Biblica® Open Lao Contemporary Version
ອາໂມດ 2
ພຣະເຈົ້າຢາເວກ່າວດັ່ງນີ້ວ່າ:
“ເນື່ອງຈາກໂມອາບໄດ້ເຮັດບາບຊ້ຳແລ້ວຊ້ຳເລົ່າສາມສີ່ຄັ້ງ
ເຮົາຈຶ່ງບໍ່ຍົກເລີກການລົງໂທດ.
ເພາະມັນໄດ້ເຜົາກະດູກກະສັດເອໂດມ
ໃຫ້ເປັນຂີ້ເຖົ່າ,
ເຮົາຈະສົ່ງໄຟມາທີ່ໂມອາບ
ເຊິ່ງຈະເຜົາຜານປ້ອມປ້ອງກັນທັງຫລາຍຂອງເກຣິໂອດ.1
ໂມອາບຈະຫລົ້ມຈົມທ່າມກາງຄວາມວຸ້ນວາຍ
ທ່າມກາງສຽງໂຫ່ຮ້ອງອອກຮົບ ແລະ ສຽງແກດັງສະໜັ່ນ.
ເຮົາຈະທຳລາຍຜູ້ປົກຄອງມັນ
ແລະ ຂ້າບັນດາຂ້າລາຊະການພ້ອມກັບມັນດ້ວຍ”,
ພຣະເຈົ້າຢາເວກ່າວດັ່ງນັ້ນ.
ພຣະເຈົ້າຢາເວກ່າວດັ່ງນີ້ວ່າ:
“ເນື່ອງຈາກຢູດາໄດ້ເຮັດບາບຊ້ຳແລ້ວຊ້ຳອີກສາມສີ່ຄັ້ງ
ເຮົາຈຶ່ງຍົກເລີກການລົງໂທດ.
ເພາະມັນໄດ້ປະຖິ້ມກົດບັນຍັດຂອງພຣະເຈົ້າຢາເວ
ແລະ ບໍ່ໄດ້ປະຕິບັດຕາມດຳລັດຂອງພຣະອົງ,
ເພາະພະປອມທັງຫລາຍໄດ້ຊັກຊວນພວກເຂົາໃຫ້ຫລົງຕະເຫລີດໄປ
ບັນດາພະ2ທີ່ບັນພະບຸລຸດຂອງພວກເຂົາໄດ້ຫລົງຕາມໄປ,
ເຮົາຈະສົ່ງໄຟມາທີ່ຢູດາ
ເຊິ່ງຈະເຜົາຜານປ້ອມປ້ອງກັນທັງຫລາຍຂອງເຢຣູຊາເລັມ”.
ຄຳພິພາກສາອິດສະຣາເອນ
ພຣະເຈົ້າຢາເວກ່າວດັ່ງນີ້ວ່າ:
“ເນື່ອງຈາກອິດສະຣາເອນໄດ້ເຮັດບາບຊ້ຳແລ້ວຊ້ຳອີກສາມສີ່ຄັ້ງ
ເຮົາຈຶ່ງຍົກເລີກການລົງໂທດ.
ພວກເຂົາຂາຍຜູ້ບໍລິສຸດເພື່ອແລກປ່ຽນກັບເງິນ,
ແລະ ຂາຍຄົນຂັດສົນເພື່ອແລກປ່ຽນກັບເກີບຄູ່ດຽວ.
ພວກເຂົາຢຽບຢ່ຳຫົວຂອງຄົນທຸກຍາກ
ເໝືອນກັບຍ່າງຢຽບຂີ້ຝຸ່ນຢູ່ເທິງພື້ນດິນ
ແລະ ບໍ່ຍອມໃຫ້ຄວາມຍຸຕິທຳແກ່ຜູ້ຖືກກົດຂີ່.
ພໍ່ ແລະ ລູກຊາຍໃຊ້ຜູ້ຍິງຄົນດຽວກັນ
ແລະ ເປັນເຫດໃຫ້ນາມອັນສັກສິດຂອງເຮົາຖືກລົບຫລູ່.
ພວກເຂົາເອນໂຕລົງນອນຂ້າງແທ່ນບູຊາທຸກແທ່ນ
ສວມເສື້ອຜ້າທີ່ຢຶດມາຈາກການຈຳນຳ.
