Biblica® Open Lao Contemporary Version
ປັນຍາຈານ 8
ຄົນໃດທີ່ເປັນເໝືອນຄົນສະຫລາດ?
ຄົນໃດທີ່ຮູ້ຄຳອະທິບາຍຂອງສິ່ງຕ່າງໆ?
ສະຕິປັນຍາຂອງຄົນເຮັດໃຫ້ໜ້າຕາຂອງຕົນເຮົາແຈ່ມໃສ
ແລະ ເຮັດໃຫ້ສີໜ້າແຂງກະດ້າງປ່ຽນໄປ.
ເຊື່ອຟັງກະສັດ
ຈົ່ງເຊື່ອຟັງຄໍາສັ່ງຂອງກະສັດ, ເພາະເຈົ້າໄດ້ປະຕິຍານໄວ້ຕໍ່ໜ້າພຣະເຈົ້າ. ຢ່າຟ້າວອອກໄປໃຫ້ພົ້ນໜ້າກະສັດ. ຢ່າຢືນການປົກປ້ອງສິ່ງທີ່ບໍ່ດີ, ເພາະກະສັດຈະເຮັດສິ່ງໃດກໍໄດ້ຕາມຄວາມພໍໃຈຂອງເພິ່ນ. ເນື່ອງຈາກຄໍາເວົ້າຂອງກະສັດມີອຳນາດສູງສຸດ, ຜູ້ໃດຈະກ້າເວົ້າກັບເພິ່ນວ່າ, “ທ່ານກໍາລັງເຮັດຫຍັງ?”
ຜູ້ໃດກໍຕາມຟັງຄຳສັ່ງຂອງກະສັດຈະບໍ່ພົບອັນຕະລາຍ,
ແລະ ຈິດໃຈຂອງຄົນມີປັນຍາຍ່ອມຮູ້ຈັກເວລາ ແລະ ວິທີທີ່ເໝາະສົມ.
ເພາະມີເວລາ ແລະ ວິທີທີ່ເໝາະສົມສຳລັບທຸກສິ່ງ,
ເຖິງວ່າຄົນໜຶ່ງຈະຈົມຢູ່ກັບຄວາມທຸກຍາກຢ່າງໜັກໜ່ວງກໍຕາມ.
ເນື່ອງຈາກບໍ່ມີຜູ້ໃດຮູ້ຈັກອະນາຄົດ,
ຜູ້ໃດສາມາດບອກໄດ້ວ່າຈະມີອັນໃດເກີດຂຶ້ນ?
ບໍ່ມີຜູ້ໃດມີອໍານາດເໜືອລົມທີ່ຈະຄວບຄຸມລົມໄດ້ສັນໃດ,
ດັ່ງນັ້ນ1 ຈຶ່ງບໍ່ມີຜູ້ໃດມີອຳນາດເໜືອວັນຕາຍຂອງຕົນສັນນັ້ນ.
ຍາມສົງຄາມຈະບໍ່ມີຜູ້ໃດປົດປະຈຳການສັນໃດ
ຄວາມຊົ່ວຮ້າຍກໍຈະບໍ່ຍອມປ່ອຍຄົນຊົ່ວສັນນັ້ນ.
ຂ້າພະເຈົ້າໄດ້ເຫັນມາໝົດແລ້ວ, ເມື່ອຂ້າພະເຈົ້າໃສ່ໃຈກັບທຸກສິ່ງທີ່ໄດ້ພາກັນເຮັດພາຍໃຕ້ດວງຕາເວັນ. ກໍພົບວ່າມີບາງເທື່ອເມື່ອຄົນຂຶ້ນມີອຳນາດເໜືອຄົນອື່ນ ແຕ່ກັບເປັນໄພແກ່ຕົນເອງ.2 ຫລັງຈາກນັ້ນ ແລ້ວຂ້າພະເຈົ້າກໍໄດ້ເຫັນບັນດາຄົນຊົ່ວຮ້າຍຖືກຝັງ ຄືບັນດາຄົນທີ່ເຂົ້າອອກໃນສະຖານບໍລິສຸດ ແລະ ໄດ້ຮັບການຍົກຍ້ອງ3ໃນເມືອງທີ່ພວກເຂົາໄດ້ເຮັດຊົ່ວນັ້ນ. ນີ້ກໍອະນິຈັງ.
