Biblica® Open Lao Contemporary Version
2 ກະສັດ 18
ກະສັດເຮເຊກີຢາແຫ່ງຢູດາຍ
(2ກສ 17:3-7; 2ຂຄ 29:1-2; 31:1,20-21)
ເຮເຊກີຢາລູກຊາຍຂອງກະສັດອາຮາດແຫ່ງຢູດາຍໄດ້ຂຶ້ນປົກຄອງ ກົງກັບປີທີສາມຂອງຊ່ວງການປົກຄອງຂອງກະສັດໂຮເຊອາລູກຊາຍຂອງເອລາແຫ່ງອິດສະຣາເອນ. ເພິ່ນຂຶ້ນເປັນກະສັດເມື່ອເພິ່ນມີອາຍຸ 25 ປີ ແລະ ເພິ່ນໄດ້ປົກຄອງຢູ່ໃນເຢຣູຊາເລັມ 29 ປີ. ແມ່ຂອງເພິ່ນມີຊື່ວ່າອາບີຢາ1 ເປັນລູກສາວຂອງເຊກາຣີຢາ. ເຮເຊກີຢາໄດ້ເຮັດສິ່ງທີ່ຖືກຕ້ອງໃນສາຍຕາຂອງພຣະເຈົ້າຢາເວເໝືອນທີ່ດາວິດບັນພະບຸລຸດຂອງເພິ່ນໄດ້ເຮັດ. ເພິ່ນໄດ້ມ້າງສະຖານບູຊາເທິງທີ່ສູງທັງຫລາຍ, ທຸບຫີນສັກສິດ ແລະ ເສົາເຈົ້າແມ່ອາເຊຣາ. ເພິ່ນໄດ້ທຳລາຍງູທອງສຳລິດທີ່ໂມເຊໄດ້ສ້າງຂຶ້ນ, ເພາະວ່າຊົນຊາດອິດສະຣາເອນໄດ້ເຜົາເຄື່ອງຫອມຖວາຍຮູບງູນັ້ນຕະຫລອດມາ. (ງູນັ້ນເອີ້ນວ່າ2ເນຮູຊະຕານ3).
ເຮເຊກີຢາໄດ້ວາງໃຈໃນພຣະເຈົ້າຢາເວ ພຣະເຈົ້າແຫ່ງອິດສະຣາເອນ. ໃນທ່າມກາງກະສັດທັງໝົດຂອງຢູດາຍນັ້ນບໍ່ມີກະສັດຄົນໃດຄືກັບເພິ່ນ ບໍ່ວ່າຜູ້ທີ່ປົກຄອງກ່ອນເພິ່ນ ຫລື ຫລັງຈາກເພິ່ນ. ເພິ່ນໄດ້ຢຶດໝັ້ນ ແລະ ຕິດຕາມພຣະເຈົ້າຢາເວຢ່າງເຂັ້ມງວດ ແລະ ເພິ່ນໄດ້ປະຕິບັດຕາມຄຳສັ່ງທີ່ພຣະເຈົ້າຢາເວໄດ້ສັ່ງໂມເຊໄວ້. ແລະ ພຣະເຈົ້າຢາເວໄດ້ຢູ່ກັບເຮເຊກີຢາ; ເພິ່ນເຮັດສິ່ງໃດເພິ່ນກໍປະສົບຄວາມສຳເລັດ. ເຮເຊກີຢາຕໍ່ຕ້ານກະສັດອັດຊີເຣຍ ແລະ ບໍ່ຍອມຮັບໃຊ້ກະສັດອັດຊີເຣຍ. ເພິ່ນໄດ້ຢຶດຄອງຊາວຟີລິດສະຕິນໄປໄກຈົນເຖິງເມືອງກາຊາ ແລະ ດິນແດນອ້ອມຂ້າງ ທຳລາຍຕັ້ງແຕ່ຫໍຄອຍຈົນເຖິງເມືອງປ້ອມປ້ອງກັນ.
