Biblica® Open Lao Contemporary Version
2 ຊາມູເອນ 7
ຄຳສັນຍາຂອງພຣະເຈົ້າຕໍ່ດາວິດ
(1ຂຄ 17:1-15)
ຫລັງຈາກ ກະສັດດາວິດຍັງຢູ່ໃນວັງຂອງເພິ່ນ ແລະ ພຣະເຈົ້າຢາເວໂຜດປະທານການພັກສະຫງົບຈາກສັດຕູທັງໝົດທີ່ຢູ່ອ້ອມຮອບເພິ່ນ, ເພິ່ນໄດ້ເວົ້າກັບຜູ້ທຳນວາຍນາທານວ່າ, “ເບິ່ງແມ, ເຮົາຢູ່ໃນເຮືອນໄມ້ສີດາ, ຂະນະທີ່ຫີບພັນທະສັນຍາຂອງພຣະເຈົ້າຍັງຢູ່ໃນເຕັນ”.
ນາທານໄດ້ຕອບກະສັດວ່າ, “ສິ່ງໃດທີ່ທ່ານຄິດ, ຂໍຈົ່ງເຮັດຕາມທີ່ທ່ານຄິດ, ເພາະພຣະເຈົ້າຢາເວຢູ່ກັບທ່ານ”.
ແຕ່ໃນຄືນນັ້ນ ມີຖ້ອຍຄໍາຂອງພຣະເຈົ້າຢາເວໄດ້ມາເຖິງນາທານໂດຍກ່າວວ່າ:
“ຈົ່ງໄປ ແລະ ບອກດາວິດຜູ້ຮັບໃຊ້ຂອງເຮົາວ່າ, ‘ພຣະເຈົ້າຢາເວກ່າວວ່າ: ເຈົ້າຈະເປັນຜູ້ສ້າງວິຫານໃຫ້ເຮົາຢູ່ບໍ? ເຮົາບໍ່ໄດ້ຢູ່ໃນວິຫານເລີຍຕັ້ງແຕ່ເຮົານຳອິດສະຣາເອນອອກມາຈາກເອຢິບຈົນເຖິງທຸກວັນນີ້. ເຮົາໄດ້ຍ້າຍຈາກບ່ອນໜຶ່ງໄປຫາອີກບ່ອນໜຶ່ງໂດຍມີຫໍເຕັນເປັນບ່ອນຢູ່ຂອງເຮົາ. ບໍ່ວ່າເຮົາໄປຢູ່ໃສກັບຊາວອິດສະຣາເອນທັງໝົດ, ເຮົາເຄີຍກ່າວກັບຜູ້ປົກຄອງຄົນໃດທີ່ເຮົາສັ່ງໃຫ້ລ້ຽງດູອິດສະຣາເອນປະຊາຊົນຂອງເຮົາບໍ່ວ່າ, “ເປັນຫຍັງພວກເຈົ້າຈຶ່ງບໍ່ສ້າງວິຫານດ້ວຍໄມ້ສີດາໃຫ້ເຮົາ?” ’
“ບັດນີ້, ຈົ່ງບອກດາວິດຜູ້ຮັບໃຊ້ຂອງເຮົາວ່າ, ພຣະເຈົ້າຢາເວຜູ້ມີລິດອຳນາດຍິ່ງໃຫຍ່ກ່າວວ່າ: ‘ເຮົານຳເຈົ້າອອກມາຈາກທົ່ງຫຍ້າ, ອອກຈາກການເບິ່ງແຍງຝູງແກະ ແລະ ແຕ່ງຕັ້ງເຈົ້າເປັນຜູ້ປົກຄອງອິດສະຣາເອນປະຊາຊົນຂອງເຮົາ. ເຮົາໄດ້ຢູ່ກັບເຈົ້າທຸກບ່ອນທີ່ເຈົ້າໄປ, ແລະ ເຮົາທຳລາຍສັດຕູທັງໝົດຂອງເຈົ້າອອກໄປຕໍ່ໜ້າເຈົ້າ. ບັດນີ້ ເຮົາຈະເຮັດໃຫ້ເຈົ້າມີຊື່ສຽງເໝືອນຜູ້ຍິ່ງໃຫຍ່ທີ່ສຸດຢູ່ໃນແຜ່ນດິນໂລກ. ແລະ ເຮົາຈະຈັດຕຽມສະຖານທີ່ແຫ່ງໜຶ່ງໃຫ້ອິດສະຣາເອນປະຊາຊົນຂອງເຮົາຕັ້ງຖິ່ນຖານ ເພື່ອພວກເຂົາຈະມີບ້ານເຮືອນເປັນຂອງຕົນເອງ ແລະ ບໍ່ຕ້ອງຖືກລົບກວນອີກ. ຄົນຊົ່ວຈະບໍ່ມາຂົ່ມເຫັງພວກເຂົາອີກ, ດັ່ງທີ່ພວກເຂົາຖືກກະທໍາມາຕັ້ງແຕ່ຕົ້ນ ແລະ ເປັນຢ່າງນັ້ນຕະຫລອດມານັບຕັ້ງແຕ່ເຮົາໄດ້ແຕ່ງຕັ້ງບັນດາຜູ້ນຳ1ໃຫ້ປົກຄອງອິດສະຣາເອນປະຊາຊົນຂອງເຮົາ. ເຮົາຍັງຈະໃຫ້ເຈົ້າພັກສະຫງົບຈາກສັດຕູທັງໝົດຂອງເຈົ້າອີກດ້ວຍ.
“ ‘ພຣະເຈົ້າຢາເວປະກາດຕໍ່ເຈົ້າວ່າ ພຣະເຈົ້າຢາເວເອງຈະຕັ້ງເຊື້ອສາຍໜຶ່ງສໍາລັບເຈົ້າວ່າ: ເມື່ອເຈົ້າຕາຍໄປ ແລະ ພັກສະຫງົບໄປຢູ່ກັບບັນພະບຸລຸດຂອງເຈົ້າແລ້ວ, ເຮົາຈະຕັ້ງເຊື້ອສາຍຄົນໜຶ່ງຂອງເຈົ້າຂຶ້ນປົກຄອງແທນເຈົ້າ, ເຊິ່ງເປັນເລືອດເນື້ອຂອງເຈົ້າເອງ, ແລະ ເຮົາຈະຕັ້ງອານາຈັກຂອງລາວຂຶ້ນ. ລາວຈະເປັນຜູ້ສ້າງວິຫານເພື່ອນາມຂອງເຮົາ ແລະ ເຮົາຈະຕັ້ງບັນລັງແຫ່ງອານາຈັກຂອງລາວຕະຫລອດໄປ. ເຮົາຈະເປັນພໍ່ຂອງລາວ ແລະ ລາວຈະເປັນລູກຊາຍຂອງເຮົາ. ເມື່ອລາວເຮັດຜິດ, ເຮົາຈະລົງໂທດດ້ວຍໄມ້ແສ້ດັ່ງມະນຸດ, ໂດຍຂ້ຽນຕີລາວດ້ວຍມືຂອງມະນຸດ. ແຕ່ຄວາມຮັກໝັ້ນຄົງຂອງເຮົາຈະບໍ່ໄປຈາກລາວ, ດັ່ງທີ່ເຮົາໄດ້ເອົາໄປຈາກໂຊນຜູ້ທີ່ເຮົາປົດອອກໄປຕໍ່ໜ້າເຈົ້າ. ເຊື້ອສາຍ ແລະ ອານາຈັກຂອງເຈົ້າຈະດຳລົງຢູ່ຕະຫລອດໄປຕໍ່ໜ້າເຮົາ;2 ບັນລັງຂອງເຈົ້າຈະໝັ້ນຄົງຢູ່ຕະຫລອດໄປ’ ”.
ນາທານຈຶ່ງລາຍງານຖ້ອຍຄໍາທັງໝົດທີ່ພຣະເຈົ້າເປີດເຜີຍນີ້ໃຫ້ດາວິດຮູ້.
