Biblica® Open Lao Contemporary Version
2 ຊາມູເອນ 17
ອາຮີໂຕເຟນໄດ້ເວົ້າກັບອັບຊາໂລມວ່າ, “ຂ້ານ້ອຍຢາກເລືອກກຳລັງພົນ 12.000 ຄົນອອກເດີນທາງໄປຕາມຫາດາວິດໃນຄືນນີ້. ແລະ ຂ້ານ້ອຍຈະໂຈມຕີຂະນະທີ່ເພິ່ນຂະນະທີ່ເພິ່ນອິດເມື່ອຍ ແລະ ອ່ອນແຮງຢູ່. ຂ້ານ້ອຍຈະເຮັດໃຫ້ເພິ່ນຢ້ານກົວ ແລ້ວຄົນທັງໝົດທີ່ຢູ່ກັບເພິ່ນຈະແຕກໜີໄປ. ຂ້ານ້ອຍຈະຂ້າແຕ່ກະສັດເທົ່ານັ້ນ ແລະ ຈະນໍາຄົນທັງໝົດກັບມາຫາທ່ານ. ຄວາມຕາຍຂອງຊາຍທີ່ທ່ານຊອກຫາຈະເຮັດໃຫ້ຄົນທັງໝົດກັບຄືນມາ; ຄົນທັງໝົດຈະບໍ່ໄດ້ຮັບອັນຕະລາຍໃດໆ”. ແຜນນີ້ເບິ່ງເໝືອນວ່າເປັນຜົນດີຕໍ່ອັບຊາໂລມ ແລະ ຕໍ່ບັນດາຜູ້ອາວຸໂສຂອງອິດສະຣາເອນທັງໝົດ.
ແຕ່ອັບຊາໂລມໄດ້ກ່າວວ່າ, “ຈົ່ງໄປເອີ້ນຮູຊາຍຊາວອາກກິດມາ, ເພື່ອພວກເຮົາຈະໄດ້ຟັງສິ່ງທີ່ລາວໄດ້ເວົ້ານັ້ນນໍາກັນ”. ເມື່ອຮູຊາຍມາພົບລາວ, ອັບຊາໂລມກໍເວົ້າວ່າ, “ອາຮີໂຕເຟນໄດ້ໃຫ້ຄຳແນະນຳຢ່າງນີ້. ພວກເຮົາຄວນຈະເຮັດຕາມທີ່ລາວເວົ້າຫລືບໍ່? ຖ້າບໍ່, ພວກເຈົ້າຈົ່ງໃຫ້ຄວາມຄິດເຫັນແກ່ພວກເຮົາ”.
ຮູຊາຍໄດ້ຕອບອັບຊາໂລມວ່າ, “ຄຳແນະນຳທີ່ອາຮີໂຕເຟນໃຫ້ຄັ້ງນີ້ບໍ່ດີເລີຍ ທ່ານກໍຮູ້ຈັກພໍ່ຂອງທ່ານ ແລະ ຄົນຂອງເພິ່ນດີ; ພວກເຂົາເປັນນັກຮົບ ແລະ ໂຫດຮ້າຍເໝືອນດັ່ງແມ່ໝີປ່າທີ່ລູກຂອງມັນຖືກລັກໄປ. ນອກຈາກນີ້, ພໍ່ຂອງທ່ານກໍເປັນນັກຮົບທີ່ມີປະສົບການ; ລາວຈະບໍ່ຢູ່ກັບພວກທະຫານໃນຕອນກາງຄືນ. ບາງເທື່ອຕອນນີ້ ເພິ່ນອາດຈະໄປລີ້ຢູ່ຕາມຖ້ຳ ຫລື ຢູ່ບ່ອນໃດບ່ອນໜຶ່ງ. ແລະ ຖ້າພໍ່ຂອງທ່ານເປັນຝ່າຍໂຈມຕີກ່ອນ,1 ຜູ້ໃດທີ່ໄດ້ຍິນກ່ຽວກັບເລື່ອງນີ້ກໍຈະເວົ້າວ່າ, ‘ກອງທະຫານຂອງອັບຊາໂລມຖືກສັງຫານເປັນໝູ່’. ແລ້ວແມ່ນແຕ່ທະຫານທີ່ກ້າຫານທີ່ສຸດ ເຊິ່ງໃຈເໝືອນດັ່ງໂຕສິງກໍຈະຕ້ອງຢ້ານກົວ, ເພາະປະຊາຊົນອິດສະຣາເອນທັງໝົດກໍຮູ້ວ່າພໍ່ຂອງທ່ານເປັນນັກຮົບ ແລະ ພວກທະຫານທີ່ຢູ່ກັບເພິ່ນກໍຄົນກ້າຫານ.
