Biblica® Open Lao Contemporary Version
ພຣະບັນຍັດສອງ 6
ຈົ່ງຮັກພຣະເຈົ້າຢາເວ ພຣະເຈົ້າຂອງພວກເຈົ້າ
ຕໍ່ໄປນີ້ຄືບັນດາພຣະບັນຍັດ, ຂໍ້ຄຳສັ່ງ ແລະ ກົດບັນຍັດເຊິ່ງພຣະເຈົ້າຢາເວ ພຣະເຈົ້າຂອງພວກເຈົ້າສັ່ງໃຫ້ຂ້າພະເຈົ້າສອນພວກເຈົ້າໃຫ້ປະຕິບັດຕາມໃນດິນແດນທີ່ພວກເຈົ້າກຳລັງຈະຂ້າມແມ່ນ້ຳຈໍແດນເຂົ້າໄປຄອບຄອງ. ເພື່ອວ່າພວກເຈົ້າ, ລູກຫລານຂອງພວກເຈົ້າ ແລະ ລູກຫລານຂອງພວກເຂົາລຸ້ນຕໍ່ໆໄປຈະຢຳເກງພຣະເຈົ້າຢາເວ ພຣະເຈົ້າຂອງພວກເຈົ້າຕະລອດທີ່ພວກເຂົາຍັງມີຊີວິດຢູ່ ໂດຍຖືຮັກສາບັນດາຂໍ້ຄຳສັ່ງ ແລະ ຄຳສັ່ງທັງໝົດຂອງພຣະອົງທີ່ຂ້າພະເຈົ້າມອບໃຫ້ພວກເຈົ້າ ແລະ ເພື່ອວ່າພວກເຈົ້າຈະຊື່ນຊົມຍິນດີກັບຊີວິດທີ່ຍືນຍາວນັ້ນ. ຊາວອິດສະຣາເອນເອີຍ, ຈົ່ງຟັງ ແລະ ຈົ່ງເອົາໃຈໃສ່ປະຕິບັດຕາມເພື່ອຈະເປັນຜົນດີແກ່ພວກເຈົ້າ ແລະ ພວກເຈົ້າຈະທະວີຈຳນວນຫລາຍຂຶ້ນໃນດິນແດນອັນອຸດົມສົມບູນດ້ວຍນ້ຳນົມ ແລະ ນ້ຳເຜິ້ງຕາມທີ່ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຈົ້າສັນຍາໄວ້ກັບພວກເຈົ້າ.
ຊາວອິດສະຣາເອນເອີຍ, ຈົ່ງຟັງ, ພຣະເຈົ້າຢາເວ ພຣະເຈົ້າຂອງພວກເຮົາ, ພຣະເຈົ້າຢາເວເປັນໜຶ່ງ.1 ຈົ່ງຮັກພຣະເຈົ້າຢາເວ ພຣະເຈົ້າຂອງພວກເຈົ້າດ້ວຍສຸດໃຈ, ດ້ວຍສຸດຈິດ ແລະ ດ້ວຍສຸດກຳລັງຂອງພວກເຈົ້າ. ຈົ່ງໃຫ້ບັນດາພຣະບັນຍັດເຫລົ່ານີ້ທີ່ຂ້າພະເຈົ້າມອບໃຫ້ພວກເຈົ້າໃນວັນນີ້ຢູ່ໃນໃຈຂອງພວກເຈົ້າ. ຈົ່ງໃຫ້ລູກຫລານຂອງພວກເຈົ້າເຫັນສິ່ງເຫລົ່ານີ້. ຈົ່ງເວົ້າເຖິງສິ່ງເຫລົ່ານີ້ເມື່ອພວກເຈົ້ານັ່ງຢູ່ທີ່ເຮືອນ ເມື່ອພວກເຈົ້າຍ່າງໄປຕາມທາງ, ເມື່ອພວກເຈົ້ານອນລົງ ຫລື ເມື່ອພວກເຈົ້າລຸກຂຶ້ນ. ຈົ່ງຜູກໄວ້ທີ່ມືຂອງພວກເຈົ້າ ແລະ ຜູກໄວ້ທີ່ໜ້າຜາກຂອງພວກເຈົ້າເພື່ອເປັນສັນຍາລັກ. ຈົ່ງຂຽນໄວ້ທີ່ຂອບປະຕູເຮືອນ ແລະ ທີ່ປະຕູຮົ້ວຂອງພວກເຈົ້າ.
