Biblica® Open Lao Contemporary Version
2 ກະສັດ 2
ພຣະເຈົ້າໄດ້ຮັບເອລີຢາຂຶ້ນສູ່ສະຫວັນ
ເມື່ອໃກ້ເວລາທີ່ພຣະເຈົ້າຢາເວຈະຮັບເອລີຢາຂຶ້ນສູ່ສະຫວັນດ້ວຍພະຍຸໝຸນ, ເອລີຢາ ແລະ ເອລີຊາໄດ້ເດີນທາງອອກຈາກກິນການ. ເອລີຢາໄດ້ເວົ້າກັບເອລີຊາວ່າ, “ຈົ່ງພັກຢູ່ບ່ອນນີ້; ພຣະເຈົ້າຢາເວໄດ້ໃຊ້ຂ້ອຍໄປທີ່ເບັດເອນ”.
ແຕ່ເອລີຊາໄດ້ຕອບວ່າ, “ພຣະເຈົ້າຢາເວດຳລົງຢູ່ ແລະ ທ່ານມີຊີວິດຢູ່ສັນໃດ ຂ້ານ້ອຍກໍຈະບໍ່ໄປຈາກທ່ານຢ່າງແນ່ນອນສັນນັ້ນ”. ດັ່ງນັ້ນ ທັງສອງຈຶ່ງເດີນທາງໄປທີ່ເບັດເອນດ້ວຍກັນ.
ບັນດາຜູ້ທຳນວາຍທີ່ເບັດເອນໄດ້ອອກມາພົບເອລີຊາ ແລະ ຖາມວ່າ, “ເຈົ້າຮູ້ບໍວ່າ ພຣະເຈົ້າຢາເວກຳລັງຈະຮັບນາຍຂອງເຈົ້າໄປໃນວັນນີ້?”
ເອລີຊາໄດ້ຕອບວ່າ, “ແມ່ນ, ຂ້ອຍຮູ້ແລ້ວ, ຢ່າເວົ້າເລື່ອງນີ້ເລີຍ”.
ແລ້ວເອລີຢາກໍໄດ້ເວົ້າກັບເອລີຊາວ່າ, “ເອລີຊາ, ຈົ່ງພັກຢູ່ບ່ອນນີ້; ພຣະເຈົ້າຢາເວໄດ້ໃຊ້ຂ້ອຍໄປທີ່ເມືອງເຢຣິໂກ”.
ເອລີຊາໄດ້ຕອບວ່າ, “ພຣະເຈົ້າຢາເວດຳລົງຢູ່ ແລະ ທ່ານມີຊີວິດຢູ່ສັນໃດ ຂ້ານ້ອຍກໍຈະບໍ່ໄປຈາກທ່ານຢ່າງແນ່ນອນສັນນັ້ນ”. ດັ່ງນັ້ນ ທັງສອງຈຶ່ງເດີນທາງໄປທີ່ເມືອງເຢຣິໂກ.
ບັນດາຜູ້ທຳນວາຍທີ່ເມືອງເຢຣິໂກໄດ້ຂຶ້ນມາຫາເອລີຊາ ແລະ ຖາມລາວວ່າ, “ເຈົ້າຮູ້ບໍວ່າ ພຣະເຈົ້າຢາເວກຳລັງຈະຮັບນາຍຂອງເຈົ້າໄປໃນວັນນີ້?”
ເອລີຊາໄດ້ຕອບວ່າ, “ແມ່ນ, ຂ້ອຍຮູ້ແລ້ວ. ຢ່າເວົ້າເລື່ອງນີ້ເລີຍ”.
ເອລີຢາຈຶ່ງໄດ້ເວົ້າກັບເອລີຊາວ່າ, “ຈົ່ງພັກຢູ່ບ່ອນນີ້; ພຣະເຈົ້າຢາເວໄດ້ໃຊ້ຂ້ອຍໄປທີ່ແມ່ນ້ຳຈໍແດນ”.
ເອລີຊາໄດ້ຕອບວ່າ “ພຣະເຈົ້າຢາເວດຳລົງຢູ່ ແລະ ທ່ານມີຊີວິດຢູ່ສັນໃດ ຂ້ານ້ອຍກໍຈະບໍ່ໄປຈາກທ່ານຢ່າງແນ່ນອນສັນນັ້ນ”. ດັ່ງນັ້ນ ທັງສອງຈຶ່ງເດີນທາງໄປດ້ວຍກັນ.
ມີຜູ້ຊາຍຫ້າສິບຄົນຈາກກຸ່ມຜູ້ທຳນວາຍໄດ້ໄປຢືນຢູ່ໄກໆ, ຫັນໜ້າໄປທາງບ່ອນທີ່ເອລີຢາ ແລະ ເອລີຊາມາຢຸດຢູ່ແຄມແມ່ນ້ຳຈໍແດນ. ແລ້ວເອລີຢາກໍໄດ້ຖອດເສື້ອຄຸມຂອງຕົນອອກ, ມ້ວນ ແລະ ຟາດລົງທີ່ແມ່ນ້ຳ. ນ້ຳກໍແຍກອອກໄປຫາເບື້ອງຊ້າຍ ແລະ ເບື້ອງຂວາ ແລ້ວທັງສອງຈຶ່ງຍ່າງຂ້າມໄປເທິງພື້ນແຫ້ງ.
