Biblica® Open Lao Contemporary Version
ພຣະບັນຍັດສອງ 33
ໂມເຊອວຍພອນເຜົ່າຕ່າງໆ
(ປຖກ 49:1-28)
ນີ້ແມ່ນຄຳອວຍພອນທີ່ໂມເຊຄົນຂອງພຣະເຈົ້າໄດ້ປະກາດແກ່ຊາວອິດສະຣາເອນກ່ອນທີ່ເພິ່ນຈະຕາຍ. ເພິ່ນກ່າວວ່າ:
“ພຣະເຈົ້າຢາເວໄດ້ມາຈາກພູເຂົາຊີນາຍ ແລະ
ແລະ ໄດ້ສ່ອງແສງອາລຸນເໜືອພວກເຂົາຈາກເສອີ;
ພຣະອົງໄດສ່ອງສະຫວ່າງອອກມາຈາກພູປາຣານ.
ພຣະອົງໄດ້ມາພ້ອມກັບ1ຜູ້ບໍລິສຸດຈຳນວນຫລວງຫລາຍ
ຈາກທິດໃຕ້, ຈາກເນີນພູ2ຂອງພຣະອົງ.
ແນ່ນອນ ພຣະອົງຮັກປະຊາຊົນ;
ຊີວິດຂອງຜູ້ບໍລິສຸດທັງໝົດຢູ່ໃນມືຂອງພຣະອົງ.
ພວກເຂົາກາບລົງທີ່ຕີນຂອງພຣະອົງ
ແລະ ຮັບການສັ່ງສອນຈາກພຣະອົງ,
ຄືກົດບັນຍັດທີ່ໂມເຊໃຫ້ແກ່ພວກເຮົາ,
ໃຫ້ເປັນກຳມະສິດຂອງຊຸມຊົນຂອງຢາໂຄບ.
ພຣະອົງເປັນກະສັດເໜືອເຢຊູຣຸນ3
ເມື່ອບັນດາຜູ້ນຳຂອງປະຊາຊົນມາຊຸມນຸມກັນ
ຮ່ວມກັບເຜົ່າຕ່າງໆຂອງອິດສະຣາເອນ.
“ຂໍໃຫ້ຣູເບັນມີຊີວິດຢູ່ ແລະ ບໍ່ຕາຍ,
ຫລື ຢ່າໃຫ້4ຄົນຂອງລາວມີໜ້ອຍ”.
ແລະ ນີ້ແມ່ນສິ່ງທີ່ເພິ່ນໄດ້ກ່າວເຖິງຢູດາວ່າ:
“ພຣະເຈົ້າຢາເວ, ຂໍຟັງສຽງຮ້ອງຂອງຢູດາ;
ຂໍນຳລາວມາຫາປະຊາຊົນຂອງລາວ.
ລາວຕໍ່ສູ້ຜ່ານຜ່າດ້ວຍມືຂອງລາວເອງ.
ຂໍຊ່ວຍຢູດາຕໍ່ສູ້ກັບສັດຕູຂອງລາວດ້ວຍ!”
ເພິ່ນໄດ້ກ່າວເຖິງເຜົ່າເລວີວ່າ:
“ອູຮິມ ແລະ ທູມມິມຂອງພຣະອົງ
ຂໍໃຫ້ຢູ່ກັບຜູ້ຮັບໃຊ້ທີ່ສັດຊື່ຂອງພຣະອົງ.
ພຣະອົງໄດ້ທົດສອບລາວຢູ່ທີ່ມັດສາ;
ພຣະອົງຕໍ່ສູ້ກັບລາວຢູ່ທີ່ແມ່ນ້ຳເມຣີບາ.
ລາວກ່າວເຖິງພໍ່ແມ່ຂອງຕົນວ່າ,
‘ຂ້າພະເຈົ້າບໍ່ເຫັນແກ່ໜ້າພວກເຂົາ’.
