Biblica® Open Lao Contemporary Version
2 ຊາມູເອນ 16
ດາວິດ ແລະ ຊີບາ
ເມື່ອດາວິດໄດ້ອອກໄປບໍ່ໄກຈາກຈອມພູກໍພົບຊີບາ, ເຊິ່ງເປັນຫົວໜ້າຄົນຮັບໃຊ້ຂອງເມຟີໂບເຊັດ, ລາວກໍາລັງລໍຖ້າພົບດາວິດຢູ່. ລາວນຳລໍຄູ່ໜຶ່ງຜູກອານ ແລະ ມີເຂົ້າຈີ່ສອງຮ້ອຍກ້ອນ ຂະໜົມໝາກອະງຸ່ນແຫ້ງໜຶ່ງຮ້ອຍກ້ອນ, ເຂົ້າໜົມໝາກເດື່ອຮ້ອຍກ້ອນ ແລະ ເຫລົ້າອະງຸ່ນໜຶ່ງຖົງ.
ດາວິດຖາມຊີບາວ່າ, “ເປັນຫຍັງເຈົ້າຈຶ່ງໄດ້ເອົານໍາສິ່ງຂອງເຫລົ່ານີ້ມາ?”
ຊີບາຕອບວ່າ, “ລໍນີ້ສຳລັບໃຫ້ຄົນໃນຄອບຄົວຂອງກະສັດຂີ່, ເຂົ້າຈີ່ ແລະ ໝາກໄມ້ໃຫ້ຄົນຂອງທ່ານກິນ, ແລະ ເຫລົ້າອະງຸ່ນເອົາໄວ້ໃຫ້ຄົນທີ່ອິດເມື່ອຍໃນຖິ່ນແຫ້ງແລ້ງກັນດານໄດ້ສົດຊື່ນ”.
ແລ້ວກະສັດໄດ້ຖາມວ່າ, “ຫລານຊາຍຂອງນາຍເຈົ້າຢູ່ໃສ?”
ຊີບາຕອບເພິ່ນວ່າ, “ລາວກໍາລັງອາໄສຢູ່ທີ່ເຢຣູຊາເລັມ, ເພາະລາວຄິດວ່າ, ‘ວັນນີ້ຊາວອິດສະຣາເອນຈະຄືນອານາຈັກປູ່ຂອງລາວໃຫ້ແກ່ລາວ’ ”.
ແລ້ວດາວິດໄດ້ເວົ້າກັບຊີບາວ່າ, “ບັດນີ້ ທຸກຢ່າງເປັນຂອງເມຟີໂບເຊັດກໍເປັນຂອງເຈົ້າແລ້ວ”.
ຊີບາໄດ້ເວົ້າວ່າ, “ຂ້ານ້ອຍກົ້ມກາບຢ່າງນັບຖື, ຂໍໃຫ້ຂ້ານ້ອຍເປັນທີ່ພໍໃຈໃນສາຍຕາຂອງທ່ານ, ກະສັດເຈົ້ານາຍຂອງຂ້ານ້ອຍ”.
ຊີເມອີສາບແຊ່ງດາວິດ
ຂະນະທີ່ກະສັດດາວິດເດີນທາງໃກ້ຈະຮອດບາຮູຣິມ, ຊາຍຄົນໜຶ່ງມາຈາກເຜົ່າດຽວກັນກັບຕະກຸນຂອງໂຊນໄດ້ອອກມາຈາກທີ່ນັ້ນ. ລາວຊື່ວ່າຊີເມອີລູກຊາຍຂອງເກຣາ, ແລະ ລາວສາບແຊ່ງດາວິດຂະນະທີ່ເພິ່ນອອກມາ. ລາວແກວ່ງກ້ອນຫີນໃສ່ດາວິດ ແລະ ບັນດາຂ້າລາຊະການຂອງກະສັດ, ແມ່ນວ່າກອງທະຫານ ແລະ ທະຫານພິເສດຢືນຢູ່ຂ້າງດາວິດດ້ານຊ້າຍ ແລະ ດ້ານຂວາກໍຕາມ. ຊີເມອີສາບແຊ່ງວ່າ, “ຈົ່ງໄປໃຫ້ພົ້ນ, ເຈົ້າຜູ້ຮ້າຍຂ້າຄົນ, ເຈົ້າຄົນຊົ່ວ! ພຣະເຈົ້າຢາເວໄດ້ຕອບແທນເຈົ້າສຳລັບເລືອດທຸກຢົດທີ່ເຈົ້າເຮັດໃຫ້ຫລັ່ງໄຫລອອກມາໃນຄອບຄົວຂອງໂຊນ, ບ່ອນທີ່ເຈົ້າໄດ້ປົກຄອງແທນ. ພຣະເຈົ້າຢາເວໄດ້ຍົກອານາຈັກໄວ້ໃນມືຂອງອັບຊາໂລມລູກຊາຍຂອງເຈົ້າ. ເຈົ້າຕ້ອງຈິບຫາຍເພາະເຈົ້າເປັນຜູ້ຂ້າຄົນ!”
