Biblica® Open Lao Contemporary Version
2 ຊາມູເອນ 24
ດາວິດນັບຈໍານວນທະຫານ
(1ຂຄ 21:1-17)
ພຣະເຈົ້າຢາເວໃຈຮ້າຍຊາວອິດສະຣາເອນອີກ, ແລະ ພຣະອົງໄດ້ຍຸຍົງໃຫ້ດາວິດຕໍ່ສູ້ພວກເຂົາໂດຍກ່າວວ່າ, “ຈົ່ງໄປນັບຈໍານວນປະຊາຊົນອິດສະຣາເອນ ແລະ ຢູດາ”.
ດັ່ງນັ້ນ ກະສັດໄດ້ເວົ້າກັບໂຢອາບ ແລະ ບັນດາຜູ້ບັນຊາການກອງທັບ1ທີ່ຢູ່ກັບເພິ່ນວ່າ, “ຈົ່ງອອກໄປໃນທົ່ວທຸກເຜົ່າຂອງອິດສະຣາເອນຕັ້ງແຕ່ເມືອງດານຈົນເຖິງເບເອນເຊບາ ແລະ ນັບເບິ່ງທະຫານ, ເພື່ອເຮົາຈະຮູ້ວ່າມີຄົນຫລາຍເທົ່າໃດ”.
ແຕ່ໂຢອາບໄດ້ຕອບກະສັດວ່າ, “ຂໍພຣະເຈົ້າຢາເວ ພຣະເຈົ້າຂອງທ່ານເພີ່ມທະວີກອງທະຫານຮ້ອຍເທົ່າ, ແລະ ຂໍໃຫ້ກະສັດເຈົ້ານາຍຂອງຂ້ານ້ອຍໄດ້ເຫັນກັບຕາ. ແຕ່ເປັນຫຍັງກະສັດເຈົ້ານາຍຂອງຂ້ານ້ອຍຈຶ່ງເຮັດເຊັ່ນນີ້?”
ເຖິງຢ່າງໃດກໍຕາມ, ຄຳສັ່ງຂອງກະສັດມີອຳນາດເໜືອໂຢອາບ ແລະ ບັນດາຜູ້ບັນຊາການກອງທັບ; ສະນັ້ນ ພວກເຂົາອອກໄປໄປນັບທະຫານຂອງອິດສະຣາເອນ.
ຫລັງຈາກຂ້າມແມ່ນ້ຳຈໍແດນໄປ, ພວກເຂົາໄດ້ຕັ້ງຄ້າຍຢູ່ໃກ້ອາໂຣເອ, ເຊິ່ງຢູ່ທາງທິດໃຕ້ຂອງເມືອງໜຶ່ງໃນໂກກທານ, ແລ້ວກໍໄປຜ່ານກາດ ແລະ ໄປທີ່ຢາເຊ. ພວກເຂົາໄດ້ໄປທີ່ກີເລອາດ ແລະ ເຂດແດນຕາຮະຕິມໂຮດາຊີ, ແລ້ວໄປທີ່ດານຢາອັນ ແລະ ອ້ອມໄປຈົນເຖິງຊີໂດນ. ຈາກນັ້ນ ພວກເຂົາໄດ້ມຸ່ງໜ້າໄປທີ່ປ້ອມປ້ອງກັນແຫ່ງເມືອງຕີເຣ ແລະ ເມືອງທັງໝົດຂອງຊາວຮີວີ ແລະ ຊາວການາອານ. ສຸດທ້າຍ, ພວກເຂົາໄດ້ເດີນທາງຕໍ່ໄປທີ່ເບເອນເຊບາໃນເນເກັບແຫ່ງຢູດາ.
ຫລັງຈາກ ພວກເຂົາໄດ້ໄປທົ່ວດິນແດນທັງໝົດ, ພວກເຂົາກໍກັບມາທີ່ເຢຣູຊາເລັມໃຊ້ເວລາເກົ້າເດືອນຊາວວັນ.
ໂຢອາບໄດ້ລາຍງານຈຳນວນທະຫານຕໍ່ກະສັດວ່າ: ມີທະຫານແປດແສນຄົນເປັນຜູ້ຊາຍທີ່ແຂງແຮງທີ່ສາມາດຈັບດາບໄດ້ໃນອິດສະຣາເອນ ແລະ ຫ້າແສນຄົນໃນຢູດາ.
ຫລັງຈາກ ດາວິດໄດ້ສຳຫລວດຈໍານວນທະຫານແລ້ວ, ເພິ່ນກໍຮູ້ສຶກຜິດ ແລະ ເພິ່ນໄດ້ເວົ້າກັບພຣະເຈົ້າຢາເວວ່າ, “ໃນສິ່ງທີ່ຂ້ານ້ອຍໄດ້ເຮັດນັ້ນ ຂ້ານ້ອຍໄດ້ບາບຢ່າງຮ້າຍແຮງ. ຂ້າແດ່ພຣະເຈົ້າຢາເວ, ບັດນີ້ ຂ້ານ້ອຍຂໍພຣະອົງຍົກໂທດຄວາມຜິດຂອງຜູ້ຮັບໃຊ້ຂອງພຣະອົງດ້ວຍ. ຂ້ານ້ອຍໄດ້ເຮັດສິ່ງທີ່ໂງ່ຫລາຍ”.
