Biblica® Open Lao Contemporary Version
ເອເຟໂຊ 1
ຈົດໝາຍສະບັບນີ້ຈາກເຮົາໂປໂລ, ຜູ້ເປັນອັກຄະສາວົກຄົນໜຶ່ງຂອງພຣະຄຣິດເຈົ້າເຢຊູຕາມຄວາມປະສົງຂອງພຣະເຈົ້າ,
ເຖິງບັນດາຄົນບໍລິສຸດຂອງພຣະເຈົ້າທີ່ເມືອງເອເຟໂຊ,1 ຜູ້ສັດຊື່ໃນພຣະຄຣິດເຈົ້າເຢຊູ.
ຂໍໃຫ້ພຣະຄຸນ ແລະ ສັນຕິສຸກທີ່ມາຈາກພຣະເຈົ້າພຣະບິດາຂອງພວກເຮົາ ແລະ ພຣະເຢຊູຄຣິດເຈົ້າອົງພຣະຜູ້ເປັນເຈົ້າ ຈົ່ງຢູ່ກັບພວກເຈົ້າທັງຫລາຍ.
ຄຳສັນລະເສີນສຳລັບພຣະພອນຝ່າຍພຣະວິນຍານໃນພຣະຄຣິດເຈົ້າ
ຂໍໃຫ້ຄຳສັນລະເສີນຈົ່ງມີແກ່ພຣະເຈົ້າຄືພຣະບິດາເຈົ້າຂອງພຣະເຢຊູຄຣິດເຈົ້າອົງພຣະຜູ້ເປັນເຈົ້າຂອງພວກເຮົາ, ຜູ້ໃຫ້ພອນໃນສະຫວັນສະຖານໃຫ້ແກ່ພວກເຮົາດ້ວຍພຣະພອນຝ່າຍວິນຍານທຸກຢ່າງໃນພຣະຄຣິດເຈົ້າ. ເພາະພຣະອົງໄດ້ເລືອກພວກເຮົາໄວ້ໃນພຣະອົງກ່ອນການສ້າງໂລກເພື່ອພວກເຮົາຈະບໍລິສຸດ ແລະ ບໍ່ມີຕຳໜິຕໍ່ສາຍຕາຂອງພຣະອົງ. ໃນຄວາມຮັກນັ້ນ ພຣະອົງ2ໄດ້ກຳນົດພວກເຮົາໄວ້ກ່ອນລ່ວງໜ້າທີ່ຈະຮັບພວກເຮົາເປັນລູກ3ຂອງພຣະອົງໂດຍຜ່ານທາງພຣະເຢຊູຄຣິດເຈົ້າ, ຕາມຄວາມພໍໃຈ ແລະ ຕາມຄວາມປະສົງຂອງພຣະອົງ ເພື່ອເປັນການສັນລະເສີນພຣະຄຸນຍິ່ງໃຫຍ່ຂອງພຣະອົງທີ່ພຣະອົງໄດ້ໃຫ້ແກ່ພວກເຮົາລ້າໆໃນພຣະອົງຜູ້ເປັນທີ່ຮັກຂອງພຣະເຈົ້າ. ໃນພຣະອົງນັ້ນ ພວກເຮົາໄດ້ຮັບການໄຖ່ດ້ວຍໂລຫິດຂອງພຣະອົງ, ຄືໄດ້ຮັບການອະໄພໂທດບາບຕາມພຣະຄຸນອັນອຸດົມຂອງພຣະເຈົ້າ ເຊິ່ງພຣະອົງໄດ້ໃຫ້ແກ່ພວກເຮົາຢ່າງເຫລືອລົ້ນ. ດ້ວຍສະຕິປັນຍາ ແລະ ຄວາມເຂົ້າໃຈທັງປວງ, ພຣະອົງ4ເຮັດໃຫ້ພວກເຮົາຮູ້ຈັກຄວາມປະສົງອັນລ້ຳເລິກຂອງພຣະອົງຕາມຄວາມພໍໃຈພຣະອົງ, ເຊິ່ງພຣະອົງໄດ້ກຳນົດໄວ້ໃນພຣະຄຣິດເຈົ້າ, ເພື່ອໃຫ້ເກີດຜົນເມື່ອເຖິງເວລາກຳນົດມາເຖິງ ເພື່ອນຳເອົາທຸກສິ່ງໃນສະຫວັນ ແລະ ເທິງແຜ່ນດິນໂລກເຂົ້າເປັນອັນໜຶ່ງອັນດຽວກັນພາຍໃຕ້ພຣະຄຣິດເຈົ້າ.
