Biblica® Open Lao Contemporary Version
2 ຂ່າວຄາວ 20
ເຢໂຮຊາຟັດເອົາຊະນະໂມອາບ ແລະ ອຳໂມນ
ຕໍ່ມາຊາວໂມອາບ ແລະ ຊາວອຳໂມນ ແລະ ຊາວເມີນິດບາງຄົນ1ໄດ້ມາຕໍ່ສູ້ກັບເຢໂຮຊາຟັດ.
ມີບາງຄົນໄດ້ມາບອກເຢໂຮຊາຟັດວ່າ, “ມີກອງທັບໃຫຍ່ກຳລັງມາຕໍ່ສູ້ທ່ານຈາກເອໂດມ,2 ຈາກທາງຟາກໜຶ່ງອີກຂອງທະເລຕາຍ3 ແລະ ບັດນີ້ ມາຮອດເມືອງຮາຊາໂຊນຕາມາແລ້ວ (ນັ້ນແມ່ນ ເມືອງເອນເກດີ)” ເຢໂຮຊາຟັດໄດ້ຕື່ນຕົກໃຈຫລາຍ ແລະ ຕັດສິນໃຈສະແຫວງຫາພຣະເຈົ້າຢາເວ. ເພິ່ນໄດ້ປະກາດໃຫ້ຖືສິນອົດອາຫານທົ່ວຢູດາຍ. ປະຊາຊົນຢູດາໄດ້ມາເຕົ້າໂຮມກັນເພື່ອສະແຫວງຫາຄວາມຊ່ວຍເຫລືອຈາກພຣະເຈົ້າຢາເວ; ພວກເຂົາມາຈາກທຸກເມືອງໃນຢູດາຍເພື່ອສະແຫວງຫາພຣະອົງ.
ເຢໂຮຊາຟັດໄດ້ຢືນຂຶ້ນໃນບ່ອນທີ່ປະຊາຊົນຂອງຢູດາຍມາຊຸມນຸມກັນ ແລະ ປະຊາຊົນຂອງເຢຣູຊາເລັມຢູ່ທີ່ເດີ່ນໃໝ່ຂອງວິຫານຂອງພຣະເຈົ້າຢາເວ ແລະ ໄດ້ອະທິຖານວ່າ:
“ຂ້າແດ່ພຣະເຈົ້າຢາເວ, ພຣະເຈົ້າຂອງບັນພະບຸລຸດຂອງພວກຂ້ານ້ອຍ, ພຣະອົງເປັນພຣະເຈົ້າຜູ້ທີ່ຢູ່ໃນສະຫວັນບໍ່ແມ່ນບໍ? ພຣະອົງປົກຄອງເໜືອອານາຈັກຂອງຊົນຊາດທັງໝົດ. ລິດອຳນາດ ແລະ ຄວາມຍິ່ງໃຫຍ່ກໍຢູ່ໃນມືຂອງພຣະອົງ, ບໍ່ມີຜູ້ໃດຕໍ່ຕ້ານພຣະອົງໄດ້. ຂ້າແດ່ພຣະເຈົ້າຂອງພວກຂ້ານ້ອຍ, ພຣະອົງໄດ້ຂັບໄລ່ປະຊາຊົນທີ່ອາໄສໃນດິນແດນນີ້ອອກໄປຕໍ່ໜ້າປະຊາຊົນອິດສະຣາເອນຂອງພຣະອົງ ແລະ ໄດ້ມອບດິນແດນໃຫ້ແກ່ເຊື້ອສາຍຂອງອັບຣາຮາມມິດສະຫາຍຂອງພຣະອົງຕະຫລອດໄປບໍ່ແມ່ນບໍ? ພວກເຮົາໄດ້ອາໄສຢູ່ບ່ອນນີ້ ແລະ ໄດ້ສ້າງສະຖານທີ່ສັກສິດເພື່ອນາມຂອງພຣະອົງ ແລະ ກ່າວວ່າ, ‘ຖ້າມີໄພພິບັດຕົກໃສ່ພວກເຈົ້າ, ບໍ່ວ່າຈະເປັນສົງຄາມ, ໂລກລະບາດ ຫລື ການອຶດຢາກອາຫານ, ພວກຂ້ານ້ອຍຈະຢືນຢູ່ຕໍ່ໜ້າພຣະອົງຄື ຕໍ່ໜ້າວິຫານທີ່ມີນາມຂອງພຣະອົງ ແລະ ຈະຮ້ອງຫາພຣະອົງໃນຍາມທຸກລຳບາກ, ແລ້ວພຣະອົງຈະຟັງ ແລະ ຊ່ວຍກູ້ພວກຂ້ານ້ອຍໃຫ້ພົ້ນ’.