ໃນປີທີສີ່ແຫ່ງການປົກຄອງຂອງກະສັດເຮເຊກີຢາ ເຊິ່ງກົງກັບປີທີເຈັດຂອງການປົກຄອງຂອງກະສັດໂຮເຊອາລູກຊາຍຂອງເອລາແຫ່ງອິດສະຣາເອນ, ກະສັດຊານມາເນເຊແຫ່ງອັດຊີເຣຍໄດ້ຍົກທັບມາບຸກອິດສະຣາເອນ ແລະ ປິດລ້ອມເມືອງຊາມາເຣຍໄວ້. ຈົນເຖິງປາຍປີທີສາມ ເມືອງຊາມາເຣຍກໍແຕກ ເຊິ່ງກົງກັບປີທີຫົກຂອງການປົກຄອງຂອງເຮເຊກີຢາ ຫລື ປີທີເກົ້າຂອງການປົກຄອງຂອງໂຮເຊອາແຫ່ງອິດສະຣາເອນ. ກະສັດອັດຊີເຣຍໄດ້ກວາດຕ້ອນຄົນອິດສະຣາເອນໄປທີ່ອັດຊີເຣຍ ແລະ ໃຫ້ພວກເຂົາຕັ້ງຖິ່ນຖານຢູ່ໃນເມືອງຮາລາ, ເມືອງໂກຊານ ບໍລິເວນແຄມຝັ່ງແມ່ນ້ຳຮາໂບ ແລະ ຕາມເມືອງຕ່າງໆຂອງເມເດຍ. ທີ່ເປັນເຊັ່ນນີ້ກໍເພາະຊົນຊາດອິດສະຣາເອນບໍ່ເຊື່ອຟັງພຣະເຈົ້າຢາເວ ພຣະເຈົ້າຂອງພວກເຂົາ, ແຕ່ໄດ້ລ່ວງລະເມີດຄຳໝັ້ນສັນຍາທັງໝົດຂອງພຣະອົງ ຕາມທີ່ໂມເຊຜູ້ຮັບໃຊ້ຂອງພຣະເຈົ້າຢາເວໄດ້ສັ່ງໄວ້. ພວກເຂົາບໍ່ຍອມຟັງ ແລະ ບໍ່ປະຕິບັດຕາມຄຳສັ່ງເຫລົ່ານັ້ນ.
ໃນປີທີສິບສີ່ຂອງການປົກຄອງຂອງກະສັດເຮເຊກີຢາ ກະສັດເຊັນນາເກຣິບປຸ້ນແຫ່ງອັດຊີເຣຍໄດ້ມາໂຈມຕີ ແລະ ຢຶດເມືອງປ້ອມປ້ອງກັນທັງຫລາຍຂອງຢູດາຍໄປ. ດັ່ງນັ້ນ ກະສັດເຮເຊກີຢາແຫ່ງຢູດາຍຈຶ່ງໄດ້ສົ່ງຂໍ້ຄວາມໄປຫາກະສັດອັກຊີເຣຍຢູ່ທີ່ລາກິດວ່າ, “ຂ້າພະເຈົ້າເຮັດຜິດໄປແລ້ວ. ຂ້າພະເຈົ້າຈະຍອມເສຍເຄື່ອງຖວາຍທຸກຢ່າງຕາມທີ່ທ່ານຮຽກຮ້ອງເອົາຈາກຂ້າພະເຈົ້າ, ຂໍພຽງແຕ່ທ່ານຖອນກຳລັງກັບໄປຈາກຂ້າພະເຈົ້າ”. ກະສັດອັດຊີເຣຍຈຶ່ງຮຽກຮ້ອງເອົາຈາກກະສັດເຮເຊກີຢາແຫ່ງອັດຊີເຣຍຕາມນັ້ນ ເປັນເງິນ 300 ຕາລັນຕົນ4 ແລະ ຄຳ 30 ຕາລັນຕົນ.5 ດັ່ງນັ້ນ ເຮເຊກີຢາຈຶ່ງໄດ້ມອບເງິນທັງໝົດທີ່ມີຢູ່ໃນວິຫານຂອງພຣະເຈົ້າຢາເວ ແລະ ໃນຄັງຫລວງໃຫ້ເຊນນາເກຣິບ.
ໃນເວລານັ້ນກະສັດເຮເຊກີຢາແຫ່ງຢູດາຍໄດ້ລອກຄຳທີ່ຫຸ້ມປະຕູ ແລະ ເສົາປະຕູຂອງວິຫານຂອງພຣະເຈົ້າຢາເວໄປມອບໃຫ້ກະສັດອັດຊີເຣຍ.
