Biblica® Open Lao Contemporary Version
ໂກໂລຊາຍ 4
ຝ່າຍນາຍທັງຫລາຍ ຈົ່ງປະຕິບັດຕໍ່ຂ້າທາດຂອງຕົນຢ່າງຖືກຕ້ອງ ແລະ ຍຸຕິທຳ ເພາະພວກເຈົ້າຮູ້ຢູ່ວ່າພວກເຈົ້າກໍມີນາຍອົງໜຶ່ງຢູ່ໃນສະຫວັນເໝືອນກັນ.
ຄຳແນະນໍາເພີ່ມເຕີມ
ຈົ່ງອຸທິດຕົນໃນການອະທິຖານ, ຈົ່ງເຝົ້າລະວັງ ແລະ ໂມທະນາຂອບພຣະຄຸນ. ແລະ ຈົ່ງອະທິຖານເພື່ອພວກເຮົາດ້ວຍ ຂໍໃຫ້ພຣະເຈົ້າເປີດປະຕູສຳລັບຂໍ້ຄວາມຂອງພວກເຮົາ ເພື່ອພວກເຮົາຈະໄດ້ປະກາດຂໍ້ເລິກລັບຂອງພຣະຄຣິດເຈົ້າ, ການທີ່ເຮົາຖືກຈໍາຈອງຢູ່ກໍເພາະເລື່ອງນີ້ແຫລະ. ຈົ່ງອະທິຖານເພື່ອວ່າເຮົາຈະໄດ້ປະກາດຂໍ້ເລິກລັບນັ້ນຢ່າງຈະແຈ້ງຕາມທີ່ເຮົາຄວນຈະກ່າວ. ຈົ່ງສະຫລາດໃນການປະຕິບັດຕໍ່ຄົນພາຍນອກ ຈົ່ງໃຊ້ທຸກໂອກາດໃຫ້ເປັນປະໂຫຍດທີ່ສຸດ. ຈົ່ງໃຫ້ວາຈາຂອງພວກເຈົ້າເຕັມດ້ວຍພຣະຄຸນຢູ່ສະເໝີ, ປະສົມດ້ວຍເກືອ ເພື່ອວ່າພວກເຈົ້າຈະໄດ້ຮູ້ວ່າຄວນຕອບທຸກຄົນຢ່າງໃດ.
ຄຳທັກທາຍສຸດທ້າຍ
ຕີຂີໂກ ຈະແຈ້ງຂ່າວທັງໝົດກ່ຽວກັບເຮົາໃຫ້ພວກເຈົ້າຮູ້. ລາວເປັນນ້ອງຮັກ, ເປັນຜູ້ຮັບໃຊ້ທີ່ສັດຊື່ ແລະ ເປັນເພື່ອນຮ່ວມຮັບໃຊ້ໃນອົງພຣະຜູ້ເປັນເຈົ້າ. ເຮົາກຳລັງສົ່ງລາວມາຫາພວກເຈົ້າກໍເພື່ອຈຸດປະສົງທີ່ຊັດເຈນທີ່ພວກເຈົ້າຈະໄດ້ຮູ້ກ່ຽວກັບສະພາບການຂອງພວກເຮົາ1 ແລະ ເພື່ອລາວຈະໄດ້ໜູນໃຈພວກເຈົ້າ. ລາວຈະມາພ້ອມກັບໂອເນຊີໂມ ນ້ອງຮັກ ແລະ ສັດຊື່ຂອງພວກເຮົາ, ລາວເປັນຄົນໜຶ່ງໃນພວກເຈົ້າ. ພວກເຂົາຈະບອກທຸກຢ່າງທີ່ເກີດຂຶ້ນຢູ່ທີ່ນີ້ໃຫ້ພວກເຈົ້າຟັງ.
ອາຣິດຕາໂຂ ເພື່ອນນັກໂທດຂອງເຮົາ ແລະ ມາຣະໂກ ຍາດພີ່ນ້ອງຂອງບາຣະນາບາ ກໍຝາກຄວາມຄິດເຖິງມາຍັງພວກເຈົ້າເໝືອນກັນ. (ພວກເຈົ້າຄົງໄດ້ຮັບຄຳແນະນໍາແລ້ວວ່າໃຫ້ຕ້ອນຮັບມາຣະໂກຖ້າລາວມາຫາພວກເຈົ້າ.)