“ແຕ່ບັດນີ້ ພວກທີ່ມາຈາກອຳໂມນ, ໂມອາບ ແລະ ພູເຂົາເສອີໄດ້ຢູ່ທີ່ນີ້ແລ້ວ, ເຊິ່ງເມື່ອອິດສະຣາເອນອອກມາຈາກເອຢິບ; ພຣະອົງບໍ່ໄດ້ອະນຸຍາດໃຫ້ພວກເຂົາບຸກລຸກດິນແດນນີ້; ດັ່ງນັ້ນ ອິດສະຣາເອນຈຶ່ງໄດ້ໄປທາງອື່ນ ແລະ ບໍ່ໄດ້ທຳລາຍພວກເຂົາ. ແຕ່ບັດນີ້ ເບິ່ງແມ ພວກເຂົາກໍາລັງຕອບແທນພວກເຮົາດ້ວຍການຂັບໄລ່ພວກຂ້ານ້ອຍອອກໄປຈາກດິນແດນທີ່ພຣະອົງໄດ້ມອບໃຫ້ພວກຂ້ານ້ອຍເປັນມໍລະດົກ. ຂ້າແດ່ພຣະເຈົ້າຂອງພວກຂ້ານ້ອຍ, ພຣະອົງຈະບໍ່ລົງໂທດພວກເຂົາບໍ? ເພາະພວກຂ້ານ້ອຍບໍ່ມີກຳລັງພໍທີ່ຈະປະເຊີນໜ້າກັບກອງທັບໃຫຍ່ນີ້ທີ່ກໍາລັງມາໂຈມຕີພວກຂ້ານ້ອຍ. ພວກຂ້ານ້ອຍບໍ່ຮູ້ວ່າຈະເຮັດຢ່າງໃດ, ພວກຂ້ານ້ອຍໄດ້ແຕ່ຫວັງເພິ່ງພາພຣະອົງ”.
ພວກຜູ້ຊາຍຢູດາທັງໝົດພ້ອມທັງເມຍ ແລະ ລູກ ແລະ ລູກນ້ອຍຂອງພວກເຂົາ, ພວກເຂົາກໍພາກັນຢືນຢູ່ຕໍ່ໜ້າພຣະເຈົ້າຢາເວ.
ແລ້ວພຣະວິນຍານຂອງພຣະເຈົ້າຢາເວໄດ້ລົງມາເໜືອຢາຮາຊີເອນລູກຊາຍຂອງເຊກາຣີຢາ, ລູກຊາຍຂອງເບນາອີຢາ, ລູກຊາຍຂອງເຢອີເອນ, ລູກຊາຍຂອງມັດຕານີຢາ, ຊາວເລວີຄົນໜຶ່ງ ແລະ ເປັນເຊື້ອສາຍຂອງອາສັບ, ຂະນະນັ້ນຢາຮາຊີເອນໄດ້ຢືນໃນບ່ອນຊຸມນຸມ.
