Biblica® Open Lao Contemporary Version
2 ກະສັດ 1
ພຣະເຈົ້າຢາເວພິພາກສາອາຮາຊີຢາ
ຫລັງຈາກທີ່ອາຮາບຕາຍ ຊົນຊາດໂມອາບກໍໄດ້ກະບົດຕໍ່ອິດສະຣາເອນ. ຝ່າຍອາຮາຊີຢາພັດຕົກຈາກລະບຽງຫ້ອງຊັ້ນທີ່ຊາມາເຣຍ ແລະ ອາການໜັກ. ດັ່ງນັ້ນ ເພິ່ນຈຶ່ງສົ່ງຜູ້ສື່ສານໄປບອກກັບພວກເຂົາວ່າ, “ຈົ່ງໄປປຶກສາເບອານເຊບຸບ ພະແຫ່ງເອັກໂຣນວ່າອາການບາດເຈັບຂອງເຮົາຈະຫາຍບໍ່”.
ແຕ່ເທວະດາຂອງພຣະເຈົ້າຢາເວໄດ້ກ່າວກັບເອລີຢາຊາວຕີຊະເບວ່າ, “ຈົ່ງໄປພົບຜູ້ສື່ສານຂອງກະສັດຊາມາເຣຍນັ້ນ ແລະ ຖາມພວກເຂົາວ່າ, ‘ເປັນເພາະໃນອິດສະຣາເອນບໍ່ມີພຣະເຈົ້າ ພວກເຈົ້າຈຶ່ງຕ້ອງໄປປຶກສາບາອານເຊບຸບ ພະແຫ່ງເອັກໂຣນແມ່ນບໍ?’ ເຫດສະນັ້ນ ພຣະເຈົ້າຢາເວຈຶ່ງກ່າວວ່າ: ‘ເຈົ້າຈະບໍ່ໄດ້ລຸກອອກຈາກຕຽງທີ່ເຈົ້າກຳລັງນອນຢູ່. ເຈົ້າຈະຕ້ອງຕາຍແນ່ນອນ!’ ” ດັ່ງນັ້ນ ເອລີຢາຈຶ່ງໄປ.
ເມື່ອຜູ້ສື່ສານຂອງກະສັດຊາມາເຣຍກັບໄປພົບກະສັດ, ກະສັດຈຶ່ງໄດ້ຖາມພວກເຂົາວ່າ, “ພວກເຈົ້າກັບມາເຮັດຫຍັງ?”
ພວກເຂົາໄດ້ຕອບວ່າ, “ມີຊາຍຄົນໜຶ່ງໄດ້ມາຫາພວກຂ້ານ້ອຍ ແລະ ລາວໄດ້ເວົ້າກັບພວກຂ້ານ້ອຍວ່າ, ‘ຈົ່ງກັບໄປຫາກະສັດຜູ້ທີ່ໄດ້ສົ່ງພວກເຈົ້າມາ ແລະ ບອກເພິ່ນວ່າ, “ພຣະເຈົ້າຢາເວກ່າວດັ່ງນີ້ວ່າ: ເປັນເພາະໃນອິດສະຣາເອນບໍ່ມີພຣະເຈົ້າ ພວກເຈົ້າຈຶ່ງຕ້ອງໄປປຶກສາບາອານເຊບຸບ ພະແຫ່ງເອັກໂຣນແມ່ນບໍ? ເຫດສະນັ້ນ ພຣະເຈົ້າຢາເວຈຶ່ງກ່າວວ່າ: ເຈົ້າຈະບໍ່ໄດ້ລຸກອອກຈາກຕຽງທີ່ເຈົ້າກຳລັງນອນຢູ່. ເຈົ້າຈະຕ້ອງຕາຍແນ່ນອນ!” ’ ”
ກະສັດຊາມາເຣຍໄດ້ຖາມວ່າ, “ຊາຍຄົນທີ່ມາພົບພວກເຈົ້າ ແລະ ບອກເລື່ອງນີ້ແກ່ພວກເຈົ້ານັ້ນໜ້າຕາທ່າທາງຄົນນີ້ເປັນຢ່າງໃດ?”
ພວກເຂົາໄດ້ຕອບວ່າ, “ລາວສວມເສື້ອຄຸມຂົນສັດ1 ແລະ ໃຊ້ສາຍໜັງຮັດແອວ”.
ກະສັດໄດ້ກ່າວວ່າ, “ລາວຄືເອລີຢາຊາວຕີຊະເບ”.
ແລ້ວລາວກະສັດກໍສົ່ງນາຍທະຫານຄົນໜຶ່ງພ້ອມດ້ວຍທະຫານຫ້າສິບຄົນໄປຫາເອລີຢາ. ນາຍທະຫານໄດ້ຂຶ້ນໄປຫາເອລີຢາ ເຊິ່ງກຳລັງນັ່ງຢູ່ເທິງຍອດພູເຂົາແຫ່ງໜຶ່ງ ແລະ ໄດ້ເວົ້າກັບເອລີຢາວ່າ, “ຄົນຂອງພຣະເຈົ້າ ກະສັດກ່າວວ່າ, ‘ຈົ່ງລົງມາ!’ ”
ເອລີຢາໄດ້ຕອບນາຍທະຫານຜູ້ນັ້ນວ່າ, “ຖ້າເຮົາເປັນຄົນຂອງພຣະເຈົ້າ ຂໍໃຫ້ໄຟຕົກລົງມາຈາກສະຫວັນ ແລະ ເຜົາຜານເຈົ້າ ແລະ ທະຫານທັງຫ້າສິບຄົນຂອງເຈົ້າ!” ແລ້ວໄຟກໍຕົກລົງມາຈາກສະຫວັນ ແລະ ເຜົາຜານນາຍທະຫານ ແລະ ຄົນຂອງລາວ.
