Biblica® Open Lao Contemporary Version
2 ກະສັດ 17
ໂຮເຊຢາເປັນກະສັດຄົນສຸດທ້າຍຂອງອິດສະຣາເອນ
(2ກສ 18:9-12)
ໂຮເຊອາລູກຊາຍຂອງເອລາກໍໄດ້ຂຶ້ນເປັນກະສັດແຫ່ງອິດສະຣາເອນໃນຊາມາເຣຍ ກົງກັບປີທີສິບສອງຂອງຊ່ວງການປົກຄອງຂອງກະສັດອາຮາດແຫ່ງຢູດາຍ ແລະ ເພິ່ນໄດ້ປົກຄອງຢູ່ເປັນເວລາເກົ້າປີ. ເພິ່ນໄດ້ເຮັດສິ່ງທີ່ຊົ່ວໃນສາຍຕາຂອງພຣະເຈົ້າຢາເວ ແຕ່ບໍ່ຫລາຍເທົ່າກັບບັນດາກະສັດອິດສະຣາເອນຄົນທີ່ຜ່ານມາ.
ກະສັດຊານມາເນເຊແຫ່ງອັດຊີເຣຍໄດ້ຂຶ້ນມາໂຈມຕີໂຮເຊອາ ຜູ້ທີ່ເຄີຍຈົ່ງຮັກພັກດີ ແລະ ໄດ້ມອບເຄື່ອງບັນນາການໃຫ້ເພິ່ນ. ແຕ່ກະສັດອັດຊີເຣຍພົບວ່າໂຮເຊອາເປັນຄົນທໍລະຍົດ, ງົດສົ່ງເຄື່ອງບັນນາການປະຈຳປີ ແລະ ໄດ້ສົ່ງທູດໄປພົບກະສັດໂສ1ແຫ່ງເອຢິບ. ເຫດສະນັ້ນ ຊານມາເນເຊຈຶ່ງໃຫ້ຈັບໂຮເຊຢາລ່າມໂສ້ ແລະ ຂັງເພິ່ນໄວ້ໃນຄຸກ. ກະສັດອັດຊີເຣຍໄດ້ບຸກເຂົ້າໄປທົ່ວແຜ່ນດິນ, ຍົກທັບໄປຕໍ່ສູ້ກັບເມືອງຊາມາເຣຍ ແລະ ປິດລ້ອມເມືອງຊາມາເຣຍເປັນເວລາສາມປີ. ໃນປີທີເກົ້າແຫ່ງຊ່ວງການປົກຄອງຂອງໂຮເຊອາ, ກະສັດອັດຊີເຣຍກໍເຂົ້າຢຶດເມືອງຊາມາເຣຍ ແລະ ກວາດຕ້ອນຊົນຊາດອິດສະຣາເອນໄປເປັນຊະເລີຍຢູ່ທີ່ອັດຊີເຣຍ. ເພິ່ນໄດ້ໃຫ້ຕັ້ງຫລັກແຫລ່ງໃນເມືອງຮາລາ, ໃນໂກຊານບໍລິເວນແຄມຝັ່ງແມ່ນ້ຳຮາໂບ ແລະ ຕາມເມືອງຕ່າງໆຂອງເມເດຍ.