ກ່ອນດາວິດຕື່ນນອນໃນຕອນເຊົ້າມື້ຕໍ່ມາ, ຖ້ອຍຄໍາຂອງພຣະເຈົ້າຢາເວໄດ້ມາເຖິງຜູ້ທຳນວາຍກາດ, ເຊິ່ງເປັນຜູ້ທຳນວາຍຂອງດາວິດວ່າ: “ຈົ່ງໄປບອກດາວິດວ່າ, ‘ນີ້ແມ່ນສິ່ງທີ່ພຣະເຈົ້າຢາເວກ່າວ: ເຮົາມີຂໍ້ສະເໜີສາມປະການ ໃຫ້ເຈົ້າເລືອກຢ່າງໜຶ່ງແລ້ວເຮົາຈະຈັດການກັບເຈົ້າຕາມນັ້ນ’ ”.
ດັ່ງນັ້ນ ກາດໄດ້ໄປຫາດາວິດ ແລະ ເວົ້າກັບເພິ່ນວ່າ “ຈະເກີດການອຶດຢາກອາຫານກັບທ່ານສາມ2ປີໃນດິນແດນຂອງທ່ານບໍ? ຫລື ປົບໜີຈາກບັນດາສັດຕູຂອງທ່ານຂະນະທີ່ພວກເຂົາໄລ່ຕາມທ່ານເປັນເວລາສາມເດືອນ? ຫລື ມີພະຍາດລະບາດເກີດຂຶ້ນໃນດິນແດນຂອງທ່ານເປັນເວລາສາມວັນ? ບັດນີ້ ຈົ່ງໃຫ້ທ່ານຄິດທົບທວນ ແລະ ຕັດສິນໃຈເພື່ອຂ້ານ້ອຍຈະຕອບພຣະອົງຜູ້ທີ່ໃຊ້ຂ້ານ້ອຍມາ”.
ດາວິດໄດ້ເວົ້າກັບກາດວ່າ, “ເຮົາລຳບາກໃຈຫລາຍ, ຂໍໃຫ້ພວກເຮົາຕົກຢູ່ໃນມືຂອງພຣະເຈົ້າຢາເວ, ເພາະຄວາມເມດຕາຂອງພຣະອົງກໍຍິ່ງໃຫຍ່ຫລາຍ; ແຕ່ຢ່າໃຫ້ເຮົາຕົກຢູ່ໃນມືຂອງມະນຸດ”.
ດັ່ງນັ້ນ ພຣະເຈົ້າຢາເວຈຶ່ງສົ່ງພະຍາດລະບາດມາສູ່ຊາວອິດສະຣາເອນຕັ້ງແຕ່ເຊົ້າວັນນັ້ນຈົນເຖິງຄົບກຳນົດ ແລະ ມີຄົນໄດ້ເສຍຊີວິດເຈັດໝື່ນຄົນຕັ້ງແຕ່ດານຈົນເຖິງເບເອນເຊບາ. ເມື່ອເທວະດາເດ່ມືຂອງຕົນອອກທຳລາຍເຢຣູຊາເລັມ, ພຣະເຈົ້າຢາເວໄດ້ທຸກໃຈກ່ຽວກັບໄພພິບັດນັ້ນ ແລະ ໄດ້ກ່າວກັບເທວະດານັ້ນທີ່ກໍາລັງທໍລະມານປະຊາຊົນວ່າ “ພໍແລ້ວ! ຈົ່ງຍົກມືອອກເທາະ” ເທວະດາຂອງພຣະເຈົ້າຢາເວກຳລັງຢືນຢູ່ທີ່ລານຟາດເຂົ້າຂອງອາໂຣນາຊາວເຢບຸດ.
ເມື່ອດາວິດໄດ້ເຫັນເທວະດາຕົນນັ້ນທີ່ກໍາລັງຂ້າປະຊາຊົນຢູ່ນັ້ນ, ເພິ່ນໄດ້ເວົ້າກັບພຣະເຈົ້າຢາເວວ່າ, “ຂ້ານ້ອຍໄດ້ເຮັດຜິດເຮັດບາບ; ຂ້ານ້ອຍເປັນຜູ້ລ້ຽງ, ຂ້ານ້ອຍໄດ້ເຮັດຜິດແລ້ວ. ປະຊາຊົນເຫລົ່ານີ້ເປັນພຽງຝູງແກະ. ພວກເຂົາໄດ້ເຮັດຫຍັງຜິດ? ຂໍໂຜດລົງໂທດຂ້ານ້ອຍກັບຄອບຄົວ”.
