Biblica® Open Lao Contemporary Version
ພຣະບັນຍັດສອງ 20
ການອອກໄປສູ້ຮົບ
ເມື່ອພວກເຈົ້າອອກສູ້ຮົບກັບບັນດາສັດຕູຂອງພວກເຈົ້າ ແລະ ເຫັນສັດຕູມີມ້າ, ລົດມ້າ ແລະ ກອງທັບໃຫຍ່ກວ່າກອງທັບຂອງພວກເຈົ້າ, ຢ່າຢ້ານພວກເຂົາ, ເພາະວ່າພຣະເຈົ້າຢາເວ ພຣະເຈົ້າຂອງພວກເຈົ້າຜູ້ນຳພວກເຈົ້າອອກມາຈາກເອຢິບນັ້ນຈະຢູ່ກັບພວກເຈົ້າ. ເມື່ອພວກເຈົ້າກຳລັງອອກໄປສູ້ຮົບ, ປະໂລຫິດຈະຕ້ອງຍ່າງອອກມາທາງໜ້າ ແລະ ກ່າວກັບກອງທັບ. ເພິ່ນຈະຕ້ອງເວົ້າວ່າ: “ອິດສະຣາເອນ, ຈົ່ງຟັງ: ວັນນີ້ພວກເຈົ້າກຳລັງເຂົ້າສູ່ການສູ້ຮົບກັບບັນດາສັດຕູຂອງພວກເຈົ້າ. ບໍ່ຕ້ອງເສຍຂັວນ ຫລື ຢ້ານກົວ; ຢ່າທໍ້ຖອຍໃຈ ຫລື ຕື່ນຕົກໃຈໂດຍພວກເຂົາ. ເພາະພຣະເຈົ້າຢາເວ ພຣະເຈົ້າຂອງພວກເຈົ້າເປັນອົງທີ່ໄປກັບພວກເຈົ້າ ພຣະອົງຕໍ່ສູ້ກັບສັດຕູຂອງພວກເຈົ້າເພື່ອພວກເຈົ້າ ເພື່ອໃຫ້ໄຊຊະນະແກ່ພວກເຈົ້າ”.
ນາຍທະຫານກໍຈະກ່າວກັບກອງທັບວ່າ: “ມີຜູ້ໃດແດ່ທີ່ຫາກໍສ້າງເຮືອນໃໝ່ ແລະ ຍັງບໍ່ທັນໄດ້ເຂົ້າໄປຢູ່ໃນເຮືອນນັ້ນ? ຖ້າມີ ໃຫ້ຜູ້ນັ້ນກັບເມືອເຮືອນຂອງຕົນ, ເພາະລາວອາດຈະຕາຍໃນສະໜາມຮົບ ແລະ ຄົນອື່ນຈະເຂົ້າໄປຢູ່ໃນເຮືອນນັ້ນ. ມີຜູ້ໃດແດ່ທີ່ຫາກໍປູກສວນອະງຸ່ນ ແລະ ຍັງບໍ່ໄດ້ກິນໝາກອະງຸ່ນເລີຍ? ຖ້າມີ ໃຫ້ຜູ້ນັ້ນຈົ່ງກັບເມືອເຮືອນ ຫລື ລາວອາດຈະຕາຍໃນສະໜາມຮົບ ແລະ ຄົນອື່ນຈະມາກິນໝາກອະງຸ່ນນັ້ນ. ມີຜູ້ໃດແດ່ທີ່ຫາກໍໝັ້ນຜູ້ຍິງ ແລະ ຍັງບໍ່ໄດ້ທັນໄດ້ແຕ່ງງານກັບນາງ? ຖ້າມີ ໃຫ້ຜູ້ນັ້ນກັບເມືອເຮືອນ, ບໍ່ດັ່ງນັ້ນລາວອາດຈະຕາຍໃນສະໜາມຮົບ ແລະ ຄົນອື່ນກໍຈະມາແຕ່ງງານກັບນາງ”. ແລ້ວນາຍທະຫານຈະກ່າວຕື່ມອີກວ່າ, “ມີຜູ້ໃດມີຄວາມຢ້ານ ຫລື ທໍ້ຖອຍໃຈ? ຈົ່ງໃຫ້ຜູ້ນັ້ນກັບເມືອເຮືອນໄປ ກ່ອນທີ່ຈະເຮັດໃຫ້ທະຫານຮ່ວມຊາດອິດສະຣາເອນຂອງລາວທໍ້ຖອຍໃຈເໝືອນກັນ”. ເມື່ອນາຍທະຫານກ່າວຕໍ່ກອງທັບຈົບແລ້ວ, ພວກເຂົາກໍຈະແຕ່ງຕັ້ງຜູ້ບັນຊາການກອງທັບນັ້ນ.