ອິດສະຣາເອນຕົກເປັນຊະເລີຍເພາະບາບ
ທີ່ເປັນເຊັ່ນນີ້ກໍເພາະອິດສະຣາເອນໄດ້ເຮັດບາບຕໍ່ພຣະເຈົ້າຢາເວ ພຣະເຈົ້າຂອງພວກເຂົາ, ຜູ້ໄດ້ນຳພວກເຂົາອອກມາຈາກເອຢິບ ຈາກອຳນາດຂອງຟາໂຣກະສັດແຫ່ງເອຢິບ. ພວກເຂົາໄດ້ຫັນໄປກາບໄຫວ້ພະອື່ນ ແລະ ເຮັດຕາມແບບຢ່າງຂອງບັນດາຊົນຊາດທີ່ພຣະເຈົ້າຢາເວໄດ້ຂັບໄລ່ອອກໄປໃຫ້ພົ້ນຈາກພວກເຂົາ, ເຮັດຕາມແບບຢ່າງທີ່ກະສັດອິດສະຣາເອນແນະນຳ. ຊົນຊາດອິດສະຣາເອນຍັງໄດ້ລັກເຮັດສິ່ງທີ່ບໍ່ຖືກຕ້ອງຫລາຍຢ່າງທີ່ຕໍ່ສູ້ພຣະເຈົ້າຢາເວ ພຣະເຈົ້າຂອງພວກເຂົາ. ພວກເຂົາໄດ້ສ້າງສະຖານບູຊາເທິງທີ່ສູງໄວ້ຢູ່ທຸກເມືອງຂອງພວກເຂົາ ຕັ້ງແຕ່ຫໍຄອຍຈົນຮອດປ້ອມປ້ອງກັນ. ພວກເຂົາໄດ້ຕັ້ງຫີນສັກສິດ ແລະ ເສົາເຈົ້າແມ່ອາເຊຣາຢູ່ເທິງໂນນພູສູງທຸກຍອດ ແລະ ກ້ອງຕົ້ນໄມ້ໃຫຍ່ທຸກຕົ້ນ. ພວກເຂົາໄດ້ເຜົາເຄື່ອງຫອມຢູ່ທີ່ສະຖານບູຊາເທິງທີ່ສູງທຸກແຫ່ງ ເໝືອນຢ່າງບັນດາຊົນຊາດທີ່ພຣະເຈົ້າຢາເວໄດ້ຂັບໄລ່ອອກໄປຈາກດິນແດນ. ເມື່ອອິດສະຣາເອນເຂົ້າມາ ອິດສະຣາເອນກໍໄດ້ເຮັດສິ່ງຊົ່ວຮ້າຍຍົວະໃຫ້ພຣະເຈົ້າຢາເວໃຈຮ້າຍ. ພວກເຂົາໄດ້ກາບໄຫວ້ບັນດາຮູບເຄົາລົບ ເຖິງແມ່ນວ່າພຣະເຈົ້າຢາເວໄດ້ກ່າວວ່າ, “ພວກເຈົ້າຢ່າເຮັດສິ່ງນີ້”.2 ພຣະເຈົ້າຢາເວໃຊ້ຜູ້ທຳນວາຍ ແລະ ຜູ້ທຳນວາຍມາເຕືອນທັງອິດສະຣາເອນ ແລະ ຢູດາວ່າ, “ຈົ່ງຫັນໜີຈາກວິຖີທາງອັນຊົ່ວຮ້າຍຂອງພວກເຈົ້າ. ຈົ່ງປະຕິບັດຕາມຄຳສັ່ງ ແລະ ດຳລັດຂອງເຮົາ ຕາມກົດບັນຍັດທັງໝົດທີ່ເຮົາໄດ້ສັ່ງໃຫ້ບັນພະບຸລຸດຂອງພວກເຈົ້າເຊື່ອງຟັງ ແລະ ທີ່ເຮົາໄດ້ແຈ້ງແກ່ພວກເຈົ້າຜ່ານທາງຜູ້ທຳນວາຍຜູ້ຮັບໃຊ້ຂອງເຮົາ”.
ແຕ່ອິດສະຣາເອນບໍ່ຍອມຟັງ ແລະ ມີໃຈດື້ດ້ານຄືກັນກັບບັນພະບຸລຸດຂອງພວກເຂົາ ເຊິ່ງບໍ່ໄດ້ວາງໃຈໃນພຣະເຈົ້າຢາເວ ພຣະເຈົ້າຂອງພວກເຂົາ. ພວກເຂົາໄດ້ປະຕິເສດດຳລັດຂອງພຣະອົງ ແລະ ຄຳໝັ້ນສັນຍາທີ່ພຣະອົງໄດ້ໃຫ້ໄວ້ແກ່ບັນພະບຸລຸດຂອງພວກເຂົາ ແລະ ກົດເກນຕ່າງໆທີ່ພຣະອົງໄດ້ເຕືອນໃຫ້ພວກເຂົາໃຫ້ປະຕິບັດຕາມ. ພວກເຂົາໄປຕິດຕາມບັນດາຮູບເຄົາລົບອັນໄຮ້ຄ່າ ແລະ ພວກເຂົາຈຶ່ງເປັນຄົນໄຮ້ຄ່າ. ພວກເຂົາເຮັດຕາມແບບຢ່າງຂອງຊົນຊາດທັງຫລາຍທີ່ຢູ່ອ້ອມຂ້າງພວກເຂົາ ເຖິງວ່າພຣະເຈົ້າຢາເວໄດ້ສັ່ງພວກເຂົາໄວ້ວ່າ, “ຈົ່ງຢ່າເຮັດຕາມພວກເຂົາ”.
