Biblica® Open Lao Contemporary Version
2 ຂ່າວຄາວ 6
ແລ້ວໂຊໂລໂມນຈຶ່ງໄດ້ເວົ້າວ່າ, “ພຣະເຈົ້າຢາເວໄດ້ກ່າວໄວ້ວ່າພຣະອົງຈະຢູ່ໃນເມກມືດ; ຂ້ານ້ອຍໄດ້ສ້າງວິຫານອັນສະຫງ່າງາມສໍາລັບພຣະອົງ, ເຊິ່ງເປັນບ່ອນທີ່ພຣະອົງຈະສະຖິດຢູ່ຕະຫລອດໄປ”.
ໃນຂະນະທີ່ປະຊາຊົນອິດສະຣາເອນກຳລັງຢືນຢູ່ທີ່ນັ້ນ, ກະສັດໂຊໂລໂມນໄດ້ຫັນກັບມາກ່າວອວຍພອນພວກເຂົາ. ແລ້ວເພິ່ນໄດ້ກ່າວວ່າ:
“ຈົ່ງສັນລະເສີນພຣະເຈົ້າຢາເວ, ພຣະເຈົ້າແຫ່ງອິດສະຣາເອນ, ຜູ້ທີ່ໄດ້ເຮັດໃຫ້ຄໍາສັນຍາສໍາເລັດເປັນຈິງຕາມທີ່ໄດ້ເຮັດໄວ້ກັບດາວິດພໍ່ຂອງຂ້ານ້ອຍດ້ວຍຖ້ອຍຄໍາຂອງພຣະອົງເອງ. ເພາະພຣະອົງໄດ້ກ່າວວ່າ, ‘ຕັ້ງແຕ່ເວລານັ້ນທີ່ເຮົານຳປະຊາຊົນຂອງເຮົາອອກມາຈາກເອຢິບ, ເຮົາບໍ່ໄດ້ເລືອກເມືອງໜຶ່ງຂອງເຜົ່າໃດໆຂອງອິດສະຣາເອນໃນການສ້າງວິຫານເພື່ອວ່ານາມຂອງເຮົາຈະຢູ່ທີ່ນັ້ນ ຫລື ບໍ່ໄດ້ເລືອກເອົາຜູ້ໃດຂຶ້ນມາເປັນຜູ້ນຳປົກຄອງປະຊາຊົນອິດສະຣາເອນຂອງເຮົາ. ແຕ່ບັດນີ້ເຮົາໄດ້ເລືອກເອົາເຢຣູຊາເລັມເພື່ອນາມຂອງເຮົາຈະຢູ່ທີ່ນັ້ນ ແລະ ເຮົາໄດ້ເລືອກດາວິດໃຫ້ປົກຄອງປະຊາຊົນອິດສະຣາເອນຂອງເຮົາ’.
“ດາວິດພໍ່ຂອງຂ້າພະເຈົ້າຕັ້ງໃຈຈະສ້າງວິຫານຖວາຍແກ່ນາມພຣະເຈົ້າຢາເວ ພຣະເຈົ້າແຫ່ງອິດສະຣາເອນ. ແຕ່ພຣະເຈົ້າຢາເວໄດ້ກ່າວກັບດາວິດພໍ່ຂອງຂ້າພະເຈົ້າວ່າ, ‘ທີ່ເຈົ້າມີໃຈຈະສ້າງວິຫານເພື່ອນາມຂອງເຮົານັ້ນກໍດີຢູ່ແລ້ວ. ເຖິງຢ່າງໃດກໍ່ຕາມ, ເຈົ້າຈະບໍ່ໄດ້ເປັນຜູ້ສ້າງວິຫານ ແຕ່ລູກຊາຍຜູ້ເປັນເລືອດເນື້ອເຊື້ອໄຂຂອງເຈົ້າຈະເປັນຜູ້ສ້າງວິຫານເພື່ອນາມຂອງເຮົາ’.
“ພຣະເຈົ້າຢາເວໄດ້ເຮັດຕາມສັນຍາ ຄືໃຫ້ຂ້າພະເຈົ້າໄດ້ນັ່ງບັນລັງແຫ່ງອິດສະຣາເອນສືບຕໍ່ຈາກດາວິດຜູ້ເປັນພໍ່ຂອງຂ້າພະເຈົ້າ ຕາມທີ່ພຣະເຈົ້າຢາເວໄດ້ໄດ້ສັນຍາໄວ້ ແລະ ຂ້າພະເຈົ້າໄດ້ສ້າງວິຫານນີ້ເພື່ອນາມຂອງພຣະເຈົ້າຢາເວ ພຣະເຈົ້າແຫ່ງອິດສະຣາເອນ. ຂ້າພະເຈົ້າໄດ້ວາງຫີບຄຳໝັ້ນສັນຍາໄວ້ຢູ່ທີ່ນັ້ນ, ເຊິ່ງເປັນຫີບຄຳໝັ້ນສັນຍາຂອງພຣະເຈົ້າຢາເວທີ່ພຣະອົງໄດ້ເຮັດໄວ້ກັບປະຊາຊົນອິດສະຣາເອນ”.
ຄໍາອະທິຖານຂອງການອຸທິດຖວາຍວິຫານຂອງໂຊໂລໂມນ
(1ກສ 8:22-53; ພສສ 132:8-10)
ແລ້ວໂຊໂລໂມນກໍຢືນຂຶ້ນຢູ່ໜ້າແທ່ນບູຊາຂອງພຣະເຈົ້າຢາເວຢູ່ຕໍ່ໜ້າປະຊາຊົນອິດສະຣາເອນທັງໝົດທີ່ມາຊຸມນຸມກັນ ແລະ ເພິ່ນຍົກມືຂຶ້ນອະທິຖານ. ບັດນີ້ ໂຊໂລໂມນໄດ້ເຮັດເວທີທອງສຳລິດຍາວຫ້າສອກ, ກວ້າງຫ້າສອກ1 ແລະ ສູງສາມສອກ2 ແລະ ໄດ້ວາງມັນໄວ້ກາງເດີນດ້ານນອກ. ເພິ່ນໄດ້ຂຶ້ນໄປທີ່ເທິງເວທີນັ້ນ ແລະ ກໍຄຸເຂົ່າລົງຕໍ່ໜ້າປະຊາຊົນອິດສະຣາເອນທັງໝົດທີ່ມາຊຸມນຸມກັນ ແລ້ວເພິ່ນກໍຍົກມືຂຶ້ນສູ່ຟ້າສະຫວັນ. ເພິ່ນໄດ້ກ່າວວ່າ:
“ຂ້າແດ່ພຣະເຈົ້າຢາເວ, ພຣະເຈົ້າແຫ່ງອິດສະຣາເອນ, ບໍ່ມີພະໃດເໝືອນພຣະອົງທັງໃນຟ້າສະຫວັນ ຫລື ແຜ່ນດິນໂລກ ພຣະອົງຜູ້ຮັກສາຄໍາໝັ້ນສັນຍາແຫ່ງຄວາມຮັກຂອງພຣະອົງຕໍ່ບັນດາຜູ້ຮັບໃຊ້ຂອງພຣະອົງຄື ຜູ້ທີ່ຍັງດຳເນີນຊີວິດໃນທາງຂອງພຣະອົງຢ່າງສຸດໃຈ. ພຣະອົງໄດ້ຮັກສາຄຳສັນຍາຕໍ່ຜູ້ຮັບໃຊ້ຂອງພຣະອົງຄື ດາວິດພໍ່ຂອງຂ້ານ້ອຍ; ພຣະອົງໄດ້ສັນຍາດ້ວຍປາກຂອງພຣະອົງ ແລະ ໄດ້ເຮັດໃຫ້ສຳເລັດດ້ວຍມືຂອງພຣະອົງເໝືອນດັ່ງທຸກວັນນີ້.
“ບັດນີ້ ຂ້າແດ່ພຣະເຈົ້າຢາເວ, ພຣະເຈົ້າແຫ່ງອິດສະຣາເອນ, ຂໍຮັກສາຄຳໝັ້ນສັນຍາທີ່ມີຕໍ່ດາວິດຜູ້ຮັບໃຊ້ຂອງພຣະອົງ ຜູ້ເປັນພໍ່ຂອງຂ້ານ້ອຍເມື່ອພຣະອົງໄດ້ກ່າວວ່າ, ‘ຖ້າເຊື້ອສາຍຂອງເຈົ້າລະມັດລະວັງໃນທຸກສິ່ງທີ່ພວກເຂົາປະຕິບັດຢູ່ຕໍ່ໜ້າເຮົາຕາມກົດບັນຍັດຂອງເຮົາ, ດັ່ງທີ່ເຈົ້າໄດ້ປະຕິບັດມານັ້ນ ເຈົ້າຈະບໍ່ຂາດຜູ້ສືບທອດທີ່ຈະນັ່ງຕໍ່ໜ້າເຮົາເທິງບັນລັງຂອງອິດສະຣາເອນ’. ແລະ ບັດນີ້ ຂ້າແດ່ພຣະເຈົ້າຢາເວ, ພຣະເຈົ້າແຫ່ງອິດສະຣາເອນ, ຂໍໂຜດໃຫ້ຄໍາສັນຍາຂອງພຣະອົງທີ່ໄດ້ເຮັດໄວ້ກັບດາວິດຜູ້ຮັບໃຊ້ຂອງພຣະອົງເກີດເປັນຈິງດ້ວຍ.
“ແຕ່ພຣະເຈົ້າຈະສະຖິດຢູ່ເທິງແຜ່ນດິນໂລກຮ່ວມກັບມະນຸດໄດ້ບໍ? ແມ່ນແຕ່ຟ້າສະຫວັນທີ່ສູງສຸດກໍບໍ່ສາມາດຮັບພຣະອົງໄດ້. ວິຫານທີ່ຂ້ານ້ອຍໄດ້ສ້າງນີ້ຈະຍິ່ງນ້ອຍຫລາຍກວ່າເທົ່າໃດ! ແຕ່ຂ້າແດ່ພຣະເຈົ້າຢາເວ ພຣະເຈົ້າຂອງຂ້ານ້ອຍ, ຂໍໂຜດຟັງຄຳອະທິຖານຂອງຜູ້ຮັບໃຊ້ຂອງພຣະອົງ ແລະ ຟັງຄຳອ້ອນວອນຂໍຄວາມເມດຕາຂອງລາວ. ຂໍໂຜດຟັງຄຳຮ້ອງຂໍ ແລະ ຄໍາອະທິຖານທີ່ຜູ້ຮັບໃຊ້ຂອງພຣະອົງກຳລັງອະທິຖານຕໍ່ພຣະອົງໃນວັນນີ້. ຂໍໃຫ້ຕາຂອງພຣະອົງເບິ່ງມາທີ່ວິຫານນີ້ທັງກາງເວັນ ແລະ ກາງຄືນ, ນີ້ເປັນບ່ອນທີ່ພຣະອົງໄດ້ກ່າວວ່າ ພຣະອົງຈະຕັ້ງນາມຂອງພຣະອົງໄວ້ຢູ່ທີ່ນັ້ນ. ຂໍພຣະອົງໂຜດຟັງຄໍາອະທິຖານຂອງຜູ້ຮັບໃຊ້ຂອງພຣະອົງທີ່ອະທິຖານຕໍ່ສະຖານທີ່ນີ້. ເມື່ອຜູ້ຮັບໃຊ້ ແລະ ປະຊາຊົນອິດສະຣາເອນຂອງພຣະອົງອະທິຖານກົງໄປທີ່ສະຖານທີ່ແຫ່ງນີ້ ຂໍໂຜດຟັງຈາກຟ້າສະຫວັນອັນເປັນບ່ອນຢູ່ຂອງພຣະອົງ ແລະ ເມື່ອພຣະອົງຟັງແລ້ວ ຂໍໂຜດຍົກໂທດ.
