Biblica® Open Lao Contemporary Version
ພຣະບັນຍັດສອງ 27
ແທ່ນບູຊາທີ່ພູເອບານ
ໂມເຊ ແລະ ຜູ້ອາວຸໂສຂອງອິດສະຣາເອນສັ່ງປະຊາຊົນວ່າ: “ຈົ່ງຮັກສາຄຳສັ່ງທັງໝົດເຫລົ່ານີ້ທີ່ຂ້າພະເຈົ້າມອບໃຫ້ພວກເຈົ້າໃນວັນນີ້. ເມື່ອພວກເຈົ້າຂ້າມແມ່ນ້ຳຈໍແດນເຂົ້າສູ່ດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າມອບໃຫ້ພວກເຈົ້ານັ້ນ, ຈົ່ງຕັ້ງຫີນໃຫຍ່ຈຳນວນໜຶ່ງຂຶ້ນ ແລະ ໂບກດ້ວຍປູນຂາວ. ຈົ່ງຈາລຶກຖ້ອຍຄຳຂອງກົດບັນຍັດທັງໝົດນີ້ໄວ້ເທິງຫີນເຫລົ່ານັ້ນ ເມື່ອພວກເຈົ້າຂ້າມໄປສູ່ດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າມອບໃຫ້ແກ່ພວກເຈົ້າ, ເຊິ່ງເປັນດິນແດນທີ່ອຸດົມດ້ວຍນ້ຳນົມ ແລະ ນ້ຳເຜິ້ງຕາມທີ່ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຈົ້າໄດ້ສັນຍາໄວ້ກັບພວກເຈົ້າ. ແລະ ເມື່ອພວກເຈົ້າຂ້າມແມ່ນ້ຳຈໍແດນໄປແລ້ວ, ຈົ່ງຕັ້ງຫີນເຫລົ່ານີ້ຂຶ້ນເທິງພູເອບານ ຕາມທີ່ຂ້າພະເຈົ້າສັ່ງພວກເຈົ້າວັນນີ້, ແລະ ໂອບດ້ວຍປູນຂາວ. ຈົ່ງສ້າງແທ່ນບູຊາດ້ວຍຫີນຂຶ້ນຢູ່ທີ່ນັ້ນຖວາຍແກ່ພຣະເຈົ້າຢາເວ ພຣະເຈົ້າຂອງພວກເຈົ້າ. ຢ່າໃຫ້ໃຊ້ເຄື່ອງມືເຫລັກສະກັດຫີນເຫລົ່ານັ້ນ. ຈົ່ງສ້າງແທ່ນບູຊາຂອງພຣະເຈົ້າຢາເວ ພຣະເຈົ້າຂອງພວກເຈົ້າດ້ວຍຫີນທຳມະຊາດ ແລະ ຖວາຍເຄື່ອງເຜົາບູຊາແກ່ພຣະເຈົ້າຢາເວ ພຣະເຈົ້າຂອງພວກເຈົ້າເທິງແທ່ນນັ້ນ. ຈົ່ງຖວາຍເຄື່ອງບູຊາເພື່ອຄວາມສາມັກຄີທຳຢູ່ເທິງແທ່ນນັ້ນ, ຈົ່ງກິນເຄື່ອງຖວາຍນັ້ນດ້ວຍຄວາມຊົມຊື່ນຍິນດີຕໍ່ໜ້າພຣະເຈົ້າຢາເວ ພຣະເຈົ້າຂອງພວກເຈົ້າ. ແລະ ພວກເຈົ້າຈົ່ງຂຽນທຸກຖ້ອຍຄຳຂອງກົດບັນຍັດນີ້ລົງໄປໃຫ້ຊັດເຈນເທິງກ້ອນຫີນທີ່ພວກເຈົ້າໄດ້ຕັ້ງຂຶ້ນນັ້ນ”.
