Biblica® Open Lao Contemporary Version
2 ກະສັດ 13
ກະສັດເຢໂຮອາຮາດແຫ່ງອິດສະຣາເອນ
ເຢໂຮອາຮາດລູກຊາຍຂອງເຢຮູໄດ້ຂຶ້ນເປັນກະສັດແຫ່ງອິດສະຣາເອນໃນຊາມາເຣຍ ເຊິ່ງກົງກັບປີທີຊາວສາມຂອງຊ່ວງການປົກຄອງຂອງກະສັດໂຢອາດ ລູກຊາຍຂອງອາຮາຊີຢາແຫ່ງຢູດາຍ ແລະ ໄດ້ປົກຄອງຢູ່ສິບເຈັດປີ. ເຢໂຮອາຮາດໄດ້ເຮັດສິ່ງທີ່ຊົ່ວໃນສາຍຕາຂອງພຣະເຈົ້າຢາເວ ໂດຍການຕາມແບບຢ່າງຄວາມບາບຂອງເຢໂຣໂບອາມ ລູກຊາຍຂອງເນບັດ, ເຊິ່ງເພິ່ນໄດ້ເຮັດໃຫ້ອິດສະຣາເອນເຮັດຕາມ ແລະ ເພິ່ນກໍບໍ່ໄດ້ຢຸດເຮັດຄວາມບາບເຫລົ່ານັ້ນ. ດັ່ງນັ້ນ ພຣະເຈົ້າຢາເວຈຶ່ງໃຈຮ້າຍອິດສະຣາເອນຫລາຍ ແລະ ພຣະອົງໃຫ້ພວກເຂົາຕົກຢູ່ພາຍໃຕ້ອຳນາດຂອງກະສັດຮາຊາເອນແຫ່ງອາຣາມ ແລະ ເບັນຮາດາດຜູ້ເປັນລູກຊາຍຂອງເພິ່ນເປັນເວລາດົນນານ.
ແລ້ວເຢໂຮອາຮາດໄດ້ສະແຫວງຫາຄວາມກະລຸນາຂອງພຣະເຈົ້າຢາເວ ແລະ ພຣະເຈົ້າຢາເວກໍໄດ້ຮັບຟັງເພິ່ນ, ເພາະພຣະອົງເຫັນວ່າກະສັດອາຣາມໄດ້ກົດຂີ່ຂົ່ມເຫັງອິດສະຣາເອນຫລາຍ. ພຣະເຈົ້າຢາເວໄດ້ຈັດຕຽມຜູ້ກອບກູ້ຄົນໜຶ່ງສຳລັບອິດສະຣາເອນ ແລະ ພວກເຂົາໄດ້ພົ້ນຈາກອຳນາດຂອງອາຣາມ. ດັ່ງນັ້ນ ຊາວອິດສະຣາເອນຈຶ່ງໄດ້ອາໄສຢູ່ໃນເຮືອນຂອງຕົນຄືກັບທີ່ພວກເຂົາເຄີຍອາໄສມາເໝືອນແຕ່ກ່ອນ. ແຕ່ພວກເຂົາກໍຍັງບໍ່ໄດ້ຫັນໜີຈາກບາບຂອງຄອບຄົວເຢໂຣໂບອາມ, ເຊິ່ງເພິ່ນໄດ້ເຮັດໃຫ້ອິດສະຣາເອນເຮັດຕາມ; ພວກເຂົາຍັງສຶບຕໍ່ດຳເນີນໃນຄວາມບາບເຫລົ່ານັ້ນຢູ່, ເສົາເຈົ້າແມ່ອາເຊຣາ1ກໍຍັງຕັ້ງຢູ່ໃນຊາມາເຣຍ.
ເຢໂຮອາຮາດບໍ່ເຫລືອທະຫານເລີຍ ເຫລືອພຽງແຕ່ທະຫານມ້າຈຳນວນຫ້າສິບຄົນ, ລົດມ້າຮົບສິບຄັນ ແລະ ທະຫານລາບຈຳນວນສິບພັນຄົນ, ເພາະຖືກກະສັດອາຣາມທຳລາຍຈົນເປັນເໝືອນຂີ້ຝຸ່ນດິນໃນເວລານວດເຂົ້າ.
ເຫດການອື່ນໆໃນຊ່ວງການປົກຄອງຂອງເຢໂຮອາຮາດ, ພາລະກິດທັງໝົດທີ່ເພິ່ນໄດ້ເຮັດ ແລະ ຄວາມສຳເລັດທັງໝົດຂອງເພິ່ນແມ່ນມີບັນທຶກໄວ້ໃນປຶ້ມປະຫວັດສາດຂອງກະສັດແຫ່ງອິດສະຣາເອນບໍ່ແມ່ນບໍ? ເຢໂຮອາຮາດໄດ້ລ່ວງລັບໄປຢູ່ກັບບັນພະບຸລຸດຂອງເພິ່ນ ແລະ ຖືກຝັງໄວ້ຢູ່ທີ່ຊາມາເຣຍ. ແລ້ວເຢໂຮອາດ2 ລູກຊາຍຂອງເພິ່ນກໍໄດ້ຂຶ້ນເປັນກະສັດແທນ.
