Biblica® Open Lao Contemporary Version
2 ຊາມູເອນ 22
ເພງສັນລະເສີນຂອງດາວິດ
(ພສສ 18:1-50)
ດາວິດໄດ້ຮ້ອງເພງບົດນີ້ຖວາຍແກ່ພຣະເຈົ້າຢາເວ ເມື່ອພຣະເຈົ້າຢາເວໄດ້ຊ່ວຍກູ້ເພິ່ນພົ້ນຈາກມືຂອງໂຊນ ແລະ ບັນດາສັດຕູທັງໝົດຂອງເພິ່ນ. ເພິ່ນໄດ້ເວົ້າວ່າ:
“ພຣະເຈົ້າຢາເວເປັນສີລາ, ເປັນປ້ອມປ້ອງກັນ ແລະ ຜູ້ຊ່ວຍກູ້ຂອງຂ້ານ້ອຍ;
ພຣະເຈົ້າຂອງຂ້ານ້ອຍເປັນສີລາທີ່ຂ້ານ້ອຍເຂົ້າໄປລີ້ໄພ,
ເປັນໂລ່ ແລະ ເປັນເຂົາ1ແຫ່ງຄວາມພົ້ນຂອງຂ້ານ້ອຍ.
ພຣະອົງເປັນຖານທີ່ໝັ້ນ, ເປັນບ່ອນລີ້ໄພ ແລະ ເປັນພຣະຜູ້ຊ່ວຍໃຫ້ພົ້ນຂອງຂ້ານ້ອຍ
ພຣະອົງຊ່ວຍຂ້ານ້ອຍໃຫ້ພົ້ນຈາກຄົນໂຫດຮ້າຍ.
“ຂ້ານ້ອຍຮ້ອງຫາພຣະເຈົ້າຢາເວ, ຜູ້ສົມຄວນໄດ້ຮັບການສັນລະເສີນ,
ແລະ ໄດ້ຮັບການຊ່ວຍໃຫ້ພົ້ນຈາກບັນດາສັດຕູຂອງຂ້ານ້ອຍ.
ຄື້ນແຫ່ງຄວາມຕາຍປິ່ນອ້ອມຂ້ານ້ອຍ;
ກະແສແຫ່ງຄວາມຈິບຫາຍຖ້ວມຂ້ານ້ອຍ.
ເຊືອກຂອງຂຸມຝັງສົບກໍພັນອ້ອມໂຕຂ້ານ້ອຍໄວ້.
ບ້ວງແຮ້ວແຫ່ງຄວາມຕາຍຢູ່ຕໍ່ໜ້າຂ້ານ້ອຍ.
“ຂ້ານ້ອຍຮ້ອງຫາພຣະເຈົ້າຢາເວໃນຍາມທຸກໃຈ;
ຂ້ານ້ອຍຮ້ອງຫາພຣະເຈົ້າຂອງຂ້ານ້ອຍ.
ພຣະອົງໄດ້ຍິນສຽງຂອງຂ້ານ້ອຍຈາກວິຫານຂອງພຣະອົງ;
ສຽງຮ້ອງຂອງຂ້ານ້ອຍດັງໄປເຖິງຫູຂອງພຣະອົງ.
ແຜ່ນດິນໂລກສັ່ນສະເທືອນ ແລະ ຫວັ່ນໄຫວ,
ຮາກຖານຂອງຟ້າສະຫວັນ2ສັ່ນຄອນ;
ຟ້າສະຫວັນສັ່ນສະເທືອນເພາະພຣະອົງໃຈຮ້າຍ.
ຄວັນພຸ່ງອອກມາຈາກຮູດັງຂອງພຣະອົງ;
ແປວໄຟທີ່ເຜົາໄໝ້ຢູ່ກໍອອກມາຈາກປາກຂອງພຣະອົງ,
ຖ່ານຫີນທີ່ເຜົາໄໝ້ຢູ່ກໍອອກມາຈາກປາກຂອງພຣະອົງ.
ພຣະອົງໄດ້ເປີດຟ້າສະຫວັນ ແລະ ໄດ້ລົງມາ;
ເມກມືດໜານັ້ນກໍຢູ່ໃຕ້ຕີນຂອງພຣະອົງ.