“ດັ່ງນັ້ນ ຂ້ານ້ອຍຂໍແນະນຳທ່ານວ່າ: ຈົ່ງໃຫ້ທະຫານອິດສະຣາເອນທັງໝົດຕັ້ງແຕ່ດານຈົນເຖິງເບເອນເຊບາທີ່ມີເປັນຈໍານວນຫລວງຫລາຍເໝືອນດັ່ງດິນຊາຍທີ່ແຄມຝັ່ງທະເລມາເຕົ້າໂຮມກັນກັບທ່ານໂດຍມີທ່ານເອງເປັນຜູ້ນຳພວກເຂົາອອກໄປສູ້ຮົບ. ແລ້ວພວກເຮົາຈະໂຈມຕີເພິ່ນບໍ່ວ່າຈະພົບເພິ່ນຢູ່ໃສກໍຕາມ, ເຮົາກໍຈະເຂົ້າໂຈມຕີເພິ່ນດັ່ງນ້ຳໝອກຕົກໃສ່ພື້ນດິນ. ບໍ່ວ່າເພິ່ນ ຫລື ຄົນຂອງເພິ່ນກໍຈະບໍ່ມີຜູ້ໃດລອດຊີວິດຈັກຄົນ. ແລະ ຖ້າດາວິດຖອຍເຂົ້າໄປເມືອງ, ແລ້ວຊາວອິດສະຣາເອນທັງໝົດກໍຈະເອົາເຊືອກທີ່ມັດເມືອງນັ້ນ ແລະ ດຶງລາກມັນລົງມາທີ່ຮ່ອມພູຈົນບໍ່ມີຫີນຈັກກ້ອນເຫລືອໃຫ້ເຫັນ”.
ອັບຊາໂລມ ແລະ ຊາວອິດສະຣາເອນທັງໝົດໄດ້ເວົ້າວ່າ “ຄຳແນະນຳຂອງຮູຊາຍຊາວອາກກິດກໍດີກວ່າຄຳແນະນຳຂອງອາຮີໂຕເຟນ” ເພາະພຣະເຈົ້າຢາເວໄດ້ຕັ້ງໃຈທີ່ຈະຂັດຂວາງຄຳແນະນຳທີ່ດີຂອງອາຮີໂຕເຟນເພື່ອນຳຄວາມຈິບຫາຍມາສູ່ອັບຊາໂລມ.
ຮູຊາຍໄດ້ບອກປະໂລຫິດຊາດົກ ແລະ ອາບີອາທາວ່າ “ອາຮີໂຕເຟນໃຫ້ຄຳແນະນຳແກ່ອັບຊາໂລມ ແລະ ບັນດາຜູ້ອາວຸໂສຂອງອິດສະຣາເອນໃຫ້ເຮັດສິ່ງເຫລົ່ານັ້ນ, ແຕ່ຂ້ອຍໄດ້ໃຫ້ຄໍາແນະນຳພວກເຂົາເຮັດເຊັ່ນນັ້ນ. ບັດນີ້ ຈົ່ງຮີບສົ່ງຂ່າວໄປບອກດາວິດວ່າ, ‘ຢ່າພັກຄ້າງຄືນທີ່ຈອມພູໃນໃນຖິ່ນແຫ້ງແລ້ງກັນດານ; ແຕ່ໃຫ້ຂ້າມໄປ, ບໍ່ດັ່ງນັ້ນກະສັດ ແລະ ທຸກຄົນທີ່ຢູ່ກັບເພິ່ນຈະຖືກຂ້າໝົດ’ ”.