ລາວໄດ້ເວົ້າວ່າ: “ຈົ່ງຟັງ, ຂ້າແດ່ກະສັດເຢໂຮຊາຟັດ ແລະ ທຸກຄົນທີ່ອາໄສຢູ່ໃນຢູດາຍ ແລະ ເຢຣູຊາເລັມ! ພຣະເຈົ້າຢາເວກ່າວກັບພວກທ່ານວ່າ, ‘ຢ່າຢ້ານ ຫລື ຢ່າທໍ້ຖອຍໃຈເລີຍ ຍ້ອນກອງທັບໃຫຍ່ນີ້. ເພາະການສູ້ຮົບບໍ່ແມ່ນຂອງພວກທ່ານ, ແຕ່ເປັນຂອງພຣະເຈົ້າ. ມື້ອື່ນຈົ່ງລົງໄປສູ້ຮົບກັບພວກເຂົາ. ພວກເຂົາຈະປີນຂຶ້ນຜ່ານທາງຊ່ອງແຄບຊີຊະ ແລະ ພວກທ່ານຈະພົບພວກເຂົາທີ່ສົ້ນສຸດຂອງຮ່ອມພູໃນຖິ່ນແຫ້ງແລ້ງກັນດານຂອງເຢຣູເອນ. ພວກທ່ານຈະບໍ່ໄດ້ຕໍ່ສູ້ໃນສະໜາມຮົບຄັ້ງນີ້. ພວກທ່ານຈົ່ງເຂົ້າປະຈຳການຢູ່; ຈົ່ງຢືນເບິ່ງການຊ່ວຍກອບກູ້ທີ່ພຣະເຈົ້າຢາເວຈະມອບໃຫ້ແກ່ພວກທ່ານ, ຢູດາຍ ແລະ ເຢຣູຊາເລັມ. ຢ່າຢ້ານ; ຢ່າທໍ້ຖອຍໃຈເລີຍ; ມື້ອື່ນຈົ່ງອອກໄປປະເຊີນໜ້າກັບພວກເຂົາ, ແລະ ພຣະເຈົ້າຢາເວຈະຢູ່ກັບພວກທ່ານ’ ”.
ເຢໂຮຊາຟັດກໍໄດ້ກົ້ມກາບລົງພື້ນດິນ, ແລະ ປະຊາຊົນຢູດາ ແລະ ປະຊາຊົນເຢຣູຊາເລັມທັງໝົດໄດ້ກົ້ມກາບນະມັດສະການຕໍ່ໜ້າພຣະເຈົ້າຢາເວ. ແລ້ວມີຊາວເລວີບາງຄົນຈາກຕະກຸນໂກຮາດ ແລະ ຈາກຕະກຸນໂກຣາໄດ້ລຸກຢືນຂຶ້ນ ແລະ ສັນລະເສີນພຣະເຈົ້າຢາເວ, ພຣະເຈົ້າແຫ່ງອິດສະຣາເອນດ້ວຍສຽງດັງໆ.
ແຕ່ເຊົ້າໆ ພວກເຂົາໄດ້ອອກໄປຖິ່ນແຫ້ງແລ້ງກັນດານທີ່ເຕກົວ. ຂະນະທີ່ພວກເຂົາຈະເດີນທາງໄປນັ້ນ, ເຢໂຮຊາຟັດໄດ້ລຸກຢືນຂຶ້ນ ແລະ ໄດ້ກ່າວວ່າ, “ຈົ່ງຟັງຂ້າພະເຈົ້າ, ຊາວຢູດາ ແລະ ຊາວເຢຣູຊາເລັມ! ຈົ່ງເຊື່ອໃນພຣະເຈົ້າຢາເວ, ພຣະເຈົ້າຂອງພວກເຈົ້າ ແລ້ວພວກເຈົ້າຈະຢືນຢູ່ໄດ້ຢ່າງໝັ້ນຄົງ; ຈົ່ງເຊື່ອບັນດາຜູ້ທໍານວາຍຂອງພຣະອົງ ແລ້ວພວກເຈົ້າຈະພົບຄວາມສຳເລັດ”. ຫລັງຈາກໄດ້ປຶກສາຫາລືກັບປະຊາຊົນແລ້ວ, ເຢໂຮຊາຟັດກໍໄດ້ແຕ່ງຕັ້ງຄົນເພື່ອຮ້ອງເພງຖວາຍພຣະເຈົ້າຢາເວ ແລະ ສັນລະເສີນສໍາລັບ4ຄວາມສະຫງ່າງາມອັນບໍລິສຸດຂອງພຣະອົງຂະນະທີ່ພວກເຂົາຍ່າງນຳໜ້າກອງທັບອອກໄປວ່າ,
“ຈົ່ງໂມທະນາຂອບພຣະຄຸນພຣະເຈົ້າຢາເວ,
ເພາະຄວາມຮັກໝັ້ນຄົງຂອງພຣະອົງກໍດຳລົງຕະຫລອດໄປເປັນນິດ”.
