກໍຢູ່ຄຽງຂ້າງເຄຣຸບໄປ. ເມື່ອເຄຣຸບຢຸດຢູ່, ກົງລໍ້ກໍຢຸດຢູ່ ແລະ ເມື່ອເຄຣຸບເຫາະຂຶ້ນ, ກົງລໍ້ກໍເຫາະຂຶ້ນໄປນຳເຄຣຸບ, ເພາະວິນຍານຂອງສິ່ງມີຊີວິດນັ້ນແມ່ນຢູ່ໃນກົງລໍ້.
ແລ້ວສະຫງ່າລາສີຂອງພຣະເຈົ້າຢາເວກໍໄປຈາກເທິງທາງເຂົ້າປະຕູວິຫານ ແລະ ໄປຢຸດຢູ່ເໜືອເຄຣຸບເຫລົ່ານັ້ນ. ໃນຂະນະທີ່ຂ້າພະເຈົ້າເຝົ້າເບິ່ງຢູ່, ເຄຣຸບເຫລົ່ານັ້ນກໍກາງປີກຂອງຕົນ ແລະ ບິນຂຶ້ນຈາກພື້ນ, ຂະນະທີ່ເຄຣຸບເຄື່ອນໄປ ກົງລໍ້ກໍເຄື່ອນໄປກັບເຄຣຸບເຫລົ່ານັ້ນ. ເຄຣຸບ ແລະ ກົງລໍ້ໄດ້ຢຸດຢູ່ທີ່ທາງເຂົ້າປະຕູທາງດ້ານທິດຕາເວັນອອກຂອງວິຫານຂອງພຣະເຈົ້າຢາເວ ແລະ ສະຫງ່າລາສີຂອງພຣະເຈົ້າແຫ່ງອິດສະຣາເອນກໍຢູ່ເໜືອເຄຣຸບເຫລົ່ານັ້ນ.
ຂ້າພະເຈົ້າເຄີຍເຫັນສິ່ງມີຊີວິດເຫລົ່ານີ້ຢູ່ໃຕ້ພຣະເຈົ້າແຫ່ງອິດສະຣາເອນທີ່ແຄມແມ່ນ້ຳເກບາກ ແລະ ຂ້າພະເຈົ້າຈຶ່ງຮູ້ວ່ານັ້ນແມ່ນບັນດາເຄຣຸບ. ແຕ່ລະຕົນມີສີ່ໜ້າ ແລະ ສີ່ປີກ, ແລະ ກ້ອງປີກຂອງເຄຣຸບເຫລົ່ານັ້ນກໍມີສິ່ງທີ່ເບິ່ງຄືມືມະນຸດ. ໃບໜ້າຂອງເຄຣຸບເຫລົ່ານີ້ມີລັກສະນະດຽວກັບທີ່ຂ້າພະເຈົ້າເຄີຍເຫັນຢູ່ທີ່ແຄມແມ່ນ້ຳເກບາກ. ແຕ່ລະຕົນມຸ່ງໄປຂ້າງໜ້າ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.