Biblica® Open Lao Contemporary Version
2 ກະສັດ 24
ໃນຊ່ວງການປົກຄອງຂອງເຢໂຮຍອາກິມ, ກະສັດເນບູກາດເນັດຊາແຫ່ງບາບີໂລນມາຮຸກຮານດິນແດນ ແລະ ເຢໂຮຍອາກິມຕົກເປັນຂ້າຮັບໃຊ້ຂອງເພິ່ນເປັນເວລາສາມປີ. ແຕ່ຫລັງຈາກນັ້ນ ເພິ່ນກໍໄດ້ຫັນກັບໄປຕໍ່ສູ້ເນບູກາດເນັດຊາ. ພຣະເຈົ້າຢາເວໄດ້ສົ່ງຊາວບາບີໂລນ,1 ອາຣາມ, ໂມອາບ ແລະ ອຳໂມນມາປຸ້ນ ແລະ ທຳລາຍຢູດາຍຕາມຖ້ອຍຄຳຂອງພຣະເຈົ້າຢາເວທີ່ໄດ້ກ່າວໄວ້ຜ່ານທາງບັນດາຜູ້ທຳນວາຍຜູ້ຮັບໃຊ້ຂອງພຣະອົງ. ເຫດການເຫລົ່ານີ້ເກີດແກ່ຢູດາຍຕາມຄຳສັ່ງຂອງພຣະເຈົ້າຢາເວ, ເພື່ອຈະກວາດລ້າງພວກເຂົາອອກໄປໃຫ້ພົ້ນຈາກພຣະອົງ ເນື່ອງຈາກຄວາມບາບທັງຫລາຍຂອງມານາເຊ ແລະ ສິ່ງທັງໝົດທີ່ເພິ່ນໄດ້ເຮັດ. ລວມທັງການເຮັດໃຫ້ເລືອດຂອງຜູ້ບໍລິສຸດຕ້ອງຫລັ່ງໄຫລ. ເພາະເພິ່ນໄດ້ເຮັດໃຫ້ເຢຣູຊາເລັມນອງດ້ວຍເລືອດຂອງຜູ້ບໍລິສຸດ ແລະ ພຣະເຈົ້າຢາເວບໍ່ໄດ້ເຕັມໃຈທີ່ຈະອະໄພໃຫ້.
ເຫດການອື່ນໆໃນຊ່ວງການປົກຄອງຂອງເຢໂຮຍອາກິມ ແລະ ພາລະກິດທັງໝົດທີ່ເພິ່ນໄດ້ເຮັດແມ່ນມີບັນທຶກໄວ້ໃນປຶ້ມປະຫວັດສາດຂອງບັນດາກະສັດແຫ່ງຢູດາຍບໍ່ແມ່ນບໍ? ເຢໂຮຍອາກິມໄດ້ລ່ວງລັບໄປຢູ່ກັບບັນພະບຸລຸດຂອງເພິ່ນ ແລະ ເຢໂຮຍອາກິນລູກຊາຍຂອງເພິ່ນກໍໄດ້ຂຶ້ນເປັນກະສັດແທນ.
ຟາໂຣແຫ່ງເອຢິບບໍ່ໄດ້ຍົກທັບກັບມາອີກ ເພາະກະສັດບາບີໂລນຢຶດດິນແດນທັງໝົດຂອງເພິ່ນຕັ້ງແຕ່ແມ່ນ້ຳແຫ່ງເອຢິບຈົນຮອດແມ່ນ້ຳເອີຟຣັດ.
ກະສັດເຢໂຮຍອາກິນແຫ່ງຢູດາຍ
(2ຂຄ 36:9-10)
ເມື່ອເຢໂຮຍອາກິນຂຶ້ນເປັນກະສັດ ເພິ່ນມີອາຍຸສິບແປດປີ ແລະ ປົກຄອງຢູ່ໃນເຢຣູຊາເລັມສາມເດືອນ ແມ່ຂອງຄືເປັນຮູຊະຕາລູກສາວຂອງເອນນາທານຈາກເຢຣູຊາເລັມ. ເຢໂຮຍາກິນເຮັດສິ່ງທີ່ຊົ່ວໃນສາຍຕາຂອງພຣະເຈົ້າຢາເວເໝືອນທີ່ບັນພະບຸລຸດຂອງໄດ້ເຮັດ.
ໃນຊ່ວງນີ້ເອງ ກອງທັບຂອງເນບູກາດເນັດຊາແຫ່ງບາບີໂລນບຸກມາລ້ອມເຢຣູຊາເລັມໄວ້. ລະຫວ່າງທີ່ລ້ອມຢູ່ນັ້ນ ເນບູກາດເນັດຊາເອງໄດ້ມາທີ່ເຢຣູຊາເລັມ. ກະສັດເຢໂຮຍອາກິນແຫ່ງຢູດາຍ, ແມ່ ແລະ ຜູ້ນຳທັບ ແລະ ຜູ້ຮັບໃຊ້ທັງໝົດໄດ້ຍອມຈຳນົນແກ່ເນບູກາດເນັດຊາ.
