Biblica® Open Lao Contemporary Version
ອາໂມດ 4
ອິດສະຣາເອນບໍ່ໄດ້ຫັນກັບມາຫາພຣະເຈົ້າ
ຈົ່ງຟັງຖ້ອຍຄຳນີ້, ບັນດາງົວແມ່ແຫ່ງບາຊານ ເຊິ່ງຢູ່ເທິງພູເຂົາຊາມາເຣຍ,
ຄືພວກແມ່ຍິງທີ່ກົດຂີ່ຄົນທຸກຍາກ ແລະ ຢຽບຢ່ຳຄົນຂັດສົນ
ແລະ ຄົນທີ່ເວົ້າກັບຜົວຂອງຕົນວ່າ, “ຊ່ວຍເອົາເຄື່ອງດື່ມມາໃຫ້ພວກເຮົາແດ່!”
ພຣະເຈົ້າຢາເວ ອົງເຈົ້ານາຍໄດ້ປະຕິຍານໂດຍຄວາມບໍລິສຸດຂອງພຣະອົງວ່າ:
“ເວລານັ້ນຈະມາເຖິງຢ່າງແນ່ນອນ
ເມື່ອພວກເຈົ້າຈະຖືກລາກໄປດ້ວຍຂໍເກາະ
ພວກສຸດທ້າຍຈະຖືກລາກໄປດ້ວຍເບັດ.
ພວກເຈົ້າແຕ່ລະຄົນຈະອອກໄປຊື່
ຜ່ານຮອຍແຕກຂອງກຳແພງ.
ພວກເຈົ້າຈະຖືກໂຍນອອກໄປທີ່ຮານໂມນ1”.
ພຣະເຈົ້າຢາເວປະກາດດັ່ງນັ້ນ.
“ຈົ່ງໄປທີ່ເບັດເອນ ແລະ ເຮັດບາບ;
ຈົ່ງໄປທີ່ກິນການ ແລະ ເຮັດບາບຫລາຍຂຶ້ນໄປອີກ.
ເອົາເຄື່ອງບູຊາຂອງພວກເຈົ້າໄປຖວາຍທຸກເຊົ້າ,
ເອົາໜຶ່ງສ່ວນສິບຂອງພວກເຈົ້າໄປຖວາຍທຸກສາມປີ.2
ເອົາເຂົ້າຈີ່ໃສ່ເຊື້ອແປ້ງມາເຜົາຖວາຍເປັນເຄື່ອງບູຊາຂອບພຣະຄຸນ
ແລະ ອວດອ້າງເຄື່ອງບູຊາຕາມຄວາມສະໝັກໃຈຂອງພວກເຈົ້າ
ຈົ່ງອວດອ້າງສິ່ງເຫລົ່ານັ້ນ ພວກເຈົ້າ ຊາວອິດສະຣາເອນ,
ໃນເມື່ອພວກເຈົ້າຮັກທີ່ຈະເຮັດເຊັ່ນນັ້ນ”,
ພຣະເຈົ້າຢາເວ ອົງເຈົ້ານາຍປະກາດດັ່ງນັ້ນ.
“ເຮົາໃຫ້ພວກເຈົ້າທ້ອງແຫ້ງ3ໃນທຸກໆນະຄອນ
ບໍ່ມີອາຫານກິນໃນທຸກໆເມືອງ,
ເຖິງປານນັ້ນ ພວກເຈົ້າກໍບໍ່ຍອມກັບມາຫາເຮົາ”,
ພຣະເຈົ້າຢາເວປະກາດດັ່ງນັ້ນ.
“ເຮົາໄດ້ງົດໃຫ້ຝົນແກ່ພວກເຈົ້າດ້ວຍ
ຍັງສາມເດືອນກ່ອນເຖິງລະດູເກັບກ່ຽວ
ເຮົາໄດ້ໃຫ້ຝົນຕົກໃນເມືອງໜຶ່ງ,
ແຕ່ບໍ່ໃຫ້ຝົນຕົກໃນອີກເມືອງໜຶ່ງ.
ນາໜຶ່ງມີຝົນ;
ອີກນາໜຶ່ງບໍ່ມີຝົນ ແລະ ເຂົ້າກໍຈະຫ່ຽວແຫ້ງໄປ.
