Biblica® Open Lao Contemporary Version
2 ກະສັດ 19
ຄຳພະຍາກອນວ່າເຢຣູຊາເລັມຈະໄດ້ຮັບການກອບກູ້
(ອຊຢ 37:1-13)
ເມື່ອກະສັດເຮເຊກີຢາໄດ້ຍິນດັ່ງນີ້ ເພິ່ນກໍຈີກເຄື່ອງນຸ່ງຂອງຕົນ ແລະ ນຸ່ງຜ້າກະສອບ ແລ້ວເຂົ້າໄປໃນວິຫານຂອງພຣະເຈົ້າຢາເວ. ເພິ່ນໄດ້ສົ່ງເອລີອາກິມ ຜູ້ຈັດການດູແລວັງ, ເຊັບນາ ຜູ້ເປັນເລຂາ ແລະ ບັນດາປະໂລຫິດອາວຸໂສ ໃຫ້ໄປພົບຜູ້ທຳນວາຍເອຊາຢາລູກຊາຍຂອງອາໂມດ, ທຸກຄົນລ້ວນແຕ່ນຸ່ງຊຸດຜ້າກະສອບ. ພວກເຂົາໄດ້ເວົ້າກັບເອຊາຢາວ່າ, “ເຮເຊກີຢາໄດ້ເວົ້າດັ່ງນີ້ວ່າ: ວັນນີ້ເປັນວັນແຫ່ງຄວາມທຸກຍາກລຳບາກ, ການຕຳໜິ ແລະ ຄວາມອັບອາຍ ເໝືອນກັບເວລາທີ່ເດັກນ້ອຍກຳລັງຈະເກີດມາ ແລະ ຜູ້ເປັນແມ່ບໍ່ມີແຮງຈະເບັ່ງພວກເຂົາອອກມາ. ບາງເທື່ອພຣະເຈົ້າຢາເວ ພຣະເຈົ້າຂອງທ່ານຈະໄດ້ຍິນທຸກຖ້ອຍຄຳຂອງຜູ້ບັນຊາການກອງທັບ, ເຊິ່ງກະສັດອັດຊີເຣຍເຈົ້ານາຍຂອງລາວໄດ້ສົ່ງມາໃຫ້ໝິ່ນປະໝາດພຣະເຈົ້າຜູ້ມີຊີວິດຢູ່ ແລະ ພຣະອົງຈະລົງໂທດລາວເພາະຖ້ອຍຄຳທີ່ພຣະເຈົ້າຢາເວ ພຣະເຈົ້າຂອງທ່ານໄດ້ຍິນນັ້ນ. ດັ່ງນັ້ນ ຂໍໃຫ້ອະທິຖານເພື່ອພວກເຮົາທີ່ເຫລືອຢູ່ພຽງແຕ່ຢິບມືນີ້ດ້ວຍ”.
ເມື່ອຜູ້ຮັບໃຊ້ຂອງກະສັດເຮເຊກີຢາມາພົບເອຊາຢາ, ເອຊາຢາກໍເວົ້າກັບພວກເຂົາວ່າ, “ຈົ່ງໄປບອກນາຍຂອງທ່ານວ່າ, ‘ພຣະເຈົ້າຢາເວກ່າວດັ່ງນີ້ວ່າ: ຢ່າຢ້ານສິ່ງທີ່ເຈົ້າໄດ້ຍິນ ຄືບັນດາຖ້ອຍຄຳທີ່ລູກນ້ອງຂອງກະສັດອັດຊີເຣຍໄດ້ໝິ່ນປະໝາດເຮົາ. ຈົ່ງຟັງ! ເມື່ອໃດທີ່ລາວໄດ້ຍິນຂ່າວຈາກການລາຍງານ, ເຮົາຈະເຮັດໃຫ້ລາວຢາກກັບຄືນໄປທີ່ປະເທດຂອງຕົນ ແລະ ເຮົາຈະໃຫ້ລາວຖືກຂ້າດ້ວຍດາບຢູ່ທີ່ນັ້ນ’ ”.
