Biblica® Open Lao Contemporary Version
2 ໂກຣິນໂທ 13
ຄຳເຕືອນສຸດທ້າຍ
ນີ້ຄົງຈະເປັນເທື່ອທີສາມທີ່ເຮົາມາຢ້ຽມຢາມພວກເຈົ້າ. “ທຸກຄະດີຈະຕ້ອງມີພະຍານຢືນຢັນສອງ ຫລື ສາມປາກ”.1 ເຮົາໄດ້ໃຫ້ຄຳເຕືອນພວກເຈົ້າໄວ້ແລ້ວເມື່ອເຮົາມາຢ້ຽມຢາມພວກເຈົ້າເທື່ອທີສອງ. ບັດນີ້ ເຮົາຂໍຢ້ຳອີກໃນຂະນະທີ່ເຮົາບໍ່ຢູ່ວ່າ: ເມື່ອເຮົາກັບມາ ເຮົາຈະບໍ່ລະເວັ້ນບັນດາຜູ້ທີ່ໄດ້ເຮັດບາບກ່ອນໜ້ານີ້ ຫລື ຄົນອື່ນໆໃດອີກ, ເມື່ອພວກເຈົ້າຮຽກຮ້ອງໃຫ້ພິສູດວ່າພຣະຄຣິດເຈົ້າກຳລັງກ່າວຜ່ານທາງເຮົາ. ພຣະອົງບໍ່ໄດ້ອ່ອນແອໃນຄວາມສຳພັນກັບພວກເຈົ້າ ແຕ່ເຕັມດ້ວຍລິດອຳນາດຢູ່ທ່າມກາງພວກເຈົ້າ. ເພາະເປັນຄວາມຈິງແທ້ທີ່ວ່າ, ໃນຄວາມອ່ອນແອ ພຣະອົງຖືກຄຶງເທິງໄມ້ກາງແຂນ ແຕ່ໂດຍລິດອຳນາດຂອງພຣະເຈົ້າພຣະອົງມີຊີວິດຢູ່. ເຊັ່ນດຽວກັນ ພວກເຮົາກໍອ່ອນແອໃນພຣະອົງ, ແຕ່ໂດຍລິດອຳນາດຂອງພຣະເຈົ້າ ພວກເຮົາຈະມີຊີວິດຢູ່ດ້ວຍກັນກັບພຣະອົງໃນຄວາມສຳພັນຂອງພວກເຮົາກັບພວກເຈົ້າ.
ຈົ່ງພິຈາລະນາຕົນເອງເພື່ອເບິ່ງວ່າພວກເຈົ້າຢູ່ໃນຄວາມເຊື່ອ ຫລື ບໍ່; ຈົ່ງທົດສອບຕົນເອງ. ພວກເຈົ້າບໍ່ຮູ້ບໍວ່າພຣະເຢຊູຄຣິດເຈົ້າຢູ່ໃນພວກເຈົ້າ ແນ່ນອນເວັ້ນໄວ້ແຕ່ວ່າພວກເຈົ້າບໍ່ຜ່ານການທົດສອບນັ້ນ? ແລະ ເຮົາໝັ້ນໃຈວ່າພວກເຈົ້າຈະພົບວ່າພວກເຮົາຜ່ານການທົດສອບນັ້ນ. ບັດນີ້ ພວກເຮົາອະທິຖານຕໍ່ພຣະເຈົ້າເພື່ອພວກເຈົ້າຈະບໍ່ເຮັດຜິດອັນໃດ ບໍ່ແມ່ນເພື່ອໃຫ້ຄົນທັງຫລາຍເຫັນວ່າພວກເຮົາໄດ້ຜ່ານການທົດສອບ ແຕ່ເພື່ອພວກເຈົ້າຈະເຮັດສິ່ງທີ່ຖືກຕ້ອງເຖິງແມ່ນເບິ່ງຄືວ່າພວກເຮົາບໍ່ຜ່ານການທົດສອບ ເພາະພວກເຮົາບໍ່ອາດເຮັດສິ່ງໃດທີ່ຂັດກັບຄວາມຈິງໄດ້ ແຕ່ເຮັດເພື່ອຄວາມຈິງເທົ່ານັ້ນ. ເມື່ອໃດກໍຕາມທີ່ພວກເຮົາອ່ອນແອ ແຕ່ພວກເຈົ້າເຂັ້ມແຂງ ພວກເຮົາກໍຊື່ນຊົມຍິນດີ; ແລະ ພວກເຮົາກໍອະທິຖານຂໍໃຫ້ພວກເຈົ້າຮັບການຟື້ນຟູຢ່າງເຕັມທີ່. ດ້ວຍເຫດນີ້ແຫລະ ໃນເວລາທີ່ເຮົາບໍ່ຢູ່ ເຮົາຈຶ່ງຂຽນສິ່ງເຫລົ່ານີ້ເຖິງພວກເຈົ້າ ເພື່ອວ່າເມື່ອເຮົາມາເຖິງແລ້ວເຮົາຈະບໍ່ໄດ້ໃຊ້ອຳນາດຢ່າງເຂັ້ມງວດກັບພວກເຈົ້າ, ອຳນາດທີ່ອົງພຣະຜູ້ເປັນເຈົ້າໄດ້ໃຫ້ແກ່ເຮົານັ້ນກໍເພື່ອສ້າງພວກເຈົ້າຂຶ້ນ ບໍ່ແມ່ນເພື່ອດຶງພວກເຈົ້າລົງ.
ຄຳລົງທ້າຍ
ສຸດທ້າຍນີ້ ພີ່ນ້ອງທັງຫລາຍເອີຍ, ຈົ່ງຊື່ນຊົມຍິນດີ! ຈົ່ງສູ້ຊົນເພື່ອການຟື້ນຟູຢ່າງເຕັມທີ່, ຈົ່ງໜູນໃຈກັນ, ຈົ່ງເປັນນ້ຳໜຶ່ງໃຈດຽວກັນ, ຈົ່ງຢູ່ຢ່າງສະຫງົບ. ແລ້ວພຣະເຈົ້າແຫ່ງຄວາມຮັກ ແລະ ສັນຕິສຸກຈະຢູ່ກັບພວກເຈົ້າ.
ຈົ່ງທັກທາຍກັນດ້ວຍການຈູບອັນບໍລິສຸດ.
ຄົນຂອງພຣະເຈົ້າທຸກຄົນຢູ່ທີ່ນີ້ກໍຝາກຄວາມຄິດເຖິງມາຍັງພວກເຈົ້າທັງຫລາຍ.
ຂໍໃຫ້ພຣະຄຸນຂອງພຣະເຢຊູຄຣິດເຈົ້າ ອົງພຣະຜູ້ເປັນເຈົ້າ ແລະ ຄວາມຮັກຂອງພຣະເຈົ້າ ແລະ ຄວາມສາມັກຄີທຳຂອງພຣະວິນຍານບໍລິສຸດເຈົ້າ ຈົ່ງສະຖິດຢູ່ກັບພວກເຈົ້າທຸກຄົນ.
Source notes (1)
- Footnote ພບຍ 19:15
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.