Biblica® Open Lao Contemporary Version
2 ຂ່າວຄາວ 3
ໂຊໂລໂມນສ້າງວິຫານ
(1ກສ 6:1-29)
ແລ້ວໂຊໂລໂມນກໍເລີ່ມສ້າງວິຫານຂອງພຣະເຈົ້າຢາເວໃນເຢຣູຊາເລັມເທິງພູໂມຣິຢາ. ບ່ອນທີ່ພຣະເຈົ້າຢາເວໄດ້ປາກົດແກ່ດາວິດພໍ່ຂອງເພິ່ນ. ບ່ອນນັ້ນເປັນລານຟາດເຂົ້າຂອງອາໂຣນາ1 ຊາວເຢບຸດ, ເຊິ່ງເປັນບ່ອນທີ່ດາວິດຈັດຕຽມໄວ້. ໃນວັນທີສອງເດືອນທີສອງປີທີສີ່ໃນການປົກຄອງຂອງເພິ່ນ, ເພິ່ນໄດ້ເລີ່ມການກໍ່ສ້າງ.
ຮາກຖານຂອງວິຫານຂອງພຣະເຈົ້າທີ່ໂຊໂລໂມນໄດ້ວາງນັ້ນຍາວ 60 ສອກ2 ແລະ ກວ້າງ 20 ສອກ3 (ໂດຍໃຊ້ໜ່ວຍສອດຕາມມາດຕະຖານເດີມ) ລະບຽງຢູ່ທາງດ້ານໜ້າຂອງວິຫານຍາວ 20 ສອກຕາມລວງກວ້າງຂອງອາຄານ ແລະ ສູງ 20 ສອກ.4
ເພິ່ນໄດ້ໂອບພາຍໃນຫ້ອງນີ້ດ້ວຍຄຳບໍລິສຸດ. ເພິ່ນປູຫ້ອງໂຖງດ້ວຍໄມ້ແປກ ແລະ ໂອບດ້ວຍຄຳບໍລິສຸດ ແລະ ຕົບແຕ່ງດ້ວຍລວດລາຍຕົ້ນປາມ ແລະ ແບບໂສ້. ເພິ່ນໄດ້ປະດັບປະດາວິຫານດ້ວຍຫີນອັນງົດງາມ ແລະ ຄຳທີ່ໃຊ້ນັ້ນມາຈາກເມືອງປາຣະວາອິມ. ເພິ່ນໄດ້ວາງເພດານທັບຄານ, ວົງກົບປະຕູ ຝາ ແລະ ປະຕູວິຫານເຮັດດ້ວຍຄຳ ແລະ ເພິ່ນແກະສະຫລັກລວດລາຍເຄຣຸບໃສ່ຝາຂອງວິຫານ.
ເພິ່ນໄດ້ສ້າງຫ້ອງສັກສິດທີ່ສຸດ, ຫ້ອງມີຄວາມກວ້າງເທົ່າກັນກັບຂະໜາດກັບຄວາມກວ້າງຂອງວິຫານຄື ກວ້າງຊາວສອກ ແລະ ຍາວຊາວສອກ. ເພິ່ນໂອບຫ້ອງພາຍໃນດ້ວຍຄຳສົດປະມານຊາວຫົກຕາລັນຕົນ.5 ເພິ່ນໃຊ້ຄຳນ້ຳໜັກປະມານຫ້າສິບເຊເຂວ6ເຮັດຕະປູຄໍາ. ເພິ່ນຍັງໄດ້ວາງສ່ວນຕ່າງໆຂອງຫ້ອງຊັ້ນເທິງໂອບດ້ວຍຄໍາເຊັ່ນກັນ.