ເມື່ອທັງສອງຂ້າມມາແລ້ວ, ເອລີຢາກໍເວົ້າກັບເອລີຊາວ່າ, “ຈົ່ງບອກຂ້ອຍມາວ່າ ຂ້ອຍຈະເຮັດຫຍັງໃຫ້ເຈົ້າໄດ້ແດ່ກ່ອນທີ່ຂ້ອຍຈະຖືກຮັບໄປ?”
ເອລີຊາໄດ້ຕອບວ່າ, “ຂໍໃຫ້ຂ້ານ້ອຍໄດ້ຮັບມໍລະດົກໃນລິດອຳນາດຂອງທ່ານເປັນສອງເທົ່າ”.
ເອລີຢາໄດ້ເວົ້າວ່າ, “ເຈົ້າຂໍສິ່ງທີ່ຍາກຫລາຍ, ແຕ່ຖ້າເຈົ້າເຫັນເວລາທີ່ຂ້ອຍຖືກຮັບຂຶ້ນໄປຈາກເຈົ້ານັ້ນ ເຈົ້າກໍຈະໄດ້ຮັບຕາມທີ່ຂໍ ຖ້າບໍ່ເຫັນ ເຈົ້າກໍຈະບໍ່ໄດ້”.
ຂະນະທີ່ທັງສອງກຳລັງຍ່າງ ແລະ ສົນທະນາກັນໄປນັ້ນ, ໃນທັນໃດນັ້ນ ກໍມີລົດມ້າທີ່ມີໄຟລຸກ ແລະ ມ້າປາກົດຂຶ້ນ ແລະ ແຍກທັງສອງອອກຈາກກັນ ແລ້ວເອລີຢາກໍຖືກພະຍຸໝຸນຫອບຂຶ້ນສູ່ສະຫວັນ. ເອລີຊາໄດ້ເຫັນດັ່ງນັ້ນ ຈຶ່ງຮ້ອງສຽງດັງວ່າ, “ພໍ່! ພໍ່ຂອງຂ້ານ້ອຍ! ຜູ້ເປັນລົດມ້າ ແລະ ທະຫານມ້າແຫ່ງອິດສະຣາເອນ!” ແລ້ວເອລີຊາກໍບໍ່ເຫັນເອລີຢາອີກ. ລາວຈຶ່ງຈີກເຄື່ອງນຸ່ງຂອງຕົນອອກເປັນສອງຕ່ອນ.
ຫລັງຈາກນັ້ນ ລາວຈຶ່ງຈັບເສື້ອຄຸມຂອງເອລີຢາທີ່ຕົກຢູ່ນັ້ນຂຶ້ນມາ ແລະ ກັບໄປຢືນຢູ່ທີ່ແຄມຝັງແມ່ນ້ຳຈໍແດນ. ລາວໄດ້ເອົາເສື້ອຄຸມທີ່ຕົກລົງຈາກເອລີຢານັ້ນຟາດນ້ຳ ແລະ ລາວໄດ້ຖາມວ່າ, “ພຣະເຈົ້າຢາເວ ພຣະເຈົ້າຂອງເອລີຢາຢູ່ໃສ?” ເມື່ອລາວຟາດນ້ຳ, ນ້ຳກໍແຍກອອກໄປຫາເບື້ອງຊ້າຍ ແລະ ເບື້ອງຂວາ ແລ້ວເອລີຊາຈຶ່ງໄດ້ຍ່າງຂ້າມໄປ.
ບັນດາຜູ້ທຳນວາຍຈາກເມືອງເຢຣິໂກ ເຊິ່ງກຳລັງເຝົ້າເບິ່ງຢູ່ ກໍໄດ້ເວົ້າວ່າ, “ລິດອຳນາດຂອງເອລີຢາມາຢູ່ກັບເອລີຊາແລ້ວ”. ແລ້ວພວກເຂົາກໍໄດ້ພາກັນມາພົບເອລີຢາ ແລະ ກົ້ມລົງທີ່ພື້ນຄຳນັບເອລີຊາ. ພວກເຂົາໄດ້ເວົ້າວ່າ, “ເບິ່ງແມ ພວກເຮົາຜູ້ຮັບໃຊ້ຂອງທ່ານມີຄົນໜຸ່ມທີ່ແຂງແຮງຫ້າສິບຄົນ. ໃຫ້ພວກເຂົາອອກໄປ ແລະ ຊອກຫານາຍຂອງທ່ານ. ບາງເທື່ອພຣະວິນຍານຂອງພຣະເຈົ້າຢາເວອາດຈະຮັບນາຍຂອງທ່ານຂຶ້ນໄປ ແລະ ປ່ອຍເພິ່ນໄວ້ຢູ່ເທິງພູເຂົາ ຫລື ຮ່ອມພູແຫ່ງໃດແຫ່ງໜຶ່ງ”.