ເມື່ອພວກເຂົາເລີ່ມຕົ້ນຮ້ອງເພງ ແລະ ສັນລະເສີນ, ພຣະເຈົ້າຢາເວໄດ້ດັກຊຸ້ມໂຈມຕີຊາວອຳໂມນ ຊາວໂມອາບ ແລະ ຊາວພູເຂົາເສອີທີ່ກໍາລັງມາຮຸກຮານຢູດາຍນັ້ນ, ແລ້ວພວກເຂົາກໍໄດ້ພ່າຍແພ້. ຊາວອຳໂມນ ແລະ ຊາວໂມອາບລຸກຂຶ້ນຕໍ່ສູ້ພວກທະຫານມາຈາກພູເຂົາເສອີໄດ້ທຳລາຍ ແລະ ກວາດລ້າງພວກເຂົາຈົນໝົດສິ້ນ. ຫລັງຈາກພວກເຂົາໄດ້ຂ້າພວກທະຫານມາຈາກເສອີແລ້ວ. ພວກເຂົາກໍໄດ້ຫັນມາທໍາລາຍກັນເອງ.
ເມື່ອທະຫານຢູດາໄດ້ມາຮອດບ່ອນທີ່ສາມາດແນມເຫັນຖິ່ນແຫ້ງແລ້ງກັນດານ ແລະ ເບິ່ງເຫັນກອງທັບໃຫຍ່, ພວກເຂົາກໍເຫັນພຽງແຕ່ສົບຄົນຕາຍກອງກັນຢູ່ຕາມພື້ນດິນ; ບໍ່ມີຜູ້ໃດລອດຊີວິດໄປໄດ້ຈັກຄົນ. ດັ່ງນັ້ນ ເຢໂຮຊາຟັດ ແລະ ທະຫານຂອງເພິ່ນຈຶ່ງອອກໄປຢຶດເຄື່ອງຂອງຂອງພວກເຂົາ, ແລະ ພວກເຂົາພົບວ່າມີເຄື່ອງມື, ເຄື່ອງນຸ່ງຫົ່ມ5 ແລະ ຍັງມີເຄື່ອງໃຊ້ທີ່ມີຄ່າເປັນຈຳນວນຫລວງຫລາຍ. ພວກເຂົາໃຊ້ເວລາສາມວັນຈຶ່ງຂົນໄປໝົດ. ໃນວັນທີສີ່ພວກເຂົາໄດ້ມາໂຮມກັນຢູ່ທີ່ຮ່ອມພູເບຣາກາ, ແລະ ພວກເຂົາໄດ້ສັນລະເສີນພຣະເຈົ້າຢາເວຢູ່ທີ່ນັ້ນ. ດ້ວຍເຫດນີ້ຮ່ອມພູນີ້ຈຶ່ງໄດ້ຖືກເອີ້ນວ່າເບຣາກາ6ຈົນເຖິງທຸກວັນນີ້.
ຈາກນັ້ນ, ພາຍໃຕ້ການນໍາພາຂອງເຢໂຮຊາຟັດ ຊາວຢູດາ ແລະ ຊາວເຢຣູຊາເລັມທັງໝົດກໍກັບຄືນມາທີ່ເຢຣູຊາເລັມດ້ວຍຄວາມຊື່ນຊົມຍິນດີ, ເພາະພຣະເຈົ້າຢາເວໄດ້ໂຜດໃຫ້ພວກເຂົາຊື່ນຊົມຍິນດີເໜືອບັນດາສັດຕູຂອງພວກເຂົາ. ພວກເຂົາໄດ້ເຂົ້າໄປໃນເຢຣູຊາເລັມ ແລະ ໄປໃນວິຫານຂອງພຣະເຈົ້າຢາເວດ້ວຍການດີດພິນໃຫຍ່, ພິນນ້ອຍ ແລະ ເປົ່າແກ.
