Biblica® Open Lao Contemporary Version
2 ຂ່າວຄາວ 36
ແລະ ປະຊາຊົນທົ່ວດິນແດນໄດ້ເລືອກເຢໂຮອາຮາດລູກຊາຍຂອງໂຢສີຢາ ແລະ ໃຫ້ເພິ່ນຂຶ້ນເປັນກະສັດໃນເຢຣູຊາເລັມແທນພໍ່ຂອງເພິ່ນ.
ກະສັດເຢໂຮອາຮາດແຫ່ງຢູດາ
(2ກສ 23:31-34)
ເມື່ອເຢໂຮອາຮາດໄດ້1ຂຶ້ນເປັນກະສັດ ເພິ່ນມີອາຍຸຊາວສາມປີ ແລະ ໄດ້ປົກຄອງຢູ່ໃນເຢຣູຊາເລັມສາມເດືອນ. ກະສັດເອຢິບໄດ້ປົດເພິ່ນອອກຈາກບັນລັງໃນເຢຣູຊາເລັມ ແລະ ບັງຄັບຢູດາຍໃຫ້ເສຍພາສີເປັນຈໍານວນເງິນ 100 ຕາລັນຕົນ2 ແລະ ຄຳ 100 ຕາລັນຕົນ3. ກະສັດເອຢິບໄດ້ແຕ່ງຕັ້ງເຈົ້າເອລີອາກິມ ນ້ອງຊາຍຂອງເຢໂຮອາຮາດຂຶ້ນເປັນກະສັດປົກຄອງເໜືອຢູດາຍ ແລະ ເຢຣູຊາເລັມ ແລ້ວໄດ້ປ່ຽນຊື່ຂອງເອລີອາກິມເປັນເຢໂຮຍອາກິມ. ແຕ່ເນໂກໄດ້ນຳຕົວເຢໂຮອາຮາດທີ່ເປັນອ້າຍຂອງເອລີອາກິມໄປທີ່ເອຢິບ.
ກະສັດເຢໂຮຍອາກິມແຫ່ງຢູດາຍ
(2ກສ 23:36–24:6)
ເມື່ອເຢໂຮຍອາກິມໄດ້ຂຶ້ນເປັນກະສັດ ເພິ່ນມີອາຍຸຊາວຫ້າປີ ແລະ ໄດ້ປົກຄອງຢູ່ໃນເຢຣູຊາເລັມເປັນເວລາສິບເອັດປີ. ເພິ່ນໄດ້ເຮັດສິ່ງທີ່ຊົ່ວຮ້າຍໃນສາຍຕາຂອງພຣະເຈົ້າຢາເວ ພຣະເຈົ້າຂອງເພິ່ນ. ກະສັດເນບູກາດເນັດຊາແຫ່ງບາບີໂລນໄດ້ມາໂຈມຕີເພິ່ນ ແລະ ຈັບເຢໂຮຍອາກິມມັດດ້ວຍໂສ້ທອງສຳລິດພ້ອມກັບນຳເອົາໂຕເພິ່ນໄປທີ່ບາບີໂລນ. ເນບູກາດເນັດຊາຍັງໄດ້ເອົາເຄື່ອງໃຊ້ຕ່າງໆຈາກວິຫານຂອງພຣະເຈົ້າຢາເວໄປ ແລະ ເອົາໄປເກັບໄວ້ໃນວິຫານ4ຂອງຕົນໃນບາບີໂລນດ້ວຍ.
ເຫດການອື່ນໆກ່ຽວກັບການປົກຄອງຂອງເຢໂຮຍອາກິມ, ສິ່ງທີ່ໜ້າກຽດໜ້າຊັງທີ່ເພິ່ນໄດ້ເຮັດ ແລະ ການກະທໍາອັນຊົ່ວຮ້າຍທັງໝົດທີ່ກ່ຽວກັບເພິ່ນ, ແມ່ນມີບັນທຶກໄວ້ໃນປື້ມປະຫວັດສາດຂອງບັນດາກະສັດແຫ່ງອິດສະຣາເອນ ແລະ ຢູດາຍ. ແລ້ວເຢໂຮຍອາກິນລູກຊາຍຂອງເພິ່ນກໍໄດ້ຂຶ້ນປົກຄອງແທນເພິ່ນ.
ກະສັດເຢໂຮຍອາກິນແຫ່ງຢູດາຍ
(2ກສ 24:8-17)
ເມື່ອເຢໂຮຍອາກິນໄດ້ຂຶ້ນເປັນກະສັດ ເພິ່ນມີອາຍຸສິບແປດປີ5 ແລະ ໄດ້ປົກຄອງຢູ່ໃນເຢຣູຊາເລັມເປັນເວລາສາມເດືອນກັບສິບວັນ. ເພິ່ນໄດ້ເຮັດສິ່ງທີ່ຊົ່ວຮ້າຍໃນສາຍຕາຂອງພຣະເຈົ້າຢາເວ ໃນລະດູໃບໄມ້ປົ່ງ ກະສັດເນບູກາດເນັດຊາກໍໄດ້ນຳເອົາເຢໂຮຍອາກິມ, ພ້ອມທັງເອົາເຄື່ອງໃຊ້ຕ່າງໆຈາກວິຫານຂອງພຣະເຈົ້າຢາເວຄືນໄປທີ່ບາບີໂລນ ແລະ ເພິ່ນໄດ້ໃຫ້ລຸງ6ຂອງເຢໂຮຍອາກິນ ຄືເຊເດກີຢາຂຶ້ນເປັນກະສັດປົກຄອງຢູດາຍ ແລະ ເຢຣູຊາເລັມ.