ເຊັນນາເກຣິບຂົ່ມຂູ່ເຢຣູຊາເລັມ
(2ຂຄ 32:9-19; ອຊຢ 36:1-22)
ຝ່າຍກະສັດອັດຊີເຣຍໄດ້ສົ່ງແມ່ທັບໃຫຍ່ຂອງເພິ່ນ, ເສນາບໍດີ ແລະ ແມ່ທັບຈາກລາກິດມາຫາກະສັດເຮເຊກີຢາທີ່ເຢຣູຊາເລັມ. ພວກເຂົາມາເຖິງເຢຣູຊາເລັມ ແລະ ຢຸດຢູ່ທີ່ທາງລະບາຍນ້ຳຂອງສະນ້ຳເທິງ ເຊິ່ງເປັນເສັ້ນທາງໄປສູ່ເດີ່ນຊັກລ້າງ. ຄົນເຫລົ່ານີ້ໄດ້ຮຽກຮ້ອງໃຫ້ກະສັດອອກມາ ແລ້ວເອລີອາກິມ ລູກຊາຍຂອງຮິນກີຢາ ຜູ້ເປັນຜູ້ຈັດການດູແລວັງ, ເຊັບນາຜູ້ເປັນເລຂາ ແລະ ໂຢອາ ລູກຊາຍຂອງອາສັບຜູ້ບັນທຶກ ກໍໄດ້ອອກໄປພົບພວກເຂົາ.
ນາຍທະຫານຜູ້ຍິ່ງໃຫຍ່ໄດ້ເວົ້າກັບພວກເຂົາວ່າ, “ຈົ່ງໄປບອກເຮເຊກີຢາວ່າ:
“ ‘ກະສັດແຫ່ງອັດຊີເຣຍ ກະສັດຜູ້ຍິ່ງໃຫຍ່ໄດ້ກ່າວດັ່ງນີ້ວ່າ: ເຈົ້າເພິ່ງພາສິ່ງໃດຈຶ່ງກ້າໝັ້ນໃຈປານນີ້? ທ່ານເວົ້າວ່າທ່ານມີຍຸດທະສາດ ແລະ ລິດອຳນາດ ແຕ່ນັ້ນກໍເປັນພຽງແຕ່ຄຳເວົ້າ ທ່ານເພິ່ງພາຜູ້ໃດຈຶ່ງກ້າກະບົດຕໍ່ຂ້າພະເຈົ້າ? ເບິ່ງແມ, ຂ້າພະເຈົ້າຮູ້ວ່າທ່ານເພິ່ງພາເອຢິບ, ເຊິ່ງເປັນເໝືອນໄມ້ຄ້ອນເທົ້າທີ່ເຮັດຈາກຕົ້ນອໍ້ທີ່ຫັກ ຜູ້ໃດທີ່ເອື່ອຍໃສ່ມັນກໍຖືກສ້ຽນຕຳເຈັບມື! ຜູ້ໃດທີ່ເພິ່ງພາກະສັດຟາໂຣແຫ່ງເອຢິບກໍເປັນແບບນີ້. ແລະ ຖ້າທ່ານເວົ້າກັບຂ້າພະເຈົ້າວ່າ, “ພວກເຮົາກຳລັງເພິ່ງພຣະເຈົ້າຢາເວ ພຣະເຈົ້າຂອງພວກເຮົາ” ກໍແມ່ນພຣະເຈົ້າອົງນີ້ບໍ່ແມ່ນບໍທີ່ເຮເຊກີຢາໄດ້ທຳລາຍແທ່ນບູຊາກັບສະຖານບູຊາເທິງທີ່ສູງທັງຫລາຍ ແລະ ກ່າວກັບຊາວຢູດາຍ ແລະ ເຢຣູຊາເລັມວ່າ, “ພວກເຈົ້າຈະຕ້ອງນະມັດສະການຢູ່ທີ່ແທ່ນບູຊານີ້ໃນເຢຣູຊາເລັມເທົ່ານັ້ນ?”
