Biblica® Open Lao Contemporary Version
ເອເຊກຽນ 9
ການພິພາກສາບັນດາຄົນທີ່ກາບໄຫວ້ຮູບເຄົາລົບ
ແລ້ວຂ້າພະເຈົ້າກໍໄດ້ຍິນພຣະອົງເປັ່ງສຽງອອກມາອັນດັງວ່າ, “ຈົ່ງນຳພວກຄົນທີ່ໄດ້ຮັບແຕ່ຕັ້ງໃຫ້ເຮັດໜ້າທີ່ພິພາກສາເມືອງນີ້ເຂົ້າມາໃກ້ໆ ໃຫ້ແຕ່ລະຄົນຖືອາວຸດຂອງຕົນມານຳ” ແລະ ຂ້າພະເຈົ້າເຫັນຊາຍຫົກຄົນມາຈາກທາງປະຕູດ້ານເທິງ ເຊິ່ງຫັນໄປທາງທິດເໜືອ, ແຕ່ລະຄົນຖືອາວຸດພິດຮ້າຍກາດໃນມືຂອງຕົນ. ພວກເຂົາມາພ້ອມກັບຊາຍຄົນໜຶ່ງທີ່ນຸ່ງຫົ່ມຜ້າຝ້າຍລິນິນເນື້ອລະອຽດດີ ຜູ້ມີຫີບເຄື່ອງຂຽນຢູ່ຂ້າງກາຍ. ພວກເຂົາເຂົ້າມາຢືນຢູ່ຂ້າງແທ່ນບູຊາທອງສຳລິດ.
ສະຫງ່າລາສີຂອງພຣະເຈົ້າແຫ່ງອິດສະຣາເອນໄດ້ເຄື່ອນຂຶ້ນຈາກເໜືອເຄຣຸບ, ບ່ອນທີ່ເຄີຍຢູ່ ແລະ ເຄື່ອນໄປທີ່ປະຕູຂອງວິຫານ. ແລ້ວພຣະເຈົ້າຢາເວກໍໄດ້ເອີ້ນຊາຍທີ່ນຸ່ງຫົ່ມຜ້າຝ້າຍລິນິນເນື້ອລະອຽດດີ ເຊິ່ງມີຫີບເຄື່ອງຂຽນຢູ່ຂ້າງກາຍນັ້ນ ແລ້ວພຣະອົງກໍໄດ້ກ່າວກັບລາວວ່າ, “ຈົ່ງໄປທົ່ວນະຄອນເຢຣູຊາເລັມ ແລະ ໃສ່ເຄື່ອງໝາຍຢູ່ເທິງໜ້າຜາກຂອງບັນດາຜູ້ທີ່ໂສກເສົ້າ ແລະ ຄ່ຳຄວນເພາະສິ່ງທີ່ໜ້າກຽດຊັງທັງໝົດ ເຊິ່ງຄົນທັງຫລາຍໄດ້ເຮັດໃນນະຄອນນີ້”.
ຂະນະທີ່ຂ້າພະເຈົ້າຟັງຢູ່ນັ້ນ ກໍໄດ້ຍິນພຣະອົງກ່າວກັບຄົນອື່ນໆວ່າ, “ຈົ່ງຕາມລາວໄປທົ່ວນະຄອນ ແລະ ຂ້າ ໂດຍບໍ່ສົງສານ ແລະ ເມດຕາປານີ. ຈົ່ງຂ້າທັງຜູ້ເຖົ້າ, ຄົນໜຸ່ມ ແລະ ແມ່ຍິງ, ແມ່ ແລະ ເດັກນ້ອຍ, ແຕ່ຢ່າແຕະຕ້ອງຜູ້ທີ່ມີເຄື່ອງໝາຍນັ້ນ. ຈົ່ງເລີ່ມຕົ້ນຕັ້ງແຕ່ສະຖານນະມັດສະການຂອງເຮົານີ້”. ດັ່ງນັ້ນ ຄົນເຫລົ່ານັ້ນຈຶ່ງເລີ່ມຕົ້ນຂ້າຕັ້ງແຕ່ຜູ້ເຖົ້າທີ່ຢູ່ຕໍ່ໜ້າວິຫານ.
ແລ້ວພຣະອົງກໍໄດ້ກ່າວວ່າກັບພວກເຂົາວ່າ, “ຈົ່ງເຮັດໃຫ້ວິຫານເປັນມົນທິນ ແລະ ເຮັດໃຫ້ເດີ່ນເຕັມໄປດ້ວຍຄົນທີ່ຖືກຂ້າ. ຈົ່ງໄປ!” ດັ່ງນັ້ນ ພວກເຂົາຈຶ່ງອອກໄປ ແລະ ເລີ່ມຕົ້ນຂ້າຄົນທົ່ວນະຄອນນັ້ນ. ໃນຂະນະທີ່ພວກເຂົາກຳລັງຂ້າຄົນຢູ່ນັ້ນ ຂ້າພະເຈົ້າກໍຖືກປະໄວ້ໃຫ້ຢູ່ຄົນດຽວ, ຂ້າພະເຈົ້າກໍກົ້ມໜ້າລົງ, ຮ້ອງຂໍວ່າ, “ຂ້າແດ່ພຣະເຈົ້າຢາເວ ອົງເຈົ້າ! ອົງເຈົ້ານາຍ, ພຣະອົງຈະທຳລາຍຄົນທີ່ເຫລືອຢູ່ ໃນອິດສະຣາເອນໃຫ້ໝົດດ້ວຍຄວາມໂກດຮ້າຍທີ່ໄດ້ລະບາຍໃສ່ເຢຣູຊາເລັມຄັ້ງນີ້ບໍ?”
ພຣະອົງໄດ້ຕອບຂ້າພະເຈົ້າວ່າ, “ຄວາມບາບຂອງຄົນອິດສະຣາເອນ ແລະ ຢູດາແມ່ນໃຫຍ່ຫລາຍ; ແຜ່ນດິນເຕັມໄປດ້ວຍການນອງເລືອດ ແລະ ນະຄອນກໍເຕັມໄປດ້ວຍຄວາມອະຍຸຕິທຳ. ພວກເຂົາເວົ້າວ່າ, ‘ພຣະເຈົ້າຢາເວໄດ້ປະຖິ້ມດິນແດນນີ້ໄປແລ້ວ; ພຣະເຈົ້າຢາເວບໍ່ເຫັນດອກ’. ດັ່ງນັ້ນ ເຮົາຈະບໍ່ເບິ່ງພວກເຂົາດ້ວຍຄວາມສົງສານ ຫລື ໄວ້ຊີວິດພວກເຂົາ. ແຕ່ເຮົາຈະນຳເອົາສິ່ງທີ່ພວກເຂົາໄດ້ເຮັດໄວ້ນັ້ນຢ້ອນກັບມາຕົກໃສ່ພວກເຂົາເອງ”.
ແລ້ວຊາຍທີ່ນຸ່ງຫົ່ມຜ້າຝ້າຍລິນິນເນື້ອລະອຽດດີ ເຊິ່ງມີຫີບເຄື່ອງຂຽນຢູ່ຂ້າງກາຍນັ້ນກໍກັບມາຕອບລາຍງານວ່າ, “ຂ້ານ້ອຍໄດ້ເຮັດຕາມທີ່ພຣະອົງໄດ້ສັ່ງຮຽບຮ້ອຍແລ້ວ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.