Biblica® Open Lao Contemporary Version
2 ຂ່າວຄາວ 21
ແລ້ວເຢໂຮຊາຟັດກໍລ່ວງລັບໄປຢູ່ກັບບັນພະບຸລຸດຂອງເພິ່ນ ແລະ ຖືກຝັງໄວ້ດ້ວຍກັນກັບພວກເຂົາໃນເມືອງດາວິດ ແລະ ເຢໂຮຣາມລູກຊາຍຂອງເພິ່ນກໍກໍໄດ້ຂຶ້ນປົກຄອງແທນ. ເຢໂຮຣາມລູກຊາຍຂອງເຢໂຮຊາຟັດແຫ່ງຢູດາຍມີນ້ອງຊາຍ1ດັ່ງນີ້: ອາຊາຣີຢາ, ເຢຮີເອນ, ເຊກາຣີຢາ, ອາຊາຣີຢາ, ມີກາເອນ ແລະ ເຊຟາຕີຢາ. ພວກເຂົາທັງໝົດເປັນລູກຊາຍຂອງເຢໂຮຊາຟັດກະສັດແຫ່ງອິດສະຣາເອນ. ພໍ່ຂອງພວກເຂົາໄດ້ມອບຂອງຂັວນເປັນເງິນ, ຄຳ ແລະ ເຄື່ອງໃຊ້ທີ່ມີຄ່າໃຫ້ພວກເຂົາ ແລະ ໃຫ້ປົກຄອງເມືອງປ້ອມປ້ອງກັນຕ່າງໆໃນຢູດາຍ, ແຕ່ໄດ້ມອບອານາຈັກໃຫ້ແກ່ເຢໂຮຣາມເພາະລາວເປັນລູກຊາຍກົກຂອງເພິ່ນ.
ເຢໂຮຣາມກະສັດແຫ່ງຢູດາຍ
(2ກສ 8:16-24)
ເມື່ອເຢໂຮຣາມໄດ້ເຮັດໃຫ້ຕົນເອງໝັ້ນຄົງເໜືອອານາຈັກຂອງພໍ່ຕົນແລ້ວ, ເພິ່ນກໍຂ້າບັນດານ້ອງຊາຍທັງໝົດຂອງເພິ່ນພ້ອມທັງບັນດາຂ້າລາຊະການຂອງອິດສະຣາເອນບາງຄົນ. ເມື່ອເພິ່ນໄດ້ຂຶ້ນເປັນກະສັດ, ເພິ່ນມີອາຍຸສາມສິບສອງປີ ແລະ ເພິ່ນໄດ້ປົກຄອງໃນເຢຣູຊາເລັມເປັນເວລາແປດປີ. ເພິ່ນໄດ້ເຮັດຕາມແບບຢ່າງຂອງບັນດາກະສັດແຫ່ງອິດສະຣາເອນ, ຕາມແບບຢ່າງຄອບຄົວຂອງອາຮາບໄດ້ເຮັດ, ເພາະເພິ່ນໄດ້ແຕ່ງງານກັບລູກສາວຄົນໜຶ່ງຂອງອາຮາບ. ເພິ່ນໄດ້ເຮັດສິ່ງທີ່ຊົ່ວຮ້າຍໃນສາຍຕາຂອງພຣະເຈົ້າຢາເວ. ເຖິງຢ່າງໃດກໍ່ຕາມ, ຍ້ອນຄໍາໝັ້ນສັນຍາທີ່ພຣະເຈົ້າຢາເວໄດ້ເຮັດໄວ້ກັບດາວິດ, ພຣະເຈົ້າຢາເວບໍ່ຢາກທຳລາຍຄອບຄົວຂອງດາວິດ. ພຣະອົງໄດ້ສັນຍາວ່າຈະຮັກສາຕະກຽງດວງໜຶ່ງໄວ້ສຳລັບເພິ່ນ ແລະ ເຊື້ອສາຍຂອງເພິ່ນຕະຫລອດໄປ.
ໃນສະໄໝຂອງເຢໂຮຣາມ, ເອໂດມໄດ້ກະບົດຕໍ່ຢູດາຍ ແລະ ໄດ້ຕັ້ງກະສັດຕົນເອງຂຶ້ນ. ດັ່ງນັ້ນ ເຢໂຮຣາມພ້ອມທັງນາຍທະຫານ ແລະ ລົດຮົບທັງໝົດຂອງເພິ່ນໄດ້ໄປທີ່ເອໂດມ. ຊາວເອໂດມປິດລ້ອມເພິ່ນ ແລະ ຜູ້ບັນຊາການລົດຮົບຂອງເພິ່ນໄວ້, ແຕ່ເພິ່ນໄດ້ລຸກຂຶ້ນ ແລະ ຕີຜ່າວົງລ້ອມອອກໄປໃນຕອນກາງຄືນ. ເອໂດມຈຶ່ງໄດ້ກະບົດຕໍ່ຢູດາຍຈົນເຖິງທຸກວັນນີ້.
ໃນເວລານັ້ນເມືອງລິບນາກໍໄດ້ກະບົດເໝືອນກັນ, ຍ້ອນເຢໂຮຣາມໄດ້ປະຖິ້ມພຣະເຈົ້າຢາເວ, ພຣະເຈົ້າຂອງບັນພະບຸລຸດຂອງເພິ່ນ. ເພິ່ນຍັງໄດ້ສ້າງສະຖານບູຊາເທິງທີ່ສູງເທິງເນີນພູທັງຫລາຍຂອງຢູດາຍ ແລະ ໄດ້ເປັນເຫດເຮັດໃຫ້ຊາວເຢຣູຊາເລັມຂາຍໂຕ ແລະ ໄດ້ເຮັດໃຫ້ຊາວຢູດາຫລົງທາງໄປ.