ເມື່ອພຣະເຈົ້າຢາເວ ພຣະເຈົ້າຂອງພວກເຈົ້ານຳພາພວກເຈົ້າເຂົ້າສູ່ດິນແດນທີ່ພຣະອົງປະຕິຍານໄວ້ກັບບັນພະບຸລຸດຂອງພວກເຈົ້າຄືອັບຣາຮາມ, ອີຊາກ ແລະ ຢາໂຄບ, ເພື່ອຈະມອບດິນແດນທີ່ກວ້າງໃຫຍ່, ເມືອງທີ່ຮຸ່ງເຮືອງທີ່ພວກເຈົ້າບໍ່ໄດ້ສ້າງຂຶ້ນ, ເຮືອນທີ່ເຕັມດ້ວຍສິ່ງດີໆສາລະພັດທີ່ພວກເຈົ້າບໍ່ໄດ້ຈັດຫາໄວ້, ນ້ຳສ້າງທີ່ພວກເຈົ້າບໍ່ໄດ້ຂຸດ ແລະ ສວນອະງຸ່ນ ແລະ ສວນໝາກກອກທີ່ພວກເຈົ້າບໍ່ໄດ້ປູກ ແລະ ເມື່ອພວກເຈົ້າໄດ້ກິນຈົນອີ່ມໜຳສຳລານແລ້ວນັ້ນ, ຈົ່ງລະວັງໃຫ້ດີວ່າ ພວກເຈົ້າບໍ່ໄດ້ລືມພຣະເຈົ້າຢາເວຜູ້ນຳເອົາພວກເຈົ້າອອກມາຈາກເອຢິບດິນແດນທີ່ພວກເຈົ້າເຄີຍເປັນຂ້າທາດນັ້ນ.
ຈົ່ງຢຳເກງພຣະເຈົ້າຢາເວ ພຣະເຈົ້າຂອງພວກເຈົ້າ, ຈົ່ງຮັບໃຊ້ພຣະອົງແຕ່ຜູ້ດຽວ ແລະ ຈົ່ງສາບານໃນນາມຂອງພຣະອົງ. ຢ່າຕິດຕາມພະອື່ນໃດຂອງຊົນຊາດຕ່າງໆທີ່ຢູ່ອ້ອມຮອບພວກເຈົ້າ, ເພາະພຣະເຈົ້າຢາເວ ພຣະເຈົ້າຂອງພວກເຈົ້າຜູ້ສະຖິດທ່າມກາງພວກເຈົ້າທັງຫລາຍເປັນພຣະເຈົ້າທີ່ຫຶງຫວງ ແລະ ຄວາມໂກດຮ້າຍຂອງພຣະອົງຈະເຜົາຜານພວກເຈົ້າ ແລະ ພຣະອົງຈະທຳລາຍພວກເຈົ້າອອກໄປຈາກດິນແດນນີ້. ຢ່າທົດລອງພຣະເຈົ້າຢາເວ ພຣະເຈົ້າຂອງພວກເຈົ້າເໝືອນດັ່ງທີ່ພວກເຈົ້າໄດ້ເຮັດທີ່ມັດສາ. ຈົ່ງປະຕິບັດຕາມພຣະບັນຍັດຂອງພຣະເຈົ້າຢາເວ ພຣະເຈົ້າຂອງພວກເຈົ້າ ແລະ ບັນດາຂໍ້ກຳນົດ ແລະ ຂໍ້ຄຳສັ່ງທີ່ພຣະອົງໄດ້ມອບໃຫ້ແກ່ພວກເຈົ້າຢ່າງເຄັ່ງຄັດ. ຈົ່ງເຮັດສິ່ງທີ່ຖືກຕ້ອງ ແລະ ດີງາມໃນສາຍຕາຂອງພຣະເຈົ້າຢາເວ, ເພື່ອວ່າທຸກສິ່ງຈະເປັນຜົນດີແກ່ພວກເຈົ້າ ແລະ ເພື່ອພວກເຈົ້າຈະໄດ້ເຂົ້າໄປຄອບຄອງດິນແດນອັນອຸດົມສົມບູນທີ່ພຣະເຈົ້າຢາເວສັນຍາໄວ້ດ້ວຍຄຳປະຕິຍານກັບບັນພະບຸລຸດຂອງພວກເຈົ້າ. ໂດຍກຳຈັດສັດຕູທັງໝົດທີ່ຢູ່ຕໍ່ໜ້າພວກເຈົ້າອອກໄປຕາມທີ່ພຣະເຈົ້າຢາເວໄດ້ກ່າວໄວ້.