ແລ້ວອາບີໄຊລູກຊາຍນາງເຊຣູອີຢາໄດ້ເວົ້າກັບກະສັດວ່າ, “ເປັນຫຍັງໝາຕາຍໂຕນີ້ຈຶ່ງສາບແຊ່ງກະສັດເຈົ້ານາຍຂອງຂ້ານ້ອຍ? ຂໍໃຫ້ຂ້ານ້ອຍອອກໄປຕັດຫົວມັນສາ”.
ແຕ່ກະສັດໄດ້ເວົ້າວ່າ, “ລູກຊາຍນາງເຊຣູອີຢາ, ເຈົ້າກ່ຽວຂ້ອງອັນໃດກັບເລື່ອງນີ້? ຖ້າລາວສາບແຊ່ງເພາະພຣະເຈົ້າຢາເວໄດ້ກ່າວກັບລາວວ່າ, ‘ຈົ່ງສາບແຊ່ງດາວິດ,’ ຜູ້ໃດຈະໄປຖາມວ່າ, ‘ເປັນຫຍັງເຈົ້າຈຶ່ງເຮັດຢ່າງນີ້?’ ”
ແລ້ວດາວິດໄດ້ເວົ້າກັບອາບີໄຊ ແລະ ບັນດາຂ້າລາຊະການທຸກຄົນຂອງເພິ່ນວ່າ, “ແມ່ນແຕ່ລູກຂອງເຮົາເອງ, ເນື້ອ ແລະ ເລືອດຂອງເຮົາເອງຍັງພະຍາຍາມຈະຂ້າເຮົາ. ແລ້ວຊາວເບັນຢາມິນຄົນນີ້ກໍຍິ່ງຈະບໍ່ຢາກເອົາຊີວິດຂອງເຮົາບໍ; ຈົ່ງປ່ອຍລາວໄປສາ; ປ່ອຍໃຫ້ລາວສາບແຊ່ງໄປ, ເພາະພຣະເຈົ້າຢາເວໄດ້ບອກລາວມາ. ບາງທີພຣະເຈົ້າຢາເວຈະເຫັນຄວາມທຸກໃຈຂອງເຮົາ ແລະ ຄືນຄໍາໝັ້ນສັນຍາແຫ່ງການອວຍພອນຂອງພຣະອົງແທນຄໍາສາບແຊ່ງຂອງລາວໃນວັນນີ້”.
ສະນັ້ນ ດາວິດ ແລະ ຄົນຂອງເພິ່ນເດີນທາງຕໍ່ໄປ ຂະນະທີ່ຊີເມອີຍ່າງໄປຕາມຮ່ອມພູຟາກທີ່ກົງກັນຂ້າມກັບເພິ່ນ, ລາວຍ່າງໄປພ້ອມທັງສາບແຊ່ງ ແລະ ແກວ່ງກ້ອນຫີນໃສ່ເພິ່ນ ແລະ ໂຮຍຝຸ່ນຂີ້ດິນໃສ່ດາວິດ. ກະສັດ ແລະ ທຸກຄົນທີ່ຢູ່ກັບເພິ່ນມາຮອດຈຸດໝາຍຂອງຕົນດ້ວຍຄວາມອິດເມື່ອຍ. ແລະ ເພິ່ນຢຸດພັກຜ່ອນຢູ່ທີ່ນັ້ນ.