ສໍາລັບຫ້ອງສັກສິດທີ່ສຸດ ເພິ່ນໄດ້ເຮັດແກະສະຫລັກຮູບເຄຣຸບຄູ່ໜຶ່ງ ແລະ ໂອບຮູບເຄຣຸບດ້ວຍຄຳ ປີກຂອງເຄຣຸບທັງສອງຕົນຍາວລວມທັງໝົດ 20 ສອກ. ປີກຂ້າງໜຶ່ງຂອງເຄຣຸບໂຕທຳອິດຍາວ 5 ສອກ7 ແລະ ປີກຂ້າງໜຶ່ງຈຸກັບຝາຂອງວິຫານ, ສ່ວນປີກອີກຂ້າງໜຶ່ງຍາວ 5 ສອກເຊັ່ນກັນ ເຊິ່ງປີກຈຸກັບປີກຂອງຮູບເຄຣຸບອີກຕົນໜຶ່ງ. ໃນທຳນອງດຽວກັນ ປີກຂ້າງໜຶ່ງຂອງເຄຣຸບຕົນທີສອງຍາວ 5 ສອກ ແລະ ປີກຈຸກັບຝາອີກດ້ານໜຶ່ງຂອງວິຫານ ແລະ ປີກອີກຂ້າງໜຶ່ງຍາວ 5 ສອກເຊັ່ນກັນ ເຊິ່ງປີກຈຸກັບປີກຂອງເຄຣຸບໂຕທຳອິດ. ປີກຂອງເຄຣຸບເຫລົ່ານີ້ພືປີກອອກກວ້າງຍາວ 20 ສອກ. ພວກມັນທັງສອງຕົນຢືນປິ່ນໜ້າໃສ່ກັນໃນຫ້ອງໂຖງ.8
ເພິ່ນໄດ້ເຮັດຜ້າກັ້ງສີຟ້າ, ສີມ່ວງ ແລະ ສີແດງເຂັ້ມ ແລະ ໄດ້ເຮັດຜ້າລິນິນເນື້ອລະອຽດດີໂດຍແສ່ວຮູບເຄຣຸບໃສ່ຜ້ານັ້ນ.
ສ່ວນຢູ່ທາງດ້ານໜ້າຂອງວິຫານ ເພິ່ນໄດ້ເຮັດເສົາສອງຕົ້ນ, ຕົ້ນເສົາສູງ 35 ສອກ9 ແຕ່ລະຕົ້ນມີຫົວເສົາສູງ 5 ສອກ. ໂຊໂລໂມນໄດ້ເຮັດໂສ້ສານກັນ10 ແລະ ໄດ້ຕັ້ງມັນໄວ້ເທິງຍອດເສົາ. ເພິ່ນຍັງໄດ້ຮູບໝາກພິລາໜຶ່ງຮ້ອຍໜ່ວຍ ແລະ ຫ້ອຍໃສ່ໂສ້ອີກດ້ວຍ. ເພິ່ນໄດ້ຕັ້ງເສົາໄວ້ຢູ່ທາງດ້ານໜ້າຂອງວິຫານ, ເສົາຕົ້ນທີໜຶ່ງຢູ່ທາງໃຕ້ຊື່ວ່າຢາກິນ11 ແລະ ເສົາອີກຕົ້ນໜຶ່ງຢູ່ທາງເໜືອຊື່ວ່າໂບອາດ.12
Source notes (12)
- Footnote ພາສາເຮັບເຣີວ່າ ໂອນນານ ເປັນອີກຮູບໜຶ່ງຂອງ ອາໂຣນາ
- Footnote ຄື ປະມານ 27 ແມັດ
- Footnote ຄື ປະມານ 9 ແມັດ ເຊັ່ນດຽວກັບຂໍ້ 4, 8, 11 ແລະ 13
- Footnote ພາສາເຮັບເຣີວ່າ ແລະ ສູງ 120
- Footnote ພາສາເຮັບເຣີວ່າ 600 ຕາລັນຕົນ
- Footnote ພາສາເຮັບເຣີວ່າ 50 ຫລຽນ
- Footnote ຄື ປະມານ 2,3 ແມັດ ເຊັ່ນດຽວກັບຂໍ້ 12 ແລະ 15
- Footnote ຫລື ຫັນໜ້າເຂົ້າດ້ານໃນ
- Footnote ຄື ປະມານ 16 ແມັດ
- Footnote ຫລື ອາດຈະເປັນ ເຮັດໂສ້ ໃນສະຖານນະມັດສະການຊັ້ນໃນ ; ໃນພາສາເຮັບຣູວະລີນີ້ມີຄວາມຫມາຍບໍ່ຊັດເຈນ
- Footnote ອາດມີໝາຍຄວາມວ່າ ພຣະອົງຕັ້ງໄວ້
- Footnote ຄົງຈະມີໝາຍຄວາມວ່າ ໃນພຣະອົງຄືກຳລັງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.