Biblica® Open Lao Contemporary Version
2 ຊາມູເອນ 21
ການແກ້ແຄ້ນໃຫ້ຊາວກີເບໂອນ
ໃນຊ່ວງການປົກຄອງຂອງດາວິດ, ເກີດມີໄພອຶດຢາກເປັນເວລາສາມປີເຕັມ; ສະນັ້ນ ດາວິດຈຶ່ງໄດ້ຖາມພຣະເຈົ້າຢາເວ. ພຣະເຈົ້າຢາເວໄດ້ກ່າວວ່າ, “ເປັນເພາະໂຊນ ແລະ ເຮືອນທີ່ເປື້ອນເລືອດຂອງລາວ; ເພາະລາວໄດ້ຂ້າຊາວກີເບໂອນ”.
ກະສັດເອີ້ນຊາວກີເບໂອນມາ ແລະ ໄດ້ເວົ້າກັບພວກເຂົາ. (ຊາວກີເບໂອນບໍ່ໄດ້ເປັນສ່ວນໜຶ່ງຂອງອິດສະຣາເອນ ແຕ່ເປັນພວກທີ່ລອດຊີວິດຈາກຊາວອາໂມ; ຊາວອິດສະຣາເອນໄດ້ປະຕິຍານວ່າຈະໄວ້ຊີວິດພວກເຂົາ, ແຕ່ໂຊນກະຕືລືລົ້ນເພື່ອອິດສະຣາເອນ ແລະ ຢູດາຈຶ່ງພະຍາຍາມກວາດລ້າງພວກເຂົາ). ດາວິດຖາມຊາວກີເບໂອນວ່າ, “ເຮົາຈະເຮັດຫຍັງໃຫ້ພວກເຈົ້າໄດ້ແດ່? ເຮົາຈະຊົດເຊີຍໃຫ້ແນວໃດເພື່ອພວກເຈົ້າຈະອວຍພອນມໍລະດົກຂອງພຣະເຈົ້າຢາເວ?”
ຊາວກີເບໂອນຕອບເພິ່ນວ່າ, “ພວກຂ້ານ້ອຍບໍ່ມີສິດທີ່ຈະຮຽກຮ້ອງເງິນ ຫລື ຄໍາຈາກໂຊນ ແລະ ຄອບຄົວຂອງເພິ່ນ, ແລະ ກໍບໍ່ມີສິດຂ້າຜູ້ໃດໃນອິດສະຣາເອນ”.
ດາວິດເວົ້າວ່າ, “ພວກເຈົ້າຢາກໃຫ້ເຮົາເຮັດຫຍັງເພື່ອພວກເຈົ້າ?”
ພວກເຂົາຕອບກະສັດວ່າ, “ສຳລັບຄົນທີ່ທຳລາຍພວກຂ້ານ້ອຍ ແລະ ຄິດຮ້າຍຕໍ່ພວກຂ້ານ້ອຍຈົນເຮັດໃຫ້ພວກຂ້ານ້ອຍວອດວາຍ ແລະ ບໍ່ມີບ່ອນຢູ່ໃນອິດສະຣາເອນ, ຂໍມອບຫລານຊາຍຈາກເຊື້ອສາຍຂອງເພິ່ນເພື່ອພວກເຮົາຈະຂ້າ ແລະ ເອົາສົບຂອງພວກເຂົາປະຈານຕໍ່ໜ້າພຣະເຈົ້າຢາເວໃນເມືອງກີເບອາຂອງໂຊນ, ເຊິ່ງຜູ້ທີ່ພຣະເຈົ້າຢາເວໄດ້ເລືອກໄວ້”.
ສະນັ້ນ ກະສັດໄດ້ເວົ້າວ່າ, “ເຮົາຈະມອບພວກເຂົາໃຫ້ພວກເຈົ້າ”.