“ເມື່ອຜູ້ໃດເຮັດຜິດຕໍ່ເພື່ອນບ້ານຂອງຕົນ ແລະ ຕ້ອງສາບານ ແລະ ພວກເຂົາມາຫາແລ້ວສາບານຢູ່ຕໍ່ໜ້າແທ່ນບູຊາໃນວິຫານນີ້, ຂໍໂຜດຟັງຈາກຟ້າສະຫວັນ ແລະ ພິຈາລະນາ. ຂໍຕັດສິນຄວາມລະຫວ່າງຜູ້ຮັບໃຊ້ທັງຫລາຍຂອງພຣະອົງ, ຂໍລົງໂທດຄົນຜິດ ແລະ ໃຫ້ສິ່ງທີ່ພວກເຂົາໄດ້ເຮັດນັ້ນຕົກໃສ່ໂຕພວກເຂົາເອງ ແລະ ສ່ວນຜູ້ບໍລິສຸດຂໍພຣະອົງປະກາດວ່າພວກເຂົາບໍ່ຜິດ ເປັນອັນພິສູດແລ້ວວ່າພວກເຂົາເປັນຜູ້ບໍລິສຸດ.
“ເມື່ອປະຊາຊົນອິດສະຣາເອນຂອງພຣະອົງເຮັດບາບຕໍ່ພຣະອົງ ແລະ ຖືກສັດຕູມາຢຶດຄອງ, ຖ້າພວກເຂົາໄດ້ຫັນກັບຄືນມາຫາພຣະອົງ ແລະ ສັນລະເສີນນາມຂອງພຣະອົງ, ອະທິຖານ ແລະ ອ້ອນວອນຕໍ່ພຣະອົງໃນວິຫານແຫ່ງນີ້, ຂໍໂຜດຟັງຈາກຟ້າສະຫວັນ ແລະ ໂຜດອະໄພການບາບຂອງປະຊາຊົນອິດສະຣາເອນຂອງພຣະອົງ ແລະ ນຳພວກເຂົາກັບມາທີ່ດິນແດນທີ່ພຣະອົງໄດ້ມອບໃຫ້ແກ່ພວກເຂົາ ແລະ ບັນພະບຸລຸດຂອງພວກເຂົາ.
“ເມື່ອທ້ອງຟ້າຖືກປິດ ແລະ ບໍ່ມີຝົນເພາະປະຊາຊົນຂອງພຣະອົງໄດ້ເຮັດບາບຕໍ່ພຣະອົງ ແລະ ເມື່ອພວກເຂົາອະທິຖານຕໍ່ສະຖານທີ່ແຫ່ງນີ້ ແລະ ສັນລະເສີນນາມຂອງພຣະອົງ ແລະ ຫັນກັບຈາກບາບຂອງຕົນເພາະພຣະອົງໄດ້ລົງໂທດພວກເຂົາແລ້ວ, ຂໍໂຜດຟັງຈາກຟ້າສະຫວັນ ແລະ ອະໄພບາບຂອງຜູ້ຮັບໃຊ້ຂອງພຣະອົງ, ປະຊາຊົນອິດສະຣາເອນຂອງພຣະອົງ. ຂໍໂຜດສອນວິຖີທາງດຳເນີນຊີວິດທີ່ຖືກຕ້ອງ ແລະ ໃຫ້ຝົນແກ່ດິນແດນທີ່ພຣະອົງໄດ້ມອບໃຫ້ເປັນມໍລະດົກຂອງປະຊາຊົນພຣະອົງ.
“ຖ້າເກີດການອຶດຢາກອາຫານ ຫລື ພະຍາດລະບາດໃນດິນແດນ ຫລື ພະຍາດພືດ ຫລື ພະຍາດລານ້ຳຄ້າງ ຫລື ຕັກແຕນບຸກມາທຳລາຍ ຫລື ສັດຕູທັງຫລາຍມາລ້ອມເມືອງ, ບໍ່ວ່າຈະເປັນພະຍາດ ຫລື ໄພພິບັດໃດກໍຕາມທີ່ເກີດຂຶ້ນ. ແລະ ເມື່ອມີຄຳອະທິຖານ ຫລື ຄຳອ້ອນວອນຈາກຜູ້ໃດຜູ້ໜຶ່ງໃນທ່າມກາງປະຊາຊົນອິດສະຣາເອນຂອງພຣະອົງ ເຊິ່ງແຕ່ລະຄົນຮູ້ເຖິງຄວາມທຸກໃຈຂອງຕົນດີ ແລະ ຍົກມືຂອງຕົນຂຶ້ນຕໍ່ວິຫານແຫ່ງນີ້ ຂໍໂຜດຟັງຈາກຟ້າສະຫວັນຄື ບ່ອນຢູ່ຂອງພຣະອົງ. ຂໍໂຜດໃຫ້ອະໄພ ແລະ ຈັດການກັບທຸກຄົນຕາມສິ່ງທີ່ພວກເຂົາໄດ້ກະທໍາ. ເນື່ອງຈາກພຣະອົງຮູ້ຈັກຈິດໃຈຂອງພວກເຂົາ (ເພາະພຣະອົງເທົ່ານັ້ນຮູ້ຈິດໃຈຂອງມະນຸດ). ເພື່ອວ່າພວກເຂົາຈະຢຳເກງພຣະອົງ ແລະ ເຊື່ອຟັງພຣະອົງຢູ່ຕະຫລອດເວລາທີ່ພວກເຂົາອາໄສຢູ່ໃນດິນແດນທີ່ພຣະອົງໄດ້ມອບໃຫ້ແກ່ບັນພະບຸລຸດຂອງພວກຂ້ານ້ອຍ.