ໃນພຣະອົງນັ້ນ ພວກເຮົາກໍໄດ້ຮັບການເລືອກ5ເໝືອນກັນ, ຖືກກຳນົດໄວ້ລ່ວງໜ້າຕາມແຜນການຂອງພຣະອົງຜູ້ເຮັດໃຫ້ທຸກສິ່ງເປັນໄປຕາມຈຸດມຸ່ງໝາຍຂອງຄວາມປະສົງຂອງພຣະອົງ, ເພື່ອພວກເຮົາທີ່ເປັນຜູ້ທຳອິດທີ່ມອບຄວາມຫວັງຂອງພວກເຮົາໄວ້ໃນພຣະຄຣິດເຈົ້າ, ຈະໄດ້ສັນລະເສີນສະຫງ່າລາສີຂອງພຣະອົງ. ແລະ ພວກເຈົ້າກໍໄດ້ຮ່ວມຢູ່ໃນພຣະຄຣິດເຈົ້າເໝືອນກັນເມື່ອພວກເຈົ້າໄດ້ຍິນພຣະຄຳແຫ່ງຄວາມຈິງ, ຄືຂ່າວປະເສີດແຫ່ງຄວາມພົ້ນຂອງພວກເຈົ້າ. ເມື່ອພວກເຈົ້າໄດ້ເຊື່ອ ພວກເຈົ້າກໍໄດ້ຖືກໝາຍໄວ້ໃນພຣະອົງດ້ວຍຕາປະທັບ, ຄືພຣະວິນຍານບໍລິສຸດເຈົ້າທີ່ໄດ້ສັນຍາໄວ້, ຜູ້ເປັນມັດຈຳຄ້ຳປະກັນມໍລະດົກຂອງພວກເຮົາຈົນກວ່າຄົນຂອງພຣະເຈົ້າຈະໄດ້ຮັບການໄຖ່ ເພື່ອເປັນການສັນລະເສີນສະຫງ່າລາສີຂອງພຣະອົງ.
ການໂມທະນາຂອບພຣະຄຸນ ແລະ ຄຳອະທິຖານ
ເພາະເຫດຜົນນີ້, ຕັ້ງແຕ່ເຮົາໄດ້ຍິນເຖິງຄວາມເຊື່ອຂອງພວກເຈົ້າໃນພຣະເຢຊູເຈົ້າອົງພຣະຜູ້ເປັນເຈົ້າ ແລະ ຄວາມຮັກຂອງພວກເຈົ້າທີ່ມີຕໍ່ຄົນຂອງພຣະເຈົ້າທຸກຄົນແລ້ວ, ເຮົາຈຶ່ງໂມທະນາຂອບພຣະຄຸນພຣະເຈົ້າສຳລັບພວກເຈົ້າຢ່າງບໍ່ຢຸດຢັ້ງ ແລະ ໄດ້ລະນຶກເຖິງພວກເຈົ້າໃນຄຳອະທິຖານຂອງເຮົາ. ເຮົາໝັ່ນຂໍໃຫ້ພຣະເຈົ້າຂອງພຣະເຢຊູຄຣິດເຈົ້າອົງພຣະຜູ້ເປັນເຈົ້າຂອງພວກເຮົາ ຄືພຣະບິດາເຈົ້າຜູ້ເຕັມດ້ວຍສະຫງ່າລາສີ ໄດ້ໃຫ້ພວກເຈົ້າທັງຫລາຍມີພຣະວິນຍານ6ແຫ່ງສະຕິປັນຍາ ແລະ ການເປີດເຜີຍ, ເພື່ອວ່າພວກເຈົ້າຈະຮູ້ຈັກພຣະອົງຫລາຍຂຶ້ນ. ເຮົາອະທິຖານໃຫ້ຕາໃຈຂອງພວກເຈົ້າສະຫວ່າງຂຶ້ນ ເພື່ອພວກເຈົ້າຈະໄດ້ຮູ້ເຖິງຄວາມຫວັງທີ່ພຣະອົງໄດ້ເອີ້ນພວກເຈົ້ານັ້ນ ຄືຮູ້ເຖິງຄວາມຮັ່ງມີແຫ່ງມໍລະດົກອັນຮຸ່ງເຮືອງຂອງພຣະອົງໃນຄົນບໍລິສຸດຂອງພຣະອົງ, ແລະ ຮູ້ເຖິງລິດອຳນາດອັນຍິ່ງໃຫຍ່ທີ່ຫາສິ່ງໃດປຽບທຽບບໍ່ໄດ້ສຳລັບພວກເຮົາຜູ້ທີ່ເຊື່ອ. ລິດອຳນາດນັ້ນເປັນເໝືອນກັບພະລັງອັນຍິ່ງໃຫຍ່ຂອງພຣະອົງ ເຊິ່ງພຣະອົງໄດ້ກະທຳໃນພຣະຄຣິດເຈົ້າເມື່ອເວລາທີ່ບັນດານໃຫ້ພຣະຄຣິດເຈົ້າເປັນຄືນມາຈາກຕາຍ ແລະ ໃຫ້ນັ່ງຢູ່ເບື້ອງຂວາມືຂອງພຣະອົງໃນສະຫວັນສະຖານ, ສູງກວ່າຜູ້ປົກຄອງ ແລະ ຜູ້ມີສິດອຳນາດທັງໝົດ, ຜູ້ມີລິດອຳນາດ ແລະ ຜູ້ມີອານຸພາບ ແລະ ເໜືອທຸກນາມທີ່ຖືກເອີ່ຍຂຶ້ນ, ບໍ່ພຽງແຕ່ໃນຍຸກປັດຈຸບັນເທົ່ານັ້ນ ແຕ່ໃນຍຸກທີ່ຈະມາເຖິງດ້ວຍ. ແລະ ພຣະເຈົ້າໄດ້ວາງສິ່ງທັງປວງລົງໃຕ້ຕີນຂອງພຣະຄຣິດເຈົ້າ ແລະ ໄດ້ຕັ້ງພຣະອົງໄວ້ເປັນຫົວເໜືອທຸກສິ່ງເພື່ອຄຣິສຕະຈັກ, ເຊິ່ງເປັນຮ່າງກາຍຂອງພຣະອົງທີ່ເຕັມບໍລິບູນດ້ວຍພຣະອົງຜູ້ໃຫ້ທຸກສິ່ງເຕັມບໍລິບູນໃນທຸກທາງ.
Source notes (6)
- Footnote ເອກະສານເກົ່າທີ່ຂຽນດ້ວຍມືໃນຍຸກທຳອິດບາງສະບັບບໍ່ມີຂໍ້ຄວາມວ່າ ທີ່ເມືອງເອເຟໂຊ
- Footnote ຫລື ສາຍຕາຂອງພຣະອົງດ້ວຍຄວາມຮັກ. 5 ພຣະອົງ
- Footnote ໃນພາສາກຣີກສຳລັບ ການຮັບເອົາລູກລ້ຽງມາ ເປັນລູກນັ້ນເປັນຄຳສັບທາງກົດໝາຍທີ່ອ້າງອີງໃສ່ສະຖານະພາບທາງກົດໝາຍທີ່ສົມບູນແບບຂອງການຮັບເອົາຜູ້ສືບມໍລະດົກທີ່ເປັນເພດຊາຍຕາມວັດທະນະທຳຂອງໂຣມ.
- Footnote ຫລື ຢ່າງເຫລືອລົ້ນ. ດ້ວຍສະຕິປັນຍາ ແລະ ຄວາມເຂົ້າໃຈທັງປວງ. 9 ແລະ ພຣະອົງ
- Footnote ຫລື ໃຫ້ເປັນທາຍາດ
- Footnote ຫລື ພວກເຈົ້າ ມີວິນຍານ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.