ກະສັດເຊເດກີຢາແຫ່ງຢູດາຍ
(2ກສ 24:18-20; ຢມຢ 52:1-3)
ເມື່ອເຊເດກີຢາໄດ້ຂຶ້ນເປັນກະສັດ ເພິ່ນມີອາຍຸຊາວເອັດປີ ແລະ ໄດ້ປົກຄອງຢູ່ໃນເຢຣູຊາເລັມເປັນເວລາສິບເອັດປີ. ເພິ່ນໄດ້ເຮັດສິ່ງທີ່ຊົ່ວຮ້າຍໃນສາຍຕາຂອງພຣະເຈົ້າຢາເວ ພຣະເຈົ້າຂອງເພິ່ນ ແລະ ບໍ່ໄດ້ຖ່ອມຕົວລົງຕໍ່ໜ້າຜູ້ທຳນວາຍເຢເຣມີຢາ ເຊິ່ງເປັນຜູ້ທີ່ກ່າວຖ້ອຍຄໍາຂອງພຣະເຈົ້າຢາເວ. ເຊເດກີຢາຍັງໄດ້ກະບົດຕໍ່ກະສັດເນບູກາດເນັດຊາ ຜູ້ທີ່ໄດ້ໃຫ້ເພິ່ນປະຕິຍານໃນນາມຂອງພຣະເຈົ້າ. ເຊເດກີຢາໄດ້ກາຍຄົນໃຈແຂງ ແລະ ດື້ດ້ານ ແລະ ບໍ່ຍອມຄືນມາຫາພຣະເຈົ້າຢາເວ ພຣະເຈົ້າແຫ່ງອິດສະຣາເອນ. ຍິ່ງໄປກວ່ານັ້ນ ຜູ້ນຳທັງໝົດຂອງປະໂລຫິດ ແລະ ຂອງປະຊາຊົນກໍບໍ່ສັດຊື່ຕໍ່ພຣະເຈົ້າຫລາຍຂຶ້ນ, ໂດຍຫັນໄປປະຕິບັດຕາມທຳນຽມອັນໜ້າກຽດໜ້າຊັງຂອງຊົນຊາດຕ່າງໆ ແລະ ສ້າງມົນທິນໃຫ້ວິຫານຂອງພຣະເຈົ້າຢາເວ ເຊິ່ງພຣະເຈົ້າໄດ້ຊຳລະໃຫ້ບໍລິສຸດແລ້ວຢູ່ໃນເຢຣູຊາເລັມ.
ການຫລົ້ມຈົມຂອງເຢຣູຊາເລັມ
(2ກສ 25:1-21; ອຊຣ 1:1-3; ຢມຢ 52:4-27)
ພຣະເຈົ້າຢາເວ ພຣະເຈົ້າຂອງບັນພະບຸລຸດຂອງພວກເຂົາ, ພຣະອົງໄດ້ສົ່ງທູດຂອງພຣະອົງມາເຕືອນພວກເຂົາຢູ່ຕະຫລອດ, ເພາະພຣະອົງສົງສານປະຊາຊົນ ແລະ ບ່ອນສະຖິດຢູ່ຂອງພຣະອົງ. ແຕ່ບັນດາປະຊາຊົນກໍເຢາະເຢີ້ຍບັນດາທູດຂອງພຣະເຈົ້າ, ດູຖູກຖ້ອຍຄໍາຂອງພຣະອົງ ແລະ ໝິ່ນປະໝາດຜູ້ທຳນວາຍທັງຫລາຍຂອງພຣະອົງ ຈົນຄວາມໂກດຮ້າຍຂອງພຣະເຈົ້າຢາເວພຸ່ງຂຶ້ນຕໍ່ປະຊາຊົນຂອງພຣະອົງ ແລະ ຈົນບໍ່ສາມາດຢັບຢັ້ງໄດ້ອີກຕໍ່ໄປ. ພຣະອົງໄດ້ນຳເອົາກະສັດແຫ່ງບາບີໂລນ7ມາຕໍ່ສູ້ພວກເຂົາ, ຂ້າຊາຍໜຸ່ມຂອງພວກເຂົາໃນສະຖານນະມັດສະການ ແລະ ບໍ່ໄວ້ຊີວິດແມ່ນແຕ່ຊາຍໜຸ່ມ ຫລື ຍິງໜຸ່ມ, ຜູ້ເຖົ້າ ຫລື ຜູ້ເຈັບປ່ວຍ. ພຣະເຈົ້າໄດ້ມອບພວກເຂົາໄວ້ໃນມືຂອງເພິ່ນ. ເພິ່ນໄດ້ນຳເອົາເຄື່ອງໃຊ້ຕ່າງໆທັງໝົດຈາກວິຫານຂອງພຣະເຈົ້າ ບໍ່ວ່ານ້ອຍ ຫລື ໃຫຍ່ ແລະ ຊັບສົມບັດທັງໝົດຈາກວິຫານຂອງພຣະເຈົ້າຢາເວ ແລະ ຊັບສົມບັດຂອງກະສັດ ແລະ ຂອງບັນດາຂ້າລາຊະການກັບໄປທີ່ບາບີໂລນ. ພວກເຂົາໄດ້ຈູດໄຟເຜົາວິຫານຂອງພຣະເຈົ້າ ແລະ ໄດ້ທະລາຍກຳແພງເຢຣູຊາເລັມລົງ ແລະ ຈູດວັງທຸກບ່ອນ ແລະ ທຳລາຍທຸກສິ່ງທີ່ມີຄ່າຢູ່ທີ່ນັ້ນ.