ກະສັດເຢໂຮອາດແຫ່ງອິດສະຣາເອນ
ເຢໂຮອາດລູກຊາຍຂອງເຢໂຮອາຮາດໄດ້ຂຶ້ນເປັນກະສັດແຫ່ງອິດສະຣາເອນໃນຊາມາເຣຍ ເຊິ່ງກົງກັບປີທີສາມສິບເຈັດຂອງຊ່ວງການປົກຄອງຂອງກະສັດໂຢອາດແຫ່ງຢູດາຍ, ເພິ່ນໄດ້ປົກຄອງເປັນເວລາສິບຫົກປີ. ເຢໂຮອາດໄດ້ເຮັດສິ່ງທີ່ຊົ່ວໃນສາຍຕາຂອງພຣະເຈົ້າຢາເວ ແລະ ບໍ່ໄດ້ຢຸດເຮັດບາບຂອງເຢໂຣໂບອາມລູກຊາຍຂອງເນບັດ ເຊິ່ງເພິ່ນໄດ້ເຮັດໃຫ້ອິດສະຣາເອນເຮັດຕາມ; ເພິ່ນກໍຍັງດຳເນີນຊີວິດຢູ່ໃນຄວາມບາບເຫລົ່ານັ້ນ.
ເຫດການອື່ນໆໃນຊ່ວງການປົກຄອງຂອງເຢໂຮອາດ, ພາລະກິດທັງໝົດທີ່ເພິ່ນໄດ້ເຮັດ ແລະ ຄວາມສຳເລັດທັງໝົດຂອງເພິ່ນ, ລວມທັງການເຮັດສົງຄາມກັບກະສັດອາມາຊີຢາແຫ່ງຢູດາຍແມ່ນມີບັນທຶກໄວ້ປຶ້ມປະຫວັດສາດຂອງກະສັດແຫ່ງອິດສະຣາເອນບໍ່ແມ່ນບໍ? ເຢໂຮອາດໄດ້ລ່ວງລັບໄປຢູ່ກັບບັນພະບຸລຸດຂອງເພິ່ນ ແລະ ຖືກຝັງໄວ້ໃນຊາມາເຣຍຮ່ວມກັບບັນດາກະສັດອິດສະຣາເອນ ແລ້ວເຢໂຣໂບອາມກໍໄດ້ຂຶ້ນເປັນກະສັດແທນ.
ເມື່ອເອລີຊາໄດ້ທຸກທໍລະມານຈາກການເຈັບປ່ວຍໜັກທີ່ໃກ້ຈະຕາຍ ກະສັດເຢໂຮອາດແຫ່ງອິດສະຣາເອນກໍໄດ້ລົງມາຢ້ຽມເພິ່ນ ແລະ ຮ້ອງໄຫ້ຕໍ່ໜ້າເພິ່ນ ແລະ ຄ່ຳຄວນວ່າ, “ພໍ່! ພໍ່! ຜູ້ເປັນລົດມ້າຮົບ ແລະ ທະຫານມ້າແຫ່ງອິດສະຣາເອນ!”
ເອລີຊາໄດ້ເວົ້າວ່າ, “ຈົ່ງເອົາຄັນທະນູກັບລູກທະນູມາ”, ແລ້ວເຢໂຮອາດກໍເຮັດຕາມ. ເອລີຊາໄດ້ບອກກະສັດອິດສະຣາເອນວ່າ, “ຈົ່ງຈັບທະນູຂຶ້ນມາ”. ເມື່ອກະສັດຈັບທະນູຂຶ້ນມາແລ້ວ, ເອລີຊາກໍວາງມືຂອງຕົນລົງເທິງມືຂອງກະສັດອິດສະຣາເອນ.
ເອລີຊາໄດ້ເວົ້າວ່າ, “ຈົ່ງເປີດປ່ອງຢ້ຽມດ້ານທິດຕາເວັນອອກ”, ແລ້ວກະສັດກໍເປີດ. ເອລີຊາເວົ້າວ່າ, “ຈົ່ງຍິງອອກໄປ!” ແລ້ວກະສັດກໍຍິງ. ເອລີຊາໄດ້ປະກາດວ່າ, “ລູກທະນູແຫ່ງໄຊຊະນະຂອງພຣະເຈົ້າຢາເວ, ລູກທະນູແຫ່ງໄຊຊະນະເໜືອອາຣາມ! ທ່ານຈະທຳລາຍຊາວອາຣາມຢູ່ທີ່ອາເຟັກຈົນໝົດສິ້ນ”.