ພຣະອົງຂຶ້ນຂີ່ເຄຣຸບ ແລະ ບິນລົງມາ;
ພຣະອົງບິນ3ດ້ວຍປີກແຫ່ງກະແສລົມ.
ພຣະອົງໃຫ້ຄວາມມືດປົກຄຸມອ້ອມພຣະອົງ
ໃຫ້ເມກຝົນອັນມືດຄື້ມ4ໃນທ້ອງຟ້າຢູ່ອ້ອມພຣະອົງ.
ສາຍຟ້າມາບແມບອອກມາ.
ຈາກແສງສະຫວ່າງກ້າແຫ່ງການປາກົດຂອງພຣະອົງ.
ພຣະເຈົ້າຢາເວເປັ່ງສຽງຟ້າຮ້ອງຈາກຟ້າສະຫວັນ;
ສຽງຂອງອົງຜູ້ສູງສຸດດັງກ້ອງ.
ພຣະອົງຍິງລູກທະນູຂອງພຣະອົງ ແລ້ວເຮັດໃຫ້ບັນດາສັດຕູກະຈັດກະຈາຍໄປ,
ພຣະອົງສົ່ງຟ້າແມບ ເຮັດໃຫ້ພວກເຂົາແຕກໜີໄປ.
ເມື່ອພຣະເຈົ້າຢາເວກ່າວເຕືອນ
ເມື່ອລົມພຸ່ງອອກຈາກດັງຂອງພຣະອົງ
ຮ່ອມພູໃນທະເລກໍເຜີຍອອກ
ຮາກຖານຂອງໂລກກໍປາກົດ
“ພຣະອົງໄດ້ຍື່ນມືຈາກເບື້ອງເທິງລົງມາ ແລະ ຈັບຂ້ານ້ອຍໄວ້;
ພຣະອົງໄດ້ດຶງຂ້ານ້ອຍອອກມາຈາກນ້ຳເລິກ.
ພຣະອົງຊ່ວຍຂ້ານ້ອຍໃຫ້ພົ້ນຈາກສັດຕູຜູ້ມີອຳນາດ,
ຈາກສັດຕູຂອງຂ້ານ້ອຍ, ເຊິ່ງແຂງແຮງກວ່າຂ້ານ້ອຍ.
ພວກເຂົາບຸກໂຈມຕີຂ້ານ້ອຍໃນຍາມທີ່ຂ້ານ້ອຍປະສົບໄພພິບັດ,
ແຕ່ພຣະເຈົ້າຢາເວໄດ້ຄ້ຳຊູຂ້ານ້ອຍໄວ້.
ພຣະອົງນຳຂ້ານ້ອຍອອກມາຍັງບ່ອນກວ້າງຂວາງ;
ພຣະອົງກອບກູ້ຂ້ານ້ອຍໄວ້ເພາະພຣະອົງຍິນດີໃນຕົວຂອງຂ້ານ້ອຍ.
“ພຣະເຈົ້າຢາເວໄດ້ຕອບແທນຂ້ານ້ອຍຕາມຄວາມຊອບທຳຂອງຂ້ານ້ອຍ;
ມອບບຳເໜັດໃຫ້ຂ້ານ້ອຍເພາະຂ້ານ້ອຍນັ້ນເປັນຄົນມືສະອາດ.
ເພາະຂ້ານ້ອຍໄດ້ຮັກສາທາງຂອງພຣະເຈົ້າຢາເວ;
ຂ້ານ້ອຍບໍ່ໄດ້ເຮັດຊົ່ວໂດຍຫັນໄປຈາກພຣະເຈົ້າຂອງຂ້ານ້ອຍ.
ກົດບັນຍັດທຸກຂໍ້ຂອງພຣະອົງກໍຢູ່ຕໍ່ໜ້າຂ້ານ້ອຍ;
ຂ້ານ້ອຍບໍ່ໄດ້ຫັນໄປຈາກດຳລັດຂອງພຣະອົງ
ຂ້ານ້ອຍບໍ່ໄດ້ມີຕຳໜິເມື່ອຢູ່ຕໍ່ໜ້າພຣະອົງ.
ແລະ ໄດ້ຮັກສາຕົນເອງໃຫ້ພົ້ນຈາກຄວາມບາບ.
