Biblica® Open Lao Contemporary Version
1 ເທສະໂລນິກ 1
ຈົດໝາຍສະບັບນີ້ຈາກເຮົາໂປໂລ, ຊີລາ1 ແລະ ຕີໂມທຽວ,
ເຖິງຄຣິສຕະຈັກຂອງຊາວເທສະໂລນິກໃນພຣະເຈົ້າພຣະບິດາ ແລະ ໃນພຣະເຢຊູຄຣິດເຈົ້າອົງພຣະຜູ້ເປັນເຈົ້າ:
ຂໍໃຫ້ພຣະຄຸນ ແລະ ສັນຕິສຸກຈົ່ງມີແກ່ພວກເຈົ້າທັງຫລາຍ.
ໂມທະນາຂອບພຣະຄຸນພຣະເຈົ້າສຳລັບຄວາມເຊື່ອຂອງຊາວເທສະໂລນິກ
ພວກເຮົາຂອບພຣະຄຸນພຣະເຈົ້າສຳລັບພວກເຈົ້າທຸກຄົນ ແລະ ກ່າວເຖິງພວກເຈົ້າໃນຄຳອະທິຖານຂອງພວກເຮົາຢ່າງຕໍ່ເນື່ອງ. ຕໍ່ໜ້າພຣະເຈົ້າພຣະບິດາຂອງພວກເຮົາ ພວກເຮົາໄດ້ລະນຶກເຖິງການງານຂອງພວກເຈົ້າອັນເກີດມາຈາກຄວາມເຊື່ອ, ການເຮັດວຽກໜັກຂອງພວກເຈົ້າທີ່ເກີດຈາກຄວາມຮັກ ແລະ ຄວາມອົດທົນຂອງພວກເຈົ້າທີ່ໄດ້ຮັບແຮງບັນດານໃຈມາຈາກຄວາມຫວັງໃນພຣະເຢຊູຄຣິດເຈົ້າຜູ້ເປັນອົງພຣະຜູ້ເປັນເຈົ້າຂອງພວກເຮົາ.
ພີ່ນ້ອງທັງຫລາຍຜູ້ເປັນທີ່ຮັກຂອງພຣະເຈົ້າເອີຍ, ພວກເຮົາຮູ້ວ່າພຣະອົງໄດ້ເລືອກເອົາພວກເຈົ້າ, ເພາະວ່າຂ່າວປະເສີດຂອງພວກເຮົາທີ່ໄດ້ມາເຖິງພວກເຈົ້າບໍ່ແມ່ນພຽງແຕ່ດ້ວຍຖ້ອຍຄຳເທົ່ານັ້ນ ແຕ່ໄດ້ມາດ້ວຍລິດອຳນາດ, ດ້ວຍພຣະວິນຍານບໍລິສຸດເຈົ້າ ແລະ ດ້ວຍຄວາມເຊື່ອໝັ້ນອັນເລິກເຊິ່ງ. ພວກເຈົ້າກໍຮູ້ວ່າພວກເຮົາໄດ້ດຳເນີນຊີວິດຢ່າງໃດໃນທ່າມກາງພວກເຈົ້າເພື່ອເຫັນແກ່ພວກເຈົ້າທັງຫລາຍ. ພວກເຈົ້າໄດ້ກາຍເປັນຜູ້ທີ່ເຮັດຕາມແບບຢ່າງຂອງພວກເຮົາ ແລະ ຂອງອົງພຣະຜູ້ເປັນເຈົ້າ, ເພາະພວກເຈົ້າໄດ້ຕ້ອນຮັບເອົາພຣະຄຳໃນທ່າມກາງຄວາມທຸກທໍລະມານຢ່າງໜັກໜ່ວງດ້ວຍຄວາມຊື່ນຊົມຍິນດີທີ່ພຣະວິນຍານບໍລິສຸດເຈົ້າໄດ້ມອບໃຫ້. ດັ່ງນັ້ນ ພວກເຈົ້າຈຶ່ງກາຍເປັນແບບຢ່າງໃຫ້ແກ່ຄົນທີ່ເຊື່ອທັງໝົດໃນແຂວງມາເກໂດເນຍ ແລະ ແຂວງອະຂາຢາ. ພຣະຄຳຂອງອົງພຣະຜູ້ເປັນເຈົ້າໄດ້ດັງອອກຈາກພວກເຈົ້າໄປ ບໍ່ແມ່ນແຕ່ຢູ່ໃນແຂວງມາເກໂດເນຍ ແລະ ໃນແຂວງອະຂາຢາເທົ່ານັ້ນ ຄວາມເຊື່ອໃນພຣະເຈົ້າຂອງພວກເຈົ້າກໍໄດ້ກາຍເປັນທີ່ຮູ້ຈັກໄປທົ່ວທຸກຫົນທຸກແຫ່ງ. ເຫດສະນັ້ນ ພວກເຮົາຈຶ່ງບໍ່ຈໍາເປັນຕ້ອງເວົ້າຫຍັງກ່ຽວກັບເລື່ອງນີ້ອີກ, ເພາະພວກເຂົາເອງໄດ້ເວົ້າເຖິງພວກເຈົ້າວ່າພວກເຈົ້າໄດ້ຕ້ອນຮັບພວກເຮົາຢ່າງໃດ. ພວກເຂົາຍັງບອກອີກວ່າພວກເຈົ້າໄດ້ຫັນໜີຈາກຮູບເຄົາລົບມາຫາພຣະເຈົ້າ ເພື່ອຮັບໃຊ້ພຣະເຈົ້າອົງທ່ຽງແທ້ ແລະ ຜູ້ມີຊີວິດຢູ່, ແລະ ຄອຍຖ້າພຣະບຸດຂອງພຣະອົງທີ່ຈະມາຈາກສະຫວັນ, ຜູ້ທີ່ພຣະອົງໄດ້ໃຫ້ເປັນຄືນມາຈາກຕາຍ ຄືພຣະເຢຊູຄຣິດເຈົ້າ, ຜູ້ທີ່ກອບກູ້ເອົາພວກເຮົາທັງຫລາຍໃຫ້ພົ້ນຈາກຄວາມໂກດຮ້າຍທີ່ກຳລັງຈະມາເຖິງ.
Source notes (1)
- Footnote ພາສາກຣີກວ່າ ຊີນວານັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.