ລາວບໍ່ເຫັນແກ່ພີ່ນ້ອງຂອງຕົນ
ຫລື ບໍ່ເຫັນແກ່ລູກຫລານຂອງຕົນເອງ,
ແຕ່ລາວເອົາໃຈໃສ່ຮັກສາຖ້ອຍຄຳຂອງພຣະອົງ
ແລະ ຮັກສາພັນທະສັນຍາຂອງພຣະອົງ.
ລາວຈະສອນຄຳສັ່ງສອນຂອງພຣະອົງແກ່ຢາໂຄບ
ແລະ ສອນກົດບັນຍັດຂອງພຣະອົງແກ່ອິດສະຣາເອນ.
ລາວຖວາຍເຄື່ອງຫອມຕໍ່ໜ້າພຣະອົງ
ແລະ ຖວາຍເຄື່ອງເຜົາບູຊາທັງໝົດເທິງແທ່ນບູຊາຂອງພຣະອົງ.
ພຣະເຈົ້າຢາເວ, ຂໍອວຍພອນຄວາມຊຳນານທັງໝົດຂອງລາວ
ແລະ ພໍໃຈວຽກງານທີ່ລາວໄດ້ເຮັດດ້ວຍ.
ຂໍໃຫ້ຟາດບັນດາຜູ້ທີ່ລຸກຂຶ້ນຕໍ່ສູ້ລາວ,
ສັດຕູຂອງລາວຈົນລຸກຂຶ້ນບໍ່ໄດ້ອີກຕໍ່ໄປ”.
ເພິ່ນໄດ້ກ່າວເຖິງເຜົ່າເບັນຢາມິນວ່າ:
“ຂໍໃຫ້ຜູ້ທີ່ພຣະເຈົ້າຢາເວຮັກພັກສະຫງົບໃນພຣະອົງຢ່າງປອດໄພ,
ເພາະພຣະອົງເປັນໂລ່ປົກປ້ອງລາວທຸກວັນ,
ແລະ ໃຫ້ຜູ້ທີ່ພຣະອົງຮັກພັກສະຫງົບຢູ່ແນບບ່າຂອງພຣະອົງ”.
ເພິ່ນໄດ້ກ່າວເຖິງເຜົ່າໂຢເຊັບວ່າ:
“ຂໍພຣະເຈົ້າຢາເວອວຍພອນດິນແດນຂອງລາວ
ດ້ວຍນ້ຳໝອກທີ່ລ້ຳເລີດຈາກສະຫວັນເບື້ອງເທິງ
ແລະ ດ້ວຍນ້ຳເລິກເບື້ອງລຸ່ມ;
ດ້ວຍຜົນຜະລິດທີ່ດີເລີດຈາກແສງຕາເວັນ
ແລະ ດ້ວຍຜົນຜະລິດທີ່ດີທີ່ສຸດຈາກດວງຕາເວັນ;
ດ້ວຍຂອງຂັວນອັນລ້ຳເລີດຈາກພູເຂົາດຶກດຳບັນ
ແລະ ຄວາມອຸດົມສົມບູນຈາກເນີນພູອັນຖາວອນ;
ດ້ວຍຂອງຂັວນອັນລ້ຳຄ່າຈາກແຜ່ນດິນໂລກ ແລະ ຄວາມອຸດົມສົມບູນຈາກພື້ນດິນ
ແລະ ດ້ວຍຄວາມກະລຸນາຂອງພຣະອົງຜູ້ສິຖິດຢູ່ໃນພຸ່ມໄມ້ທີ່ລຸກເປັນໄຟ.
ຂໍໃຫ້ພອນທັງໝົດເຫລົ່ານີ້ມາເໜືອຫົວຂອງໂຢເຊັບ,
ມາເໜືອໜ້າຜາກຂອງເຈົ້າຜູ້ເປັນນາຍໃນທ່າມກາງອ້າຍນ້ອງຂອງລາວ.5
ລາວສະຫງ່າງາມເໝືອນດັ່ງງົວເຖິກຫົວປີ;
ເຂົາສັດຂອງລາວຄືກັບເຂົາຂອງງົວປ່າ.
