Biblica® Open Lao Contemporary Version
2 ຊາມູເອນ 4
ອີຊະໂບເຊັດຖືກຂ້າ
ເມື່ອອີຊະໂບເຊັດລູກຊາຍຂອງໂຊນໄດ້ຍິນວ່າອັບເນໄດ້ຕາຍໄປແລ້ວທີ່ເມືອງເຮັບໂຣນ, ເພິ່ນກໍຢ້ານກົວ ແລະ ອິດສະຣາເອນທັງໝົດກໍຕົກໃຈຢ້ານ. ລູກຊາຍຂອງໂຊນມີຫົວໜ້າກອງໂຈນສອງຄົນ. ຜູ້ໜຶ່ງຊື່ວ່າບາອານາ ແລະ ອີກຜູ້ໜຶ່ງຊື່ວ່າເຣກາບ; ພວກເຂົາເປັນລູກຂອງຮິມໂມນຈາກເຜົ່າເບັນຢາມິນແຫ່ງເມືອງເບເອໂຣດ ເຊິ່ງຖືວ່າເປັນສ່ວນໜຶ່ງຂອງເບັນຢາມິນ, ເພາະຊາວເບເອໂຣດໜີໄປອາໄສຢູ່ທີ່ເມືອງກິດຕາອິມ ແລະ ໄດ້ອາໄສຢູ່ທີ່ນັ້ນໃນຖານະຄົນຕ່າງຊາດຈົນເຖິງທຸກວັນນີ້.
(ໂຢນາທານລູກຊາຍຂອງໂຊນມີລູກຊາຍຄົນໜຶ່ງທີ່ຂາພິການທັງສອງຂ້າງ. ລາວມີອາຍຸຫ້າປີ ເມື່ອມີຄົນນຳຂ່າວກ່ຽວກັບໂຊນ ແລະ ໂຢນາທານຈາກຢິດຊະເຣນມາບອກ. ເອື້ອຍລ້ຽງຈຶ່ງອຸ້ມລາວຂຶ້ນ ແລະ ໄດ້ພາໜີໄປ, ແຕ່ດ້ວຍຄວາມຟ້າວຂອງນາງ, ລາວໄດ້ຕົກລົງມາ ແລະ ເປັນຄົນພິການ. ລາວຊື່ວ່າເມຟີໂບເຊັດ.)
ບັດນີ້ເຣກາບ ແລະ ບາອານາ, ລູກຊາຍຂອງຮິມໂມນຊາວເມືອງເບເອໂຣດອອກເດີນທາງໄປທີ່ເຮືອນຂອງອີຊະໂບເຊັດ, ແລະ ພວກເຂົາມາຮອດທີ່ນັ້ນໃນເວລາໃກ້ຈະທ່ຽງ ຂະນະທີ່ອີຊະໂບເຊັດກຳລັງນອນພັກທ່ຽງຢູ່. ພວກເຂົາໄດ້ເຂົ້າໄປຫ້ອງດ້ານໃນຂອງເຮືອນ ແລະ ເຮັດຄືວ່າຈະເຂົ້າໄປເອົາເຂົ້າຫວີດ, ແລະ ພວກເຂົາໄດ້ໃຊ້ມີດແທງທີ່ທ້ອງຂອງອີຊະໂບເຊັດ. ຈາກນັ້ນ ເຣກາບ ແລະ ບາອານາກໍໜີໄປ.
ພວກເຂົາເຂົ້າໄປໃນເຮືອນຂະນະທີ່ອີຊະໂບເຊັດນອນຢູ່ເທິງຕຽງໃນຫ້ອງນອນ. ຫລັງຈາກພວກເຂົາແທງ ແລະ ໄດ້ຂ້າລາວແລ້ວ, ພວກເຂົາກໍຕັດຫົວຂອງລາວ. ແລະ ຖືຫົວໄປນໍາພວກເຂົາ, ພວກເຂົາເດີນທາງຕະຫລອດຄືນຕາມເສັ້ນທາງອາຣາບາ. ພວກເຂົາໄດ້ນຳຫົວອີຊະໂບເຊັດມາໃຫ້ດາວິດທີ່ເມືອງເຮັບໂຣນ ແລະ ເວົ້າຕໍ່ກະສັດວ່າ, “ນີ້ຄືຫົວຂອງອີຊະໂບເຊັດລູກຊາຍຂອງໂຊນ, ສັດຕູຂອງທ່ານ, ຜູ້ທີ່ພະຍາຍາມຂ້າທ່ານ. ມື້ນີ້ພຣະເຈົ້າຢາເວໄດ້ແກ້ແຄ້ນຕໍ່ໂຊນ ແລະ ເຊື້ອສາຍຂອງລາວໃຫ້ເຈົ້ານາຍກະສັດຂອງຂ້ານ້ອຍແລ້ວ”.
ດາວິດຕອບເຣກາບ ແລະ ອ້າຍຂອງລາວບາອານາ, ເຊິ່ງເປັນລູກຂອງຮິມໂມນຊາວເມືອງເບເອໂຣດວ່າ, “ພຣະເຈົ້າຢາເວມີຊີວິດຢູ່ສັນໃດ, ຄືຜູ້ທີ່ໄດ້ຊ່ວຍກູ້ເຮົາພົ້ນຈາກຄວາມເດືອດຮ້ອນທັງປວງນັ້ນ, ເມື່ອມີຄົນໄດ້ມາບອກເຮົາວ່າ, ‘ກະສັດໂຊນຕາຍແລ້ວ,’ ແລະ ແມ່ນວ່າລາວກໍາລັງນໍາຂ່າວດີມາບອກ, ເຮົາກໍໄດ້ຈັບລາວ ແລະ ຂ້າລາວທີ່ຊິກລັກສັນນັ້ນ. ນັ້ນແມ່ນບຳເໜັດທີ່ເຮົາໃຫ້ສຳລັບຂ່າວຂອງລາວ! ຫລາຍກວ່ານັ້ນຈັກເທົ່າໃດ ເມື່ອຄົນຊົ່ວໄດ້ຂ້າຄົນບໍລິສຸດໃນເຮືອນ ແລະ ເທິງຕຽງຂອງລາວ ບັດນີ້ ເຮົາບໍ່ຄວນຈະຮຽກຮ້ອງເລືອດຂອງລາວຈາກມືຂອງເຈົ້າ ແລະ ກຳຈັດເຈົ້າອອກຈາກແຜ່ນດິນບໍ!”
ສະນັ້ນ ດາວິດຈຶ່ງສັ່ງທະຫານຂອງເພິ່ນ ແລະ ພວກເຂົາໄດ້ຂ້າເຣກາບ ແລະ ບາອານາ. ທະຫານໄດ້ຕັດມື ແລະ ຕີນຂອງພວກເຂົາອອກມາ ແລະ ແຂວນສົບໄວ້ທີ່ສະນໍ້າໃນເມືອງເຮັບໂຣນ. ແຕ່ພວກເຂົາກໍນຳຫົວຂອງອີຊະໂບເຊັດໄປ ແລະ ຝັງໄວ້ໃນອຸບມຸງຝັງສົບຂອງອັບເນທີ່ເມືອງເຮັບໂຣນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.