ພຣະເຈົ້າຢາເວໄດ້ໃຫ້ບຳເໜັດແກ່ຂ້ານ້ອຍຕາມຄວາມຊອບທຳຂອງຂ້ານ້ອຍ,
ຕາມມືທີ່ບໍລິສຸດ5ຂອງຂ້ານ້ອຍໃນສາຍຕາຂອງພຣະອົງ.
“ພຣະອົງໄດ້ສະແດງພຣະອົງເອງວ່າສັດຊື່ຕໍ່ຄົນທີ່ສັດຊື່,
ພຣະອົງໄດ້ສະແດງພຣະອົງເອງວ່າບໍ່ມີຕຳໜິຕໍ່ຄົນທີ່ບໍ່ມີຕຳໜິ,
ພຣະອົງໄດ້ສະແດງພຣະອົງເອງວ່າບໍລິສຸດຕໍ່ຄົນທີ່ບໍລິສຸດ,
ແຕ່ພຣະອົງໄດ້ສະແດງພຣະອົງເອງວ່າສະຫລາດຫລັກແຫລມຕໍ່ຄົນທີ່ຫລອກລວງ.
ພຣະອົງໄດ້ຊ່ວຍຜູ້ທີ່ຖ່ອມໃຈໃຫ້ພົ້ນ,
ແຕ່ຕາຂອງພຣະອົງເຝົ້າເບິ່ງຄົນອວດອົ່ງຈອງຫອງເພື່ອເຮັດໃຫ້ພວກເຂົາຕົກຕ່ຳລົງ.
ຂ້າແດ່ພຣະເຈົ້າຢາເວ, ພຣະອົງເປັນຕະກຽງຂອງຂ້ານ້ອຍ;
ພຣະເຈົ້າຢາເວໄດ້ປ່ຽນຄວາມມືດມົນຂອງຂ້ານ້ອຍໃຫ້ກາຍເປັນຄວາມສະຫວ່າງ;
ຂ້ານ້ອຍສາມາດໂຈມຕີຂອງກອງທັບໄດ້ດ້ວຍຄວາມຊ່ວຍເຫລືອຈາກພຣະອົງ;6
ຂ້ານ້ອຍປີນຂ້າມກຳແພງເມືອງໄດ້ໂດຍພຣະເຈົ້າຂອງຂ້ານ້ອຍ.
“ສຳລັບພຣະເຈົ້າ, ວິຖີທາງຂອງພຣະອົງນັ້ນແມ່ນດີເລີດ:
ຖ້ອຍຄໍາຂອງພຣະເຈົ້າຢາເວກໍບໍ່ມີຂໍ້ຜິດພາດ;
ພຣະອົງເປັນໂລ່ສຳລັບທຸກຄົນທີ່ລີ້ໄພໃນພຣະອົງ.
ເພາະນອກຈາກພຣະເຈົ້າຢາເວແລ້ວຜູ້ໃດທີ່ເປັນພຣະເຈົ້າ?
ແລະ ຜູ້ໃດທີ່ເປັນພຣະສີລາ ນອກຈາກພຣະເຈົ້າຂອງພວກເຮົາ?
ຄືພຣະເຈົ້ານີ້ແຫລະ ທີ່ເປັນຜູ້ໃຫ້ກຳລັງແກ່ຂ້ານ້ອຍ.7
ແລະ ຮັກສາຫົນທາງຂອງຂ້ານ້ອຍໃຫ້ປອດໄພ.
ພຣະອົງໄດ້ເຮັດໃຫ້ຕີນຂອງຂ້ານ້ອຍເປັນເໝືອນດັ່ງຕີນກວາງ.
ພຣະອົງເຮັດໃຫ້ຂ້ານ້ອຍຢືນຢູ່ເທິງທີ່ສູງໄດ້.
ພຣະອົງໄດ້ຝຶກມືຂອງຂ້ານ້ອຍໃຫ້ພ້ອມສູ້ຮົບ;
ແຂນຂອງຂ້ານ້ອຍຈຶ່ງສາມາດກົ່ງຄັນທະນູທອງສຳລິດໄດ້.
