Biblica® Open Lao Contemporary Version
ພຣະບັນຍັດສອງ 7
ການຂັບໄລ່ຊົນຊາດຕ່າງໆອອກໄປ
ເມື່ອພຣະເຈົ້າຢາເວ ພຣະເຈົ້າຂອງພວກເຈົ້າໄດ້ນຳພາພວກເຈົ້າເຂົ້າສູ່ດິນແດນທີ່ພວກເຈົ້າກຳລັງເຂົ້າໄປຄອບຄອງ ແລະ ຂັບໄລ່ຊົນຊາດຕ່າງໆອອກໄປຕໍ່ໜ້າພວກເຈົ້າຄື ຊາວຮິດຕີ ຊາວກີກາຊີ ຊາວອາໂມ, ຊາວການາອານ, ຊາວເປຣີຊີ, ຊາວຮີວີ ແລະ ຊາວເຢບຸດ, ເຈັດຊົນຊາດທີ່ໃຫຍ່ ແລະ ເຂັ້ມແຂງກວ່າພວກເຈົ້າ ແລະ ເມື່ອພຣະເຈົ້າຢາເວ ພຣະເຈົ້າຂອງພວກເຈົ້າໄດ້ມອບພວກເຂົາໃຫ້ແກ່ພວກເຈົ້າ ແລະ ພວກເຈົ້າໄດ້ເອົາຊະນະພວກເຂົາໄດ້ແລ້ວ, ຫລັງຈາກນັ້ນ ພວກເຈົ້າຕ້ອງທຳລາຍລ້າງ1ພວກເຂົາໃຫ້ໝົດສິ້ນ. ຢ່າເຮັດສົນທິສັນຍາກັບພວກເຂົາ ແລະ ຢ່າສະແດງຄວາມເມດຕາຕໍ່ພວກເຂົາ. ຢ່າແຕ່ງງານຂ້າມເຊື້ອຊາດກັບພວກເຂົາ. ຢ່າໃຫ້ລູກຫລານຂອງພວກເຈົ້າບໍ່ວ່າຊາຍ ຫລື ຍິງແຕ່ງງານກັບລູກຫລານຂອງພວກເຂົາ. ເພາະພວກເຂົາຈະເຮັດໃຫ້ລູກຫລານຂອງພວກເຈົ້າຫັນໜີຈາກການຕິດຕາມເຮົາເພື່ອໄປຮັບໃຊ້ພະອື່ນໆ, ແລ້ວຄວາມໂກດຮ້າຍຂອງພຣະເຈົ້າຢາເວກໍຈະເຜົາຜານທຳລາຍພວກເຈົ້າຢ່າງວ່ອງໄວ. ຈົ່ງເຮັດຢ່າງນີ້ກັບພວກເຂົາຄື: ຮື້ແທ່ນບູຊາຂອງພວກເຂົາຖິ້ມ, ທຸບຫີນສັກສິດຖິ້ມ, ຕັດເສົາ2ເຈົ້າແມ່ອາເຊຣາລົງ ແລະ ເຜົາຮູບເຄົາລົບຂອງພວກເຂົາຖິ້ມ. ເພາະພວກເຈົ້າເປັນປະຊາຊົນບໍລິສຸດແກ່ພຣະເຈົ້າຢາເວ ພຣະເຈົ້າຂອງພວກເຈົ້າ. ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ເລືອກພວກເຈົ້າອອກມາຈາກປະຊາຊາດທັງໝົດເທິງແຜ່ນດິນໂລກໃຫ້ເປັນປະຊາຊົນຂອງພຣະອົງ, ເປັນກຳມະສິດອັນລ້ຳຄ່າຂອງພຣະອົງ.
