Biblica® Open Lao Contemporary Version
2 ຂ່າວຄາວ 31
ເມື່ອຈົບພິທີສະຫລອງແລ້ວ ຊາວອິດສະຣາເອນຜູ້ທີ່ຢູ່ທີ່ນັ້ນກໍໄດ້ໄປທີ່ເມືອງຕ່າງໆຂອງຢູດາຍ, ພວກເຂົາໄດ້ທຸບທຳລາຍຫີນສັກສິດ ແລະ ໄດ້ຕັດເສົາໄມ້ເຈົ້າແມ່ອາເຊຣາລົງ. ພວກເຂົາໄດ້ທຳລາຍສະຖານບູຊາເທິງທີ່ສູງທັງຫລາຍ ແລະ ທຳລາຍແທ່ນບູຊາຕ່າງໆທົ່ວຢູດາຍ, ເຜົ່າເບັນຢາມິນ, ເອຟຣາອິມ ແລະ ມານາເຊ. ຫລັງຈາກພວກເຂົາໄດ້ທຳລາຍຈົນໝົດແລ້ວ, ຊາວອິດສະຣາເອນທັງໝົດກໍກັບຄືນເມືອເມືອງ ແລະ ດິນແດນຂອງຕົນ.
ການຖວາຍເພື່ອການນະມັດສະການ
(2ກສ 18:5-7)
ເຮເຊກີຢາໄດ້ມອບໝາຍໃຫ້ບັນດາປະໂລຫິດ ແລະ ຊາວເລວີຈັດໜ້າທີ່ຮັບຜິດຊອບຂອງພວກເຂົາແຕ່ລະຄົນໃນຖານະເປັນປະໂລຫິດ ຫລື ຊາວເລວີ ເພື່ອຖວາຍເຄື່ອງເຜົາບູຊາ, ການຖວາຍເພື່ອຄວາມສາມັກຄີທຳ, ການບົວລະບັດຮັບໃຊ້, ການໂມທະນາຂອບພຣະຄຸນ ແລະ ຮ້ອງເພງສັນລະເສີນຢູ່ທີ່ປະຕູຕ່າງໆຂອງບ່ອນຢູ່ຂອງພຣະເຈົ້າຢາເວ. ກະສັດມີສ່ວນມອບຊັບສິນສ່ວນຕົວຂອງຕົນເພື່ອຈັດຫາເຄື່ອງເຜົາບູຊາປະຈຳວັນໃນຕອນເຊົ້າ ແລະ ໃນຕອນແລງ ແລະ ຈັດຫາເຄື່ອງເຜົາບູຊາໃນວັນຊະບາໂຕ, ໃນວັນເດືອນຂຶ້ນໃໝ່ ແລະ ໃນເທດສະການຕ່າງໆຕາມທີ່ກໍານົດໄວ້ໃນກົດບັນຍັດຂອງພຣະເຈົ້າຢາເວ. ເພິ່ນໄດ້ສັ່ງປະຊາຊົນທີ່ອາໄສຢູ່ໃນເຢຣູຊາເລັມນຳເອົາສ່ວນທີ່ບັນດາປະໂລຫິດ ແລະ ຊາວເລວີຄວນໄດ້ຮັບມາໃຫ້ພວກເຂົາ ເພື່ອວ່າປະໂລຫິດ ແລະ ຄົນເລວີຈະອຸທິດຕົນຕາມກົດບັນຍັດຂອງພຣະເຈົ້າຢາເວ. ພໍແຕ່ຄໍາສັ່ງໄດ້ປະກາດອອກໄປ, ຊາວອິດສະຣາເອນທີ່ມີໃຈກວ້າງຂວາງກໍໄດ້ເອົານຳຜົນທຳອິດຂອງເມັດພືດ, ເຫລົ້າອະງຸ່ນ, ນໍ້າມັນໝາກກອກ, ນໍ້າເຜິ້ງ ແລະ ພືດຜົນທຸກຊະນິດຂອງພວກເຂົາທີ່ຢູ່ໃນທົ່ງນາມາຖວາຍ. ພວກເຂົາໄດ້ນຳເອົາເງິນເປັນຈໍານວນຫລວງຫລາຍ, ໜຶ່ງສ່ວນສິບຈາກຊັບສິນທຸກຢ່າງທີ່ພວກເຂົາມີມາຖວາຍ. ປະຊາຊົນອິດສະຣາເອນ ແລະ ຢູດາຍຜູ້ທີ່ອາໄສໃນເມືອງຕ່າງໆຂອງຢູດາຍຍັງນຳເອົາໜຶ່ງສ່ວນສິບຈາກຝູງງົວ ແລະ ຝູງແກະຂອງຕົນມາຖວາຍ ແລະ ໜຶ່ງສ່ວນສິບຂອງສິ່ງບໍລິສຸດມາຖວາຍແກ່ພຣະເຈົ້າຢາເວ ພຣະເຈົ້າຂອງພວກເຂົາ, ແລ້ວພວກເຂົາກໍເອົາມາລວມກັນໄວ້ເປັນກອງ. ພວກເຂົາເລີ່ມນຳເຂົ້າມາໃນເດືອນທີສາມຈົນຄົບຖ້ວນໃນເດືອນທີເຈັດ. ເມື່ອກະສັດເຮເຊກີຢາ ແລະ ບັນດາຂ້າລາຊະການຂອງເພິ່ນມາເຫັນກອງເຄື່ອງຖວາຍເຫລົ່ານີ້ ກໍສັນລະເສີນພຣະເຈົ້າຢາເວ ແລ້ວກໍອວຍພອນປະຊາຊົນອິດສະຣາເອນຂອງພຣະອົງ.
