Biblica® Open Lao Contemporary Version
ປັນຍາຈານ 9
ປາຍທາງຮ່ວມກັນຂອງທຸກຄົນ
ດັ່ງນັ້ນ ຂ້າພະເຈົ້າຈຶ່ງໄດ້ຄິດຕຶກຕອງສິ່ງທັງໝົດນີ້ ແລະ ສະຫລຸບໄດ້ວ່າ ທັງຄົນຊອບທຳກັບຄົນສະຫລາດ ແລະ ການກະທຳຂອງພວກເຂົາແມ່ນລ້ວນແຕ່ຢູ່ໃນມືຂອງພຣະເຈົ້າ, ແຕ່ບໍ່ມີຜູ້ໃດຮູ້ວ່າຄວາມຮັກ ຫລື ຄວາມກຽດຊັງລໍຖ້າພວກເຂົາຢູ່. ທຸກຄົນມີຈຸດໝາຍປາຍທາງດຽວກັນ ບໍ່ວ່າຄົນຊອບທຳ ຫລື ຄົນຊົ່ວ, ຄົນດີ ຫລື ຄົນບໍ່ດີ,1 ຄົນບໍ່ເປັນມົນທິນ ຫລື ຄົນເປັນມົນທິນ, ຄົນຖວາຍເຄື່ອງບູຊາ ແລະ ຄົນບໍ່ຖວາຍ.
ສິ່ງທີ່ເກີດຂຶ້ນກັບຄົນດີສັນໃດ
ກໍເກີດຂຶ້ນກັບຄົນບາບສັນນັ້ນ;
ສິ່ງທີ່ເກີດຂຶ້ນກັບຄົນທີ່ກ່າວຄຳສາບານສັນໃດ
ກໍເກີດຂຶ້ນກັບຄົນທີ່ຢ້ານທີ່ຈະສາບານສັນນັ້ນ.
ນີ້ເປັນສິ່ງຊົ່ວຮ້າຍໃນທຸກສິ່ງທີ່ເກີດຂຶ້ນພາຍໃຕ້ດວງຕາເວັນຄື: ທຸກຄົນມີປາຍທາງດຽວກັນ. ຫລາຍກວ່ານັ້ນ, ຈິດໃຈຂອງຄົນທັງຫລາຍແມ່ນເຕັມໄປດ້ວຍຄວາມຊົ່ວຮ້າຍ ແລະ ຄວາມບ້າຕະຫລອດຊີວິດຂອງຕົນ ແລະ ຫລັງຈາກນັ້ນ ພວກເຂົາກໍຕາຍຕາມຄົນອື່ນໄປ. ມີຄວາມຫວັງສຳລັບຄົນເປັນເທົ່ານັ້ນ2 ແມ່ນແຕ່ໝາເປັນໆ ກໍຍັງດີກວ່າໂຕສິງທີ່ຕາຍແລ້ວ!
ເພາະຄົນເປັນຮູ້ວ່າຕົນຈະຕ້ອງຕາຍ,
ແຕ່ຄົນຕາຍບໍ່ຮູ້ອັນໃດເລີຍ;
ພວກເຂົາບໍ່ມີລາງວັນຕໍ່ໄປ,
ແລະ ແມ່ນແຕ່ຊື່ຂອງພວກເຂົາກໍຖືກລືມ.
ຄວາມຮັກຂອງພວກເຂົາ, ຄວາມກຽດຊັງຂອງພວກເຂົາ
ແລະ ຄວາມອິດສາຂອງພວກເຂົາໄດ້ຜ່ານພົ້ນໄປແຕ່ດົນນານ;
ພວກເຂົາຈະບໍ່ມີສ່ວນຮ່ວມກັບສິ່ງໃດໆ
ທີ່ເກີດຂຶ້ນພາຍໃຕ້ດວງຕາເວັນອີກ.
ດັ່ງນັ້ນ ຈົ່ງໄປ, ກິນອາຫານຂອງເຈົ້າດ້ວຍຄວາມຍິນດີ ແລະ ດື່ມເຫລົ້າອະງຸ່ນຂອງເຈົ້າດ້ວຍໃຈຊື່ນຊົມຍິນດີ, ເພາະພຣະເຈົ້າອະນຸຍາດສິ່ງທີ່ເຈົ້າເຮັດແລ້ວ. ຈົ່ງນຸ່ງເຄື່ອງນຸ່ງສີຂາວສະເໝີ ແລະ ທາຫົວຂອງເຈົ້າດ້ວຍນ້ຳມັນ. ຈົ່ງມີຄວາມສຸກກັບເມຍທີ່ເຈົ້າຮັກ ຕະຫລອດວັນແຫ່ງຊີວິດອະນິຈັງ ເຊິ່ງພຣະເຈົ້າໄດ້ໃຫ້ແກ່ເຈົ້າພາຍໃຕ້ດວງຕາເວັນ. ເພາະນີ້ຄືສ່ວນໃນຊີວິດຂອງເຈົ້າ ແລະ ໃນການເຮັດວຽກໜັກພາຍໃຕ້ດວງຕາເວັນຂອງເຈົ້າ. ມືຂອງເຈົ້າເຮັດອັນໃດກໍຕາມ ກໍຈົ່ງເຮັດສິ່ງນັ້ນຢ່າງເຕັມກຳລັງຂອງເຈົ້າ, ເພາະໃນແດນຄົນຕາຍທີ່ເຈົ້າກຳລັງຈະໄປນັ້ນ, ບໍ່ມີການງານ ຫລື ການວາງແຜນ ບໍ່ມີຄວາມຮູ້ ຫລື ສະຕິປັນຍາ.