ຄຳອະທິຖານຂອງດາວິດ
(1ຂຄ 17:16-27)
ຫລັງຈາກນັ້ນກະສັດດາວິດຈຶ່ງເຂົ້າໄປ ແລະ ນັ່ງຢູ່ຕໍ່ໜ້າພຣະເຈົ້າຢາເວ ແລະ ເພິ່ນໄດ້ເວົ້າວ່າ:
“ຂ້າແດ່ພຣະເຈົ້າຢາເວ ອົງເຈົ້ານາຍ, ຂ້ານ້ອຍແມ່ນຜູ້ໃດ ແລະ ຄອບຄົວຂອງຂ້ານ້ອຍແມ່ນຜູ້ໃດ, ພຣະອົງຈຶ່ງນຳຂ້ານ້ອຍມາໄກຂະໜາດນີ້? ແລະ ບໍ່ພຽງເທົ່ານີ້ ຂ້າແດ່ພຣະເຈົ້າຢາເວ ອົງເຈົ້ານາຍ, ພຣະອົງຍັງກ່າວເຖິງອະນາຄົດຂອງຄອບຄົວຜູ້ຮັບໃຊ້ຂອງພຣະອົງ, ຂ້າແດ່ພຣະເຈົ້າຢາເວ ອົງເຈົ້ານາຍ, ຂໍ້ບັງຄັບນີ້ມີໄວ້ເພື່ອມະນຸດເທົ່ານັ້ນ!3
“ດາວິດຈະເວົ້າຫຍັງຫລາຍໄປກວ່ານີ້ໄດ້? ເພາະພຣະອົງຮູ້ຈັກຜູ້ຮັບໃຊ້ຂອງພຣະອົງ, ຂ້າແດ່ພຣະເຈົ້າຢາເວ ອົງເຈົ້ານາຍ. ພຣະອົງໄດ້ກະທຳສິ່ງທີ່ຍິ່ງໃຫຍ່ນີ້ ແລະ ເຮັດໃຫ້ເປັນທີ່ຮູ້ຈັກແກ່ຜູ້ຮັບໃຊ້ຂອງພຣະອົງ ເພາະເຫັນແກ່ຖ້ອຍຄໍາຂອງພຣະອົງ ແລະ ຕາມຄວາມປະສົງຂອງພຣະອົງ.
“ຂ້າແດ່ພຣະເຈົ້າຢາເວ ອົງເຈົ້ານາຍ, ພຣະອົງຍິ່ງໃຫຍ່! ດັ່ງທີ່ພວກຂ້ານ້ອຍໄດ້ຍິນດ້ວຍຫູຂອງພວກຂ້ານ້ອຍເອງ, ບໍ່ມີຜູ້ໃດເໝືອນພຣະອົງ, ບໍ່ມີພຣະເຈົ້າອື່ນໃດນອກຈາກພຣະອົງ. ແລະ ມີຊົນຊາດໃດໃນໂລກທີ່ເໝືອນອິດສະຣາເອນປະຊາຊົນຂອງພຣະອົງທີ່ພຣະເຈົ້າໄດ້ມາໄຖ່ພວກເຂົາໃນຖານະປະຊາຊົນເພື່ອພຣະອົງເອງ ແລະ ເພື່ອນຳກຽດຕິຍົດມາສູ່ນາມຂອງພຣະອົງ ແລະ ໄດ້ກະທຳການອັດສະຈັນທີ່ຍິ່ງໃຫຍ່ອັນໜ້າຢ້ານ ໂດຍຂັບໄລ່ປະຊາຊາດຕ່າງໆ ແລະ ພະຂອງພວກເຂົາອອກໄປໃຫ້ພົ້ນໜ້າປະຊາຊົນຂອງພຣະອົງ, ເຊິ່ງພຣະອົງໄດ້ໄຖ່ອອກມາຈາກເອຢິບ?4 ພຣະອົງໄດ້ຕັ້ງປະຊາຊົນອິດສະຣາເອນເປັນຂອງພຣະອົງເອງຕະຫລອດໄປ, ແລະ ຂ້າແດ່ພຣະເຈົ້າຢາເວ, ພຣະອົງໄດ້ກາຍເປັນພຣະເຈົ້າຂອງພວກເຂົາ.