ພຣະເຈົ້າຢາເວໄດ້ເລືອກພວກເຈົ້າ ແລະ ຮັກພວກເຈົ້າ ບໍ່ແມ່ນເພາະພວກເຈົ້າມີຈຳນວນຫລາຍກວ່າຊົນຊາດອື່ນໆ, ແທ້ຈິງແລ້ວພວກເຈົ້າເປັນຊົນຊາດທີ່ນ້ອຍທີ່ສຸດຂອງບັນດາຊົນຊາດທັງໝົດ. ແຕ່ເພາະພຣະເຈົ້າຢາເວຮັກພວກເຈົ້າ ແລະ ຮັກສາຄຳປະຕິຍານທີ່ໄດ້ໃຫ້ໄວ້ກັບບັນພະບຸລຸດຂອງພວກເຈົ້າ ພຣະອົງຈຶ່ງໄດ້ນຳພວກເຈົ້າອອກມາດ້ວຍມືອັນມີລິດອຳນາດຍິ່ງໃຫຍ່ ແລະ ໄດ້ໄຖ່ພວກເຈົ້າອອກມາຈາກດິນແດນທີ່ເຄີຍເປັນຂ້າທາດ, ຈາກອຳນາດຂອງຟາໂຣກະສັດແຫ່ງເອຢິບ. ເຫດສະນັ້ນ ຈົ່ງຮູ້ວ່າ ພຣະເຈົ້າຢາເວ ພຣະເຈົ້າຂອງພວກເຈົ້າເປັນພຣະເຈົ້າ, ພຣະອົງເປັນພຣະເຈົ້າຜູ້ສັດຊື່, ພຣະອົງໄດ້ຮັກສາພັນທະສັນຍາແຫ່ງຄວາມຮັກຂອງພຣະອົງຕໍ່ຜູ້ທີ່ຮັກພຣະອົງ ແລະ ຖືຮັກສາພຣະບັນຍັດຕ່າງໆຂອງພຣະອົງເຖິງພັນຊົ່ວອາຍຸຄົນ. ແຕ່
ບັນດາຜູ້ທີ່ກຽດຊັງພຣະອົງ ພຣະອົງຈະຕອບສະໜອງໃຫ້ພວກເຂົາດ້ວຍການທຳລາຍ;
ພຣະອົງຈະຕອບສະໜອງຄົນເຫລົ່ານັ້ນທີ່ກຽດຊັງພຣະອົງໂດຍບໍ່ຊັກຊ້າ.
ເຫດສະນັ້ນ, ຈົ່ງເອົາໃຈໃສ່ປະຕິບັດຕາມບັນດາຂໍ້ຄຳສັ່ງ, ກົດເກນ ແລະ ກົດບັນຍັດທີ່ຂ້າພະເຈົ້າມອບໃຫ້ພວກເຈົ້າໃນວັນນີ້.
ຖ້າພວກເຈົ້າເອົາໃຈໃສ່ ແລະ ປະຕິບັດຕາມກົດບັນຍັດເຫລົ່ານີ້ຢ່າງລະມັດລະວັງ, ແລ້ວພຣະເຈົ້າຢາເວ ພຣະເຈົ້າຂອງພວກເຈົ້າຈະຮັກສາພັນທະສັນຍາແຫ່ງຄວາມຮັກຂອງພຣະອົງກັບພວກເຈົ້າ ເໝືອນດັ່ງທີ່ພຣະອົງໄດ້ປະຕິຍານໄວ້ກັບບັນພະບຸລຸດຂອງພວກເຈົ້າ. ພຣະອົງຈະຮັກພວກເຈົ້າ ແລະ ອວຍພອນພວກເຈົ້າ ແລະ ເຮັດໃຫ້ພວກເຈົ້າທະວີຄູນຈຳນວນຂຶ້ນ. ພຣະອົງຈະອວຍພອນລູກຫລານຂອງພວກເຈົ້າ ແລະ ຜົນເກັບກ່ຽວຈາກແຜ່ນດິນຂອງພວກເຈົ້າ, ທັງເມັດພືດ, ເຫລົ້າອະງຸ່ນໃໝ່ ແລະ ນ້ຳມັນໝາກກອກ, ລູກງົວ ແລະ ລູກແກະຈາກຝູງສັດຂອງພວກເຈົ້າໃນດິນແດນທີ່ພຣະອົງໄດ້ປະຕິຍານໄວ້ກັບບັນພະບຸລຸດຂອງພວກເຈົ້າວ່າຈະມອບໃຫ້ແກ່ພວກເຈົ້າ. ພວກເຈົ້າຈະໄດ້ຮັບພອນຫລາຍກວ່າຊົນຊາດອື່ນໃດ; ຈະບໍ່ມີຜູ້ຊາຍ ຫລື ແມ່ຍິງຄົນໃດໃນພວກເຈົ້າທີ່ເປັນໝັນ ຫລື ຝູງສັດຂອງພວກເຈົ້າກໍຈະບໍ່ມີໂຕໃດທີ່ຈະບໍ່ເກີດລູກອ່ອນ. ພຣະເຈົ້າຢາເວຈະປົກປ້ອງພວກເຈົ້າຈາກພະຍາດທຸກຊະນິດ. ພຣະອົງຈະບໍ່ໃຫ້ພວກເຈົ້າໄດ້ຮັບຄວາມທໍລະມານດ້ວຍພະຍາດຮ້າຍແຮງໃດໆ ເໝືອນດັ່ງພວກເຈົ້າຮູ້ຈັກໃນເອຢິບ, ແຕ່ຈະໃຫ້ພະຍາດຮ້າຍແຮງນັ້ນທໍລະມານຄົນທັງຫລາຍທີ່ກຽດຊັງພວກເຈົ້າ. ຈົ່ງທຳລາຍປະຊາຊົນທັງໝົດທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ມອບໄວ້ໃນມືຂອງພວກເຈົ້າ. ຢ່າຫລຽວເບິ່ງພວກເຂົາດ້ວຍຄວາມສົງສານ ແລະ ຢ່າຮັບໃຊ້ບັນດາພະຂອງພວກເຂົາ, ເພາະນັ້ນຈະເປັນບ້ວງແຮ້ວດັກຈັບພວກເຈົ້າ.
ພວກເຈົ້າອາດຈະກັງວົນໄປເອງວ່າ, “ຊົນຊາດພວກນີ້ເຂັ້ມແຂງກວ່າພວກເຮົາ. ພວກເຮົາຈະໄປຂັບໄລ່ພວກເຂົາໄດ້ຢ່າງໃດ?” ແຕ່ຢ່າຢ້ານພວກເຂົາເລີຍ; ຈົ່ງລະນຶກເຖິງສິ່ງທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ກະທຳແກ່ຟາໂຣ ແລະ ແກ່ຊາວເອຢິບທັງໝົດ. ພວກເຈົ້າກໍໄດ້ເຫັນກັບຕາຂອງພວກເຈົ້າແລ້ວເຖິງການທົດສອບອັນໃຫຍ່, ໝາຍສຳຄັນ ແລະ ການອັດສະຈັນຕ່າງໆ, ມືອັນມີລິດອຳນາດຍິ່ງໃຫຍ່ ແລະ ແຂນທີ່ເດ່ອອກໄປ, ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ໃຊ້ສິ່ງເຫລົ່ານີ້ນຳພາພວກເຈົ້າອອກມາ. ພຣະເຈົ້າຢາເວ ພຣະເຈົ້າຂອງພວກເຈົ້າຈະເຮັດແບບດຽວກັນນີ້ກັບປະຊາຊົນທັງໝົດທີ່ພວກເຈົ້າຢ້ານກົວຢູ່ໃນເວລານີ້. ນອກຈາກນັ້ນ, ພຣະເຈົ້າຢາເວ ພຣະເຈົ້າຂອງພວກເຈົ້າຈະສົ່ງຕໍ່ມາຕອດພວກເຂົາ ແມ່ນແຕ່ຜູ້ລອດຊີວິດທີ່ຫລົບລີ້ຈາກພວກເຈົ້າ ໃຫ້ຈິບຫາຍໄປໝົດ. ຢ່າຢ້ານພວກເຂົາ, ເພາະພຣະເຈົ້າຢາເວ ພຣະເຈົ້າຂອງພວກເຈົ້າຜູ້ຢູ່ທ່າມກາງພວກເຈົ້າເປັນພຣະເຈົ້າອົງຍິ່ງໃຫຍ່ ແລະ ໜ້າຢ້ານກົວ. ພຣະເຈົ້າຢາເວ ພຣະເຈົ້າຂອງພວກເຈົ້າຈະຄ່ອຍໆຂັບໄລ່ຊົນຊາດເຫລົ່ານີ້ອອກໄປຕໍ່ໜ້າພວກເຈົ້າເທື່ອລະນ້ອຍ. ພຣະອົງບໍ່ໄດ້ອະນຸຍາດໃຫ້ພວກເຈົ້າກຳຈັດພວກເຂົາອອກໄປໃຫ້ໝົດເທື່ອດຽວ ບໍ່ດັ່ງນັ້ນສັດປ່າກໍຈະທະວີຄູນຈຳນວນຂຶ້ນອ້ອມຮອບພວກເຈົ້າຢ່າງວ່ອງໄວ. ແຕ່ພຣະເຈົ້າຢາເວ ພຣະເຈົ້າຂອງພວກເຈົ້າຈະມອບພວກເຂົາໃຫ້ແກ່ພວກເຈົ້າ, ໂດຍການໂຍນພວກເຂົາເຂົ້າໃນຄວາມວຸ້ນວາຍຈົນພວກເຂົາໄດ້ຖືກທຳລາຍລ້າງໄປ. ພຣະອົງຈະມອບກະສັດຂອງພວກເຂົາໄວ້ໃນມືຂອງພວກເຈົ້າ ແລະ ພວກເຈົ້າຈະລຶບຊື່ຄົນເຫລົ່ານັ້ນອອກຈາກໃຕ້ຟ້າສະຫວັນ. ບໍ່ມີຜູ້ໃດສາມາດລຸກຂຶ້ນຕໍ່ສູ້ພວກເຈົ້າໄດ້; ພວກເຈົ້າຈະທຳລາຍລ້າງພວກເຂົາ. ຈົ່ງເຜົາບັນດາຮູບເຄົາລົບຂອງພະຕ່າງໆຂອງພວກເຂົາຖິ້ມລົງໃສ່ໄຟ. ຢ່າຢາກໄດ້ເງິນ ແລະ ຄຳທີ່ໃຊ້ເຮັດຮູບເຄົາລົບເຫລົ່ານັ້ນ ແລະ ຢ່າເກັບໄວ້ເປັນຂອງພວກເຈົ້າເອງ ບໍ່ດັ່ງນັ້ນບ້ວງແຮ້ວຈະດັກຈັບພວກເຈົ້າເອງ, ເພາະພຣະເຈົ້າຢາເວ ພຣະເຈົ້າຂອງພວກເຈົ້າກຽດຊັງພວກມັນ. ຢ່ານຳສິ່ງທີ່ໜ້າກຽດຊັງເຂົ້າໄປໄວ້ໃນເຮືອນຂອງພວກເຈົ້າ ຢ້ານວ່າພວກເຈົ້າຈະເປັນເໝືອນສິ່ງນັ້ນ, ຄືຖືກແຍກອອກມາເພື່ອທຳລາຍ. ຈົ່ງຖືວ່າສິ່ງນັ້ນຊົ່ວຮ້າຍ ແລະ ໜ້າລັງກຽດ, ເພາະມັນຄືສິ່ງທີ່ຖືກແຍກອອກມາເພື່ອທຳລາຍ.
Source notes (2)
- Footnote ຂໍ້ນີ້ໃນພາສາເຮັບເຣີໝາຍເຖິງສິ່ງຂອງ ຫລື ບຸກຄົນທີ່ຖວາຍແກ່ພຣະເຈົ້າຢາເວແລ້ວບໍ່ອາດເອີ້ນຄືນໄດ້ ມັກຈະຕ້ອງທຳລາຍໃຫ້ໝົດສິ້ນໄປ ເຊັ່ນດຽວກັບຂໍ້ 26
- Footnote ຄື ເສົາໄມ້ທີ່ເປັນສັນຍາລັກຂອງຮູບເຄົາລົບເຈົ້າແມ່ອາເຊຣາ; ຢູ່ທີ່ນີ້ ແລະ ບ່ອນອື່ນໆໃນພຣະບັນຍັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.