ແລະ ເຢຊູ ຜູ້ທີ່ຄົນເອີ້ນກັນວ່າຢູສະໂຕ ກໍຝາກຄວາມຄິດເຖິງມາຍັງພວກເຈົ້າເໝືອນກັນ. ມີພຽງແຕ່ຄົນເຫລົ່ານີ້ເທົ່ານັ້ນທີ່ເປັນຄົນຢິວໃນທ່າມກາງເພື່ອນຮ່ວມງານຂອງເຮົາເພື່ອອານາຈັກຂອງພຣະເຈົ້າ ແລະ ພວກເຂົາໄດ້ໜູນໃຈເຮົາຫລາຍ.
ເອປາຟາ ຜູ້ເປັນຄົນໜຶ່ງໃນພວກເຈົ້າ ແລະ ເປັນຜູ້ຮັບໃຊ້ຂອງພຣະຄຣິດເຈົ້າເຢຊູກໍຝາກຄວາມຄິດເຖິງມາຍັງພວກເຈົ້າເໝືອນກັນ. ເພິ່ນໄດ້ປ້ຳສູ້ອະທິຖານເພື່ອພວກເຈົ້າຢູ່ສະເໝີ ເພື່ອໃຫ້ພວກເຈົ້າຕັ້ງໝັ້ນຄົງຢູ່ໃນຄວາມປະສົງຂອງພຣະເຈົ້າ, ເປັນຜູ້ໃຫຍ່ ແລະ ມີຄວາມໝັ້ນໃຈຢ່າງເຕັມສ່ວນ. ເຮົາເປັນພະຍານຝ່າຍເພິ່ນໄດ້ວ່າເພິ່ນທຳງານໜັກໜ່ວງເພື່ອພວກເຈົ້າ ແລະ ເພື່ອຄົນທັງຫລາຍທີ່ຢູ່ເມືອງລາວດີເກອາ ແລະ ທັງຄົນທີ່ຢູ່ເມືອງເຮຍຣາໂປລີ.
ລູກາ ເພື່ອນທີ່ຮັກຂອງພວກເຮົາຜູ້ເປັນໝໍ ແລະ ເດມາ ກໍຝາກຄວາມຄິດເຖິງມາຍັງພວກເຈົ້າ.
ເຮົາຂໍຝາກຄວາມຄິດເຖິງໄປຍັງພີ່ນ້ອງທັງຫລາຍທີ່ຢູ່ເມືອງລາວດີເກອາ ແລະ ເຖິງນາງນິມຟາ ແລະ ຄຣິສຕະຈັກທີ່ຢູ່ໃນເຮືອນຂອງນາງເໝືອນກັນ.
ຫລັງຈາກໄດ້ອ່ານຈົດໝາຍສະບັບນີ້ແລ້ວ ໃຫ້ສັງເກດວ່າມີການອ່ານຈົດໝາຍນີ້ໃນຄຣິສຕະຈັກທີ່ຢູ່ເມືອງລາວດີເກອາເໝືອນກັນ ແລະ ຂະນະດຽວກັນກໍຂໍໃຫ້ພວກເຈົ້າຮັບຈົດໝາຍຈາກເມືອງລາວດີເກອາມາອ່ານເໝືອນກັນ.
ຈົ່ງບອກອາຂີໂປວ່າ: “ຈົ່ງເຮັດພັນທະກິດທີ່ເຈົ້າໄດ້ຮັບມອບໝາຍໃນອົງພຣະຜູ້ເປັນເຈົ້າໃຫ້ສຳເລັດ”.
ເຮົາໂປໂລ ຂຽນຄຳທັກທາຍດ້ວຍມືຂອງເຮົາເອງ. ຂໍໃຫ້ລະນຶກເຖິງໂສ້ຂອງເຮົາດ້ວຍ. ຂໍໃຫ້ພຣະຄຸນຈົ່ງສະຖິດຢູ່ກັບພວກເຈົ້າທັງຫລາຍ.
Source notes (1)
- Footnote ເອກະສານເກົ່າທີ່ຂຽນດ້ວຍມືບາງສະບັບວ່າ ເພື່ອ ລາວ ຈະໄດ້ຮູ້ ເຖິງ ການເປັນຢູ່ຂອງ ພວກເຈົ້າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.