ເຮເຊກີຢາໄດ້ຖາມບັນດາປະໂລຫິດ ແລະ ຊາວເລວີກ່ຽວກັບກອງເຄື່ອງຖວາຍເຫລົ່ານັ້ນ; ແລະ ອາຊາຣີຢາຫົວໜ້າປະໂລຫິດທີ່ມາຈາກເຊື້ອສາຍຂອງຊາດົກໄດ້ຕອບວ່າ, “ຕັ້ງແຕ່ປະຊາຊົນເລີ່ມນຳເອົາເຄື່ອງຖວາຍມາທີ່ວິຫານຂອງພຣະເຈົ້າຢາເວ, ພວກເຮົາກໍມີອາຫານກິນຈົນອີ່ມ ແລະ ຍັງເຫລືອຈຳນວນຫລວງຫລາຍຂະໜາດນີ້, ເພາະພຣະເຈົ້າຢາເວໄດ້ອວຍພອນປະຊາຊົນຂອງພຣະອົງ”.
ເຮເຊກີຢາໄດ້ສັ່ງໃຫ້ຈັດຕຽມຄັງໄວ້ໃນວິຫານຂອງພຣະເຈົ້າຢາເວ ແລະ ພວກເຂົາກໍໄດ້ເຮັດຕາມນັ້ນ. ແລ້ວພວກເຂົາໄດ້ນຳເອົາເຄື່ອງຖວາຍຕ່າງໆ, ໜຶ່ງສ່ວນສິບ ແລະ ຂອງຂັວນເຂົ້າມາເກັບໄວ້ຢູ່ທີ່ນັ້ນຢ່າງສັດຊື່. ໂກນານີຢາຊາວເລວີ ເປັນຫົວໜ້າຮັບຜິດຊອບສິ່ງຂອງເຫລົ່ານີ້ ແລະ ນ້ອງຊາຍຂອງລາວຄື ຊີເມອີຢູ່ໃນຕໍາແໜ່ງເປັນຮອງ. ເຢອູເອນ, ອາຊາຊີຢາ, ນາຮາດ, ອາສາເຮນ, ເຢຣິໂມດ, ໂຢຊາບັດ, ເອລີເອນ, ອິດຊະມາກີຢາ, ມາຮາດ ແລະ ເບນາອີຢາເປັນຜູ້ຊ່ວຍຂອງໂກນານີຢາ ແລະ ຊີເມອີນ້ອງຊາຍຂອງລາວ. ຄົນທັງໝົດເຫລົ່ານີ້ໄດ້ຮັບໃຊ້ໂດຍໄດ້ຮັບການແຕ່ງຕັ້ງຈາກກະສັດເຮເຊກີຢາ ແລະ ອາຊາຣີຢາໃຫ້ເປັນເຈົ້າໜ້າທີ່ຮັບຜິດຊອບເບິ່ງແຍງວິຫານຂອງພຣະເຈົ້າ.