ເມື່ອເປັນຢ່າງນີ້ ກະສັດຈຶ່ງໄດ້ສົ່ງນາຍທະຫານຄົນອື່ນພ້ອມດ້ວຍທະຫານຫ້າສິບຄົນໄປ. ນາຍທະຫານໄດ້ເວົ້າກັບເອລີຢາວ່າ, “ຄົນຂອງພຣະເຈົ້າ, ກະສັດກ່າວວ່າ ‘ຈົ່ງລົງມາດຽວນີ້!’ ”
ເອລີຢາໄດ້ຕອບວ່າ, “ຖ້າເຮົາເປັນຄົນຂອງພຣະເຈົ້າ ກໍຂໍໃຫ້ໄຟຕົກລົງມາຈາກສະຫວັນ ແລະ ເຜົາຜານເຈົ້າ ແລະ ທະຫານຫ້າສິບນາຍຂອງເຈົ້າ!” ແລ້ວໄຟຈາກພຣະເຈົ້າກໍລົງມາຈາກສະຫວັນ ແລະ ເຜົານາຍທະຫານ ແລະ ທະຫານທັງຫ້າສິບຄົນ.
ດັ່ງນັ້ນ ກະສັດຈຶ່ງໄດ້ສົ່ງນາຍທະຫານກັບທະຫານອີກຫ້າສິບຄົນໄປເປັນຄັ້ງທີສາມ. ຄັ້ງທີສາມນີ້ນາຍທະຫານໄດ້ຂຶ້ນໄປ ແລະ ຄຸເຂົ່າຂອງຕົນລົງຕໍ່ໜ້າເອລີຢາ. ລາວໄດ້ເວົ້າວ່າ, “ຂ້າແດ່ຄົນຂອງພຣະເຈົ້າ ໂຜດໄວ້ຊີວິດຂ້າພະເຈົ້າ ແລະ ບັນດາຄົນທັງຫ້າສິບຄົນ ເຊິ່ງເປັນຜູ້ຮັບໃຊ້ຂອງທ່ານ! ໄຟຈາກສະຫວັນໄດ້ລົງມາເຜົາຜານນາຍທະຫານສອງຄົນກ່ອນໜ້ານີ້ກັບທະຫານຂອງພວກເຂົາ. ແຕ່ບັດນີ້ຂໍໃຫ້ໄວ້ຊີວິດຂ້າພະເຈົ້າດ້ວຍ!”
ເທວະດາຂອງພຣະເຈົ້າຢາເວໄດ້ກ່າວກັບເອລີຢາວ່າ, “ຢ່າຢ້ານລາວເລີຍ ຈົ່ງໄປກັບລາວ”. ເອລີຢາຈຶ່ງລົງໄປກັບລາວ ແລ້ວໄປພົບກະສັດ.
ເອລີຢາໄດ້ບອກກະສັດວ່າ, “ພຣະເຈົ້າຢາເວກ່າວດັ່ງນີ້ວ່າ: ເປັນເພາະໃນອິດສະຣາເອນບໍ່ມີພຣະເຈົ້າ ພວກເຈົ້າຈຶ່ງຕ້ອງໄປປຶກສາບາອານເຊບຸບ ພະແຫ່ງເອັກໂຣນແມ່ນບໍ? ເນື່ອງຈາກເຈົ້າເຮັດເຊັ່ນນີ້ ເຈົ້າຈະບໍ່ໄດ້ລຸກອອກຈາກຕຽງທີ່ເຈົ້າກຳລັງນອນຢູ່. ເຈົ້າຈະຕ້ອງຕາຍແນ່ນອນ!” ດັ່ງນັ້ນ ອາຮາຊີຢາຈຶ່ງຕາຍ ຕາມຖ້ອຍຄຳຂອງພຣະເຈົ້າຢາເວທີ່ເອລີຢາກ່າວໄວ້.
ເນື່ອງຈາກອາຮາຊີຢາບໍ່ມີລູກຊາຍ, ໂຢຣາມ2 ຈຶ່ງໄດ້ຂຶ້ນເປັນກະສັດປົກຄອງແທນ ເຊິ່ງກົງກັບປີທີສອງແຫ່ງການປົກຄອງຂອງກະສັດເຢໂຮຣາມ ລູກຊາຍເຢໂຮຊາຟັດແຫ່ງຢູດາຍ. ເຫດການອື່ນໆໃນຊ່ວງການປົກຄອງຂອງອາຮາຊີຢາ ແລະ ພາລະກິດທີ່ເພິ່ນໄດ້ເຮັດແມ່ນມີບັນທຶກໄວ້ໃນປຶ້ມປະຫວັດສາດຂອງບັນດາກະສັດແຫ່ງອິດສະຣາເອນບໍ່ແມ່ນບໍ?
Source notes (2)
- Footnote ຫລື ລາວເປັນຄົນທີ່ມີຂົນຫລາຍ
- Footnote ພາສາເຮັບເຣີວ່າ ເຢໂຮຣາມ ເປັນອີກຮູບໜຶ່ງຂອງ ໂຢຣາມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.