Biblica® Open Lao Contemporary Version
ປັນຍາຈານ 3
ມີເວລາສຳລັບທຸກສິ່ງ
ມີເວລາສຳລັບທຸກສິ່ງ
ແລະ ມີລະດູການສໍາລັບກິດຈະກໍາທຸກຢ່າງພາຍໃຕ້ຟ້າສະຫວັນນີ້.
ມີເວລາເກີດ ແລະ ມີເວລາຕາຍ,
ມີເວລາປູກ ແລະ ມີເວລາຖອນ,
ມີເວລາຂ້າ ແລະ ມີເວລາຢຽວຢາຮັກສາ,
ມີເວລາສໍາລັບຮື້ຖອນ ແລະ ມີເວລາສ້າງຂຶ້ນ,
ມີເວລາຮ້ອງໄຫ້ ແລະ ມີເວລາຫົວຂັວນ,
ມີເວລາໄວ້ທຸກ ແລະ ມີເວລາຟ້ອນລຳ,
ມີເວລາກະຈາຍກ້ອນຫີນ ແລະ ມີເວລາຮວບຮວມກ້ອນຫີນ,
ມີເວລາໂອບກອດ ແລະ ມີເວລາບໍ່ໂອບກອດ,
ມີເວລາສະແຫວງຫາ ແລະ ມີເວລາເລີກລາ,
ມີເວລາທະນຸຖະໜອມ ແລະ ມີເວລາຖິ້ມໄປ,
ມີເວລາຈີກຂາດ ແລະ ມີເວລາຫຍິບ,
ມີເວລາມິດງຽບ ແລະ ມີເວລາເວົ້າ,
ມີເວລາຮັກ ແລະ ມີເວລາກຽດຊັງ,
ມີເວລາສົງຄາມ ແລະ ມີເວລາສັນຕິ.
ຄົນເຮັດວຽກໄດ້ຫຍັງຈາກການເຮັດວຽກໜັກ? ຂ້າພະເຈົ້າໄດ້ເຫັນພາລະທີ່ພຣະເຈົ້າວາງໃຫ້ມະນຸດ. ພຣະອົງໄດ້ເຮັດໃຫ້ທຸກສິ່ງງົດງາມຕາມເວລາຂອງມັນ. ພຣະອົງຍັງໄດ້ວາງນິລັນການໄວ້ໃນໃຈຂອງມະນຸດ; ເຖິງປານນັ້ນ ມະນຸດກໍບໍ່ສາມາດຢັ່ງຮູ້ເຖິງສິ່ງທີ່ພຣະເຈົ້າໄດ້ເຮັດຕັ້ງແຕ່ຕົ້ນຈົນຈົບໄດ້. ຂ້າພະເຈົ້າຮູ້ວ່າສຳລັບຄົນບໍ່ມີຫຍັງດີໄປກວ່າການມີຄວາມສຸກ ແລະ ເຮັດຄວາມດີຂະນະທີ່ຍັງມີຊີວິດຢູ່. ແຕ່ລະຄົນຈະໄດ້ກິນກັບດື່ມ ແລະ ພໍໃຈໃນການເຮັດວຽກຢ່າງໜັກໜ່ວງຂອງຕົນ ເພາະນີ້ເປັນຂອງຂວັນຈາກພຣະເຈົ້າ. ຂ້າພະເຈົ້າຮູ້ວ່າທຸກສິ່ງທີ່ພຣະເຈົ້າເຮັດຈະດຳລົງຢູ່ຕະຫລອດໄປ; ບໍ່ສາມາດເພີ່ມເຕີມອັນໃດເຂົ້າໄປ ຫລື ຕັດອັນໃດອອກໄດ້. ພຣະເຈົ້າເຮັດເພື່ອຄົນທັງຫລາຍຢຳເກງພຣະອົງ.