ຄຳສາບແຊ່ງຈາກພູເອບານ
ແລ້ວໂມເຊ ແລະ ບັນດາປະໂລຫິດຊາວເລວີກໍໄດ້ກ່າວແກ່ຊາວອິດສະຣາເອນທັງໝົດວ່າ, “ອິດສະຣາເອນ, ຈົ່ງມິດງຽບ ແລະ ຟັງ! ບັດນີ້ ພວກເຈົ້າໄດ້ເປັນປະຊາຊົນຂອງພຣະເຈົ້າຢາເວ ພຣະເຈົ້າຂອງພວກເຈົ້າແລ້ວ. ຈົ່ງເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າ ແລະ ປະຕິບັດຕາມຄຳສັ່ງ ແລະ ດຳລັດທັງໝົດຂອງພຣະອົງທີ່ຂ້າພະເຈົ້າມອບໃຫ້ພວກເຈົ້າໃນວັນນີ້”.
ໃນວັນດຽວກັນນັ້ນໂມເຊກໍໄດ້ສັ່ງປະຊາຊົນດັ່ງນີ້ວ່າ:
ເມື່ອພວກເຈົ້າໄດ້ຂ້າມແມ່ນ້ຳຈໍແດນແລ້ວ, ບັນດາເຜົ່າເຫລົ່ານີ້ຈະຕ້ອງຢືນຢູ່ເທິງພູເຂົາເກຣີຊິມເພື່ອອວຍພອນປະຊາຊົນຄື: ເຜົ່າຊີເມໂອນ, ເລວີ, ຢູດາ, ອິດຊາຄາ, ໂຢເຊັບ ແລະ ເບັນຢາມິນ. ແລະ ເຜົ່າເຫລົ່ານີ້ຈະຢືນຢູ່ເທິງພູເຂົາເອບານເພື່ອສາບແຊ່ງປະຊາຊົນຄື: ເຜົ່າຣູເບັນ, ກາດ, ອາເຊ, ເຊບູໂລນ, ດານ ແລະ ເນັບທາລີ.
ຊາວເລວີຈະຮ້ອງກ່າວກັບຊາວອິດສະຣາເອນທັງໝົດວ່າ:
“ຂໍສາບແຊ່ງຄົນທີ່ສ້າງຮູບເຄົາລົບ ເຊິ່ງເປັນສິ່ງທີ່ພຣະເຈົ້າຢາເວລັງກຽດ ເປັນຜົນງານຂອງຈາກມືຂອງຊ່າງ ແລະ ຕັ້ງໄວ້ຢ່າງປິດລັບ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ບໍ່ໃຫ້ກຽດພໍ່ ຫລື ແມ່ຂອງຕົນ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ຍ້າຍຫີນຫລັກເຂດແດນຂອງເພື່ອນບ້ານຂອງຕົນ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ນຳພາຄົນຕາບອດໃຫ້ຫລົງທາງ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ບໍ່ໃຫ້ຄວາມຍຸຕິທຳແກ່ຄົນຕ່າງດ້າວ, ລູກກຳພ້າພໍ່ ຫລື ແມ່ໝ້າຍ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ຮ່ວມຫລັບນອນກັບເມຍຂອງພໍ່ຂອງຕົນ, ເພາະລາວບໍ່ໃຫ້ກຽດຕຽງຂອງພໍ່ຂອງຕົນ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ສົມສູ່ກັບສັດ”.
ແລ້ວປະຊາຊົນທັງໝົດຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ຮ່ວມຫລັບນອນກັບເອື້ອຍ ຫລື ນ້ອງສາວ, ບໍ່ວ່າຈະເປັນລູກສາວຂອງພໍ່ ຫລື ລູກສາວຂອງແມ່ຂອງຕົນກໍຕາມ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ຮ່ວມຫລັບນອນກັບແມ່ເຖົ້າຂອງຕົນ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ຂ້າເພື່ອນບ້ານຂອງຕົນຢ່າງລັບໆ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາແມນ!”
“ຂໍສາບແຊ່ງຄົນທີ່ຮັບສິນບົນເພື່ອຂ້າຄົນບໍລິສຸດ”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາເມນ!”
“ຂໍສາບແຊ່ງຄົນທີ່ບໍ່ຢຶດໝັ້ນປະຕິບັດຖ້ອຍຄຳຂອງກົດບັນຍັດນີ້”.
ແລ້ວປະຊາຊົນທັງໝົດກໍຈະພາກັນຮ້ອງຕອບວ່າ, “ອາເມນ!”
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.