ພວກເຂົາໄດ້ປະຖິ້ມຄຳສັ່ງທັງໝົດຂອງພຣະເຈົ້າຢາເວ ພຣະເຈົ້າຂອງພວກເຂົາ ແລະ ໄດ້ສ້າງຮູບເຄົາລົບເປັນງົວນ້ອຍສອງໂຕໄວ້ສຳລັບພວກເຂົາເອງ ແລະ ເສົາເຈົ້າແມ່ອາເຊຣາ. ພວກເຂົາໄດ້ກາບລົງຕໍ່ບັນດາດາວທັງຫລາຍ ແລະ ພວກເຂົາໄດ້ກາບໄຫວ້ພະບາອານ. ພວກເຂົາໄດ້ເອົາບັນດາລູກຊາຍ ແລະ ລູກສາວຂອງຕົນເຜົາບູຊາຍັນ.3 ພວກເຂົາໄດ້ຝຶກຝົນການທຳນາຍ ແລະ ສະແຫວງຫາລາງບອກເຫດ ແລະ ປ່ອຍຕົນເອງໃຫ້ເຮັດສິ່ງທີ່ຊົ່ວຮ້າຍໃນສາຍຕາຂອງພຣະເຈົ້າຢາເວ ແລະ ຍົວະໃຫ້ພຣະອົງໃຈຮ້າຍ.
ດັ່ງນັ້ນ ພຣະເຈົ້າຢາເວຈຶ່ງໄດ້ໃຈຮ້າຍໃຫ້ອິດສະຣາເອນຫລາຍ ແລະ ຂັບໄລ່ພວກເຂົາອອກໄປໃຫ້ພົ້ນຈາກພຣະອົງ. ເຫລືອຢູ່ແຕ່ເຜົ່າຢູດາເທົ່ານັ້ນ, ແລະ ແມ່ນແຕ່ຢູດາເອງກໍບໍ່ປະຕິບັດຕາມຄຳສັ່ງຂອງພຣະເຈົ້າຢາເວ ພຣະເຈົ້າຂອງພວກເຂົາ. ພວກເຂົາໄດ້ປະຕິບັດຕາມແນວທາງທີ່ອິດສະຣາເອນແນະນຳ. ເຫດສະນັ້ນ ພຣະເຈົ້າຢາເວຈຶ່ງໄດ້ປະຕິເສດຊົນຊາດອິດສະຣາເອນທັງໝົດ; ພຣະອົງໄດ້ລົງໂທດພວກເຂົາ ແລະ ມອບພວກເຂົາໄວ້ໃນມືຂອງຜູ້ປຸ້ນຈີ້, ຈົນກວ່າພຣະອົງຈະກຳຈັດພວກເຂົາອອກໄປໃຫ້ພົ້ນຈາກພຣະອົງ.
ເມື່ອພຣະເຈົ້າໄດ້ຈີກອິດສະຣາເອນອອກໄປຈາກເຊື້ອສາຍຂອງດາວິດແລ້ວ, ພວກເຂົາກໍໄດ້ເລືອກເຢໂຣໂບອາມລູກຊາຍຂອງເນບັດເປັນກະສັດຂອງພວກເຂົາ. ເຢໂຣໂບອາມໄດ້ຊັກຈູງອິດສະຣາເອນອອກຈາກການຕິດຕາມພຣະເຈົ້າຢາເວ ແລະ ເຮັດໃຫ້ພວກເຂົາເຮັດບາບອັນຮ້າຍແຮງ. ຊາວອິດສະຣາເອນຈົມຢູ່ໃນບາບຂອງເຢໂຣໂບອາມ ແລະ ບໍ່ຍອມຫັນໜີຈາກຄວາມບາບເຫລົ່ານັ້ນ ຈົນໃນທີ່ສຸດ ພຣະເຈົ້າຢາເວກຳຈັດພວກເຂົາອອກໄປໃຫ້ພົ້ນຈາກພຣະອົງ ຕາມທີ່ພຣະອົງໄດ້ເຕືອນໄວ້ຜ່ານທາງຜູ້ທຳນວາຍຜູ້ຮັບໃຊ້ຂອງພຣະອົງ. ດັ່ງນັ້ນ ອິດສະຣາເອນຈຶ່ງຖືກກວາດຕ້ອນໄປຈາກບ້ານເກີດເມືອງນອນຂອງຕົນໄປເປັນຊະເລີຍຢູ່ໃນອັດຊີເຣຍ ແລະ ພວກເຂົາກໍຍັງຢູ່ທີ່ນັ້ນ.