ຄຳແນະນຳຂອງຮູຊາຍ ແລະ ອາຮີໂຕເຟນ
ໃນຂະນະດຽວກັນ, ອັບຊາໂລມ ແລະ ຊາວອິດສະຣາເອນທັງໝົດກໍມາຮອດເຢຣູຊາເລັມ ແລະ ອາຮີໂຕເຟນກໍຢູ່ກັບລາວ. ເມື່ອຮູຊາຍຊາວອາກກິດ, ເຊິ່ງເປັນເພື່ອນສະໜິດຂອງດາວິດໄປພົບອັບຊາໂລມ ແລະ ໄດ້ເວົ້າກັບລາວວ່າ, “ຂໍກະສັດຈົ່ງໝັ້ນຢືນ! ຂໍໃຫ້ກະສັດຈົ່ງໝັ້ນຢືນ!”
ອັບຊາໂລມໄດ້ເວົ້າກັບຮູຊາຍວ່າ, “ນີ້ແມ່ນຄວາມຮັກທີ່ເຈົ້າສະແດງຕໍ່ໝູ່ຂອງເຈົ້າ? ຖ້າດາວິດເປັນໝູ່ຂອງເຈົ້າ, ເປັນຫຍັງເຈົ້າຈຶ່ງບໍ່ໄປກັບເພິ່ນ?”
ຮູຊາຍໄດ້ຕອບອັບຊາໂລມວ່າ, “ບໍ່, ຂ້ານ້ອຍຈະຢູ່ກັບຄົນທີ່ໄດ້ຖືກຈາກພຣະເຈົ້າຢາເວ, ຈາກຜູ້ນຳເຫລົ່ານີ້ ແລະ ຈາກຊາວອິດສະຣາເອນທັງໝົດ, ແລະ ຂ້ານ້ອຍຍັງຈະຢູ່ກັບລາວ. ຫລາຍກວ່ານັ້ນ, ຜູ້ໃດທີ່ຂ້ານ້ອຍຄວນຈະຮັບໃຊ້? ຂ້ານ້ອຍບໍ່ຄວນຮັບໃຊ້ລູກຊາຍຂອງເພິ່ນບໍ? ຂ້ານ້ອຍໄດ້ຮັບໃຊ້ພໍ່ຂອງທ່ານມາແລ້ວຢ່າງໃດ ບັດນີ້ ຂ້ານ້ອຍຈະຮັບໃຊ້ທ່ານຢ່າງນັ້ນ”.
ອັບຊາໂລມໄດ້ເວົ້າກັບອາຮີໂຕເຟນວ່າ, “ຈົ່ງຊ່ວຍແນະນຳພວກເຮົາ. ພວກເຮົາຄວນຈະເຮັດຢ່າງໃດ?”
ອາຮີໂຕເຟນຕອບວ່າ, “ຈົ່ງໄປຫລັບນອນກັບບັນດາເມຍນ້ອຍຂອງພໍ່ທ່ານທີ່ເບິ່ງແຍງວັງຢູ່. ແລ້ວຄົນອິດສະຣາເອນທັງໝົດຈະໄດ້ຮູ້ວ່າທ່ານເປັນທີ່ກຽດຊັງຕໍ່ພໍ່ຂອງທ່ານ ແລະ ທຸກຄົນທີ່ຢູ່ກັບທ່ານຈະມີໃຈກະຕືລືລົ້ນຫລາຍຍິ່ງຂຶ້ນ”. ດັ່ງນັ້ນ ພວກເຂົາຈຶ່ງກາງຜ້າເຕັນຂຶ້ນຢູ່ເທິງດາດຟ້າຂອງວັງ ແລະ ອັບຊາໂລມໄດ້ຫລັບນອນກັບບັນດາເມຍນ້ອຍຂອງພໍ່ຕົນຕໍ່ໜ້າຊາວອິດສະຣາເອນທັງໝົດ.
ໃນເວລານັ້ນ ຄໍາແນະນໍາຂອງອາຮີໂຕເຟນກໍເປັນດັ່ງຄໍາແນະນໍາຂອງຜູ້ທີ່ຖາມຈາກພຣະເຈົ້າ. ນັ້ນແມ່ນວິທີທີ່ດາວິດ ແລະ ອັບຊາໂລມກໍຖືວ່າຄຳແນະນຳທຸກຢ່າງຂອງອາຮີໂຕເຟນໄດ້ຖາມຈາກພຣະເຈົ້າ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.