“ສ່ວນຄົນຕ່າງຊາດທີ່ບໍ່ແມ່ນປະຊາຊົນອິດສະຣາເອນຂອງພຣະອົງ ແຕ່ໄດ້ມາຈາກແດນດິນຫ່າງໄກ ຍ້ອນນາມອັນຍິ່ງໃຫຍ່ ແລະ ມືອັນມີລິດອໍານາດຍິ່ງໃຫຍ່ຂອງພຣະອົງ ແລະ ແຂນຂອງພຣະອົງທີ່ໄດ້ຢຽດອອກມາ ເມື່ອພວກເຂົາມາອະທິຖານທີ່ວິຫານນີ້, ຂໍໂຜດຟັງຈາກຟ້າສະຫວັນບ່ອນຢູ່ຂອງພຣະອົງ. ຂໍຕອບຄຳອະທິຖານທີ່ຄົນຕ່າງຊາດທີ່ໄດ້ທູນຂໍຕໍ່ພຣະອົງ, ເພື່ອວ່າປະຊາຊົນໃນໂລກຈະຮູ້ຈັກນາມຂອງພຣະອົງ ແລະ ຢຳເກງພຣະອົງເໝືອນດັ່ງກັບປະຊາຊົນອິດສະຣາເອນພຣະອົງເອງ ແລະ ຈະຮູ້ວ່າຂ້ານ້ອຍໄດ້ສ້າງວິຫານນີ້ຂຶ້ນເພື່ອປະກາດນາມຂອງພຣະອົງ.
“ເມື່ອພຣະອົງໃຊ້ປະຊາຊົນຂອງພຣະອົງອອກໄປສູ້ຮົບກັບສັດຕູ ບໍ່ວ່າຢູ່ບ່ອນໃດທີ່ພຣະອົງສົ່ງພວກເຂົາໄປ ແລະ ເມື່ອພວກເຂົາອະທິຖານຕໍ່ພຣະເຈົ້າຢາເວ ມຸ່ງໜ້າມາທີ່ນະຄອນນີ້ທີ່ພຣະອົງໄດ້ເລືອກໄວ້ ແລະ ທີ່ວິຫານແຫ່ງນີ້ ເຊິ່ງຂ້ານ້ອຍສ້າງຂຶ້ນເພື່ອນາມຂອງພຣະອົງ, ຂໍໂຜດຟັງຄຳອະທິຖານ ແລະ ຄຳອ້ອນວອນຂອງພວກເຂົາຈາກຟ້າສະຫວັນ ແລະ ຂໍໂຜດຊ່ວຍເຫລືອພວກເຂົາດ້ວຍ.