ພຣະອົງໄດ້ໃຫ້ຄວາມຊ່ວຍໃຫ້ພົ້ນຂອງພຣະອົງເປັນໂລ່ຂອງຂ້ານ້ອຍ;
ການຊ່ວຍເຫລືອຂອງພຣະອົງເຮັດໃຫ້ຂ້ານ້ອຍຍິ່ງໃຫຍ່ຂຶ້ນ.
ພຣະອົງໄດ້ເຮັດໃຫ້ຫົນທາງທີ່ຂ້ານ້ອຍເດີນໄປນັ້ນກວ້າງຂວາງ.
ເພື່ອບໍ່ໃຫ້ຂໍ່ຕີນຂອງຂ້ານ້ອຍພິກ.8
“ຂ້ານ້ອຍໄລ່ຕາມສັດຕູຂອງຂ້ານ້ອຍ ແລະ ຍ່ອງພວກເຂົາ;
ຂ້ານ້ອຍບໍ່ໄດ້ກັບມາຈົນກວ່າພວກເຂົາຖືກທຳລາຍ.
ຂ້ານ້ອຍຍ່ອງພວກເຂົາຈົນໝຸ່ນ ແລະ ພວກເຂົາລຸກຂຶ້ນບໍ່ໄດ້ອີກ.
ພວກເຂົາລົ້ມລົງຢູ່ໃຕ້ຕີນຂອງຂ້ານ້ອຍ.
ພຣະອົງໄດ້ໃຫ້ກຳລັງຂ້ານ້ອຍເພື່ອສູ້ຮົບ;
ພຣະອົງເຮັດໃຫ້ບັນດາສັດຕູຂອງຂ້ານ້ອຍຖ່ອມລົງຢູ່ຕໍ່ໜ້າຂ້ານ້ອຍ.
ພຣະອົງໄດ້ເຮັດໃຫ້ສັດຕູຂອງຂ້ານ້ອຍຖອຍໜີໄປ.
ແລະ ຂ້ານ້ອຍໄດ້ທຳລາຍລ້າງສັດຕູຂອງຂ້ານ້ອຍ.
ພວກເຂົາຮ້ອງຂໍຄວາມຊ່ວຍເຫລືອ, ແຕ່ບໍ່ມີຜູ້ໃດຊ່ວຍພວກເຂົາ
ພວກເຂົາຮ້ອງຫາພຣະເຈົ້າຢາເວ ແຕ່ພຣະອົງບໍ່ຕອບ.
ຂ້ານ້ອຍເອົາຊະນະພວກເຂົາຢ່າງງ່າຍດາຍດັ່ງຂີ້ຝຸ່ນດິນໃນແຜ່ນດິນໂລກ.
ຂ້ານ້ອຍໂຈມຕີ ແລະ ຢຽບຢ່ຳພວກເຂົາດັ່ງຂີ້ຕົມຕາມຫົນທາງ.
“ພຣະອົງໄດ້ຊ່ວຍຂ້ານ້ອຍໃຫ້ພົ້ນຈາກການໂຈມຕີຂອງຄົນທັງຫລາຍ;
ພຣະອົງໄດ້ຮັກສາຂ້ານ້ອຍໄວ້ໃຫ້ເປັນປະມຸກຂອງປະຊາຊາດທັງຫລາຍ.
ຄົນທີ່ຂ້ານ້ອຍບໍ່ຮູ້ຈັກບັດນີ້ມາຮັບໃຊ້ຂ້ານ້ອຍ,
ຄົນຕ່າງຊາດທັງຫລາຍຕ່າງກໍກົ້ມກາບຕໍ່ໜ້າຂ້ານ້ອຍ;
ທັນທີທີ່ພວກເຂົາໄດ້ຍິນກ່ຽວກັບຂ້ານ້ອຍ, ພວກເຂົາກໍເຊື່ອຟັງຂ້ານ້ອຍ.
ພວກເຂົາລ້ວນແຕ່ເສຍກຳລັງໃຈ;
ພວກເຂົາຕ່າງກໍຕົວສັ່ນ9ອອກມາຈາກຖານທີ່ໝັ້ນຂອງຕົນ.