ເມື່ອນາຍທະຫານອັດຊີເຣຍໄດ້ຂ່າວວ່າກະສັດຂອງຕົນໄດ້ອອກໄປຈາກລາກິດແລ້ວ, ກໍຖອນທັບໄປ ແລະ ພົບລາວກຳລັງສູ້ຮົບຢູ່ກັບເມືອງລິບນາ.
ແລ້ວເຊັນນາເກຣິບກໍໄດ້ຮັບລາຍງານວ່າຕີຣາກາ ກະສັດແຫ່ງກູເຊ1ແຫ່ງເອຢິບຍົກທັບຈະມາສູ້ຮົບກັບເພິ່ນ. ດັ່ງນັ້ນ ເພິ່ນຈຶ່ງສົ່ງຄົນໄປຫາເຮເຊກີຢາພ້ອມກັບຖ້ອຍຄຳວ່າ: “ຈົ່ງໄປບອກກະສັດເຮເຊກີຢາແຫ່ງຢູດາຍດັ່ງນີ້ວ່າ: ຢ່າຍອມໃຫ້ພະທີ່ທ່ານເພິ່ງພານັ້ນຫລອກລວງທ່ານເມື່ອພຣະອົງກ່າວວ່າ, ‘ເຢຣູຊາເລັມຈະບໍ່ຕົກຢູ່ໃນກຳມືກະສັດອັດຊີເຣຍ’. ທ່ານກໍຮູ້ດີວ່າບັນດາກະສັດອັດຊີເຣຍໄດ້ເຮັດຫຍັງແກ່ປະເທດທັງໝົດ, ກະສັດເຫລົ່ານັ້ນໄດ້ທຳລາຍລ້າງທຸກສິ່ງທຸກຢ່າງ. ແລ້ວທ່ານຈະໄດ້ຮັບການກອບກູ້ບໍ? ບັນດາພະຂອງຊົນຊາດຕ່າງໆທີ່ບັນພະບຸລຸດຂອງເຮົາໄດ້ທຳລາຍລ້າງໄປນັ້ນໄດ້ຊ່ວຍກອບກູ້ພວກເຂົາໄວ້ບໍ ຄືພະທັງຫລາຍຂອງໂກຊານ, ຮາຣານ, ເຣເຊັບ ແລະ ຄົນເອເດນທີ່ຢູ່ໃນເຕລາສາ? ກະສັດແຫ່ງນະຄອນຮາມັດ ກະສັດອັກປັດ, ກະສັດເສຟາກວາອິມ, ເຮນາ ແລະ ອີວາຢູ່ໃສ?”
(ອຊຢ 37:14-20)
ເມື່ອເຮເຊກີຢາໄດ້ຮັບຂໍ້ຄວາມສະບັບນີ້ຈາກຜູ້ສົ່ງຂ່າວ ແລະ ອ່ານຈົບ. ແລ້ວເພິ່ນກໍໄດ້ໄປຍັງວິຫານຂອງພຣະເຈົ້າຢາເວ ແລະ ພືໜັງສືນັ້ນອອກຕໍ່ໜ້າພຣະເຈົ້າຢາເວ. ແລ້ວເຮເຊກີຢາກໍໄດ້ອະທິຖານຕໍ່ພຣະເຈົ້າຢາເວວ່າ, “ຂ້າແດ່ພຣະເຈົ້າຢາເວ ພຣະເຈົ້າແຫ່ງອິດສະຣາເອນ ຜູ້ຢູ່ເທິງບ່ອນນັ່ງລະຫວ່າງເຄຣຸບ, ພຣະອົງຜູ້ດຽວເປັນພຣະເຈົ້າເໜືອອານາຈັກທັງໝົດຂອງໂລກ. ພຣະອົງໄດ້ສ້າງຟ້າສະຫວັນ ແລະ ແຜ່ນດິນໂລກ. ຂ້າແດ່ພຣະເຈົ້າຢາເວ ຂໍໂຜດເບິ່ງ ແລະ ຟັງ; ຂ້າແດ່ພຣະເຈົ້າຢາເວ ຂໍໂຜດເບິ່ງ ແລະ ຟັງຖ້ອຍຄຳທີ່ເຊັນນາເກຣິບສົ່ງມາໝິ່ນປະໝາດພຣະເຈົ້າຜູ້ມີຊີວິດຢູ່.