ເມື່ອພວກເຈົ້າເດີນຂະບວນເຂົ້າໄປໂຈມຕີເມືອງໜຶ່ງ, ຈົ່ງຍື່ນຂໍ້ສະເໜີໃຫ້ປະຊາຊົນຂອງເມືອງນັ້ນຍອມເຈລະຈາຢ່າງສັນຕິ. ຖ້າພວກເຂົາຍອມຮັບຂໍ້ສະເໜີ ແລະ ເປີດປະຕູເມືອງຂອງຕົນໃຫ້, ທຸກຄົນທີ່ຢູ່ໃນເມືອງນັ້ນຈະຖືກເກນແຮງງານ ແລະ ຈະຕ້ອງເຮັດວຽກໃຫ້ພວກເຈົ້າ. ຖ້າພວກເຂົາບໍ່ຍອມເຈລະຈາຢ່າງສັນຕິ ແລະ ຕໍ່ສູ້ກັບພວກເຈົ້າ, ຈົ່ງປິດລ້ອມເມືອງນັ້ນ. ເມື່ອພຣະເຈົ້າຢາເວ ພຣະເຈົ້າຂອງພວກເຈົ້າມອບເມືອງນັ້ນໄວ້ໃນມືຂອງພວກເຈົ້າ, ຈົ່ງໃຊ້ດາບຂ້າຜູ້ຊາຍທຸກຄົນທີ່ຢູ່ໃນເມືອງນັ້ນ. ສ່ວນແມ່ຍິງ, ເດັກນ້ອຍ, ຝູງສັດ ແລະ ຊັບສິນຕ່າງໆໃນເມືອງນັ້ນ, ພວກເຈົ້າອາດຈະຢຶດເອົາສິ່ງເຫລົ່ານີ້ມາເປັນຂອງພວກເຈົ້າເອງ ແລະ ພວກເຈົ້າອາດນຳໃຊ້ທຸກສິ່ງທີ່ຢຶດມາໄດ້ຈາກສັດຕູທີ່ພຣະເຈົ້າຢາເວ ພຣະເຈົ້າຂອງພວກເຈົ້າມອບໃຫ້ພວກເຈົ້ານັ້ນ. ນີ້ແມ່ນວິທີທີ່ພວກເຈົ້າຈະປະຕິບັດຕໍ່ເມືອງທັງໝົດທີ່ຢູ່ຫ່າງໄກຈາກພວກເຈົ້າ ແລະ ບໍ່ແມ່ນເມືອງທີ່ເປັນຂອງຊົນຊາດໃກ້ຄຽງ.
ເຖິງຢ່າງໃດກໍຕາມ, ໃນເມືອງຕ່າງໆຂອງປະເທດທີ່ພຣະເຈົ້າຢາເວ ພຣະເຈົ້າຂອງພວກເຈົ້າກຳລັງມອບໃຫ້ເປັນມໍລະດົກຂອງພວກເຈົ້ານັ້ນ, ຢ່າໄວ້ຊີວິດ ຈົ່ງທຳລາຍທຸກສິ່ງທີ່ມີລົມຫາຍໃຈ. ຈົ່ງທຳລາຍລ້າງໃຫ້ໝົດສິ້ນໄປ,1 ຊາວຮິດຕີ, ຊາວອາໂມ, ຊາວການາອານ, ຊາວເປຣີຊີ, ຊາວຮີວີ ແລະ ຊາວເຢບຸດ ຕາມທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ສັ່ງພວກເຈົ້າໄວ້. ບໍ່ດັ່ງນັ້ນພວກເຂົາຈະສອນໃຫ້ພວກເຈົ້າເຮັດສິ່ງທີ່ໜ້າກຽດຊັງໂດຍການກາບໄຫວ້ພະອື່ນຕາມພວກເຂົາ ແລະ ພວກເຈົ້າຈະເຮັດບາບຕໍ່ສູ້ພຣະເຈົ້າຢາເວ ພຣະເຈົ້າຂອງພວກເຈົ້າ.
ເມື່ອພວກເຈົ້າປິດລ້ອມເມືອງຢູ່ດົນນານແລ້ວ, ຈົ່ງຕໍ່ສູ້ເພື່ອຢຶດເອົາເມືອງນັ້ນ, ຢ່າທຳລາຍຕົ້ນໄມ້ໂດຍໃຊ້ຂວານປ້ຳພວກມັນຖິ້ມ, ເພາະພວກເຈົ້າຈະໄດ້ກິນໝາກຂອງມັນ. ຢ່າຕັດຕົ້ນໄມ້ຖິ້ມ, ຕົ້ນໄມ້ໃນທົ່ງນາເປັນມະນຸດບໍ ພວກເຈົ້າຈຶ່ງຈະຕ້ອງປິດລ້ອມພວກມັນ?2 ເຖິງຢ່າງໃດກໍຕາມ, ພວກເຈົ້າອາດຕັດຕົ້ນໄມ້ທີ່ພວກເຈົ້າຮູ້ວ່າບໍ່ແມ່ນຕົ້ນໄມ້ກິນໝາກໄດ້ ແລະ ນຳໃຊ້ຕົ້ນໄມ້ເພື່ອໃຊ້ເປັນເຄື່ອງປິດລ້ອມເມືອງຂອງສັດຕູຈົນກວ່າເມືອງຈະຕົກເປັນຂອງພວກເຈົ້າ.
Source notes (2)
- Footnote ຄຳນີ້ໃນພາສາເຮັບເຣີໝາຍເຖິງສິ່ງຂອງ ຫລື ບຸກຄົນທີ່ຖວາຍແກ່ພຣະເຈົ້າຢາເວແລ້ວບໍ່ອາດຮຽກຄືນໄດ້ ຈະຕ້ອງທຳລາຍລ້າງໃຫ້ໝົດສິ້ນໄປ
- Footnote ຫລື ຕົກເປັນຂອງຜູ້ທີ່ປິດລ້ອມ, ເພາະໝາກໄມ້ເປັນຜົນປະໂຫຍດຂອງປະຊາຊົນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.