ກະສັດດາວິດໄດ້ໄວ້ຊີວິດເມຟີໂບເຊັດລູກຂອງໂຢນາທານ, ເຊິ່ງເປັນຫລານຊາຍຂອງໂຊນ, ຍ້ອນຄຳສາບານຕໍ່ໜ້າພຣະເຈົ້າຢາເວລະຫວ່າງດາວິດ ແລະ ໂຢນາທານລູກຊາຍຂອງໂຊນ. ແຕ່ກະສັດໄດ້ເອົາອາກໂມນີກັບເມຟີໂບເຊັດ, ພວກເຂົາທັງສອງເປັນລູກຊາຍຂອງນາງຣິຊະປາລູກສາວຂອງອາອີຢາ, ເຊິ່ງນາງໄດ້ເກີດໃຫ້ໂຊນພ້ອມທັງລູກຊາຍຫ້າຄົນຂອງນາງເມຣາບ1ລູກສາວຂອງໂຊນ, ເຊິ່ງນາງໄດ້ເກີດໃຫ້ອັດຣີເອນລູກຊາຍຂອງບາກຊິນໄລຊາວເມໂຮລາ. ເພິ່ນໄດ້ມອບພວກເຂົາໃຫ້ຊາວກີເບໂອນປະຫານ ແລະ ເອົາສົບຂອງພວກເຂົາປະຈານເທິງເນີນພູຕໍ່ໜ້າພຣະເຈົ້າຢາເວ. ຄົນທັງເຈັດກໍເສຍຊີວິດພ້ອມກັນ; ພວກເຂົາຖືກຂ້າໃນຊ່ວງມື້ທໍາອິດຂອງຕົ້ນລະດູເກັບກ່ຽວເຂົ້າບາເລໄດ້ເລີ່ມຕົ້ນ.
ນາງຣິຊະປາລູກສາວຂອງອາອີຢາເອົາຜ້າກະສອບ ແລະ ກາງອອກຢູ່ເທິງກ້ອນຫີນສຳລັບຕົນ. ຕັ້ງແຕ່ລະດູເກັບກ່ຽວເລີ່ມຕົ້ນຈົນຝົນຄ່ອຍໆຕົກລົງຈາກຟ້າສະຫວັນໃສ່ສົບເຫລົ່ານັ້ນ, ນາງບໍ່ໄດ້ປ່ອຍໃຫ້ຝູງນົກມາແຕະຕ້ອງສົບໃນເວລາກາງເວັນ ຫລື ຝູງສັດປ່າໃນຕອນກາງຄືນ. ເມື່ອດາວິດໄດ້ຍິນເຖິງສິ່ງທີ່ນາງຣິຊະປາລູກສາວຂອງອາອີຢາ, ເຊິ່ງເປັນເມຍນ້ອຍຂອງໂຊນໄດ້ກະທໍາ. ເພິ່ນກໍໄປເອົາກະດູກຂອງໂຊນ ແລະ ໂຢນາທານລູກຊາຍຂອງເພິ່ນມາຈາກຊາວຢາເບັດກີເລອາດ (ພວກເຂົາໄດ້ລັກເອົາສົບຂອງໂຊນ ແລະ ໂຢນາທານມາຈາກເດີ່ນເມືອງເບັດຊານ, ບ່ອນທີ່ຊາວຟີລິດສະຕິນໄດ້ແຂວນໂຊນ ແລະ ລູກຊາຍຂອງເພິ່ນໄວ້ ຫລັງຈາກພວກເຂົາໄດ້ຂ້າໂຊນທີ່ກິນໂບອາ.) ດາວິດໄດ້ເອົາກະດູກຂອງໂຊນ ແລະ ໂຢນາທານລູກຊາຍຂອງເພິ່ນມາຈາກທີ່ນັ້ນ ແລະ ຮວບຮວມກະດູກຂອງຜູ້ທີ່ໄດ້ຖືກຂ້າ ແລະ ຖືກປະຈານໄວ້ນຳກັນ.
ພວກເຂົາໄດ້ຝັງກະດູກຂອງໂຊນ ແລະ ໂຢນາທານລູກຊາຍຂອງເພິ່ນໄວ້ໃນອຸບມຸງກີເຊພໍ່ຂອງໂຊນທີ່ເຊລາໃນເຂດແດນເບັນຢາມິນ, ແລະ ເຮັດທຸກສິ່ງຕາມທີ່ກະສັດໄດ້ສັ່ງ. ຫລັງຈາກນັ້ນ, ພຣະເຈົ້າໄດ້ຕອບຄຳອະທິຖານເພື່ອດິນແດນນັ້ນ.
