Biblica® Open Lao Contemporary Version
2 ຊາມູເອນ 6
ຫີບພັນທະສັນຍາຖືກນໍາມາທີ່ເຢຣູຊາເລັມ
(1ຂຄ 13:1-14; 15:25–16:3)
ດາວິດໄດ້ນຳເອົາທະຫານອິດສະຣາເອນທີ່ເກັ່ງກ້າທັງໝົດສາມສິບພັນຄົນມາເຕົ້າໂຮມກັນອີກ. ເພິ່ນ ແລະ ຄົນຂອງເພິ່ນໄດ້ໄປທີ່ບາອາລາ1ຢູ່ໃນຢູດາເພື່ອນຳຫີບພັນທະສັນຍາຂອງພຣະເຈົ້າຢູ່ທີ່ນັ້ນ, ເຊິ່ງເອີ້ນຕາມຊື່ຄືຊື່ຂອງພຣະເຈົ້າຢາເວຜູ້ມີລິດອໍານາດຍິ່ງໃຫຍ່, ຜູ້ນັ່ງເທິງບັນລັງເຄຣຸບລະຫວ່າງກາງຫີບພັນທະສັນຍາ. ພວກເຂົາຕັ້ງຫີບພັນທະສັນຍາຂອງພຣະເຈົ້າໃສ່ເທິງກວຽນໃໝ່ ແລະ ນຳເອົາຫີບອອກຈາກເຮືອນຂອງອາບີນາດາບ, ເຊິ່ງຢູ່ເທິງເນີນພູ. ອຸດຊາ ແລະ ອາຮີໂອລູກຊາຍຂອງອາບີນາດາບເປັນຄົນຂັບກວຽນໃໝ່. ໂດຍບັນຈຸຫີບພັນທະສັນຍາຂອງພຣະເຈົ້າ ແລະ ອາຮີໂອຍ່າງນຳໜ້າຫີບ. ດາວິດ ແລະ ປະຊາຊົນອິດສະຣາເອນທັງໝົດກໍສະເຫລີມສະຫລອງຢ່າງເຕັມທີ່ຕໍ່ໜ້າພຣະເຈົ້າຢາເວ, ມີການຮ້ອງເພງ, ບັນເລງດົນຕີ2ດ້ວຍພິນເຂົາຄູ່, ພິນໃຫຍ່, ກອງແຊັກ, ສັ່ງກະລໍ ແລະ ຕົບແສ່ງ.
ເມື່ອພວກເຂົາມາຮອດລານຟາດເຂົ້າຂອງນາໂກນ, ອຸດຊາຍື່ນມືອອກ ແລະ ຈັບຫີບພັນທະສັນຍາຂອງພຣະເຈົ້າໄວ້, ເພາະງົວເຕະສະດຸດ. ຄວາມໂກດຮ້າຍຂອງພຣະເຈົ້າຢາເວຈຶ່ງພຸ່ງຂຶ້ນຕໍ່ອຸດຊາ ເພາະການກະທໍາຂອງລາວບໍ່ຢໍາເກງພຣະເຈົ້າ; ເຫດສະນັ້ນ ພຣະເຈົ້າຈຶ່ງຂ້າລາວ ແລະ ລາວຕາຍຢູ່ຂ້າງຫີບພັນທະສັນຍາຂອງພຣະເຈົ້າຢູ່ທີ່ນັ້ນ.