ມີໂກເຣລູກຊາຍຂອງອີມນາເປັນຊາວເລວີ, ເຊິ່ງເປັນຄົນເຝົ້າຍາມປະຕູທາງດ້ານຕາເວັນອອກ, ລາວມີໜ້າທີ່ຮັບຜິດຊອບເຄື່ອງຖວາຍດ້ວຍຄວາມສະມັກໃຈທີ່ແກ່ພຣະເຈົ້າ, ມີໜ້າທີ່ແຈກຢາຍເຄື່ອງຖວາຍຂອງພຣະເຈົ້າຢາເວ ແລະ ເຄື່ອງຖວາຍທີ່ບໍລິສຸດດ້ວຍ. ເອເດນ, ມີນີອາມິນ, ເຢຊູອາ, ເຊມາອີຢາ, ອາມາຣີຢາ ແລະ ເຊການີຢາເປັນຜູ້ຊ່ວຍຂອງລາວຢ່າງສັດຊື່ໃນເມືອງຕ່າງໆຂອງບັນດາປະໂລຫິດ, ໂດຍເຮັດໜ້າທີ່ແຈກຢາຍເຄື່ອງຖວາຍແກ່ພີ່ນ້ອງທີ່ເປັນປະໂລຫິດຢ່າງເທົ່າທຽມກັນບໍ່ວ່າພວກເຂົາຈະເປັນຄົນໜຸ່ມ ຫລື ເປັນຜູ້ອາວຸໂສກໍຕາມ.
ນອກຈາກນີ້, ພວກເຂົາຍັງໄດ້ແຈກຢາຍໃຫ້ກັບຜູ້ຊາຍທີ່ມີອາຍຸສາມປີຂຶ້ນໄປ ຫລື ມີຊື່ຢູ່ໃນບັນທຶກລຳດັບວົງຕະກຸນຄືທຸກຄົນທີ່ຈະເຂົ້າໄປໃນວິຫານຂອງພຣະເຈົ້າຢາເວເພື່ອປະຕິບັດໜ້າທີ່ປະຈຳວັນຂອງພວກເຂົາ, ຕາມໜ້າທີ່ຮັບຜິດຊອບ ແລະ ຕາມໝວດຂອງພວກເຂົາທີ່ໄດ້ຈັດຕັ້ງໄວ້. ແລະ ພວກເຂົາໄດແຈກຢາຍໃຫ້ແກ່ບັນດາປະໂລຫິດທີ່ມີຊື່ບັນທຶກຕາມຄອບຄົວໃນວົງຕະກຸນຂອງພວກເຂົາ ແລະ ແຈກຢາຍໃຫ້ແກ່ຊາວເລວີຜູ້ມີອາຍຸຊາວປີຂຶ້ນໄປ, ຕາມໜ້າທີ່ຮັບຜິດຊອບ ແລະ ຕາມໝວດຂອງພວກເຂົາທີ່ໄດ້ຈັດຕັ້ງໄວ້ເໝືອນກັນ. ລວມທັງລູກນ້ອຍ, ເມຍ, ລູກຊາຍ ແລະ ລູກສາວໃນຊຸມຊົນທັງໝົດທີ່ມີລາຍຊື່ບັນທຶກຕາມລຳດັບວົງຕະກຸນເຫລົ່ານີ້ ເພາະພວກເຂົາສັດຊື່ໃນການຊຳລະຕົນໃຫ້ບໍລິສຸດ.
ສຳລັບບັນດາປະໂລຫິດ, ເຊິ່ງເປັນເຊື້ອສາຍຂອງອາໂຣນ, ຜູ້ທີ່ອາໄສຢູ່ໃນພື້ນທີ່ປູກຝັງຕາມເມືອງຕ່າງໆຂອງພວກເຂົາ ຫລື ຢູ່ຕາມເມືອງອື່ນໆ, ຈະມີຄົນຮັບຜິດຊອບແຈກຢາຍສ່ວນແບ່ງໃຫ້ແກ່ຜູ້ຊາຍທຸກຄົນໃນພວກເຂົາ ແລະ ຊາວເລວີທັງໝົດທີ່ມີລາຍຊື່ບັນທຶກລຳດັບວົງຕະກຸນຂອງຊາວເລວີ.
ເຮເສກີຢາໄດ້ເຮັດແບບນີ້ທົ່ວຢູດາຍ, ເຊິ່ງເປັນການເຮັດສິ່ງທີ່ດີ ແລະ ຖືກຕ້ອງ ແລະ ສັດຊື່ຕໍ່ໜ້າພຣະເຈົ້າຢາເວ ພຣະເຈົ້າຂອງເພິ່ນ. ທຸກສິ່ງທີ່ເພິ່ນໄດ້ເຮັດເພື່ອການຮັບໃຊ້ໃນວິຫານຂອງພຣະເຈົ້າ, ແລະ ໃນການເຊື່ອຟັງກົດບັນຍັດ ແລະ ໃນຂໍ້ຄຳສັ່ງທັງຫລາຍຂອງພຣະອົງ, ເພິ່ນສະແຫວງຫາພຣະເຈົ້າຂອງເພິ່ນ ແລະ ເຮັດວຽກງານຢ່າງສຸດໃຈ. ດັ່ງນັ້ນ ເພິ່ນຈຶ່ງຈະເລີນຮຸ່ງເຮືອງຂຶ້ນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.