ເອລີຊາໄດ້ຕອບວ່າ, “ບໍ່ຕ້ອງສົ່ງພວກເຂົາໄປ”.
ແຕ່ພວກເຂົາອ້ອນວອນຈົນເອລີຊາຂັດບໍ່ໄດ້. ດັ່ງນັ້ນ ລາວຈຶ່ງໄດ້ກ່າວວ່າ, “ຈົ່ງສົ່ງພວກເຂົາໄປ”. ແລ້ວພວກເຂົາກໍໄດ້ສົ່ງຜູ້ຊາຍຫ້າສິບຄົນໄປ ເພື່ອຄົ້ນຫາຕະຫລອດສາມວັນ ແຕ່ກໍບໍ່ພົບເອລີຢາ. ສ່ວນເອລີຊາຍັງຄົງຢູ່ທີ່ເມືອງເຢຣິໂກ, ເມື່ອພວກເຂົາກັບມາຮອດ ເອລີຊາຈຶ່ງກ່າວກັບພວກເຂົາວ່າ, “ຂ້ອຍບອກພວກເຈົ້າແລ້ວບໍ່ແມ່ນບໍວ່າບໍ່ຕ້ອງໄປ?”
ນ້ຳກັບຄືນສູ່ສະພາບດີ
ຊາວເມືອງນັ້ນໄດ້ມາແຈ້ງເອລີຊາວ່າ, “ນາຍເອີຍ, ເບິ່ງແມ, ທ່ານກໍເຫັນແລ້ວວ່າເມືອງນີ້ຕັ້ງຢູ່ໃນບ່ອນທີ່ດີ, ແຕ່ນ້ຳນັ້ນໃຊ້ບໍ່ໄດ້ ແລະ ແຜ່ນດິນກໍບໍ່ເກີດພືດຜົນ”.
ເອລີຊາໄດ້ວ່າ, “ຈົ່ງເອົາຊາມໃໝ່ມາໃຫ້ຂ້ອຍ ແລະ ໃສ່ເກືອລົງໃນຊາມນັ້ນ”. ດັ່ງນັ້ນ ພວກເຂົາກໍໄດ້ນຳເອົາຊາມນັ້ນມາໃຫ້ເອລີຊາ.
ດັ່ງນັ້ນ ເອລີຊາຈຶ່ງຍ່າງອອກໄປທີ່ບໍ່ນ້ຳ ແລະ ໄດ້ເທເກືອລົງໄປ, ໂດຍກ່າວວ່າ, “ພຣະເຈົ້າຢາເວກ່າວດັ່ງນັ້ນວ່າ: ‘ເຮົາໄດ້ເຮັດໃຫ້ນ້ຳແຫ່ງນີ້ມີສະພາບດີແລ້ວ. ຕັ້ງແຕ່ນີ້ໄປມັນຈະບໍ່ເປັນເຫດໃຫ້ຕາຍ ຫລື ເຮັດໃຫ້ແຜ່ນດິນບໍ່ເກີດພືດຜົນອີກ’ ”. ແລະ ນ້ຳກໍຄົງສະພາບດີເຊັ່ນນັ້ນຕະຫລອດມາຈົນທຸກວັນນີ້ ຕາມທີ່ເອລີຊາໄດ້ກ່າວໄວ້.
ເອລີຊາຖືກເຢາະເຢີ້ຍ
ຈາກທີ່ນັ້ນເອລີຊາໄດ້ເດີນທາງໄປທີ່ເບັດເອນ. ຂະນະທີ່ລາວກຳລັງຍ່າງໄປຕາມ, ມີເດັກນ້ອຍຜູ້ຊາຍກຸ່ມໜຶ່ງອອກມາຈາກເມືອງນັ້ນ ແລະ ໄດ້ເຢາະເຢີ້ຍລາວ. ພວກເຂົາເວົ້າວ່າ, “ຈົ່ງອອກໄປຈາກບ່ອນນີ້, ຄົນຫົວລ້ານ! ຈົ່ງອອກໄປຈາກບ່ອນນີ້, ຄົນຫົວລ້ານ!” ເອລີຊາຈຶ່ງຫັນກັບມາເບິ່ງພວກເຂົາ ແລະ ສາບແຊ່ງພວກເຂົາໃນນາມຂອງພຣະເຈົ້າຢາເວ. ແລ້ວກໍມີແມ່ໝີສອງໂຕອອກມາຈາກປ່າ ແລະ ໄດ້ຂ້າເດັກນ້ອຍ 42 ຄົນນັ້ນ. ແລ້ວເອລີຊາກໍໄດ້ໄປທີ່ພູເຂົາກາເມນ ແລະ ຈາກທີ່ນັ້ນກັບມາທີ່ຊາມາເຣຍ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.