ຫລັງຈາກນັ້ນ ດາວິດກໍໃຈຮ້າຍເພາະຄວາມໂກດຮ້າຍຂອງພຣະເຈົ້າຢາເວໄດ້ຕໍ່ສູ້ອຸດຊາ ແລະ ຈົນເຖິງທຸກວັນນີ້ສະຖານທີ່ແຫ່ງນັ້ນຈຶ່ງໄດ້ຖືກເອີ້ນວ່າ ເປເຣັດອຸດຊາ.3
ໃນວັນນັ້ນ ດາວິດກໍເກີດຢ້ານກົວພຣະເຈົ້າຢາເວ ແລະ ກ່າວວ່າ, “ເຮົາຈະນຳຫີບພັນທະສັນຍາຂອງພຣະເຈົ້າຢາເວກັບໄປໄດ້ຢ່າງໃດ?” ເພິ່ນບໍ່ເຕັມໃຈທີ່ຈະນຳເອົາຫີບຄຳໝັ້ນສັນຍາຂອງພຣະເຈົ້າຢາເວຢູ່ເພິ່ນກັບໄປທີ່ເມືອງດາວິດ. ແຕ່ເພິ່ນໄດ້ນຳຫີບໄປໄວ້ທີ່ເຮືອນຂອງໂອເບັດເອໂດມຊາວເມືອງກາດແທນ. ຫີບພັນທະສັນຍາຂອງພຣະເຈົ້າຢາເວກໍຍັງຢູ່ທີ່ເຮືອນຂອງໂອເບັດເອໂດມຊາວກາດເປັນເວລາສາມເດືອນ, ແລະ ພຣະເຈົ້າຢາເວໄດ້ອວຍພອນໂອເບັດເອໂດມຊາວກາດ ແລະ ທຸກຄົນໃນຄອບຄົວຂອງລາວ.
ບັດນີ້ ກະສັດດາວິດໄດ້ຍິນວ່າ, “ພຣະເຈົ້າຢາເວໄດ້ອວຍພອນຄອບຄົວໂອເບັດເອໂດມ ແລະ ທຸກສິ່ງທີ່ລາວມີຍ້ອນຫີບພັນທະສັນຍາຂອງພຣະເຈົ້າ”. ດັ່ງນັ້ນ ດາວິດຈຶ່ງໄປນໍາເອົາຫີບພັນທະສັນຍາຂອງພຣະເຈົ້າມາຈາກເຮືອນຂອງໂອເບັດເອໂດມມາທີ່ເມືອງຂອງດາວິດດ້ວຍຄວາມຊົມຊື່ນຍິນດີ. ເມື່ອພວກທີ່ຫາມຫີບພັນທະສັນຍາຂອງພຣະເຈົ້າຢາເວໄດ້ຍ່າງໄປໄດ້ຫົກກ້າວ, ດາວິດກໍຖວາຍບູຊາງົວເຖິກໂຕໜຶ່ງ ແລະ ລູກງົວເຖິກໂຕໜຶ່ງ. ດາວິດໃສ່ເສື້ອຄຸມຝ້າຍລິນິນເອໂຟດເນື້ອລະອຽດ, ເພິ່ນເຕັ້ນລຳຕໍ່ໜ້າພຣະເຈົ້າຢາເວຢ່າງສຸດກຳລັງ, ເມື່ອດາວິດ ແລະ ປະຊາຊົນອິດສະຣາເອນທັງໝົດກໍາລັງນໍາເອົາຫີບພັນທະສັນຍາຂອງພຣະເຈົ້າຢາເວໂດຍສົ່ງສຽງໂຫ່ຮ້ອງ ແລະ ສຽງແກ.
ຂະນະທີ່ຫີບພັນທະສັນຍາຂອງພຣະເຈົ້າຜ່ານເຂົ້າມາໃນເມືອງຂອງດາວິດ, ມີການລູກສາວຂອງໂຊນແນມເບິ່ງຈາກປ່ອງຢ້ຽມ. ແລະ ເຫັນກະສັດດາວິດໂດດເຕັ້ນ ແລະ ຟ້ອນລຳຕໍ່ໜ້າພຣະເຈົ້າຢາເວ, ນາງຄິດດູໝິ່ນດາວິດຢູ່ໃນໃຈຂອງຕົນ.
