Biblica® Open Lao Contemporary Version
2 ຂ່າວຄາວ 5
ເມື່ອວຽກງານທັງໝົດສຳລັບວິຫານຂອງພຣະເຈົ້າຢາເວສຳເລັດຮຽບຮ້ອຍແລ້ວ, ເພິ່ນກໍໄດ້ນຳເງິນ, ຄຳ ແລະ ເຄື່ອງໃຊ້ຕ່າງໆ, ເຊິ່ງດາວິດຜູ້ເປັນພໍ່ຂອງເພິ່ນໄດ້ຖວາຍໄວ້ ແລ້ວເພິ່ນກໍໄດ້ເກັບໄວ້ໃນຄັງວິຫານຂອງພຣະເຈົ້າ.
ຫີບພັນທະສັນຍາຖືກນໍາເຂົ້າໃນວິຫານ
(1ກສ 8:1-21)
ແລ້ວໂຊໂລໂມນກໍເອີ້ນບັນດາຜູ້ອາວຸໂສທັງໝົດຂອງອິດສະຣາເອນ, ຫົວໜ້າເຜົ່າທັງໝົດ ແລະ ຫົວໜ້າຄອບຄົວທັງໝົດຂອງຊາວອິດສະຣາເອນມາທີ່ເຢຣູຊາເລັມ, ເພື່ອນຳຫີບພັນທະສັນຍາຂອງພຣະເຈົ້າຢາເວຈາກພູເຂົາຊີໂອນ, ເມືອງຂອງດາວິດ. ແລ້ວຜູ້ຊາຍອິດສະຣາເອນທັງໝົດກໍພ້ອມກັນມາພົບກະສັດໃນຊ່ວງເທດສະການໃນເດືອນທີເຈັດ.
ເມື່ອຜູ້ອາວຸໂສທັງໝົດຂອງອິດສະຣາເອນມາຮອດແລ້ວ, ພວກຊາວເລວີກໍຍົກຫີບຄຳໝັ້ນສັນຍາຂຶ້ນ, ແລະ ພວກເຂົາໄດ້ນໍາຫີບຄຳໝັ້ນສັນຍາ ແລະ ເຕັນນັດພົບ ແລະ ເຄື່ອງໃຊ້ສັກສິດທັງໝົດມາທີ່ວິຫານ. ບັນດາປະໂລຫິດຊາວເລວີກໍໄດ້ຫາມຂຶ້ນໄປທີ່ວິຫານ; ແລະ ກະສັດໂຊໂລໂມນ ແລະ ປະຊາຊົນອິດສະຣາເອນທັງໝົດທີ່ໄດ້ຊຸມນຸມກັນກັບເພິ່ນຕໍ່ໜ້າຫີບຄໍາໝັ້ນສັນຍາໄດ້ຖວາຍແກະ ແລະ ງົວເປັນເຄື່ອງບູຊາຈຳນວນຫລວງຫລາຍຈົນພວກເຂົາບໍ່ສາມາດບັນທຶກໄດ້ ຫລື ບໍ່ສາມາດນັບໄດ້.