ດາວິດສ້າງແທ່ນບູຊາ
(1ຂຄ 21:18-26)
ໃນວັນນັ້ນ ກາດໄດ້ໄປຫາດາວິດ ແລະ ໄດ້ເວົ້າກັບເພິ່ນວ່າ, “ຈົ່ງຂຶ້ນໄປ ແລະ ສ້າງແທ່ນບູຊາຖວາຍແກ່ພຣະເຈົ້າຢາເວທີ່ລານຟາດເຂົ້າຂອງອາໂຣນາຊາວເຢບຸດ”. ດັ່ງນັ້ນ ດາວິດໄດ້ໄປເຮັດຕາມທີ່ພຣະເຈົ້າຢາເວໄດ້ຜ່ານທາງກາດ. ເມື່ອອາໂຣນາຫລຽວເຫັນກະສັດ ແລະ ຂ້າລາຊະການຂອງເພິ່ນທີ່ກໍາລັງມຸ່ງໜ້າມາຫາລາວ, ລາວກໍອອກໄປ ແລະ ກົ້ມກາບລົງພື້ນດິນຕໍ່ໜ້າກະສັດ.
ອາໂຣນາໄດ້ເວົ້າວ່າ, “ເປັນຫຍັງກະສັດເຈົ້ານາຍຂອງຂ້ານ້ອຍຈຶ່ງມາຫາຜູ້ຮັບໃຊ້ຂອງທ່ານຢູ່ທີ່ນີ້?”
ດາວິດໄດ້ຕອບວ່າ, “ເພື່ອມາຊື້ລານຟາດເຂົ້າຂອງເຈົ້າ, ເຮົາຈະສ້າງແທ່ນບູຊາຖວາຍແກ່ພຣະເຈົ້າຢາເວ, ເພື່ອໂລກລະບາດທີ່ເກີດຂຶ້ນກັບປະຊາຊົນຈຶ່ງຈະຢຸດ”.
ອາໂຣນາໄດ້ເວົ້າກັບດາວິດວ່າ, “ຂໍໃຫ້ກະສັດເຈົ້ານາຍຂອງຂ້ານ້ອຍເອົາໄດ້ຕາມຄວາມປາຖະໜາ ແລະ ເຄື່ອງເຜົາຖວາຍບູຊາ. ນີ້ແມ່ນງົວສຳລັບເປັນເຄື່ອງເຜົາບູຊາ. ແລະ ນີ້ແມ່ນໄມ້ຟາດເຂົ້າ ແລະ ແອກງົວເພື່ອໃຊ້ເປັນຟືນ. ຂ້ານ້ອຍອາໂຣນາຂໍມອບສິ່ງທັງໝົດນີ້ແກ່ກະສັດ”. ລາວໄດ້ເວົ້າກັບເພິ່ນອີກວ່າ, “ຂໍພຣະເຈົ້າຢາເວ ພຣະເຈົ້າຂອງທ່ານໂຜດຍອມຮັບທ່ານດ້ວຍ”.
ແຕ່ກະສັດໄດ້ຕອບອາໂຣນາວ່າ, “ບໍ່, ເຮົາຢືນຢັນທີ່ຈະຊື້ຈາກເຈົ້າ. ເຮົາຈະບໍ່ຖວາຍເຄື່ອງບູຊາແກ່ພຣະເຈົ້າຢາເວ ພຣະເຈົ້າຂອງເຮົາທີ່ເຜົາເຄື່ອງຖວາຍບູຊາໂດຍທີ່ບໍ່ຈ່າຍອັນໃດ”.
ດັ່ງນັ້ນ ດາວິດຈຶ່ງໄດ້ຊື້ລານຟາດເຂົ້າ ແລະ ງົວ ແລ້ວກໍຈ່າຍເງິນໜັກ 50 ຫລຽນເຊເຂວ3ໃຫ້ພວກເຂົາ. ດາວິດໄດ້ສ້າງແທ່ນບູຊາຂຶ້ນຖວາຍແກ່ພຣະເຈົ້າຢາເວຢູ່ທີ່ນັ້ນ ແລະ ເຜົາເຄື່ອງບູຊາ ແລະ ເຄື່ອງບູຊາເພື່ອຄວາມສາມັກຄີທຳ. ຫລັງຈາກນັ້ນ ພຣະເຈົ້າຢາເວໄດ້ຕອບຄຳອະທິຖານຂອງເພິ່ນເພື່ອແຜ່ນດິນ ແລະ ໂລກລະບາດທີ່ເກີດຂຶ້ນກັບອິດສະຣາເອນກໍຢຸດ.
Source notes (3)
- Footnote ພາສາເຮັບເຣີວ່າ ໂຢອາບຜູ້ອອກຄຳສັ່ງກອງທັບ (ເບິ່ງຂໍ້ 4 ແລະ 1ຂຄ 21:2)
- Footnote ພາສາເຮັບເຣີວ່າ ເຈັດປີ (ເບິ່ງ 1ຂຄ 21:12)
- Footnote 1 ຫລຽນ ຄືເງິນໜັກປະມານ 11,5 ກຣາມ ມີຄ່າເທົ່າກັບຄ່າແຮງສອງເດືອນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.