“ ‘ມາ, ມາຕໍ່ລອງກັບກະສັດອັດຊີເຣຍນາຍຂອງຂ້າພະເຈົ້າວ່າ: ຂ້າພະເຈົ້າຈະໃຫ້ມ້າສອງພັນໂຕແກ່ທ່ານ ຖ້າທ່ານຫາຄົນຂີ່ມ້າມາໄດ້! ເຮັດແນວໃດພວກເຈົ້າຈະຕໍ່ສູ້ກັບຜູ້ປົກຄອງທີ່ນ້ອຍທີ່ສຸດຄົນໜຶ່ງຂອງນາຍເຮົາໄດ້, ເຖິງແມ່ນວ່າພວກເຈົ້າເພິ່ງພາລົດມ້າ ແລະ ມ້າຈາກເອຢິບກໍຕາມ? ຫລາຍກວ່ານັ້ນ ທ່ານຄິດວ່າຂ້າພະເຈົ້າມາໂຈມຕີ ແລະ ທຳລາຍບ່ອນນີ້ໂດຍບໍ່ມີຄຳສັ່ງຈາກພຣະເຈົ້າຢາເວບໍ? ພຣະເຈົ້າຢາເວເອງທີ່ບອກໃຫ້ຂ້າພະເຈົ້າຍົກທັບມາໂຈມຕີ ແລະ ທຳລາຍດິນແດນນີ້’ ”.
ແລ້ວເອລີອາກິມລູກຊາຍຂອງຮິນກີຢາ, ເຊັບນາ ແລະ ໂຢອາກໍເວົ້າກັບນາຍທະຫານນັ້ນວ່າ “ກະລຸນາເວົ້າກັບຜູ້ຮັບໃຊ້ຂອງທ່ານເປັນພາສາອາຣາມິກ ເພາະພວກເຮົາຟັງເຂົ້າໃຈ. ຢ່າເວົ້າກັບພວກເຮົາເປັນພາສາເຮັບເຣີເລີຍ ຄົນທັງຫລາຍທີ່ຢູ່ເທິງກຳແພງຈະໄດ້ຍິນ”.
ແຕ່ນາຍທະຫານນັ້ນຕອບວ່າ “ນາຍເຮົາໃຊ້ເຮົາມາເວົ້າກັບເຈົ້າ ແລະ ນາຍຂອງເຈົ້າເທົ່ານັ້ນບໍ? ບໍ່ແມ່ນກັບພວກທີ່ນັ່ງຢູ່ເທິງກຳແພງນຳບໍ? ພວກນັ້ນກໍເໝືອນເຈົ້າ ຈະຕ້ອງກິນອາຈົມ ແລະ ດື່ມຍ່ຽວຂອງໂຕເອງ”.
ແລ້ວນາຍທະຫານອັດຊີເຣຍກໍຢືນຂຶ້ນ ແລະ ຮ້ອງບອກເປັນພາສາເຮັບເຣີວ່າ “ຈົ່ງຟັງຖ້ອຍຄຳຂອງກະສັດຜູ້ຍິ່ງໃຫຍ່ ຄືກະສັດແຫ່ງອັດຊີເຣຍ! ກະສັດກ່າວດັ່ງນີ້ວ່າ ຢ່າປ່ອຍໃຫ້ເຮເຊກີຢາຫລອກລວງພວກເຈົ້າ ລາວຊ່ວຍກູ້ພວກເຈົ້າໃຫ້ພົ້ນຈາກມືຂອງເຮົາບໍ່ໄດ້. ຢ່າປ່ອຍໃຫ້ເຮເຊກີຢາຊັກຈູງໃຈພວກເຈົ້າໃຫ້ວາງໃຈໃນພຣະເຈົ້າຢາເວ, ຢ່າເຊື່ອເມື່ອລາວບອກວ່າ ‘ພຣະເຈົ້າຢາເວຈະຊ່ວຍກູ້ພວກເຮົາແນ່ນອນ; ເມືອງນີ້ຈະບໍ່ຕົກຢູ່ໃນກຳມືຂອງກະສັດອັດຊີເຣຍ’.