“ພຣະເຈົ້າຢາເວມີຊີວິດຢູ່! ຂໍໃຫ້ຄໍາສັນລະເສີນເປັນຂອງພະສີລາຂອງຂ້ານ້ອຍ!
ຂໍຍົກຍ້ອງພຣະເຈົ້າຂອງຂ້ານ້ອຍ, ພຣະສີລາ, ພຣະຜູ້ຊ່ວຍໃຫ້ພົ້ນຂອງຂ້ານ້ອຍ!
ພຣະອົງເປັນພຣະເຈົ້າຜູ້ແກ້ແຄ້ນໃຫ້ຂ້ານ້ອຍ,
ຜູ້ໄດ້ປາບປະຊາຊາດຕ່າງໆ ໃຫ້ຢູ່ພາຍໃຕ້ຂ້ານ້ອຍ,
ຜູ້ໄດ້ຊ່ວຍຂ້ານ້ອຍໃຫ້ພົ້ນຈາກບັນດາສັດຕູຂອງຂ້ານ້ອຍ.
ພຣະອົງໄດ້ຍົກຂ້ານ້ອຍຂຶ້ນເໜືອສັດຕູທັງຫລາຍຂອງຂ້ານ້ອຍ.
ພຣະອົງໄດ້ກອບກູ້ຂ້ານ້ອຍຈາກຄົນໂຫດຮ້າຍ;
ຂ້າແດ່ພຣະເຈົ້າຢາເວ ເຫດສະນັ້ນ ຂ້ານ້ອຍຈຶ່ງສັນລະເສີນພຣະອົງຢູ່ທ່າມກາງຊົນຊາດທັງຫລາຍ;
ຂ້ານ້ອຍຈະຮ້ອງເພງສັນລະເສີນນາມຂອງພຣະອົງ.
“ພຣະອົງໄດ້ໃຫ້ໄຊຊະນະອັນຍິ່ງໃຫຍ່ແກ່ກະສັດຂອງພຣະອົງ;
ພຣະອົງສະແດງຄວາມກະລຸນາຢ່າງບໍ່ຢຸດຢັ້ງແກ່ຜູ້ທີ່ພຣະອົງໄດ້ເຈີມຕັ້ງໄວ້,
ຄືດາວິດ ແລະ ເຊື້ອສາຍຂອງເພິ່ນຕະຫລອດໄປ”.
Source notes (9)
- Footnote ພາສາເຮັບເຣີວ່າ ເຂົາສັດ ເຊິ່ງເປັນສັນຍະລັກຂອງກຳລັງ
- Footnote ສະບັບ Vulg. ແລະ Syr. ວ່າ ພູເຂົາທັງຫລາຍ (ເບິ່ງ ພສສ 18:7)
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ປາກົດ (ເບິ່ງ ພສສ 18:10)
- Footnote ພາສາເຮັບເຣີວ່າ ໜາແໜ້ນ (ເບິ່ງ ພສສ 18:11)
- Footnote ສະບັບເຊັບຕູອາຈິນ ແລະ ສະບັບວັນເກດວ່າ ຕາມທີ່ເຫັນວ່າຂ້ານ້ອຍເປັນຄົນມືສະອາດ (ເບິ່ງ ພສສ 18:24)
- Footnote ຫລື ສາມາດ ແລ່ນ ຜ່ານອຸປະສັກມາໄດ້
- Footnote ໜັງສືມ້ວນທະເລຕາຍ ບາງສຳເນົາຕົ້ນສະບັບ, ເຊັບຕູອາຈິນ, ສະບັບວັນເກດ ແລະ ສະບັບຊີເລຍ (ເຊັ່ນດຽວກັນໃນ ພສສ 18:32) ສະບັບມາໂຊເຣຕິກວ່າ ພຣະເຈົ້ານີ້ແຫລະ ເປັນທີ່ລີ້ໄພອັນເຂັ້ມແຂງຂອງຂ້ານ້ອຍ
- Footnote ພາສາເຮັບເຣີວ່າ ເພື່ອຂໍ້ຕີນຂອງຂ້ານ້ອຍຈະບໍ່ພິກ
- Footnote ສະບັບ MT. ວ່າ ພວກພວກເຂົາຖືອາວຸດ (ເບິ່ງ ພສສ 18:45)
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.