ຄົນຕ່າງຊາດມາຕັ້ງຖິ່ນຖານຢູ່ໃນຊາມາເລຍ
ກະສັດອັດຊີເຣຍໄດ້ນຳຄົນຈາກບາບີໂລນ, ກຸດທາ, ອີວາ, ຮາມັດ ແລະ ເສຟາກວາອິມ ແລະ ໃຫ້ພວກເຂົາຕັ້ງຖິ່ນຖານຢູ່ໃນເມືອງຕ່າງໆຂອງຊາມາເລຍແທນທີ່ຊາວອິດສະຣາເອນ. ພວກເຂົາໄດ້ຢຶດຄອງຊາມາເຣຍ ແລະ ອາໄສຢູ່ໃນເມືອງຕ່າງໆ. ເມື່ອພວກເຂົາມາເຖິງເປັນຄັ້ງທຳອິດ ພວກເຂົາບໍ່ໄດ້ນະມັດສະການພຣະເຈົ້າຢາເວ; ດັ່ງນັ້ນ ພຣະອົງຈຶ່ງໄດ້ສົ່ງໂຕສິງມາຢູ່ທ່າມກາງພວກເຂົາ ແລະ ພວກເຂົາໄດ້ຂ້າບາງຄົນ. ກະສັດອັດຊີເຣຍໄດ້ຮັບລາຍງານວ່າ, “ປະຊາຊົນທີ່ເພິ່ນໃຫ້ເຂົ້າມາຕັ້ງຖິ່ນຖານໃນເມືອງຊາມາເຣຍນັ້ນບໍ່ຮູ້ກົດບັນຍັດຂອງພະແຫ່ງດິນແດນນີ້. ເພິ່ນຈຶ່ງໄດ້ສົ່ງໂຕສິງເຂົ້າມາທ່າມກາງພວກເຂົາ ເຊິ່ງໄດ້ຂ້າພວກເຂົາຫລາຍຄົນ ເພາະປະຊາຊົນບໍ່ຮູ້ສິ່ງທີ່ເພິ່ນຢາກໃຫ້ປະຕິບັດ”.
ກະສັດອັດຊີເຣຍຈຶ່ງມີຄຳສັ່ງນີ້ວ່າ, “ໃຫ້ສົ່ງປະໂລຫິດຄົນໜຶ່ງທີ່ຖືກພວກເຈົ້າກວາດຕ້ອນມາຈາກຊາມາເຣຍກັບໄປຢູ່ທີ່ນັ້ນ ເພື່ອສອນປະຊາຊົນໃຫ້ຮູ້ສິ່ງທີ່ພະແຫ່ງດິນແດນນັ້ນຢາກໃຫ້ເຮັດ”. ດັ່ງນັ້ນ ປະໂລຫິດຄົນໜຶ່ງ ເຊິ່ງເປັນຊະເລີຍມາຈາກຊາມາເຣຍຈຶ່ງມາຢູ່ທີ່ເບັດເອນ ແລະ ໄດ້ສອນປະຊາຊົນໃຫ້ນະມັດສະການພຣະເຈົ້າຢາເວ.
ແຕ່ຊົນຊາດເຫລົ່ານີ້ໄດ້ສ້າງພະຂອງຕົນໃນເມືອງຕ່າງໆທີ່ມາຕັ້ງຖິ່ນຖານດ້ວຍ ແລະ ຕັ້ງພະໄວ້ຕາມສະຖານບູຊາເທິງທີ່ສູງທັງຫລາຍ ເຊິ່ງຊາວຊາມາເຣຍໄດ້ສ້າງໄວ້. ຄົນທີ່ມາຈາກບາບີໂລນກໍສ້າງພະຊຸກໂກດເບໂນດ, ບັນດາຄົນທີ່ມາຈາກກຸດທາໄດ້ສ້າງພະເນການ ແລະ ບັນດາຄົນທີ່ມາຈາກຮາມັດໄດ້ສ້າງພະອາຊີມາ. ຊາວອິບວາໄດ້ສ້າງພະນິບຮາດ ແລະ ພະຕາກຕັກ ແລະ ຊາວເສຟາກວາອິມໄດ້ເຜົາລູກຂອງຕົນຖວາຍແກ່ພະອັດຣຳເມເລັກ ແລະ ພະອານາມເມເລັກ ເຊິ່ງເປັນພະຂອງເມືອງເຊຟາກວາອິມ. ພວກເຂົານະມັດສະການພຣະເຈົ້າຢາເວ, ແຕ່ພວກເຂົາກໍໄດ້ຕັ້ງຄົນຂອງພວກເຂົາເອງຈາກທຸກປະເພດໃຫ້ເປັນປະໂລຫິດປະຈຳສະຖານບູຊາເທິງທີ່ສູງທັງຫລາຍ. ພວກເຂົານະມັດສະການພຣະເຈົ້າຢາເວ, ແຕ່ພວກເຂົາກໍຮັບໃຊ້ພະຂອງຕົນ ຕາມທຳນຽມຂອງປະຊາຊາດທັງຫລາຍທີ່ພວກເຂົາຖືກພາມາ.
