Biblica® Open Lao Contemporary Version
2 ຂ່າວຄາວ 29
ເຮເຊກີຢາຊຳລະວິຫານ
(2ກສ 18:2-3)
ເມື່ອເຮເຊກີຢາຂຶ້ນເປັນກະສັດ ເພິ່ນອາຍຸຊາວຫ້າປີ ແລະ ເພິ່ນໄດ້ປົກຄອງໃນເຢຣູຊາເລັມເປັນເວລາຊາວເກົ້າປີ. ແມ່ຂອງເພິ່ນຊື່ວ່າອາບີຢາ ເຊິ່ງເປັນລູກສາວຂອງເຊກາຣີຢາ. ເພິ່ນໄດ້ເຮັດສິ່ງທີ່ຖືກຕ້ອງໃນສາຍຕາຂອງພຣະເຈົ້າຢາເວເໝືອນທີ່ດາວິດບັນພະບຸລຸດຂອງເພິ່ນໄດ້ເຮັດ.
ໃນເດືອນທີໜຶ່ງຂອງປີທໍາອິດຂອງການປົກຄອງຂອງເພິ່ນ, ເພິ່ນໄດ້ເປີດປະຕູວິຫານຂອງພຣະເຈົ້າຢາເວ ແລະ ໄດ້ສ້ອມແປງປະຕູຄືນໃໝ່. ເພິ່ນໄດ້ເອີ້ນບັນດາປະໂລຫິດ ແລະ ຊາວເລວີມາພົບກັນ, ແລ້ວກໍປະຊຸມກັນກັບພວກເຂົາຢູ່ທີ່ສີ່ແຍກທາງດ້ານຕາເວັນອອກ. ແລະເພິ່ນໄດ້ກ່າວວ່າ: “ຈົ່ງຟັງຂ້າພະເຈົ້າ, ຊາວເລວີ! ບັດນີ້ ຈົ່ງຊຳລະຕົນເອງໃຫ້ບໍລິສຸດ ແລະ ຈົ່ງຊຳລະວິຫານຂອງພຣະເຈົ້າຢາເວ, ພຣະເຈົ້າຂອງບັນພະບຸລຸດຂອງພວກທ່ານ. ຈົ່ງລົບລ້າງສິ່ງທີ່ເປັນມົນທິນທັງໝົດອອກຈາກບ່ອນສັກສິດ. ບັນພະບຸລຸດຂອງພວກເຮົາບໍ່ສັດຊື່; ພວກເຂົາໄດ້ເຮັດສິ່ງທີ່ຊົ່ວຮ້າຍໃນສາຍຕາຂອງພຣະເຈົ້າຢາເວ ພຣະເຈົ້າຂອງພວກເຮົາ ແລະ ໄດ້ປະຖິ້ມພຣະອົງ. ພວກເຂົາໄດ້ຫັນໜ້າໜີຈາກບ່ອນທີ່ພຣະເຈົ້າຢາເວສະຖິດຢູ່ ແລະ ໄດ້ປິ່ນຫລັງໃສ່ພຣະອົງ. ພວກເຂົາຍັງໄດ້ປິດລະບຽງປະຕູວິຫານໄວ້, ບໍ່ໃຕ້ຕະກຽງ. ພວກເຂົາບໍ່ໄດ້ເຜົາເຄື່ອງຫອມ ຫລື ຖວາຍເຄື່ອງເຜົາບູຊາໃດໆທີ່ບ່ອນສັກສິດແກ່ພຣະເຈົ້າແຫ່ງອິດສະຣາເອນ. ເຫດສະນັ້ນ, ຄວາມໂກດຮ້າຍຂອງພຣະເຈົ້າຢາເວຈຶ່ງໄດ້ຕົກໃສ່ຢູດາຍ ແລະ ເຢຣູຊາເລັມ; ພຣະເຈົ້າໄດ້ເຮັດໃຫ້ພວກເຂົາເປັນທີ່ໜ້າລັງກຽດ, ເປັນຕາໜ້າຢ້ານ ແລະ ຖືກດູໝິ່ນ, ດັ່ງທີ່ພວກທ່ານໄດ້ເຫັນກັບຕາຂອງພວກທ່ານເອງ. ດ້ວຍເຫດນີ້ ບັນພະບຸລຸດຂອງພວກເຮົາໄດ້ລົ້ມລົງຕາຍດ້ວຍດາບ ແລະ ດ້ວຍເຫດນີ້ ດ້ວຍລູກຊາຍ ແລະ ບັນດາລູກສາວ ແລະ ເມຍຂອງພວກເຮົາຖືກຈັບໄປເປັນຊະເລີຍ. ບັດນີ້ ຂ້າພະເຈົ້າຕັ້ງໃຈທີ່ຈະເຮັດຄໍາໝັ້ນສັນຍາກັບພຣະເຈົ້າຢາເວ, ພຣະເຈົ້າແຫ່ງອິດສະຣາເອນ, ເພື່ອວ່າຄວາມໂກດຮ້າຍອັນຮຸນແຮງຂອງພຣະອົງຈະຫັນໜີໄປຈາກພວກເຮົາ. ລູກທັງຫລາຍຂອງເຮົາເອີຍ, ບັດນີ້ ຢ່າໄດ້ເມີນເສີຍຕໍ່ໜ້າທີ່ຂອງພວກທ່ານ ເພາະພຣະເຈົ້າຢາເວໄດ້ເລືອກເອົາພວກທ່ານໃຫ້ຢືນຢູ່ຕໍ່ໜ້າພຣະອົງ ແລະ ຮັບໃຊ້ພຣະອົງ, ເພື່ອປະຕິບັດໜ້າທີ່ຕໍ່ໜ້າພຣະອົງ ແລະ ເພື່ອເຜົາເຄື່ອງຫອມຖວາຍແກ່ພຣະອົງ”.
ແລ້ວຊາວເລວີເຫລົ່ານີ້ຈຶ່ງເລີ່ມປະຕິບັດໜ້າທີ່ດັ່ງນີ້:
ຈາກຊາວໂກຮາດຄື:
ມາຮາດ ລູກຊາຍຂອງອາມາໄສ ແລະ ໂຢເອນລູກຊາຍຂອງອາຊາຣີຢາ;
ຈາກຊາວເມຣາຣິຄື:
ກີເຊ ລູກຊາຍຂອງອັບດີ ແລະ ອາຊາຣີຢາລູກຊາຍຂອງເຢຮານເລເລນ;
ຈາກຊາວເກໂຊນຄື:
ໂຢອາ ລູກຊາຍຂອງຊິມມາ ແລະ ເອເດນລູກຊາຍຂອງໂຢອາ;
ຈາກເຊື້ອສາຍຂອງເອລີຊາຟັນຄື:
ຊິມຣີ ແລະ ເຢອູເອນ;
ຈາກເຊື້ອສາຍຂອງອາສັບຄື:
ເຊກາຣີຢາ ແລະ ມັດຕານິຢາ;
ຈາກເຊື້ອສາຍຂອງເຮມານຄື:
ເຢອູເອນ ແລະ ຊີເມອີ;
ຈາກເຊື້ອສາຍຂອງເຢດູທູນຄື:
ເຊມາອີຢາ ແລະ ອຸດຊີເອນ.