ລາວຈະຂວິດປະຊາຊາດທັງຫລາຍດ້ວຍເຂົາສັດເຫລົ່ານັ້ນ,
ແມ່ນແຕ່ບັນດາປະຊາຊາດທີ່ຢູ່ສຸດປາຍແຜ່ນດິນໂລກ.
ນີ້ຄືຊາວເອຟຣາອິມເປັນຈຳນວນສິບພັນຄົນ;
ແລະ ຊາວມານາເຊເປັນຈຳນວນຫລາຍພັນຄົນ”.
ເພິ່ນໄດ້ກ່າວເຖິງເຜົ່າເຊບູໂລນວ່າ:
“ຈົ່ງຊື່ນຊົມຍິນດີ, ເຊບູໂລນ, ເມື່ອເຈົ້າອອກໄປ,
ແລະ ເຈົ້າ, ອິດຊາຄາ, ຈົ່ງຍິນດີຢູ່ໃນເຕັນຂອງເຈົ້າ.
ພວກເຂົາຈະເອີ້ນປະຊາຊົນມາຊຸມນຸມກັນຢູ່ທີ່ພູເຂົານັ້ນ
ແລະ ຖວາຍເຄື່ອງບູຊາແຫ່ງຄວາມຊອບທຳຢູ່ທີ່ນັ້ນ;
ພວກເຂົາຈະສະເຫລີມສະຫລອງຄວາມອຸດົມສົມບູນແຫ່ງທະເລ,
ພ້ອມທັງຊັບສົມບັດທີ່ເຊື່ອງໄວ້ໃນຫາດຊາຍ”.
ເພິ່ນໄດ້ກ່າວເຖິງເຜົ່າກາດວ່າ:
“ສັນລະເສີນພຣະອົງຜູ້ຂະຫຍາຍອານາຈັກຂອງກາດ!
ກາດມີຊີວິດຢູ່ທີ່ນັ້ນເໝືອນດັ່ງສິງ,
ເຊິ່ງສາມາດຈີກທັງແຂນ ຫລື ຫົວໄດ້.
ລາວເລືອກດິນແດນທີ່ດີທີ່ສຸດໄວ້ເປັນຂອງຕົນເອງ;
ສ່ວນທີ່ເປັນຂອງຜູ້ນຳຖືກສະຫງວນໄວ້ສຳລັບລາວ.
ເມື່ອບັນດາຫົວໜ້າຂອງປະຊາຊົນມາຊຸມນຸມກັນ,
ລາວເຮັດໃຫ້ລຸລ່ວງຕາມຄວາມປະສົງອັນຊອບທຳຂອງພຣະເຈົ້າຢາເວ,
ແລະ ຕາມການຕັດສິນຂອງພຣະອົງກ່ຽວກັບອິດສະຣາເອນ”.
ເພິ່ນໄດ້ກ່າວເຖິງເຜົ່າດານວ່າ:
“ດານເປັນເໝືອນລູກສິງ
ກະໂດດແລ່ນອອກມາຈາກບາຊານ”.
ເພິ່ນໄດ້ກ່າວເຖິງເຜົ່າເນັບທາລີວ່າ:
“ເນັບທາລີແມ່ນອຸດົມສົມບູນດ້ວຍຄວາມກະລຸນາຈາກພຣະເຈົ້າຢາເວ
ແລະ ເຕັມລົ້ນດ້ວຍພຣະພອນຂອງພຣະອົງ;
ລາວຈະຄອບຄອງໄປທາງພາກໃຕ້ຈົນເຖິງທະເລສາບ”.