“ແລະ ບັດນີ້, ຂ້າແດ່ ພຣະເຈົ້າຢາເວ ພຣະເຈົ້າ, ຂໍຮັກສາຄໍາສັນຍາທີ່ພຣະອົງໃຫ້ໄວ້ກ່ຽວກັບຜູ້ຮັບໃຊ້ຂອງພຣະອົງ ແລະ ຄອບຄົວຂອງລາວຕະຫລອດໄປ. ຂໍເຮັດຕາມດັ່ງທີ່ພຣະອົງໄດ້ສັນຍາໄວ້ດ້ວຍ, ເພື່ອນາມຂອງພຣະອົງຈະຍິ່ງໃຫຍ່ຕະຫລອດໄປ. ແລ້ວຄົນທັງຫລາຍຈະເວົ້າວ່າ, ‘ພຣະເຈົ້າຢາເວຜູ້ມີລິດອໍານາດຍິ່ງໃຫຍ່ເປັນພຣະເຈົ້າຂອງອິດສະຣາເອນ!’ ແລະ ເຊື້ອສາຍດາວິດຜູ້ຮັບໃຊ້ຂອງພຣະອົງຈະໄດ້ຮັບການສະຖາປະນາໄວ້ຕໍ່ໜ້າພຣະອົງ.
“ຂ້າແດ່ພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່, ພຣະເຈົ້າແຫ່ງອິດສະຣາເອນ, ພຣະອົງໄດ້ເປີດເຜີຍສິ່ງນີ້ແກ່ຜູ້ຮັບໃຊ້ຂອງພຣະອົງ ແລະ ກ່າວວ່າ, ‘ເຮົາຈະສ້າງຄອບຄົວໜຶ່ງເພື່ອເຈົ້າ’. ດັ່ງນັ້ນ ຜູ້ຮັບໃຊ້ຂອງພຣະອົງຈຶ່ງກ້າອະທິຖານແບບນີ້ຕໍ່ພຣະອົງ. ຂ້າແດ່ພຣະເຈົ້າຢາເວ ອົງເຈົ້ານາຍ, ພຣະອົງເປັນພຣະເຈົ້າ! ຄຳໝັ້ນສັນຍາຂອງພຣະອົງເຊື່ອຖືໄດ້ ແລະ ພຣະອົງສັນຍາຈະໃຫ້ສິ່ງດີເຫລົ່ານີ້ແກ່ຜູ້ຮັບໃຊ້ຂອງພຣະອົງ. ບັດນີ້ ຂໍໂຜດອວຍພອນຄອບຄົວຜູ້ຮັບໃຊ້ຂອງພຣະອົງໃຫ້ຍືນຍົງຢູ່ຕະຫລອດໄປໃນສາຍຕາຂອງພຣະອົງ; ເພາະພຣະອົງເປັນພຣະເຈົ້າຢາເວ ອົງເຈົ້ານາຍໄດ້ກ່າວໄວ້ເຊັ່ນນັ້ນ ແລະ ດ້ວຍການອວຍພອນຂອງພຣະອົງ ຂໍໃຫ້ຄອບຄົວຂອງຜູ້ຮັບໃຊ້ຂອງພຣະອົງໄດ້ຮັບການອວຍພອນຈາກພຣະອົງຕະຫລອດໄປດ້ວຍ”.
Source notes (4)
- Footnote ຫລື ພວກຜູ້ປົກຄອງທັງຫລາຍ
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ຕໍ່ໜ້າເຈົ້າ
- Footnote ຫລື ເຜົ່າພັນມະນຸດ
- Footnote ພາສາເຮັບເຣີວ່າ ການອັດສະຈັນສຳລັບແຜ່ນດິນຂອງພຣະອົງຕໍ່ໜ້າປະຊາຊົນຂອງພຣະອົງ ຜູ້ທີ່ພຣະອົງໄຖ່ຈາກເອຢິບ ຈາກບັນດາປະຊາຊາດ ແລະ ພະຂອງພວກເຂົາ (ເບິ່ງ 1ຂຄ 17:21)
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.