“ເມື່ອພວກເຂົາເຮັດບາບຕໍ່ພຣະອົງ ເພາະບໍ່ມີຜູ້ໃດທີ່ບໍ່ເຮັດບາບເລີຍ ແລ້ວພຣະອົງຈຶ່ງໃຈຮ້າຍໃຫ້ກັບພວກເຂົາ ແລະ ມອບພວກເຂົາໄວ້ກັບສັດຕູຂອງພວກເຂົາ, ຜູ້ທີ່ເອົາໄປເປັນຊະເລີຍທີ່ດິນແດນຫ່າງໄກ ຫລື ໃກ້ກໍຕາມ; ແລະ ຖ້າພວກເຂົາປ່ຽນໃຈໃນດິນແດນທີ່ພວກເຂົາເປັນຊະເລີຍ ແລະ ກັບໃຈແລ້ວອ້ອນວອນຕໍ່ພຣະອົງໃນດິນແດນຂອງຜູ້ທີ່ຈັບພວກເຂົາເປັນຊະເລີຍນັ້ນ ແລະ ເວົ້າວ່າ ‘ພວກຂ້ານ້ອຍໄດ້ເຮັດບາບ, ພວກຂ້ານ້ອຍຜິດໄປແລ້ວ, ພວກຂ້ານ້ອຍໄດ້ປະພຶດຊົ່ວ’; ແລະ ຖ້າພວກເຂົາຫັນກັບຄືນມາຫາພຣະອົງຢ່າງສຸດຈິດ ແລະ ສຸດໃຈຂອງພວກເຂົາໃນແດນດິນທີ່ພວກເຂົາຖືກຈັບໄປເປັນຊະເລີຍ ແລະ ອະທິຖານປິ່ນໜ້າໃສ່ດິນແດນທີ່ພຣະອົງມອບໃຫ້ແກ່ບັນພະບຸລຸດຂອງພວກເຂົາ, ປິ່ນໜ້າໃສ່ເມືອງທີ່ພຣະອົງໄດ້ເລືອກໄວ້ ແລະ ປິ່ນໜ້າໃສ່ວິຫານທີ່ຂ້ານ້ອຍໄດ້ສ້າງຂຶ້ນເພື່ອນາມຂອງພຣະອົງ; ຂໍໂຜດຟັງຄຳອະທິຖານ ແລະ ຄຳອ້ອນວອນຂອງພວກເຂົາຈາກຟ້າສະຫວັນ, ເຊິ່ງເປັນບ່ອນຢູ່ຂອງພຣະອົງ, ແລະ ຂໍໂຜດຊ່ວຍເຫລືອພວກເຂົາ. ແລະ ອະໄພໃຫ້ແກ່ປະຊາຊົນຂອງພຣະອົງ, ຜູ້ທີ່ໄດ້ເຮັດບາບຕໍ່ພຣະອົງດ້ວຍ.
“ບັດນີ້, ຂ້າແດ່ພຣະເຈົ້າຂອງຂ້ານ້ອຍ, ຂໍໂຜດຫລຽວເບິ່ງ ແລະ ງ່ຽງຫູຟັງຄຳພາວັນນາອະທິຖານທີ່ຂ້ານ້ອຍອຸທິດຖວາຍໃນບ່ອນນີ້ດ້ວຍ.
“ບັດນີ້ ຂ້າແດ່ພຣະເຈົ້າຢາເວ ພຣະເຈົ້າ ຂໍໂຜດລຸກຂຶ້ນ ແລະ ມາຍັງບ່ອນຢູ່ຂອງພຣະອົງ,
ທັງພຣະອົງ ແລະ ຫີບຄຳໝັ້ນສັນຍາແຫ່ງລິດອຳນາດຂອງພຣະອົງ.
ຂ້າແດ່ພຣະເຈົ້າຢາເວ ພຣະເຈົ້າ, ຂໍໃຫ້ບັນດາປະໂລຫິດຂອງພຣະອົງສວມຄວາມພົ້ນຂອງພຣະອົງ,
ຂໍໃຫ້ປະຊາຊົນທີ່ສັດຊື່ຂອງພຣະອົງຊົມຊື່ນຍິນດີໃນພຣະຄຸນຄວາມດີຂອງພຣະອົງ.
ຂ້າແດ່ພຣະເຈົ້າຢາເວ ພຣະເຈົ້າ, ຂໍຢ່າໄດ້ປະຕິເສດຜູ້ທີ່ພຣະອົງໄດ້ເຈີມໄວ້.
ຂໍໂຜດລະນຶກເຖິງຄວາມຮັກອັນຍິ່ງໃຫຍ່ທີ່ໄດ້ສັນຍາໄວ້ກັບດາວິດຜູ້ຮັບໃຊ້ຂອງພຣະອົງ”.
Source notes (2)
- Footnote ຄື ປະມານ 2,3 ແມັດ
- Footnote ຄື ປະມານ 1,3 ແມັດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.