ຫລັງຈາກນັ້ນ ເອລີຊາກໍເວົ້າວ່າ, “ຈົ່ງຈັບລູກທະນູຂຶ້ນມາ”, ແລ້ວກະສັດກໍຈັບລູກທະນູນັ້ນຂຶ້ນມາ. ເອລີຊາໄດ້ບອກກະສັດວ່າ, “ຈົ່ງຟາດລົງພື້ນ”. ກະສັດກໍຟາດລູກທະນູສາມເທື່ອແລ້ວກໍຢຸດ. ຄົນຂອງພຣະເຈົ້າໃຈຮ້າຍ ແລະ ເວົ້າວ່າ, “ທ່ານສົມຄວນຈະຟາດພື້ນຫ້າ ຫລື ຫົກເທື່ອ; ຫລັງຈາກນັ້ນ ທ່ານກໍຈະເອົາຊະນະອາຣາມ ແລະ ທຳລາຍມັນໃຫ້ໝົດສິ້ນ. ແຕ່ວ່າທ່ານຈະຊະນະອາຣາມພຽງແຕ່ສາມເທື່ອເທົ່ານັ້ນ”.
ເອລີຊາຕາຍ ແລະ ຖືກຝັງໄວ້.
ໃນເວລານັ້ນ ກອງໂຈນຂອງຊາວໂມອາບເຄີຍມາບຸກລຸກດິນແດນທຸກລະດູໃບໄມ້ປົ່ງ. ຄັ້ງໜຶ່ງ ຂະນະທີ່ຄົນອິດສະຣາເອນກຳລັງຝັງຮ່າງກາຍຂອງຊາຍຄົນໜຶ່ງ, ທັນທີທີ່ພວກເຂົາເຫັນກອງໂຈນ; ພວກເຂົາກໍຖິ້ມຮ່າງກາຍຂອງຊາຍຄົນນັ້ນເຂົ້າໄປໃນອຸບໂມງຝັງສົບຂອງເອລີຊາ. ເມື່ອຮ່າງກາຍນັ້ນແຕະຕ້ອງກັບໂຄງກະດູກຂອງເອລີຊາ, ຊາຍຄົນນັ້ນກໍກັບມີຊີວິດ ແລະ ລຸກຂຶ້ນຢືນ.
ກະສັດຮາຊາເອນແຫ່ງອາຣາມໄດ້ກົດຂີ່ຂົ່ມເຫັງອິດສະຣາເອນຕະຫລອດຊ່ວງການປົກຄອງຂອງເຢໂຮອາຮາດ. ແຕ່ພຣະເຈົ້າຢາເວກະລຸນາພວກເຂົາ ແລະ ເມດຕາສົງສານ ແລະ ໄດ້ສະແດງຄວາມຫ່ວງໃຍຕໍ່ພວກເຂົາ ເພາະເຫັນແກ່ຄຳໝັ້ນສັນຍາທີ່ຂອງພຣະອົງທີ່ໄດ້ໃຫ້ໄວ້ກັບອັບຣາຮາມ, ອີຊາກ ແລະ ຢາໂຄບ. ເຖິງບັດນີ້ ພຣະອົງກໍບໍ່ໄດ້ປະສົງຈະທຳລາຍພວກເຂົາ ຫລື ໄລ່ພວກເຂົາໄປໃຫ້ພົ້ນຈາກພຣະອົງ.
ກະສັດຮາຊາເອນແຫ່ງອາຣາມໄດ້ຕາຍ ແລະ ເບັນຮາດາດລູກຊາຍຂອງເພິ່ນກໍຂຶ້ນເປັນກະສັດແທນ. ແລ້ວເຢໂຮອາດລູກຊາຍຂອງເຢໂຮອາຮາດກໍໄດ້ຢຶດຫົວເມືອງຕ່າງໆຄືນມາຈາກເບັນຮາດາດລູກຊາຍຂອງຮາຊາເອນ ເຊິ່ງກະສັດເບັນຮາດາດໄດ້ຢຶດໄປເອົາໄປຈາກເຢໂຮອາຮາດພໍ່ຂອງເພິ່ນ. ເຢໂຮອາດໄດ້ຮົບຊະນະເບັນຮາດາດສາມເທື່ອ ດັ່ງນັ້ນ ເພິ່ນຈຶ່ງໄດ້ຫົວເມືອງອິດສະຣາເອນຄືນມາ.
Source notes (2)
- Footnote ຄື ສັນຍະລັກຂອງເຈົ້າແມ່ອາເຊຣາ ເຊັ່ນດຽວກັບບ່ອນອື່ນໆໃນ 2 ກະສັດ
- Footnote ພາສາເຮັບເຣີວ່າ ໂຢອາດ ເປັນອີກຮູບໜຶ່ງຂອງ ເຢໂຮອາດ ເຊັ່ນດຽວກັບຂໍ້ 12, 13, 14, 25; 1, 13, 23, 27
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.