ເຢໂຮຣາມໄດ້ຮັບຈົດໝາຍສະບັບໜຶ່ງຈາກຜູ້ທຳນວາຍເອລີຢາ, ເຊິ່ງໄດ້ກ່າວວ່າ:
“ພຣະເຈົ້າຢາເວ, ພຣະເຈົ້າຂອງດາວິດພໍ່ຂອງທ່ານກ່າວດັ່ງນີ້ວ່າ: ‘ທ່ານບໍ່ໄດ້ເຮັດຕາມແບບຢ່າງຂອງກະສັດເຢໂຮຊາຟັດບິດາຂອງທ່ານ ຫລື ຂອງກະສັດອາສາແຫ່ງຢູດາຍ. ແຕ່ທ່ານໄດ້ເຮັດຕາມແບບຢ່າງຂອງບັນດາກະສັດແຫ່ງອິດສະຣາເອນ ແລະ ທ່ານໄດ້ນໍາພາຊາວຢູດາ ແລະ ຊາວເຢຣູຊາເລັມຂາຍໂຕເໝືອນດັ່ງຄອບຄົວຂອງອາຮາບທີ່ໄດ້ເຮັດ. ທ່ານຍັງໄດ້ຂ້າບັນດານ້ອງຊາຍຂອງທ່ານເອງ, ເຊິ່ງເປັນຄົນໃນຄອບຄົວຂອງທ່ານເອງ, ຜູ້ທີ່ດີກວ່າທ່ານ. ສະນັ້ນ ບັດນີ້ພຣະເຈົ້າຢາເວຈະກໍາລັງໂຈມຕີປະຊາຊົນ, ບັນດາລູກຊາຍ, ແລະ ເມຍຂອງທ່ານ ແລະ ທຸກສິ່ງທີ່ເປັນຂອງທ່ານຢ່າງໜັກໜ່ວງ. ທ່ານເຈົ້າຈະເຈັບປ່ວຍຢ່າງໜັກດ້ວຍໂລກລຳໄສ້ຊ້ຳເຮື້ອຈົນກວ່າໂລກນີ້ເຮັດໃຫ້ລຳໄສ້ຂອງທ່ານໄຫລອອກມາ’ ”.
ພຣະເຈົ້າຢາເວໄດ້ດົນໃຈຊາວຟີລິດສະຕິນ ແລະ ຊາວອາຣັບ ເຊິ່ງເປັນຜູ້ທີ່ອາໄສຢູ່ໃກ້ຊາວກູເຊເປັນສັດຕູກັບເຢໂຮຣາມ. ພວກເຂົາເຂົ້າມາໂຈມຕີ, ໄດ້ຮຸກຮານຢູດາຍ ແລະ ໄດ້ເອົາເຄື່ອງຂອງທີ່ມີຄ່າທັງໝົດໃນວັງຂອງກະສັດໄປ, ພ້ອມທັງຈັບບັນດາລູກຊາຍ ແລະ ເມຍຂອງເຢໂຮຣາມໄປດ້ວຍ. ບໍ່ມີລູກຊາຍເຫລືອຈັກຄົນໃຫ້ເພິ່ນຍົກເວັ້ນແຕ່ອາຮາຊີຢາ2 ລູກຊາຍຫລ້າຂອງເພິ່ນ.
ຫລັງຈາກເຫດການທັງໝົດນີ້, ພຣະເຈົ້າຢາເວໄດ້ທໍລະມານເຢໂຮຣາມດ້ວຍໂລກລຳໄສ້ທີ່ບໍ່ສາມາດປິ່ນປົວໄດ້ ໃນເວລານັ້ນ, ຊ່ວງທ້າຍປີທີສອງ, ໄສ້ຂອງເພິ່ນກໍໄຫລອອກມາຍ້ອນພະຍາດນີ້ ແລະ ເພິ່ນກໍໄດ້ຕາຍໄປດ້ວຍຄວາມເຈັບປວດຢ່າງທໍລະມານ. ປະຊາຊົນຂອງເພິ່ນບໍ່ໄດ້ກໍ່ກອງໄຟໄວ້ທຸກເພື່ອໃຫ້ກຽດເພິ່ນເໝືອນດັ່ງທີ່ພວກເຂົາໄດ້ເຮັດແກ່ບັນພະບຸລຸດຂອງເພິ່ນ.
ເຢໂຮຣາມໄດ້ຂຶ້ນເປັນກະສັດ ເມື່ອເພິ່ນມີອາຍຸສາມສິບສອງປີ ແລະ ໄດ້ປົກຄອງຢູ່ໃນເຢຣູຊາເລັມເປັນເວລາແປດປີ. ເພິ່ນໄດ້ຕາຍໄປໂດຍບໍ່ມີຜູ້ໃດໂສກເສົ້າເສຍໃຈນຳເພິ່ນ, ແລະ ໄດ້ຝັງໄວ້ໃນເມືອງຂອງດາວິດ, ແຕ່ບໍ່ໄດ້ຝັງໄວ້ໃນອຸບມຸງແຫ່ງກະສັດ.
Source notes (2)
- Footnote ຄື ຢູດາ ພົບເລື້ອຍໆໃນ 2 ຂ່າວຄາວ
- Footnote ພາສາເຮັບເຣີວ່າ ເຢໂຮອາຮາດ ເປັນອີກຮູບໜຶ່ງຂອງ ອາຮາສີຢາ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.