ໃນປີທີແປດແຫ່ງຊ່ວງການປົກຄອງຂອງເນບູກາດເນັດຊາ, ເຢໂຮຍາກິນຖືກຈັບໄປເປັນຊະເລີຍ. ຕາມທີ່ພຣະເຈົ້າຢາເວໄດ້ກ່າວໄວ້, ເນບູກາດເນັດຊາປຸ້ນເອົາສົມບັດທັງໝົດຈາກວິຫານຂອງພຣະເຈົ້າຢາເວ ແລະ ວັງກັບໄປ, ຕະຫລອດຈົນພາຊະນະເຄື່ອງໃຊ້ຄຳທັງໝົດທີ່ກະສັດໂຊໂລໂມນແຫ່ງອິດສະຣາເອນໃຫ້ເຮັດຂຶ້ນເພື່ອໃຊ້ໃນວິຫານຂອງພຣະເຈົ້າຢາເວດ້ວຍ. ເນບູກາດເນັດຊາໄດ້ຈັບກຸມຊະເລີຍຈຳນວນສິບພັນຄົນໄປຈາກເຢຣູຊາເລັມ ມີທັງຜູ້ຮັບໃຊ້, ນັກຮົບ, ຊ່າງຝີມື ແລະ ຊ່າງໂລຫະຕ່າງໆ ເຫລືອໄວ້ແຕ່ປະຊາຊົນທີ່ທຸກຍາກທີ່ສຸດ.
ເນບູກາດເນັດຊາໄດ້ຈັບກຸມໂຕເຢໂຮຍອາກິນໄປເປັນຊະເລີຍທີ່ບາບີໂລນ ລວມທັງບັນດາເມຍທັງຫລາຍ, ແມ່, ຜູ້ຮັບໃຊ້ ແລະ ຊົນຊັ້ນຜູ້ນຳຂອງຢູດາຍດ້ວຍ. ກະສັດແຫ່ງບາບີໂລນຄຸມໂຕບັນດານັກຮົບທັງໝົດເຈັດພັນຄົນໄປທີ່ບາບີໂລນ, ລ້ວນແຕ່ແຂງແຮງ ແລະ ພ້ອມທີ່ຈະອອກຮົບ ແລະ ຊ່າງໂລຫະກັບຊ່າງຝີມືອີກໜຶ່ງພັນຄົນ. ຫລັງຈາກນັ້ນ ເພິ່ນກໍໄດ້ແຕ່ງຕັ້ງມັດຕານິຢາ ລຸງຂອງເຢໂຮຍາກິນໃຫ້ເປັນກະສັດແທນ ແລະ ໄດ້ປ່ຽນຊື່ເປັນເຊເດກີຢາ.
ກະສັດເຊເດກີຢາແຫ່ງຢູດາຍ
(2ຂຄ 36:11-16; ຢມຢ 52:1-3)
ເມື່ອເຊເດກີຢາໄດ້ຂຶ້ນເປັນກະສັດແຫ່ງຢູດາຍ, ເພິ່ນມີອາຍຸຊາວເອັດປີ ແລະ ເພິ່ນໄດ້ປົກຄອງເຢຣູຊາເລັມເປັນເວລາສິບເອັດປີ. ແມ່ຂອງເພິ່ນຊື່ວ່າຮາມູຕານທີ່ເປັນລູກສາວຂອງເຢເຣມີຢາ, ນາງມາຈາກລິບນາ. ເຊເດກີຢາໄດ້ເຮັດສິ່ງທີ່ຊົ່ວໃນສາຍຕາຂອງພຣະເຈົ້າຢາເວເໝືອນດັ່ງທີ່ເຢໂຮຍອາກິມໄດ້ເຮັດ. ຍ້ອນຄວາມໃຈຮ້າຍຂອງພຣະເຈົ້າຢາເວຈຶ່ງເຮັດໃຫ້ເຫດການທັງໝົດນີ້ໄດ້ເກີດຂຶ້ນກັບເຢຣູຊາເລັມ ແລະ ຢູດາຍ, ໃນທີ່ສຸດພຣະອົງໂຍນພວກເຂົາໄປໃຫ້ພົ້ນຈາກໜ້າຂອງພຣະອົງ. ບັດນີ້ ເຊເດກີຢາໄດ້ກະບົດຕໍ່ກະສັດບາບີໂລນ.
ເຢຣູຊາເລັມຫລົ້ມຈົມ
(2ຂຄ 36:17-20; ຢມຢ 39:1-10; 40:7-9; 41:1-3,16-18; 52:4-27)
ໃນເວລານັ້ນເຊເດກີຢາໄດ້ກະບົດຕໍ່ກະສັດບາບີໂລນ.
Source notes (1)
- Footnote ຫລື ກັນເດອານ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.