ພວກເຂົາໄດ້ນຳເອົາຫີບພັນທະສັນຍາຂອງພຣະເຈົ້າຢາເວມາຕັ້ງໄວ້ໃນຫໍເຕັນທີ່ດາວິດໄດ້ຈັດຕຽມໄວ້ ແລະ ດາວິດໄດ້ຖວາຍເຄື່ອງເຜົາບູຊາ ແລະ ເຄື່ອງບູຊາເພື່ອຄວາມສາມັກຄີທຳຕໍ່ໜ້າພຣະເຈົ້າຢາເວ. ຫລັງຈາກທີ່ເພິ່ນໄດ້ຖວາຍເຄື່ອງເຜົາບູຊາ ແລະ ເຄື່ອງບູຊາເພື່ອຄວາມສາມັກຄີທຳສຳເລັດແລ້ວ, ດາວິດກໍອວຍພອນແກ່ປະຊາຊົນໃນນາມຂອງພຣະເຈົ້າຢາເວຜູ້ມີລິດອໍານາດຍິ່ງໃຫຍ່. ຫລັງຈາກນັ້ນ ເພິ່ນໄດ້ເອົາເຂົ້າຈີ່, ຂະໝົມໝາກອິນທະຜາລໍາ ແລະ ຂະໜົມອະງຸ່ນແຫ້ງຢ່າງລະໜຶ່ງກ້ອນແກ່ທຸກຄົນທັງຊາຍ ແລະ ຍິງ ແລ້ວປະຊາຊົນທັງປວງພາກັນກັບບ້ານຂອງຕົນ.
ເມື່ອດາວິດກັບຄືນມາວັງເພື່ອຈະອວຍພອນຄອບຄົວຂອງຕົນ, ມີການລູກສາວຂອງໂຊນອອກມາຫາດາວິດ ແລະ ເວົ້າວ່າ, “ມື້ນີ້ກະສັດແຫ່ງອິດສະຣາເອນສ້າງຊື່ສຽງໃຫ້ຕົນເອງຫລາຍໂດຍແກ້ເຄື່ອງຕໍ່ໜ້າຂ້າທາດຍິງຄົນຮັບໃຊ້ຂອງຕົນດັ່ງຄົນໄຮ້ປັນຍາ!”
ດາວິດເວົ້າກັບມີການວ່າ, “ການເຮັດເຊັ່ນນີ້ຕໍ່ໜ້າພຣະເຈົ້າຢາເວ, ຜູ້ໄດ້ເລືອກຂ້ອຍແທນພໍ່ຂອງເຈົ້າ ຫລື ຄົນໃດຄົນໜຶ່ງໃນຄອບຄົວຂອງເພິ່ນ ເມື່ອພຣະອົງແຕ່ງຕັ້ງຂ້ອຍເປັນຜູ້ປົກຄອງອິດສະຣາເອນປະຊາຊົນຂອງພຣະເຈົ້າຢາເວ ຂ້ອຍຈະສະຫລອງຕໍ່ໜ້າພຣະເຈົ້າຢາເວ. ເຖິງແມ່ນວ່າຂ້ອຍຈະເບິ່ງໄຮ້ກຽດຫລາຍກວ່ານີ້ ແລະ ຂ້ອຍຈະໄດ້ຮັບຄວາມອັບອາຍຂາຍໜ້າໃນສາຍຕາຂອງຂ້ອຍເອງ. ແຕ່ພວກຂ້າທາດຍິງທີ່ເຈົ້າເວົ້າເຖິງນັ້ນ ຂ້ອຍກໍໄດ້ຮັບຄໍາຍົກຍ້ອງ”.
ແລະ ມີການລູກສາວຂອງໂຊນກໍບໍ່ມີລູກຕະຫລອດຊີວິດຂອງນາງ.
Source notes (3)
- Footnote ຄື ກີຣີອາດເຢອາຣີມ
- Footnote ສະບັບ MT. ວ່າ ສະເຫລີມສະຫລອງສະເພາະຕໍ່ໜ້າພຣະເຈົ້າຢາເວດ້ວຍການບັນເລງເຄື່ອງດົນຕີທຸກຊະນິດທີ່ເຮັດຈາກໄມ້ແປກ
- Footnote ແປວ່າ ໄພພິບັດແກ່ອຸດຊາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.