ເມື່ອພວກເຂົາໄດ້ມາປະຊຸມກັນກັບພວກພີ່ນ້ອງຊາວເລວີ ແລະ ໄດ້ຊຳລະຕົນເອງແລ້ວ, ພວກເຂົາກໍເຂົ້າໄປຊຳລະວິຫານຂອງພຣະເຈົ້າຢາເວ, ຕາມທີ່ກະສັດໄດ້ສັ່ງໄວ້ນັ້ນ, ປະຕິບັດຕາມຖ້ອຍຄຳຂອງພຣະເຈົ້າຢາເວ. ບັນດາປະໂລຫິດໄດ້ເຂົ້າໄປທາງໃນສະຖານນະມັດສະການຂອງພຣະເຈົ້າຢາເວເພື່ອຊຳລະບ່ອນນັ້ນ. ພວກເຂົານຳເອົາທຸກສິ່ງທີ່ເປັນມົນທິນທີ່ພວກເຂົາພົບໃນວິຫານຂອງພຣະເຈົ້າຢາເວອອກມາທີ່ເດີ່ນວິຫານຂອງພຣະເຈົ້າຢາເວ. ຊາວເລວີໄດ້ຂົນສິ່ງທີ່ເປັນມົນທິນອອກໄປ ແລະ ນໍາເອົາທີ່ຮ່ອມພູກິດໂຣນ. ພວກເຂົາໄດ້ເລີ່ມຕົ້ນຊຳລະວິຫານໃນວັນທີໜຶ່ງເດືອນທີໜຶ່ງ ແລະ ໃນວັນທີແປດຂອງເດືອນນັ້ນ ພວກເຂົາກໍຊຳລະອອກມາຈົນຮອດດ້ານໜ້າລະບຽງປະຕູວິຫານຂອງພຣະເຈົ້າຢາເວ. ພວກເຂົາໃຊ້ເວລາອີກແປດວັນໃນການຊຳລະວິຫານຂອງພຣະເຈົ້າຢາເວ. ແລ້ວກໍສໍາເລັດໃນວັນທີສິບຫົກຂອງເດືອນທີໜຶ່ງ.
ແລ້ວພວກເຂົາໄດ້ໄປພົບກະສັດເຮເຊກີຢາ ແລະ ໄດ້ລາຍງານວ່າ: “ພວກຂ້ານ້ອຍໄດ້ຊຳລະວິຫານຂອງພຣະເຈົ້າຢາເວທັງໝົດແລ້ວ, ພ້ອມທັງແທ່ນບູຊາຂອງເຜົາເຄື່ອງຖວາຍບູຊາ ແລະ ເຄື່ອງໃຊ້ທັງໝົດປະຈຳແທ່ນບູຊາ, ແລະ ໂຕະວາງເຂົ້າຈີ່ຖວາຍ ແລະ ເຄື່ອງໃຊ້ທັງໝົດປະຈຳໂຕະ. ພວກຂ້ານ້ອຍໄດ້ຈັດຕຽມ ແລະ ໄດ້ຊຳລະເຄື່ອງໃຊ້ທຸກຢ່າງທີ່ກະສັດອາຮາດໄດ້ເອົາອອກໄປໃນເວລາທີ່ເພິ່ນບໍ່ສັດຊື່ຕໍ່ພຣະເຈົ້າ ຂະນະທີ່ເພິ່ນໄດ້ເປັນເປັນກະສັດ. ບັດນີ້ ສິ່ງຂອງເຫລົ່ານັ້ນໄດ້ວາງໄວ້ຢູ່ທາງໜ້າຂອງແທ່ນບູຊາຂອງພຣະເຈົ້າຢາເວແລ້ວ”.
ມື້ຕໍ່ມາໃນເວລາເຊົ້າໆ ກະສັດເຮເຊກີຢາໄດ້ເອີ້ນບັນດາເຈົ້າໜ້າທີ່ຂອງເມືອງໃຫ້ມາປະຊຸມກັນ ແລ້ວກໍພາກັນຂຶ້ນໄປທີ່ວິຫານຂອງພຣະເຈົ້າຢາເວນໍາກັນ. ພວກເຂົາໄດ້ນຳເອົາງົວເຖິກເຈັດໂຕ, ແກະເຖິກເຈັດໂຕ, ແກະຜູ້ເຈັດໂຕ ແລະ ແບ້ຜູ້ເຈັດໂຕເປັນເຄື່ອງຖວາຍບູຊາໄຖ່ບາບສຳລັບອານາຈັກ, ສຳລັບສະຖານນະມັດສະການ ແລະ ສຳລັບຢູດາ. ກະສັດໄດ້ສັ່ງໃຫ້ບັນດາປະໂລຫິດ, ຜູ້ທີ່ເປັນເຊື້ອສາຍຂອງອາໂຣນຖວາຍສັດເຫລົ່ານັ້ນເທິງແທ່ນບູຊາຂອງພຣະເຈົ້າຢາເວ. ດັ່ງນັ້ນ ພວກເຂົາຈຶ່ງຂ້າງົວເຖິກ ແລະ ບັນດາປະໂລຫິດໄດ້ນຳເອົາເລືອດໄປ ແລະ ຊິດໃສ່ເທິງແທ່ນບູຊາ; ຕໍ່ມາ ພວກເຂົາໄດ້ຂ້າແກະຜູ້ ແລະ ເອົາເລືອດຊິດໃສ່ເທິງແທ່ນບູຊາ; ພວກເຂົາໄດ້ຂ້າລູກແກະ ແລ້ວເອົາເລືອດຊິດໃສ່ເທິງແທ່ນບູຊາ. ພວກເຂົາໄດ້ເອົາແບ້ເຖິກສຳລັບເປັນເຄື່ອງບູຊາໄຖ່ບາບໄດ້ນຳອອກມາຕໍ່ໜ້າກະສັດ ແລະ ປະຊາຊົນທີ່ມາຊຸມນຸມກັນ ແລ້ວພວກເຂົາກໍໄດ້ວາງມືໃສ່ແບ້ເຖິກເຫລົ່ານັ້ນ. ຫລັງຈາກນັ້ນ ບັນດາປະໂລຫິດກໍໄດ້ຂ້າແບ້ ແລະ ນໍາເອົາເລືອດໄປຖອກໃສ່ເທິງແທ່ນບູຊາເພື່ອເປັນເຄື່ອງບູຊາໄຖ່ບາບໃຫ້ກັບອິດສະຣາເອນທັງໝົດ, ເພາະກະສັດໄດ້ສັ່ງໃຫ້ເຜົາເຄື່ອງຖວາຍບູຊາ ແລະ ເຄື່ອງບູຊາໄຖ່ບາບສຳລັບອິດສະຣາເອນທັງໝົດ.
ເຮເສກີຢາໄດ້ໃຫ້ຄົນເລວີປະຈຳໜ້າທີ່ຢູ່ໃນວິຫານຂອງພຣະເຈົ້າຢາເວ ພ້ອມກັບໃຫ້ດີດພິນໃຫຍ່ ແລະ ພິນນ້ອຍ ແລະ ຕົບແສ່ງຕາມທີ່ດາວິດ ແລະ ກາດຜູ້ທຳນວາຍຂອງກະສັດ ແລະ ຜູ້ທຳນວາຍນາທານໄດ້ກຳນົດໄວ້; ພຣະເຈົ້າຢາເວທີ່ໄດ້ສັ່ງຜ່ານທາງບັນດາຜູ້ທຳນວາຍຂອງພຣະອົງໄວ້. ດັ່ງນັ້ນ ຄົນເລວີຈຶ່ງເຂົ້າປະຈຳທີ່ຕຽມບັນເລງເຄື່ອງດົນຕີທີ່ດາວິດເຮັດຂຶ້ນ ສ່ວນບັນດາປະໂລຫິດກໍເຂົ້າປະຈຳທີ່ຕຽມເປົ່າແກຂອງຕົນ.
ເຮເຊກີຢາໄດ້ສັ່ງໃຫ້ຖວາຍເຄື່ອງເຜົາບູຊາເທິງແທ່ນບູຊາ. ໃນຂະນະທີ່ເລີ່ມຕົ້ນຖວາຍບູຊາ, ພວກເຂົາກໍເລີ່ມຮ້ອງສັນລະເສີນພຣະເຈົ້າຢາເວດ້ວຍການເປົ່າແກປະສານກັນກັບການຫລິ້ນເຄື່ອງດົນຕີຂອງກະສັດດາວິດແຫ່ງອິດສະຣາເອນ. ຂະນະທີ່ນັກຮ້ອງຂັບຮ້ອງ ແລະ ນັກດົນຕີເປົ່າແກ, ຊຸມນຸມປະຊາຊົນທັງໝົດກໍກົ້ມກາບນະມັດສະການ. ເປັນເຊັ່ນນີ້ຈົນກວ່າຖວາຍເຄື່ອງເຜົາບູຊາສຳເລັດ.