“ຢ່າໄປຟັງເຮເຊກີຢາ. ກະສັດອັດຊີເຣຍກ່າວດັ່ງນີ້ວ່າ ໃຫ້ຈົງຮັກພັກດີຕໍ່ເຮົາ ແລະ ອອກມາຫາເຮົາ. ແລ້ວພວກເຈົ້າທຸກຄົນຈະໄດ້ກິນໝາກອະງຸ່ນ ແລະ ໝາກເດື່ອຈາກສວນຂອງຕົນ ແລະ ດື່ມນ້ຳຈາກບໍ່ຂອງຕົນ. ຈົນກວ່າເຮົາຈະມາພາພວກເຈົ້າໄປດິນແດນໜຶ່ງທີ່ຄືກັນກັບດິນແດນຂອງພວກເຈົ້າເອງ ເປັນດິນແດນທີ່ມີເມັດເຂົ້າ, ເຫລົ້າອະງຸ່ນໃໝ່, ເຂົ້າຈີ່, ສວນອະງຸ່ນ, ຕົ້ນໝາກກອກ ແລະ ນ້ຳເຜິ້ງຢ່າງອຸດົມສົມບູນ. ຈົ່ງເລືອກທີ່ຈະຢູ່ດີກວ່າຕາຍ!
“ຢ່າຟັງເຮເຊກີຢາ, ພາະລາວກຳລັງຫລອກລວງເຈົ້າໃຫ້ຫລົງຜິດ ເມື່ອລາວກ່າວວ່າ ‘ພຣະເຈົ້າຢາເວຈະຊ່ວຍກອບກູ້ພວກເຮົາ’. ມີພະຂອງຊາດໃດແດ່ທີ່ກອບກູ້ດິນແດນຂອງຕົນໃຫ້ພົ້ນຈາກກຳມືຂອງກະສັດອັດຊີເຣຍໄດ້? ບັນດາເທບພະເຈົ້າແຫ່ງຮາມັດ ແລະ ອັກປັດຢູ່ໃສ? ບັນດາເທບພະເຈົ້າແຫ່ງເສຟາກວາອິມ, ເຮນາ ແລະ ອີວາຢູ່ໃສ? ພະເຫລົ່ານັ້ນຊ່ວຍຊາມາເຣຍໃຫ້ພົ້ນຈາກກຳມືຂອງເຮົາໄດ້ບໍ? ມີເທບພະເຈົ້າຕົນໃດໃນຊົນຊາດເຫລົ່ານີ້ທີ່ສາມາດຊ່ວຍດິນແດນຂອງຕົນໃຫ້ລອດພົ້ນຈາກເຮົາໄດ້? ແລ້ວພຣະເຈົ້າຢາເວຈະສາມາດຊ່ວຍກອບກູ້ເຢຣູຊາເລັມຈາກກຳມືຂອງເຮົາໄດ້ບໍ?”
ແຕ່ປະຊາຊົນມິດງຽບ ແລະ ບໍ່ເວົ້າຫຍັງຈັກຄຳ ເພາະກະສັດໄດ້ສັ່ງວ່າ “ຢ່າຕອບລາວ”.
ແລ້ວເອລີອາກິມຜູ້ຈັດການເບິ່ງແຍງວັງ ເຊິ່ງເປັນລູກຊາຍຂອງຮິນກີຢາ, ເຊັບນາຜູ້ເປັນເລຂາ ແລະ ໂຢອາຜູ້ຈົດບັນທຶກ ເຊິ່ງເປັນລູກຊາຍຂອງອາສັບຈຶ່ງກັບໄປພົບເຮເຊກີຢາດ້ວຍເຄື່ອງນຸ່ງທີ່ຈີກຂາດ ແລະ ບອກລາວຕາມທີ່ນາຍທະຫານອັດຊີເຣຍໄດ້ກ່າວໄວ້.
Source notes (5)
- Footnote ພາສາເຮັບເຣີວ່າ ອາບີ ເປັນອີກຮູບໜຶ່ງຂອງ ອາບີຢາ
- Footnote ຫລື ພວກເຂົາ ເອີ້ນວ່າ
- Footnote ຄຳວ່າ ເນຮູຊະຕານ ມີສຽງຄ້າຍຄຳພາສາເຮັບເຣີທີ່ມີຄວາມຫມາຍວ່າ ທອງສຳລິດ ແລະ ງູ ແລະ ສິ່ງທີ່ເປັນມົນທິນ
- Footnote ຫລື ປະມານ 11 ໂຕນ
- Footnote ຫລື ປະມານ 1 ໂຕນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.