ເພິ່ນໄດ້ກ່າວເຖິງເຜົ່າອາເຊວ່າ:
“ອາເຊເປັນລູກຊາຍທີ່ໄດ້ຮັບພຣະພອນຫລາຍທີ່ສຸດ,
ຂໍໃຫ້ລາວເປັນທີ່ພໍໃຈໂດຍພີ່ນ້ອງທັງຫລາຍຂອງລາວ,
ແລະ ຂໍໃຫ້ລາວໄດ້ລ້າງຕີນຂອງລາວດ້ວຍນ້ຳມັນ.
ກອນປະຕູຂອງເຈົ້າຈະເປັນເຫລັກ ແລະ ທອງສຳລິດ
ແລະ ກຳລັງຂອງເຈົ້າຈະຢູ່ຄູ່ວັນຂອງເຈົ້າ.
“ບໍ່ມີຜູ້ໃດເປັນເໝືອນພຣະເຈົ້າຂອງເຢຊູຣຸນ,
ຜູ້ແລ່ນຂ້າມຟ້າສະຫວັນມາເພື່ອຊ່ວຍເຫລືອເຈົ້າ ແລະ
ຜູ້ປະທັບຢູ່ເທິງເມກດ້ວຍລິດອຳນາດຂອງພຣະອົງ.
ພຣະເຈົ້າອົງນິລັນດອນເປັນທີ່ລີ້ໄພຂອງເຈົ້າ
ແລະ ຢູ່ເບື້ອງລຸ່ມຄືອ້ອມແຂນຕະຫລອດໄປ.
ພຣະອົງຈະຂັບໄລ່ບັນດາສັດຕູອອກໄປໃຫ້ພົ້ນຈາກເຈົ້າ,
ໂດຍກ່າວວ່າ, ‘ຈົ່ງທຳລາຍພວກເຂົາ!’
ດັ່ງນັ້ນ ອິດສະຣາເອນຈະດຳເນີນຊີວິດຢູ່ດ້ວຍຄວາມປອດໄພ;
ຢາໂຄບຈະອາໄສຢູ່ຢ່າງໝັ້ນຄົງ
ໃນດິນແດນແຫ່ງເມັດພືດ ແລະ ເຫລົ້າອະງຸ່ນໃໝ່,
ບ່ອນທີ່ຟ້າສະຫວັນຫລັ່ງລິນນ້ຳໝອກລົງມາ.
ອິດສະຣາເອນ! ພຣະພອນນີ້ເປັນຂອງພວກເຈົ້າແລ້ວ,
ມີຜູ້ໃດເປັນເໝືອນພວກເຈົ້າ,
ເປັນຊົນຊາດທີ່ພຣະເຈົ້າຢາເວໄດ້ຊ່ວຍໃຫ້ພົ້ນ?
ພຣະອົງເປັນຜູ້ປົກປ້ອງ ແລະ ເປັນຜູ້ຊ່ວຍເຈົ້າ
ແລະ ເປັນດາບອັນສະຫງ່າລາສີຂອງພວກເຈົ້າ.
ບັນດາສັດຕູຂອງພວກເຈົ້າຈະກົ້ມຫົວໃຫ້ພວກເຈົ້າ
ແລະ ພວກເຈົ້າຈະຢຽບຫົວ6ຂອງພວກເຂົາ”.
Source notes (6)
- Footnote ຫລື ຈາກ
- Footnote ໃນພາສາເຮັບເຣີປະໂຫຍກນີ້ມີຄວາມໝາຍບໍ່ຊັດເຈນ
- Footnote ແປວ່າ ຜູ້ທ່ຽງທຳ ຄື ອິດສະຣາເອນ ເຊັ່ນດຽວກັບຂໍ້ 5
- Footnote ຫລື ແຕ່ໃຫ້
- Footnote ຫລື ເໜືອຜູ້ພັດພາກຈາກອ້າຍນ້ອງ
- Footnote ຫລື ຈະຢຽບ ເທິງ ຮ່າງກາຍຂອງພວກເຂົາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.