ພວກເຂົາດື່ມເຫລົ້າອະງຸ່ນທີ່ຢຶດມາຈາກການປັບໄໝ
ໃນເຮືອນຂອງພະຂອງພວກເຂົາ.
“ເຮົາໄດ້ທຳລາຍຊາວອາໂມຕໍ່ໜ້າພວກເຂົາ,
ທັງທີ່ອາໂມສູງສະຫງ່າເໝືອນດັ່ງຕົ້ນໄມ້ສີດາ
ແລະ ແຂງແກ່ນເໝືອນດັ່ງຕົ້ນໂອກ.
ເຮົາໄດ້ທຳລາຍຜົນຂອງພວກເຂົາທີ່ຢູ່ຂ້າງເທິງ
ແລະ ຮາກຂອງພວກເຂົາທີ່ຢູ່ຂ້າງລຸ່ມ.
ເຮົາໄດ້ນຳພວກເຈົ້າອອກມາຈາກເອຢິບ
ແລະ ນຳພາພວກເຈົ້າຜ່ານຖິ່ນແຫ້ງແລ້ງກັນດານຕະຫລອດສີ່ສິບປີ
ເພື່ອຍົກດິນແດນຂອງຊາວອາໂມໃຫ້ແກ່ພວກເຈົ້າ.
“ເຮົາຍັງໄດ້ຕັ້ງລູກຊາຍບາງຄົນຂອງພວກເຈົ້າໃຫ້ເປັນຜູ້ທຳນວາຍ
ແລະ ໄດ້ເລືອກຄົນໜຸ່ມບາງຄົນຂອງພວກເຈົ້າໃຫ້ເປັນຄົນນາຊີຣີ3
ນີ້ເປັນຄວາມຈິງບໍ່ແມ່ນບໍ ປະຊາຊົນອິດສະຣາເອນ?”
ພຣະເຈົ້າຢາເວປະກາດດັ່ງນັ້ນ.
“ແຕ່ພວກເຈົ້າກໍບັງຄັບໃຫ້ຄົນນາຊີຣີດື່ມເຫລົ້າອະງຸ່ນ
ແລະ ສັ່ງບັນດາຜູ້ທຳນວາຍບໍ່ໃຫ້ກ່າວຄຳທຳນວາຍ.
“ດັ່ງນັ້ນ ບັດນີ້ເຮົາຈະຍ່ອງພວກເຈົ້າ
ເໝືອນດັ່ງກວຽນທີ່ບັນທຸກພືດຜົນເຕັມຖືກຍ່ອງ
ຄົນທີ່ວ່ອງໄວຈະໜີບໍ່ພົ້ນ
ຄົນທີ່ແຂງແຮງຈະບໍ່ອາດຮວບຮວມກຳລັງຂອງຕົນ,
ແລະ ນັກຮົບກໍຈະເອົາຊີວິດຂອງຕົນບໍ່ພົ້ນ.
ນັກຍິງທະນູຈະບໍ່ອາດຢືນຢູ່ໄດ້,
ທະຫານບົກຈະໜີໄປບໍ່ພົ້ນ
ແລະ ທະຫານມ້າຈະເອົາຊີວິດຂອງບໍ່ພົ້ນ.
ແມ່ນແຕ່ນັກຮົບທີ່ກ້າຫານທີ່ສຸດ
ກໍຈະໜີໂຕເປົ່າໄປໃນວັນນັ້ນ”,
ພຣະເຈົ້າຢາເວປະກາດດັ່ງນັ້ນ.
Source notes (3)
- Footnote ຫລື ຂອງເມືອງຕ່າງໆຂອງມັນ
- Footnote ຫລື ຄຳຕົວະທັງຫລາຍ
- Footnote ນາຊີຣີ ແມ່ນຄົນອິດສະຣາເອນທີ່ອຸທິດຕົນແກ່ພຣະເຈົ້າ ໂດຍສາບານວ່າຈະບໍ່ດື່ມເຫລົ້າອະງຸ່ນ ຫລື ເບຍ ຫລື ຕັດຜົມ ຫລື ແຕະຕ້ອງສົບຄົນຕາຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.