ອັນໃດກໍຕາມທີ່ເປັນຢູ່ ແລະ ອັນໃດທີ່ຈະເກີດຂຶ້ນ
ກໍເປັນຢູ່ມາກ່ອນແລ້ວ;
ແລະ ພຣະເຈົ້າຈະນຳອະດີດມາພິພາກສາອີກ.1
ແລະ ຫລາຍກວ່ານັ້ນ ພາຍໃຕ້ດວງຕາເວັນ ຂ້າພະເຈົ້າຍັງໄດ້ເຫັນອີກວ່າ:
ໃນສະຖານທີ່ແຫ່ງການພິພາກສາ ກໍມີຄວາມຊົ່ວຮ້າຍຢູ່ນຳ,
ໃນສະຖານທີ່ແຫ່ງຄວາມຍຸຕິທຳ ກໍມີຄວາມຊົ່ວຮ້າຍຢູ່ນໍາ.
ຂ້າພະເຈົ້າໄດ້ເວົ້າກັບຕົນເອງວ່າ,
“ພຣະເຈົ້າຈະພິພາກສາ
ທັງຄົນຊອບທຳ ແລະ ຄົນຊົ່ວ,
ເພາະຈະມີເວລາສຳລັບທຸກເລື່ອງ,
ມີເວລາສຳລັບພິພາກສາການກະທຳທຸກຢ່າງ”.
ຂ້າພະເຈົ້າໄດ້ເວົ້າກັບຕົນເອງອີກວ່າ, “ສຳລັບມະນຸດ, ພຣະເຈົ້າທົດສອບພວກເຂົາ ເພື່ອພວກເຂົາຈະເຫັນວ່າຕົນເອງເປັນເໝືອນສັດ. ຊະຕາກຳຂອງມະນຸດກໍເໝືອນຂອງສັດຢ່າງແນ່ນອນ; ທັງສອງມີຊາຕາກໍາກັນຄື: ຝ່າຍໜຶ່ງຕາຍ, ອີກຝ່າຍກໍຕ້ອງຕາຍເໝືອນກັນ. ຕ່າງກໍມີລົມຫາຍໃຈ2ເໝືອນກັນ; ມະນຸດບໍ່ໄດ້ປຽບຫລາຍກວ່າສັດ. ທຸກສິ່ງລ້ວນອະນິຈັງ. ທັງສອງກໍໄປບ່ອນດຽວກັນ; ທັງສອງມາຈາກດິນ ແລະ ຕ້ອງກັບຄືນສູ່ດິນ. ຜູ້ໃດຈະຮູ້ໄດ້ວ່າຈິດວິນຍານຂອງມະນຸດຈະຂຶ້ນສູ່ເບື້ອງເທິງ ແລະ ວິນຍານຂອງສັດ3ຈະລົງສູ່ໂລກເບື້ອງລຸ່ມ?”
ດັ່ງນັ້ນ ຂ້າພະເຈົ້າຈຶ່ງເຫັນວ່າບໍ່ມີອັນໃດດີໄປກວ່າຄົນໄດ້ມ່ວນຊື່ນຢູ່ກັບງານຂອງຕົນ, ເພາະນັ້ນເປັນສ່ວນຂອງພວກເຂົາ. ເພາະວ່າຜູ້ໃດຈະເຮັດໃຫ້ພວກເຂົາເຫັນໄດ້ວ່າຈະເກີດຫຍັງຂຶ້ນຫລັງຈາກພວກເຂົາໄດ້?
Source notes (3)
- Footnote ຫລື ພຣະເຈົ້າຈະເອີ້ນອະດີດໃຫ້ກັບຄືນມາອີກ
- Footnote ຫລື ວິນຍານ
- Footnote ຫລື ຜູ້ໃດຈະຮູ້ຈັກຈິດວິນຍານຂອງມະນຸດທີ່ຂຶ້ນສູ່ເບື້ອງເທິງ ຫລື ວິນຍານຂອງສັດທີ່
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.