Biblica® Open Lao Contemporary Version
ອາໂມດ 3
ເອີ້ນພະຍານມາກ່າວໂທດອິດສະຣາເອນ
ປະຊາຊົນອິດສະຣາເອນ, ຈົ່ງຟັງຖ້ອຍຄຳຂອງພຣະເຈົ້າຢາເວທີ່ຕໍ່ວ່າພວກເຈົ້າ ຕໍ່ວ່າຄອບຄົວທັງໝົດທີ່ເຮົາໄດ້ນຳອອກມາຈາກເອຢິບ ດັ່ງນີ້ວ່າ:
“ພວກເຈົ້າເທົ່ານັ້ນທີ່ເຮົາໄດ້ເລືອກໄວ້
ຈາກຊົນຊາດທັງໝົດໃນໂລກນີ້;
ເຫດສະນັ້ນ ເຮົາຈະລົງໂທດພວກເຈົ້າ
ເພາະບາບທັງໝົດຂອງພວກເຈົ້າ”.
ສອງຄົນຈະຍ່າງໄປດ້ວຍກັນ
ໂດຍພວກເຂົາບໍ່ໄດ້ຕົກລົງກັນໄວ້ກ່ອນໄດ້ບໍ?
ເມື່ອໂຕສິງລ່າເຫຍື່ອບໍ່ໄດ້
ມັນກໍຈະແຜດສຽງດັງຢູ່ໃນປ່າບໍ?
ເມື່ອມັນຈັບສັດຫຍັງບໍ່ໄດ້
ມັນຈະຮ້ອງຄວນຄາງຢູ່ໃນຖ້ຳບໍ?
ເມື່ອບໍ່ໄດ້ວາງເຫຍື່ອລໍ້ໄວ້
ນົກຈະຕົກລົງໃນກັບດັກທີ່ວາງຢູ່ທີ່ພື້ນດິນໄດ້ບໍ?
ຖ້າບໍ່ມີສິ່ງໃດໄປຕິດຢູ່ທີ່ນັ້ນ
ກັບດັກຈະລັ່ນຂຶ້ນໄດ້ບໍ?
ເມື່ອສຽງແກດັງຂຶ້ນໃນເມືອງ
ຄົນທັງຫລາຍຈະບໍ່ຕົກໃຈບໍ?
ເມື່ອເກີດໄພພິບັດໃນເມືອງໃດ
ພຣະເຈົ້າຢາເວບໍ່ໄດ້ເປັນຜູ້ບັນດານໃຫ້ເກີດບໍ?
ແນ່ນອນ ພຣະເຈົ້າຢາເວ ອົງເຈົ້ານາຍຈະບໍ່ກະທຳສິ່ງໃດ
ໂດຍບໍ່ເປີດເຜີຍແຜນການຂອງພຣະອົງ
ໃຫ້ບັນດາຜູ້ທຳນວາຍທີ່ເປັນຜູ້ຮັບໃຊ້ຂອງພຣະອົງໄດ້ຮູ້.
ເມື່ອໂຕສິງໄດ້ແຜດສຽງ
ຜູ້ໃດຈະບໍ່ຢ້ານ?
ເມື່ອພຣະເຈົ້າຢາເວ ອົງເຈົ້ານາຍໄດ້ກ່າວແລ້ວ
ຜູ້ໃດຈະບໍ່ກ່າວຄຳທຳນວາຍ?
ຈົ່ງປ່າວຮ້ອງແກ່ປ້ອມປ້ອງກັນແຫ່ງອາຊະໂດດ
ແລະ ແກ່ປ້ອມປ້ອງກັນແຫ່ງເອຢິບວ່າ:
“ຈົ່ງມາຊຸມນຸມກັນຢູ່ເທິງພູເຂົາຂອງຊາມາເຣຍ;
ມາເບິ່ງຄວາມສັບສົນວຸ້ນວາຍໃນເມືອງນັ້ນ
ແລະ ເບິ່ງການກົດຂີ່ຂົ່ມເຫັງທ່າມກາງປະຊາຊົນຂອງເມືອງນັ້ນ”.
ພຣະເຈົ້າຢາເວປະກາດດັ່ງນີ້ວ່າ,
“ບັນດາຜູ້ທີ່ສະສົມເຄື່ອງຂອງທີ່ປຸ້ນ ແລະ ຢຶດມາ ໄວ້ໃນປ້ອມປ້ອງກັນຕ່າງໆຂອງຕົນ
ພວກເຂົາບໍ່ຮູ້ຈັກເຮັດສິ່ງທີ່ຖືກຕ້ອງ”.
ເຫດສະນັ້ນ ພຣະເຈົ້າຢາເວອົງເຈົ້ານາຍກ່າວຈຶ່ງວ່າ:
“ສັດຕູຈະມາລ້າງຜານແຜ່ນດິນຂອງເຈົ້າ
ພວກເຂົາຈະພັງທີ່ໝັ້ນຂອງເຈົ້າລົງ
ແລະ ປຸ້ນປ້ອມປ້ອງກັນທັງຫລາຍຂອງເຈົ້າ”.
ພຣະເຈົ້າຢາເວກ່າວດັ່ງນີ້ວ່າ:
“ເໝືອນຄົນລ້ຽງແກະຊ່ວຍແກະອອກມາຈາກປາກໂຕສິງ
ໄດ້ພຽງກະດູກຂາສອງອັນ ຫລື ເສດຫູຕ່ອນດຽວສັນໃດ,
ຊາວອິດສະຣາເອນກໍຈະໄດ້ຮັບການຊ່ວຍເຫລືອແບບດຽວກັນສັນນັ້ນ,
ຄືຄົນເຫລົ່ານັ້ນທີ່ນັ່ງຢູ່ເທິງຂອບຕຽງຂອງພວກເຂົາ
ໃນຊາມາເຣຍ ແລະ ນັ່ງຢູ່ເທິງຕັ່ງນວມໃນດາມັສກັດ1”.
ອົງພຣະຜູ້ເປັນເຈົ້າ ພຣະເຈົ້າຢາເວ ພຣະເຈົ້າຜູ້ມີລິດອຳນາດຍິ່ງໃຫຍ່ປະກາດວ່າ, “ຈົ່ງຟັງ ແລ້ວໄປກ່າວໂທດເຊື້ອສາຍຂອງຢາໂຄບວ່າ,
“ໃນວັນທີ່ເຮົາລົງໂທດອິດສະຣາເອນເພາະບາບທັງຫລາຍຂອງພວກເຂົາ;
ເຮົາຈະທຳລາຍແທ່ນບູຊາແຫ່ງເບັດເອນ;
ເຂົາຂອງແທ່ນຈະຖືກຕັດອອກ
ແລະ ຫລົ່ນລົງທີ່ພື້ນ.
ເຮົາຈະພັງທະລາຍເຮືອນລະດູໜາວ
ພ້ອມທັງເຮືອນລະດູຮ້ອນລົງ;
ເຮືອນທັງຫລາຍທີ່ຕົກແຕ່ງດ້ວຍງາຊ້າງກໍຈະຖືກທຳລາຍ
ແລະ ອາຄານໃຫຍ່ທັງຫລາຍຈະສູນສິ້ນໄປ”,
ພຣະເຈົ້າຢາເວປະກາດດັ່ງນັ້ນ.
Source notes (1)
- Footnote ໃນພາສາເຮັບເຣີວັກນີ້ມີຄວາມຫມາຍບໍ່ຊັດເຈນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.