ໃນອະນາຄົດ, ເມື່ອລູກຫລານຂອງພວກເຈົ້າຖາມພວກເຈົ້າເຖິງ “ຂໍ້ກຳນົດ, ຂໍ້ຄຳສັ່ງ ແລະ ກົດບັນຍັດທີ່ພຣະເຈົ້າຢາເວ ພຣະເຈົ້າຂອງພວກເຮົາສັ່ງໄວ້ນີ້ມີຄວາມໝາຍວ່າຢ່າງໃດ?” ຈົ່ງບອກພວກເຂົາວ່າ: “ພວກເຮົາເຄີຍເປັນຂ້າທາດຂອງຟາໂຣຢູ່ໃນປະເທດເອຢິບ, ແຕ່ພຣະເຈົ້າຢາເວນຳເອົາພວກເຮົາອອກມາຈາກເອຢິບດ້ວຍມືອັນລິດອຳນາດຂອງພຣະອົງ. ພຣະເຈົ້າຢາເວເຮັດໝາຍສຳຄັນ ແລະ ການອັດສະຈັນຍິ່ງໃຫຍ່ທີ່ໜ້າຢ້ານກົວແກ່ຊາວເອຢິບ ແລະ ແກ່ຟາໂຣລວມທັງເຊື້ອວົງທັງປວງຂອງລາວຕໍ່ໜ້າຕໍ່ຕາພວກເຮົາ. ແຕ່ພຣະອົງນຳເຮົາອອກມາຈາກທີ່ນັ້ນເຂົ້າສູ່ດິນແດນນີ້ ແລະ ມອບດິນແດນນີ້ໃຫ້ແກ່ພວກເຮົາຕາມທີ່ສັນຍາໄວ້ດ້ວຍຄຳປະຕິຍານຕໍ່ບັນພະບຸລຸດຂອງພວກເຮົາ. ພຣະເຈົ້າຢາເວສັ່ງໃຫ້ພວກເຮົາເຊື່ອຟັງຂໍ້ຄຳສັ່ງທັງໝົດເຫລົ່ານີ້ ແລະ ໃຫ້ຢຳເກງພຣະເຈົ້າຢາເວ ພຣະເຈົ້າຂອງພວກເຮົາ, ເພື່ອວ່າພວກເຮົາຈະຈະເລີນຮຸ່ງເຮືອງ ແລະ ມີຊີວິດຢູ່ເໝືອນດັ່ງໃນກໍລະນີວັນນີ້. ແລະ ຖ້າພວກເຮົາເຊື່ອຟັງຢ່າງເອົາໃຈໃສ່ກົດບັນຍັດທັງໝົດນີ້ຕໍ່ໜ້າພຣະເຈົ້າຢາເວ ພຣະເຈົ້າຂອງພວກເຮົາ ຕາມທີ່ພຣະອົງໄດ້ສັ່ງພວກເຮົາໄວ້ແລ້ວນັ້ນ, ຄວາມຊອບທຳກໍຈະເປັນຂອງພວກເຮົາ”.
Source notes (1)
- Footnote ຫລື ພຣະເຈົ້າຢາເວ ພຣະເຈົ້າຂອງເຮົາເປັນພຣະເຈົ້າຢາເວແຕ່ພຽງອົງດຽວ ຫລື ພຣະເຈົ້າຢາເວເປັນພຣະເຈົ້າຂອງພວກເຮົາ ພຣະເຈົ້າຢາເວເປັນໜຶ່ງ ຫລື ພຣະເຈົ້າຢາເວເປັນພຣະເຈົ້າຂອງເຮົາແຕ່ຜູ້ດຽວ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.