ໂຢນາທານ ແລະ ອາຮີມາອາດກໍາລັງພັກຢູ່ທີ່ເອນໂຣເກນ. ສາວໃຊ້ຄົນໜຶ່ງອອກໄປ ແລະ ມາບອກພວກເຂົາ, ແລະ ພວກເຂົາໄດ້ອອກໄປ ແລະ ບອກກະສັດດາວິດ, ເພື່ອບໍ່ໃຫ້ມີຄົນເຫັນພວກເຂົາເຂົ້າໄປໃນເມືອງ. ແຕ່ມີຊາຍໜຸ່ມຄົນໜຶ່ງເຫັນພວກເຂົາ ແລະ ໄດ້ໄປບອກອັບຊາໂລມ. ພວກເຂົາທັງສອງຈຶ່ງໜີໄປຢ່າງວ່ອງໄວ ແລະ ໄປທີ່ເຮືອນຂອງຊາຍຄົນໜຶ່ງໃນບາຮູຣິມ. ລາວມີນ້ຳສ້າງຢູ່ທີ່ເດີນບ້ານ, ແລະ ພວກເຂົາກໍລົງໄປໃນນໍ້າສ້າງນັ້ນ. ເມຍຂອງຊາຍຄົນນັ້ນໄດ້ເອົາຜ້າມາ ແລະ ຜືອອກປິດປາກນໍ້າສ້າງໄວ້ ແລະ ຢາຍເມັດເຂົ້າໃສ່ເທິງນັ້ນ. ບໍ່ມີຜູ້ໃດຮູ້ເລື່ອງນີ້ເລີຍ.
ເມື່ອຄົນຂອງອັບຊາໂລມໄດ້ມາຫາຍິງນັ້ນຢູ່ທີ່ເຮືອນ, ພວກເຂົາໄດ້ຖາມນາງວ່າ, “ອາຮີມາອາດ ແລະ ໂຢນາທານຢູ່ໃສ?”
ນາງຕອບພວກເຂົາວ່າ, “ຊາຍເຫລົ່ານັ້ນຂ້າມຫ້ວຍໄປແລ້ວ”.2 ພວກເຂົາຄົ້ນຫາແຕ່ບໍ່ພົບຜູ້ໃດ, ສະນັ້ນ ພວກເຂົາກັບຄືນມາທີ່ເຢຣູຊາເລັມ.
ຫລັງຈາກທີ່ພວກເຂົາໄດ້ໄປແລ້ວ, ອາຮີມາອາດ ແລະ ໂຢນາທານກໍປີນຂຶ້ນຈາກນໍ້າສ້າງ ແລ້ວໄດ້ໄປບອກກະສັດດາວິດ. ພວກເຂົາໄດ້ເວົ້າກັບເພິ່ນວ່າ, “ໂຜດເດີນທາງອອກມາ ແລະ ຂ້າມແມ່ນ້ຳດຽວນີ້; ອາຮີໂຕເຟນໄດ້ແນະນຳໃຫ້ອັບຊາໂລມຕໍ່ສູ້ກັບທ່ານ”. ດັ່ງນັ້ນ ດາວິດ ແລະ ຄົນທັງໝົດທີ່ຢູ່ກັບເພິ່ນອອກເດີນທາງ ແລະ ຂ້າມແມ່ນ້ຳຈໍແດນໄປ. ພໍຮອດຕອນເຊົ້າ. ທຸກຄົນກໍໄດ້ຂ້າມແມ່ນ້ຳຈໍແດນມາຄົບທຸກຄົນ.
ເມື່ອອາຮີໂຕເຟນເຫັນວ່າບໍ່ມີຜູ້ໃດເຮັດຕາມຄຳແນະນຳຂອງຕົນ, ລາວກໍຂີ່ລໍໄປທີ່ບ້ານເກີດຂອງຕົນ. ລາວໄດ້ຈັດການກັບຊັບສົມບັດຂອງຕົນໃຫ້ຮຽບຮ້ອຍ ແລ້ວຜູກຄໍຕາຍ. ດັ່ງນັ້ນ ລາວໄດ້ຕາຍໄປ ແລະ ຖືກຝັງໄວ້ໃນອຸບມຸງຂອງພໍ່ຂອງລາວ.
ອັບຊາໂລມຕາຍ
ດາວິດໄດ້ໄປທີ່ມະຫານາອິມ ແລະ ອັບຊາໂລມໄດ້ຂ້າມແມ່ນ້ຳຈໍແດນມາກັບທະຫານອິດສະຣາເອນທັງໝົດ. ອັບຊາໂລມໄດ້ແຕ່ງຕັ້ງອາມາສາເປັນຜູ້ນຳກອງທັບແທນໂຢອາບ. ອາມາສາເປັນລູກຊາຍຂອງເຢເທີ,3 ເຊິ່ງເປັນຊາວອິດຊະມາເອນ4ທີ່ໄດ້ແຕ່ງງານກັບອາບີກາຍ,5 ລູກສາວຂອງນາຮາດ ແລະ ເປັນເອື້ອຍຂອງນາງເຊຣູອີຢາແມ່ຂອງໂຢອາບ. ອັບຊາໂລມ ແລະ ທະຫານອິດສະຣາເອນຕັ້ງຄ້າຍໃນດິນແດນກີເລອາດ.
ເມື່ອດາວິດໄດ້ມາຮອດມະຫານາອິມ, ໂຊບີລູກຊາຍຂອງນາຮາດຈາກເມືອງຣັບບາຂອງຊາວອຳໂມນ ແລະ ມາກີລູກຊາຍອໍາມີເອນຈາກເມືອງໂລເດບາ ແລະ ບາກຊິນໄລຊາວກີເລອາດຈາກເມືອງໂຣເກລິມ ໄດ້ນຳເຄື່ອງນອນ, ໝໍ້ຕົ້ມ, ຖ້ວຍຊາມ ແລະ ເຄື່ອງໃຊ້ໝໍ້ດິນ. ພວກເຂົາຍັງໄດ້ນໍາເຂົ້າຫວີດ ແລະ ເຂົ້າບາເລ, ແປ້ງ, ເຂົ້າຂົ້ວ, ໝາກຖົ່ວ ແລະ ໝາກຖົ່ວແດງ, ນໍ້າເຜິ້ງ ແລະ ນໍ້ານົມຂຸ້ນ, ແກະ ແລະ ເນີຍແຂງຈາກນົມງົວມາໃຫ້ດາວິດ ແລະ ຄົນຂອງເພິ່ນກິນ. ເພາະພວກເຂົາໄດ້ເວົ້າວ່າ “ຄົນທັງຫລາຍຕ້ອງອິດເມື່ອຍ, ຫິວເຂົ້າ ແລະ ຫິວນໍ້າໃນຖິ່ນແຫ້ງແລ້ງກັນດານ”.
Source notes (5)
- Footnote ຫລື ເມື່ອບາງຄົນລົ້ມຕາຍໃນການໂຈມຕີເທື່ອທຳອິດ
- Footnote ຫລື “ ພວກເຂົາຜ່ານຄອກແກະໄປຫານ້ຳແລ້ວ ”
- Footnote ພາສາເຮັບເຣີວ່າ ອິດລາ ເປັນອີກຮູບໜຶ່ງຂອງ ເຢເທີ
- Footnote ສຳເນົາສະບັບເຊັບຕູອາຈິນ ບາງສະບັບວ່າ ຊາວອິດຊະມາເອນ ຫລື ຊາວອິດສະຣາເອນ (ເບິ່ງ 1ຂຄ 2:17)
- Footnote ພາສາເຮັບເຣີວ່າ ອາບີກາຍ ເປັນອີກຮູບໜຶ່ງຂອງ ອາບີກາຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.