ຫລັງຈາກນັ້ນ ປະໂລຫິດກໍນຳຫີບຄຳໝັ້ນສັນຍາຂອງພຣະເຈົ້າຢາເວເຂົ້າສູ່ສະຖານນະມັດສະການຊັ້ນໃນຂອງວິຫານຄືບ່ອນທີ່ສັກສິດທີ່ສຸດ ແລະ ຕັ້ງໄວ້ໃຕ້ປີກຂອງເຄຣຸບ. ເຄຣຸບພືປີກອອກປົກຄຸມເໜືອບ່ອນທີ່ຫີບຄໍາໝັ້ນສັນຍາຢູ່ ແລະ ປົກຄຸມເໜືອຫີບກັບໄມ້ຄານຫາມ. ໄມ້ຄານຫາມເຫລົ່ານີ້ຍາວຫລາຍໂດຍເດ່ອອກມາຈາກຫີບ, ເຊິ່ງເບິ່ງເຫັນໄດ້ຈາກທາງດ້ານຂອງຫ້ອງຊັ້ນໃນບ່ອນສັກສິດ, ແຕ່ເບິ່ງບໍ່ເຫັນຈາກດ້ານນອກຂອງບ່ອນສັກສິດ ແລະ ໄມ້ຄານຫາມກໍຍັງຢູ່ທີ່ນັ້ນຈົນເຖິງທຸກວັນນີ້. ໃນຫີບນັ້ນບໍ່ມີສິ່ງໃດນອກຈາກສີລາສອງແຜ່ນທີ່ໂມເຊໄດ້ໃສ່ໄວ້ເມື່ອເວລາຢູ່ທີ່ພູເຂົາໂຮເຣັບ ບ່ອນທີ່ພຣະເຈົ້າຢາເວເຮັດຄຳໝັ້ນສັນຍາກັບຊົນຊາດອິດສະຣາເອນຫລັງຈາກພວກເຂົາອອກມາຈາກເອຢິບ.
ແລ້ວບັນດາປະໂລຫິດຈຶ່ງອອກມາຈາກບ່ອນສັກສິດ. ບັນດາປະໂລຫິດທັງໝົດທີ່ຢູ່ໃນທີ່ນັ້ນໄດ້ຊຳລະຕົນເອງໃຫ້ບໍລິສຸດ, ບໍ່ວ່າພວກຕົນຈະປະຈຳຢູ່ໝວດໃດກໍຕາມ. ຊາວເລວີທັງໝົດຜູ້ທີ່ເປັນນັກດົນຕີເຊັ່ນ: ອາສັບ, ເຮມານ ແລະ ເຢດູທູນ ແລະ ພວກລູກຊາຍຂອງພວກເຂົາ ແລະ ຍາດຕິພີ່ນ້ອງຂອງພວກເຂົາໂດຍຢືນຢູ່ທາງດ້ານຕາເວັນອອກຂອງແທ່ນບູຊາ, ພວກເຂົາກໍໄດ້ນຸ່ງຜ້າປ່ານເນື້ອລະອຽດດີ, ແລ້ວກໍຕົບແສ່ງ, ຕິດພິນໃຫຍ່ ແລະ ດີດພິນນ້ອຍ. ພວກເຂົາກໍຮ່ວມກັນກັບບັນດາປະໂລຫິດ 120 ຄົນເປົ່າແກປະສານສຽງກັນ. ພວກເປົ່າແກ ແລະ ນັກດົນຕີໄດ້ປະສານເປັນສຽງດຽວກັນເພື່ອຖວາຍຄໍາສັນລະເສີນ ແລະ ໂມທະນາຂອບພຣະຄຸນແກ່ພຣະເຈົ້າຢາເວ. ພ້ອມທັງປະສານສຽງແກ, ແສ່ງ ແລະ ເຄື່ອງດົນຕີອື່ນໆ, ພວກນັກຮ້ອງໄດ້ເປັ່ງສຽງຂອງຕົນສັນລະເສີນພຣະເຈົ້າຢາເວ ແລະ ຮ້ອງວ່າ:
“ພຣະອົງແສນດີ;
ຄວາມຮັກໝັ້ນຄົງຂອງພຣະອົງດຳລົງຕະຫລອດໄປເປັນນິດ”.
ແລ້ວວິຫານຂອງພຣະເຈົ້າຢາເວກໍມີເມກປົກຄຸມເຕັມໄປທົ່ວ, ບັນດາປະໂລຫິດບໍ່ອາດປະຕິບັດໜ້າທີ່ຂອງຕົນໄດ້ເພາະເມກນັ້ນ, ເນື່ອງຈາກສະຫງ່າລາສີຂອງພຣະເຈົ້າຢາເວໄດ້ປົກຄຸມຢູ່ທົ່ວທັງວິຫານຂອງພຣະອົງ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.