“ຂ້າແດ່ພຣະເຈົ້າຢາເວ, ເປັນຄວາມຈິງທີ່ບັນດາກະສັດອັດຊີເຣຍໄດ້ທຳລາຍຊົນຊາດທັງໝົດນີ້ ແລະ ແຜ່ນດິນຂອງພວກເຂົາ. ແລະ ໄດ້ເຜົາທຳລາຍພະຂອງພວກເຂົາຖິ້ມ ເພາະພະເຫລົ່ານັ້ນບໍ່ແມ່ນພຣະເຈົ້າ ເປັນພຽງແຕ່ໄມ້ ແລະ ຫີນທີ່ເຮັດຂຶ້ນດ້ວຍມືຂອງມະນຸດ. ບັດນີ້ ຂ້າແດ່ພຣະເຈົ້າຢາເວ ພຣະເຈົ້າຂອງພວກຂ້ານ້ອຍ, ຂໍຊ່ວຍພວກຂ້ານ້ອຍໃຫ້ພົ້ນຈາກມືຂອງລາວ ເພື່ອອານາຈັກທັງໝົດໃນໂລກນີ້ຈະໄດ້ຮູ້ວ່າພຣະເຈົ້າຢາເວ ພຣະອົງແຕ່ພຽງຜູ້ດຽວເທົ່ານັ້ນທີ່ເປັນພຣະເຈົ້າ”.
ເອຊາຢາທຳນວາຍວ່າເຊັນນາເກຣິບຈະຫລົ້ມຈົມ
(2ຂຄ 32:20-21; ອຊຢ 37:21-38)
ຫລັງຈາກນັ້ນ ເອຊາຢາລູກຊາຍຂອງອາໂມດຈຶ່ງໄດ້ສົ່ງຂໍ້ຄວາມມາໄປຫາເຮເຊກີຢາວ່າ, “ພຣະເຈົ້າຢາເວ ພຣະເຈົ້າແຫ່ງອິດສະຣາເອນກ່າວດັ່ງນີ້ວ່າ: ເຮົາໄດ້ຍິນຄຳອະທິຖານຂອງເຈົ້າເລື່ອງກະສັດເຊັນນາເກຣິບແຫ່ງອັດຊີເຣຍແລ້ວ. ພຣະເຈົ້າຢາເວຈຶ່ງກ່າວເຖິງລາວດັ່ງນີ້ວ່າ:
“ ‘ລູກສາວບໍລິສຸດແຫ່ງຊີໂອນ2
ດູໝິ່ນເຈົ້າ ແລະ ເຢາະເຢີ້ຍເຈົ້າ.
ລູກສາວແຫ່ງເຢຣູຊາເລັມ3
ແກວ່ງໜ້າເມື່ອເຈົ້າແຕກໜີ.
ຜູ້ໃດທີ່ເຈົ້າເວົ້າໝິ່ນປະໝາດ ແລະ ເຢາະເຢີ້ຍ?
ເຈົ້າຂຶ້ນສຽງ
ແລະ ເຮັດຕາຈອງຫອງໃສ່ຜູ້ໃດ?
ຕໍ່ອົງບໍລິສຸດແຫ່ງອິດສະຣາເອນບໍ!
ເຈົ້າໃຊ້ຜູ້ສົ່ງຂ່າວຂອງເຈົ້າ
ມາກ່າວໝິ່ນປະໝາດພຣະເຈົ້າຢາເວ.
ແລະ ເຈົ້າໄດ້ເວົ້າວ່າ,
“ດ້ວຍລົດຮົບທັງຫລາຍຂອງເຮົາ
ເຮົາໄດ້ຂຶ້ນໄປເຖິງບັນດາຍອດພູເຂົາສູງ,
ສູ່ຍອດສູງທີ່ສຸດແຫ່ງເລບານອນ.
ເຮົາໄດ້ຕັດບັນດາຕົ້ນໄມ້ສີດາທີ່ສູງທີ່ສຸດ,
ແລະ ຕົ້ນແປກຈູນີເປີທີ່ດີທີ່ສຸດ.
ເຮົາໄດ້ຂຶ້ນໄປຮອດຍອດທີ່ສູງທີ່ສຸດ,
ຄືປ່າອັນອຸດົມສົມບູນທີ່ສຸດ.
ເຮົາໄດ້ຂຸດນ້ຳສ້າງຫລາຍແຫ່ງໃນຕ່າງແດນ
ແລະ ໄດ້ດື່ມນ້ຳຢູ່ທີ່ນັ້ນ.
ດ້ວຍຕີນຂອງເຮົາ
ສາຂາຂອງແມ່ນ້ຳນິນໃນເອຢິບກໍແຫ້ງ.”
“ ‘ເຈົ້າບໍ່ເຄີຍໄດ້ຍິນບໍ?
ເຮົາໄດ້ສັ່ງໄວ້ແຕ່ດົນນານມາແລ້ວ.
ເຮົາໄດ້ວາງແຜນໄວ້ຕັ້ງແຕ່ອະດີດ;
ແລະ ບັດນີ້ເຮົາກໍເຮັດໃຫ້ເປັນໄປຕາມນັ້ນ,
ຄືໃຫ້ເຈົ້າປ່ຽນປ້ອມປ້ອງກັນເມືອງທັງຫລາຍ
ໃຫ້ກາຍເປັນກອງຫີນ.
ປະຊາຊົນຂອງພວກເຂົາໝົດອຳນາດ,
ຕົກໃຈ ແລະ ອັບອາຍ.
ພວກເຂົາເປັນດັ່ງພືດພັນໃນທົ່ງນາ,
ພວກເຂົາເປັນເໝືອນໜໍ່ອ່ອນຂຽວສົດ,
ເໝືອນຫຍ້າງອກຂຶ້ນເທິງຫລັງຄາ,
ຖືກແດດແຜດເຜົາກ່ອນຈະໃຫຍ່ຂຶ້ນມາ.
“ ‘ແຕ່ເຮົາຮູ້ວ່າເຈົ້າມາຈາກໃສ
ແລະ ເຈົ້າມາ ແລະ ໄປຕອນໃດ.
ແລະ ຮູ້ວ່າເຈົ້າໃຈຮ້າຍເຮົາສໍ່າໃດ.
ເພາະເຈົ້າໃຈຮ້າຍໃສ່ເຮົາ
ແລະ ເພາະຄໍາເວົ້າອວດຕົວຂອງເຈົ້າມາຮອດຫູຂອງເຮົາ
ເຮົາຈະເອົາເບັດກ່ຽວດັງຂອງເຈົ້າ
ແລະ ເອົາບັງຫຽນໃສ່ປາກຂອງເຈົ້າ,
ແລະ ເຮົາຈະເຮັດໃຫ້ເຈົ້າຫັນກັບໄປ
ຕາມເສັ້ນທາງທີ່ເຈົ້າມາ.’
“ເຮເຊກີຢາ, ນີ້ຈະເປັນໝາຍສຳຄັນແກ່ເຈົ້າຄື:
“ປີນີ້ເຈົ້າຈະກິນພືດທີ່ເກີດຂຶ້ນເອງ,
ແລະ ປີທີສອງກໍຈະກິນພືດທີ່ອອກຜົນຕາມມາ.