ພວກເຂົາຍັງຢຶດຖືເຄົາລົບທຳນຽມເດີມຂອງພວກເຂົາມາຈົນເຖິງທຸກວັນນີ້. ພວກເຂົາບໍ່ໄດ້ນະມັດສະການພຣະເຈົ້າຢາເວຢ່າງແທ້ຈິງ ຫລື ຢຶດໝັ້ນໃນດຳລັດ ແລະ ກົດເກນ, ກົດບັນຍັດ ແລະ ຄຳສັ່ງທີ່ພຣະເຈົ້າຢາເວໄດ້ໃຫ້ໄວ້ແກ່ເຊື້ອສາຍຂອງຢາໂຄບ ເຊິ່ງພຣະອົງຕັ້ງຊື່ໃຫ້ວ່າອິດສະຣາເອນ. ເມື່ອພຣະເຈົ້າຢາເວໄດ້ເຮັດຄຳໝັ້ນສັນຍາກັບຊົນຊາດອິດສະຣາເອນ; ພຣະອົງໄດ້ສັ່ງພວກເຂົາໄວ້ວ່າ: “ຢ່ານະມັດສະການບັນດາພະອື່ນ ຫລື ກາບລົງຕໍ່ພວກເຂົາ, ຢ່າຮັບໃຊ້ພວກເຂົາ ຫລື ຖວາຍເຄື່ອງບູຊາແກ່ພະເຫລົ່ານັ້ນ. ແຕ່ພວກເຈົ້າຈົ່ງນະມັດສະການພຣະເຈົ້າຢາເວແຕ່ພຽງຜູ້ດຽວ, ຜູ້ທີ່ໄດ້ນຳພວກເຈົ້າອອກມາຈາກເອຢິບດ້ວຍລິດອຳນາດອັນຍິ່ງໃຫຍ່ ແລະ ດ້ວຍມືທີ່ຢຽດອອກ, ພວກເຈົ້າຈະຕ້ອງກາບລົງ ແລະ ຖວາຍເຄື່ອງບູຊາແກ່ພຣະອົງ. ພວກເຈົ້າຈະຕ້ອງເອົາໃຈໃສ່ປະຕິບັດຕາມດຳລັດ ແລະ ກົດເກນ, ກົດບັນຍັດ ແລະ ຄຳສັ່ງທີ່ພຣະອົງຂຽນໄວ້ໃຫ້ພວກເຈົ້າ. ຢ່າໄປນະມັດສະການພະອື່ນ. ຢ່າລືມຄຳໝັ້ນສັນຍາທີ່ເຮົາເຮັດໄວ້ກັບພວກເຈົ້າ ແລະ ຢ່ານະມັດສະການພະອື່ນ. ແຕ່ຈົ່ງນະມັດສະການພຣະເຈົ້າຢາເວ ພຣະເຈົ້າຂອງພວກເຈົ້າ; ຜູ້ທີ່ຈະກອບກູ້ພວກເຈົ້າໃຫ້ພົ້ນຈາກມືຂອງສັດຕູຂອງພວກເຈົ້າທັງໝົດ”.
ແຕ່ຄົນເຫລົ່ານັ້ນບໍ່ຟັງ, ພວກເຂົາຍັງເຮັດຕາມທຳນຽມເດີມຂອງພວກເຂົາ. ເຖິງແມ່ນວ່າຄົນເຫລົ່ານີ້ກຳລັງນະມັດສະການພຣະເຈົ້າຢາເວ, ພວກເຂົາກໍຍັງຮັບໃຊ້ບັນດາຮູບເຄົາລົບຂອງຕົນ. ບັນດາລູກຂອງພວກເຂົາ ແລະ ຫລານຂອງພວກເຂົາກໍສືບຕໍ່ເຮັດຕາມແບບຢ່າງຂອງບັນພະບຸລຸດຂອງພວກເຂົາມາຈົນເຖິງທຸກວັນນີ້.
Source notes (3)
- Footnote ອາດຈະເປັນຊື່ຫຍໍ້ຂອງ ໂອໂສກອນ
- Footnote ອພຍ 20:4,5
- Footnote ຫລື ພວກພວກເຂົາໃຫ້ລູກຊາຍລູກສາວລຸຍໄຟ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.