ເມື່ອອາຊະຍາກອນຍັງບໍ່ໄດ້ຖືກຕັດສິນລົງໂທດຢ່າງໄວວາ, ຈິດໃຈຂອງຄົນທັງຫລາຍກໍເຕັມໄປດ້ວຍກົນອຸບາຍທີ່ຈະເຮັດຜິດ. ເຖິງແມ່ນວ່າຄົນຊົ່ວຈະກໍ່ອາຊະຍາກຳເປັນຮ້ອຍຄັ້ງອາດມີຊີວິດຢູ່ຍືນຍາວ, ຂ້າພະເຈົ້າຮູ້ແນ່ນອນວ່າບັນດາຜູ້ທີ່ຢຳເກງພຣະເຈົ້າທີ່ຢູ່ຕໍ່ໜ້າພຣະອົງຍ່ອມໄດ້ດີກວ່າ. ເນື່ອງຈາກຄົນຊົ່ວບໍ່ຢຳເກງພຣະເຈົ້າ, ພວກເຂົາກໍຈະບໍ່ໄດ້ດີ ແລະ ວັນຄືນຂອງພວກເຂົາກໍຈະບໍ່ຍືນຍາວເໝືອນເງົາ.
ມີສິ່ງອະນິຈັງອີກຢ່າງທີ່ເກີດຂຶ້ນໃນໂລກນີ້ຄື: ຄົນຊອບທຳໄດ້ຮັບຜົນທີ່ຄົນຊົ່ວສົມຄວນໄດ້ຮັບ. ແຕ່ຄົນຊົ່ວກັບໄດ້ຮັບຜົນທີ່ຄົນຊອບທຳສົມຄວນໄດ້ຮັບ. ຂ້າພະເຈົ້າກ່າວວ່າ, ນີ້ກໍອະນິຈັງ. ດັ່ງນັ້ນ ຂ້າພະເຈົ້າຈຶ່ງສະໜັບສະໜູນໃຫ້ມ່ວນຊື່ນກັບຊີວິດ, ເພາະສຳລັບມະນຸດທີ່ຢູ່ພາຍໃຕ້ດວງຕາເວັນແລ້ວ ບໍ່ມີອັນໃດດີໄປກວ່າການກິນກັບການດື່ມ ແລະ ຍິນດີ. ດັ່ງນັ້ນ ຄວາມຊື່ນຊົມຍິນດີຈະຢູ່ຄຽງຂ້າງພວກເຂົາໄປໃນການງານເຮັດວຽກໜັກຂອງພວກເຂົາຕະຫລອດວັນຄືນແຫ່ງຊີວິດ ເຊິ່ງພຣະເຈົ້າໄດ້ມອບໃຫ້ແກ່ພວກເຂົາພາຍໃຕ້ດວງຕາເວັນ.
ເມື່ອຂ້າພະເຈົ້າໃສ່ໃຈທີ່ຈະຮູ້ຈັກສະຕິປັນຍາ ແລະ ສັງເກດງານຕ່າງໆທີ່ເຮັດໃນໂລກນີ້ ຄົນທັງຫລາຍອົດນອນທັງເວັນທັງຄືນ ແລ້ວຂ້າພະເຈົ້າກໍເຫັນທຸກສິ່ງທີ່ພຣະເຈົ້າໄດ້ເຮັດ. ບໍ່ມີຜູ້ໃດເຂົ້າໃຈສິ່ງທີ່ເປັນໄປພາຍໃຕ້ດວງຕາເວັນ. ເຖິງແມ່ນວ່າຈະສະແຫວງຫາດ້ວຍຄວາມພາກພຽນທັງໝົດ, ແຕ່ກໍບໍ່ມີຜູ້ໃດພົບຄວາມໝາຍ. ເຖິງແມ່ນວ່າຄົນສະຫລາດອ້າງວ່າຕົນຮູ້, ພວກເຂົາກໍຍັງບໍ່ໄດ້ເຂົ້າໃຈຢ່າງແທ້ຈິງ.
Source notes (3)
- Footnote ຫລື ຮັກສາຈິດວິນຍານຂອງມະນຸດ ແລະ ກໍ
- Footnote ຫລື ພວກເຂົາ
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ແລະ ຖືກລືມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.