ຄົນທັງຫລາຍໂຊເຊຈາກເມືອງໜຶ່ງໄປອີກເມືອງໜຶ່ງເພື່ອຫານ້ຳ
ແຕ່ກໍໄດ້ບໍ່ພໍດື່ມ,
ເຖິງປານນັ້ນພວກເຈົ້າກໍບໍ່ຍອມກັບມາຫາເຮົາ”,
ພຣະເຈົ້າຢາເວປະກາດດັ່ງນັ້ນ.
“ຫລາຍຄັ້ງທີ່ເຮົາໂຈມຕີສວນ ແລະ ສວນອະງຸ່ນຂອງພວກເຈົ້າ,
ພືດຜົນຖືກທຳລາຍ ແລະ ຂຶ້ນລາ.
ມີຕັກແຕນກັດກິນຕົ້ນໝາກເດື່ອ ແລະ ຕົ້ນໝາກກອກຂອງພວກເຈົ້າ.
ເຖິງປານນັ້ນ ພວກເຈົ້າກໍບໍ່ຍອມກັບມາຫາເຮົາ”.
ພຣະເຈົ້າຢາເວປະກາດດັ່ງນັ້ນ.
“ເຮົາໄດ້ສົ່ງໄພພິບັດຕ່າງໆມາທ່າມກາງພວກເຈົ້າ
ເໝືອນທີ່ເຮົາໄດ້ເຮັດແກ່ເອຢິບ.
ເຮົາໄດ້ຂ້າຊາຍໜຸ່ມຂອງພວກເຈົ້າດ້ວຍດາບ,
ພ້ອມກັບຂ້າມ້າທັງຫລາຍທີ່ພວກເຈົ້າຢຶດມາໄດ້.
ເຮົາໄດ້ເຮັດໃຫ້ກິ່ນເໝັນທີ່ກຸ້ມໄປທົ່ວຄ້າຍພັກພັດເຂົ້າດັງຂອງພວກເຈົ້າ.
ເຖິງປານນັ້ນ ພວກເຈົ້າກໍບໍ່ຍອມກັບມາຫາເຮົາ”,
ພຣະເຈົ້າຢາເວປະກາດດັ່ງນັ້ນ.
“ເຮົາໄດ້ໂຄ່ນລົ້ມພວກເຈົ້າບາງຄົນໄປ
ເໝືອນທີ່ເຮົາ4ໄດ້ໂຄ່ນລົ້ມໂຊໂດມ ແລະ ໂກໂມຣາ.
ພວກເຈົ້າເໝືອນດົ້ນຟືນທີ່ຖືກດຶງອອກມາຈາກກອງໄຟ,
ເຖິງປານນັ້ນ ພວກເຈົ້າກໍບໍ່ຍອມກັບມາຫາເຮົາ”,
ພຣະເຈົ້າຢາເວປະກາດດັ່ງນັ້ນ.
“ເຫດສະນັ້ນ ອິດສະຣາເອນ ເຮົາຈະເຮັດກັບເຈົ້າດັ່ງນີ້,
ແລະ ເພາະເຮົາຈະເຮັດກັບເຈົ້າດັ່ງນີ້,
ອິດສະຣາເອນ, ຈົ່ງຕຽມໂຕພົບກັບພຣະເຈົ້າຂອງເຈົ້າ”.
ພຣະອົງຜູ້ກໍ່ຮ່າງສ້າງພູເຂົາທັງຫລາຍ
ຜູ້ສ້າງລົມ,
ແລະ ຜູ້ທີ່ສະແດງຄວາມຄິດໃຫ້ແກ່ມະນຸດ,
ພຣະອົງຜູ້ເຮັດໃຫ້ປ່ຽນຮຸ່ງເຊົ້າໃຫ້ເປັນຄວາມມືດມິດ,
ແລະ ດຳເນີນການຢູ່ເທິງເບື້ອງສູງຂອງໂລກ
ນາມຂອງພຣະອົງຄືພຣະເຈົ້າຢາເວ ພຣະເຈົ້າຜູ້ມີລິດອຳນາດຍິ່ງໃຫຍ່.
Source notes (4)
- Footnote ພາສາເຮັບເຣີວ່າ ຈະຖືກໂຍນອອກໄປ ໂອ ພູເຂົາແຫ່ງການກົດຂີ່ຂົ່ມເຫັງ (ເບິ່ງສະບັບ LXX.)
- Footnote ຫລື ຖວາຍໃນວັນທີສາມ
- Footnote ພາສາເຮັບເຣີວ່າ ໃຫ້ແຂ້ວຂອງເຈົ້າສະອາດ
- Footnote ພາສາເຮັບເຣີວ່າ ພຣະເຈົ້າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.