ເມື່ອການຖວາຍເຄື່ອງບູຊາສຳເລັດແລ້ວ, ກະສັດ ແລະ ທຸກຄົນທີ່ຢູ່ກັບເພິ່ນກໍໄດ້ຄຸເຂົ່າລົງກາບນະມັດສະການ. ກະສັດເຮເຊກີຢາ ແລະ ບັນດາເຈົ້າໜ້າທີ່ໄດ້ສັ່ງໃຫ້ຊາວເລວີສັນລະເສີນພຣະເຈົ້າຢາເວດ້ວຍບົດສັນລະເສີນຂອງດາວິດ ແລະ ຂອງຜູ້ທຳນວາຍອາສັບ. ດັ່ງນັ້ນ ພວກເຂົາຈຶ່ງຮ້ອງເພງດ້ວຍຄວາມຊົມຊື່ນຍິນດີ ແລະ ກົ້ມກາບນະມັດສະການພຣະເຈົ້າ.
ຫລັງຈາກນັ້ນ ເຮເຊກີຢາກໍໄດ້ກ່າວວ່າ, “ບັດນີ້ ພວກເຈົ້າໄດ້ອຸທິດຖວາຍຕົນເອງແກ່ພຣະເຈົ້າຢາເວແລ້ວ. ຈົ່ງນຳເອົາເຄື່ອງບູຊາມາ ແລະ ເຄື່ອງຖວາຍໂມທະນາຂອບພຣະຄຸນມາທີ່ວິຫານຂອງພຣະເຈົ້າຢາເວ”. ດັ່ງນັ້ນ ປະຊາຊົນຈຶ່ງໄດ້ນຳເຄື່ອງບູຊາ ແລະ ເຄື່ອງຖວາຍໂມທະນາຂອບພຣະຄຸນມາຖວາຍ ແລະ ທຸກຄົນທີ່ເຕັມໃຈກໍໄດ້ນຳເຄື່ອງເຜົາບູຊາມາຖວາຍ.
ຈໍານວນຂອງເຄື່ອງເຜົາບູຊາທີ່ປະຊາຊົນນຳມາຖວາຍມີຄື ງົວເຖິກເຈັດສິບໂຕ, ແກະເຖິກໜຶ່ງຮ້ອຍໂຕ ແລະ ແກະຜູ້ສອງຮ້ອຍໂຕ ສັດທັງໝົດນີ້ເປັນເຄື່ອງເຜົາບູຊາແກ່ພຣະເຈົ້າຢາເວ. ຈໍານວນສັດທີ່ຊຳລະຖວາຍເປັນເຄື່ອງບູຊາມີງົວເຖິກຫົກຮ້ອຍໂຕ, ແກະ ແລະ ແບ້ສາມພັນໂຕ. ແຕ່ມີບັນດາປະໂລຫິດໜ້ອຍເກີນໄປສຳລັບລົກໜັງສັດທີ່ເປັນເຄື່ອງເຜົາບູຊາທັງໝົດ; ດັ່ງນັ້ນ ພີ່ນ້ອງຊາວເລວີໄດ້ມາຊ່ວຍເຫລືອພວກເຂົາຈົນວຽກງານສຳເລັດ ແລະ ຈົນປະໂລຫິດຄົນອື່ນໆໄດ້ເຮັດພິທີຊຳລະຕົນ, ເພາະຊາວເລວີເຄັ່ງຄັດໃນການຊຳລະຕົນຫລາຍກວ່າບັນດາປະໂລຫິດ. ມີເຄື່ອງເຜົາບູຊາຢ່າງຫລວງຫລາຍ, ພ້ອມທັງໄຂມັນຂອງເຄື່ອງຖວາຍເພື່ອຄວາມສາມັກຄີທຳ ແລະ ເຄື່ອງດື່ມຖວາຍບູຊາພ້ອມກັນກັບເຄື່ອງເຜົາບູຊາ.
ດັ່ງນັ້ນ ການນະມັດສະການໃນວິຫານຂອງພຣະເຈົ້າຢາເວກໍໄດ້ຮັບການຟື້ນຟູຂຶ້ນໃໝ່. ເຮເຊກີຢາ ແລະ ປະຊາຊົນທັງໝົດກໍພາກັນຊົມຊື່ນຍິນດີໃນສິ່ງທີ່ພຣະເຈົ້າໄດ້ກະທຳເພື່ອປະຊາຊົນຂອງພຣະອົງ, ເພາະທຸກຢ່າງສຳເລັດຜົນຢ່າງວ່ອງໄວ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.