ສົງຄາມກັບຊາວຟີລິດສະຕິນ
(1ຂຄ 20:4-8)
ມີການສູ້ຮົບລະຫວ່າງຊາວຟີລິດສະຕິນ ແລະ ອິດສະຣາເອນອີກຄັ້ງໜຶ່ງ. ດາວິດໄດ້ລົງໄປກັບທະຫານເພື່ອຕໍ່ສູ້ກັບຊາວຟີລິດສະຕິນ, ແລະ ເພິ່ນກໍອິດເມື່ອຍຫລາຍ. ອີສະບີເບໂນບ, ເຊິ່ງເປັນເຊື້ອສາຍຂອງຄົນໜຶ່ງຂອງຣາຟາ, ລາວຖືຫອກທອງສຳລິດໜັກປະມານ 300 ເຊເຂວ2 ແລະ ພາຍດາບໃໝ່ໂດຍເວົ້າວ່າລາວຢາກຈະຂ້າດາວິດ. ແຕ່ອາບີໄຊລູກຊາຍນາງເຊຣູອີຢາເຂົ້າມາຊ່ວຍດາວິດ; ລາວໄດ້ໂຈມຕີຊາວຟີລິດສະຕິນຄົນນັ້ນ ແລະ ໄດ້ຂ້າລາວ. ແລ້ວທະຫານຂອງດາວິດໄດ້ປະຕິຍານໂດຍເວົ້າວ່າ, “ຈະບໍ່ໃຫ້ທ່ານອອກໄປສູ້ຮົບກັບພວກເຮົາອີກ, ເພື່ອບໍ່ໃຫ້ຕະກຽງຂອງອິດສະຣາເອນຕ້ອງດັບໄປ”.
ຕໍ່ມາ, ມີການສູ້ຮົບກັບຊາວຟີລິດສະຕິນອີກທີ່ເມືອງໂກບ. ໃນເວລານັ້ນ ສິບເບກາຍຊາວຮູຊາໄດ້ຂ້າສາເຟ, ເຊິ່ງເປັນເຊື້ອສາຍຄົນໜຶ່ງຂອງຣາຟາ.
ແລະ ໃນການສູ້ຮົບກັບຊາວຟີລິດສະຕິນອີກຄັ້ງໜຶ່ງທີ່ໂກບ, ເອນຮານານລູກຊາຍຂອງຢາອີ3ຊາວເບັດເລເຮັມໄດ້ຂ້ານ້ອງຊາຍຂອງ4ໂກລີອາດຊາວກາດ, ຜູ້ທີ່ຖືຫອກດ້າມໃຫຍ່ເໝືອນໄມ້ທີ່ໃຊ້ຕ່ຳຫູກ.
ໃນການສູ້ຮົບອີກຄັ້ງ, ເຊິ່ງໄດ້ເກີດຂຶ້ນທີ່ເມືອງກາດ, ຄົນຮູບຮ່າງໃຫຍ່ທີ່ມີນິ້ວມືນິ້ວຕີນເບື້ອງລະຫົກນິ້ວລວມທັງໝົດມີຊາວສີ່ນິ້ວ. ລາວເປັນເຊື້ອສາຍຂອງຣາຟາເໝືອນກັນ. ເມື່ອລາວໄດ້ເວົ້າເຢາະເຢີ້ຍຊາວອິດສະຣາເອນ, ໂຢນາທານລູກຊາຍຂອງຊີເມອາ, ອ້າຍຂອງດາວິດໄດ້ຂ້າລາວ.
ສີ່ຄົນເຫລົ່ານີ້ເປັນເຊື້ອສາຍຂອງຣາຟາໃນເມືອງກາດ ແລ້ວພວກເຂົາໄດ້ຖືກດາວິດ ແລະ ທະຫານຂອງເພິ່ນໄດ້ຂ້າພວກເຂົາດ້ວຍມືຂອງຕົນ.
Source notes (4)
- Footnote ສຳເນົາຕົ້ນສະບັບພາສາເຮັບເຣີ ແລະ ສະບັບເຊັບຕູອາຈິນ ສ່ວນໃຫຍ່ວ່າ ມີການ
- Footnote ຫລື 3,5 ກິໂລກຣາມ
- Footnote ຫລື ລູກຊາຍຢາອີຊ່າງຕໍ່າຜ້າ
- Footnote ພາສາເຮັບເຣີບໍ່ມີ ນ້ອງຊາຍຂອງ (ເບິ່ງ 1ຂຄ 20:5)
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.