ບັນດາຄົນທີ່ເຫລືອຢູ່ຜູ້ລອດຊີວິດຈາກຄົມດາບໄດ້ຖືກຈັບໄປເປັນຊະເລີຍຢູ່ທີ່ບາບີໂລນ, ພວກເຂົາໄດ້ກາຍເປັນເປັນຄົນຮັບໃຊ້ຂອງເພິ່ນ ແລະ ເຊື້ອສາຍຂອງເພິ່ນຈົນອານາຈັກແຫ່ງເປີເຊຍຂຶ້ນມາມີອຳນາດ. ແຜ່ນດິນກໍໄດ້ຊື່ນຊົມຍິນດີກັບວັນຊະບາໂຕແຫ່ງການຢຸດພັກຕະຫລອດຊ່ວງປີທີ່ຮົກຮ້າງຢູ່ຈົນຄົບເຈັດສິບປີຕາມທີ່ພຣະເຈົ້າຢາເວໄດ້ກ່າວໄວ້ໂດຍເຢເຣມີຢາ.
ໃນປີທີໜຶ່ງຂອງສະໄໝຂອງກະສັດໄຊຣັດແຫ່ງເປີເຊຍ ພຣະເຈົ້າຢາເວໄດ້ເຮັດໃຫ້ຖ້ອຍຄໍາຂອງພຣະອົງສໍາເລັດ ໂດຍພຣະເຈົ້າຢາເວໄດ້ດົນໃຈກະສັດໄຊຣັດແຫ່ງເປີເຊຍໃຫ້ປະກາດອອກໄປທົ່ວອານາຈັກຂອງເພິ່ນ ແລະ ໃຫ້ບັນທຶກເລື່ອງນີ້ລົງເປັນລາຍລັກອັກສອນວ່າ:
“ກະສັດໄຊຣັດແຫ່ງເປີເຊຍໄດ້ກ່າວດັ່ງນີ້ວ່າ:
“ ‘ພຣະເຈົ້າຢາເວ ພຣະເຈົ້າແຫ່ງຟ້າສະຫວັນໄດ້ມອບອານາຈັກທັງໝົດຂອງໂລກນີ້ໃຫ້ແກ່ຂ້າພະເຈົ້າ ແລະ ພຣະອົງໄດ້ມອບໝາຍໃຫ້ຂ້າພະເຈົ້າສ້າງວິຫານສຳລັບພຣະອົງຢູ່ທີ່ເຢຣູຊາເລັມໃນເຂດຢູດາຍ. ຄົນໃດໃນບັນດາພວກທ່ານທີ່ເປັນປະຊາຊົນຂອງພຣະເຈົ້າ ຂໍໃຫ້ພວກທ່ານກັບໄປທີ່ນັ້ນ ແລະ ຂໍໃຫ້ພຣະເຈົ້າຢາເວ ພຣະເຈົ້າຂອງພວກເຂົາຢູ່ກັບພວກເຂົາດ້ວຍ’ ”.
Source notes (7)
- Footnote ພາສາເຮັບເຣີວ່າ ໂອາຮາດ ເປັນອີກຮູບໜຶ່ງຂອງ ເຢໂຮອາຮາດ ເຊັ່ນດຽວກັບຂໍ້ 4
- Footnote ປະມານ 3,4 ໂຕນ
- Footnote ປະມານ 3,4 ໂຕນ
- Footnote ຫລື ວັງ
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ແປດປີ (ເບິ່ງ 2ກສ 24:8)
- Footnote ພາສາເຮັບເຣີວ່າ ອ້າຍນ້ອງ ໝາຍເຖິງ ພີ່ນ້ອງ (ເບິ່ງ 2ກສ 24:17)
- Footnote ຫລື ຊາວຄານເດອາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.