ແຕ່ໃນປີທີສາມ ຈົ່ງຫວ່ານ ແລະ ເກັບກ່ຽວ,
ຈົ່ງເຮັດສວນອະງຸ່ນ ແລະ ກິນໝາກຂອງມັນ.
ປະຊາຊົນຢູດາຍທີ່ເຫລືອຢູ່ນັ້ນ
ຈະຢັ່ງຮາກ ແລະ ເກີດຜົນອີກຄັ້ງໜຶ່ງ.
ເພາະຈະມີຄົນທີ່ເຫລືອຢູ່ມາຈາກເຢຣູຊາເລັມ,
ແລະ ຜູ້ລອດຊີວິດກຸ່ມໜຶ່ງຈະມາຈາກພູເຂົາຊີໂອນ.
ຄວາມກະຕືລືລົ້ນຂອງພຣະເຈົ້າຢາເວ ອົງຜູ້ມີລິດອໍານາດຍິ່ງໃຫຍ່
ຈະເຮັດໃຫ້ສຳເລັດຕາມນີ້.
“ເຫດສະນັ້ນ ນີ້ແມ່ນສິ່ງທີ່ພຣະເຈົ້າຢາເວກ່າວເຖິງກະສັດອັດຊີເຣຍວ່າ:
“ ‘ລາວຈະບໍ່ໄດ້ເຂົ້າມາໃນເມືອງນີ້
ຫລື ຍິງທະນູໃນຢູ່ນີ້.
ລາວຈະບໍ່ມາຖືໂລ່ຢູ່ໜ້າເມືອງ
ຫລື ສ້າງສິ່ງປິດລ້ອມໂຈມຕີເມືອງ.
ລາວມາທາງໃດກໍຈະກັບໄປທາງນັ້ນ
ລາວຈະບໍ່ໄດ້ເຂົ້າມາໃນເມືອງນີ້
ພຣະເຈົ້າຢາເວປະກາດດັ່ງນັ້ນ.
ເຮົາຈະປົກປ້ອງ ແລະ ຊ່ວຍເມືອງນີ້ໄວ້
ເພື່ອເຫັນແກ່ເຮົາເອງ ແລະ ເຫັນແກ່ດາວິດຜູ້ຮັບໃຊ້ຂອງເຮົາ.’ ”
ໃນຄືນນັ້ນເອງເທວະດາຂອງພຣະເຈົ້າຢາເວກໍອອກໄປຂ້າຄົນໃນຄ້າຍອັດຊີເຣຍ 185.000 ຄົນ ເຊົ້າມື້ຕໍ່ມາເມື່ອຜູ້ຄົນຕື່ນຂຶ້ນກໍເຫັນຊາກສົບກະຈາຍຢູ່! ກະສັດເຊັນນາເກຣິບແຫ່ງອັດຊີເຣຍຈຶ່ງສັ່ງໃຫ້ຮື້ຄ້າຍ ແລະ ຖອນທັບກັບໄປຍັງເມືອງນີເນເວ ແລະ ຢູ່ທີ່ນັ້ນ.
ມື້ໜຶ່ງຂະນະທີ່ນະມັດສະການຢູ່ໃນວິຫານຂອງລາວ ອັດຣາມເມເຫລັກ ແລະ ຊາເລເຊີລູກຊາຍຂອງລາວເອງໄດ້ຂ້າລາວດ້ວຍດາບ ແລ້ວໜີໄປຍັງດິນແດນອາຣາຣັດ ແລະ ເອສາຮັດໂດນລູກຊາຍອີກຄົນໜຶ່ງຂອງລາວຂຶ້ນປົກຄອງແທນ.
Source notes (3)
- Footnote ຄື ຈາກຕອນເທິງຂອງລຸ່ມແມ່ນ້ຳນິນ
- Footnote ຄື ຊາວເຢຣູຊາເລັມ
- Footnote ຄື ຊາວເຢຣູຊາເລັມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.