ຂ້າພະເຈົ້າໄດ້ເຫັນສິ່ງອື່ນອີກພາຍໃຕ້ດວງຕາເວັນຄື:
ຄົນວ່ອງໄວບໍ່ຊະນະການແລ່ນແຂ່ງກັນສະເໝີໄປ
ຄົນແຂງແຮງບໍ່ຊະນະເສິກສະເໝີໄປ,
ຫລື ບໍ່ແມ່ນວ່າຄົນສະຫລາດຈະໄດ້ອາຫານ
ຫລື ບໍ່ແມ່ນວ່າຊັບສົມບັດຈະເປັນຂອງຄົນທີ່ຍອດຢ້ຽມ
ຫລື ບໍ່ແມ່ນວ່າຜູ້ຮູ້ຈະໄດ້ຮັບຄວາມພໍໃຈ;
ແຕ່ເວລາ ແລະ ໂອກາດມາເຖິງພວກເຂົາທຸກຄົນ.
ຫລາຍກວ່ານັ້ນ, ບໍ່ມີຜູ້ໃດຮູ້ວ່າເວລາຂອງຕົນຈະມາເຖິງເມື່ອໃດ:
ເໝືອນປາທີ່ຕິດຢູ່ໃນມອງ,
ຫລື ນົກທີ່ຕິດຢູ່ໃນບ້ວງແຮ້ວ,
ດັ່ງນັ້ນ ຄົນທັງຫລາຍກໍຕິດກັບດັກຊ່ວງເວລາແຫ່ງຄວາມຊົ່ວຮ້າຍ.
ທີ່ຕົກໃສ່ພວກເຂົາໂດຍບໍ່ຄາດຄິດ.
ສະຕິປັນຍາດີກວ່າຄວາມໂງ່ຈ້າ
ຂ້າພະເຈົ້າຍັງໄດ້ເຫັນຕົວຢ່າງຂອງສະຕິປັນຍາພາຍໃຕ້ດວງຕາເວັນ ເຊິ່ງຂ້າພະເຈົ້າປະທັບໃຈຫລາຍ ຄືມີເມືອງນ້ອຍໆແຫ່ງໜຶ່ງທີ່ມີຄົນອາໄສຢູ່ໜ້ອຍດຽວ. ແລ້ວກໍມີກະສັດຜູ້ມີອໍານາດຄົນໜຶ່ງໄດ້ມາໂຈມຕີເມືອງນີ້, ອ້ອມເມືອງນັ້ນໄວ້ ແລະ ສ້າງກຳແພງໃຫຍ່ອ້ອມຮອບເມືອງໄວ້. ໃນເມືອງນັ້ນມີຊາຍທຸກຍາກຄົນໜຶ່ງແຕ່ສະຫລາດ ແລະ ລາວໄດ້ຊ່ວຍເມືອງນັ້ນໄວ້ດ້ວຍສະຕິປັນຍາຂອງລາວ, ແຕ່ບໍ່ມີຜູ້ໃດລະນຶກເຖິງຊາຍທຸກຍາກຄົນນັ້ນ. ດັ່ງນັ້ນ ຂ້າພະເຈົ້າຈຶ່ງເວົ້າວ່າ, “ສະຕິປັນຍາແມ່ນດີກວ່າກຳລັງ”. ແຕ່ສະຕິປັນຍາຂອງຊາຍທຸກຍາກກໍຖືກດູຖູກ ແລະ ຄຳເວົ້າຂອງລາວກໍບໍ່ມີຜູ້ໃດຮັບຟັງ.
ຖ້ອຍຄຳເບົາໆຂອງຄົນສະຫລາດກໍໜ້າຟັງ
ຫລາຍກວ່າສຽງຮ້ອງຂອງຜູ້ປົກຄອງຂອງຄົນໂງ່ຈ້າ.
ສະຕິປັນຍາແມ່ນເໜືອກວ່າອາວຸດສົງຄາມ,
ແຕ່ຄົນບາບຄົນດຽວກໍທຳລາຍຄົນດີຈຳນວນຫລວງຫລາຍ.
Source notes (2)
- Footnote ພາສາເຮັບເຣີບໍ່ມີຄຳວ່າ ຫລື ຄົນບໍ່ດີ
- Footnote ຫລື ແລ້ວຈະເລືອກອັນໃດ? ຜູ້ມີຊີວິດທັງໝົດຍັງມີຫວັງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.