ອານາຈັກທັງໝົດທີ່ຢູ່ອ້ອມຮອບກໍຢ້ານກົວພຣະເຈົ້າ ເມື່ອພວກເຂົາໄດ້ຍິນວ່າ ພຣະເຈົ້າຢາເວໄດ້ສູ້ຕໍ່ກັບບັນດາສັດຕູຂອງອິດສະຣາເອນຢ່າງໃດ. ແລະ ອານາຈັກຂອງເຢໂຮຊາຟັດຈຶ່ງມີຄວາມສະຫງົບສຸກ, ເພາະພຣະເຈົ້າຂອງເພິ່ນໄດ້ໃຫ້ເພິ່ນພັກຜ່ອນຢູ່ທຸກດ້ານ.
ບັ້ນປາຍຂອງການປົກຄອງຂອງເຢໂຮຊາຟັດ
(1ກສ 22:41-50)
ດັ່ງນັ້ນ ເຢໂຮຊາຟັດໄດ້ປົກຄອງຢູດາຍ. ເພິ່ນຂຶ້ນເປັນກະສັດເມື່ອເພິ່ນອາຍຸໄດ້ 35 ປີ ແລະ ເພິ່ນໄດ້ປົກຄອງໃນເຢຣູຊາເລັມເປັນເວລາ 25 ປີ. ແມ່ຂອງເພິ່ນຄືອາຊູບາລູກສາວຂອງຊິນຮີ. ເພິ່ນໄດ້ດຳເນີນຕາມແບບຢ່າງຂອງອາສາຜູ້ເປັນພໍ່ຂອງຕົນ ແລະ ບໍ່ຕະເຫລີດໄປຈາກພວກເຂົາ; ເພິ່ນໄດ້ເຮັດສິ່ງທີ່ຖືກຕ້ອງໃນສາຍຕາຂອງພຣະເຈົ້າຢາເວ. ເຖິງຢ່າງໃດກໍຕາມ ເພິ່ນບໍ່ໄດ້ທຳລາຍສະຖານບູຊາເທິງທີ່ສູງທັງຫລາຍ ແລະ ບັນດາປະຊາຊົນຍັງບໍ່ໄດ້ຕັ້ງໃຈມາຫາພຣະເຈົ້າຂອງບັນພະບຸລຸດຂອງພວກເຂົາ.
ເຫດການອື່ນໆໃນຊ່ວງການປົກຄອງຂອງເຢໂຮຊາຟັດຕັ້ງແຕ່ຕົ້ນຈົນຈົບ, ໄດ້ຖືກຂຽນໄວ້ໃນປຶ້ມປະຫວັດສາດຂອງເຢຮູລູກຊາຍຮານານີ, ເຊິ່ງບັນທຶກໃນປຶ້ມປະຫວັດສາດຂອງບັນດາກະສັດແຫ່ງອິດສະຣາເອນ.
ຕໍ່ມາ, ກະສັດເຢໂຮຊາຟັດແຫ່ງຢູດາຍໄດ້ເຮັດພັນທະມິດກັບກະສັດອາຮາຊີຢາແຫ່ງອິດສະຣາເອນ, ເຊິ່ງເປັນວິຖີທາງທີ່ຊົ່ວຮ້າຍຫລາຍ. ເພິ່ນ ແລະ ກະສັດອາຮາຊີຢາໄດ້ຕົກລົງເພື່ອສ້າງກອງເຮືອໃນການຄ້າຂາຍ.7 ຫລັງຈາກ ສິ່ງເຫລົ່ານີ້ໄດ້ຖືກສ້າງຂຶ້ນເມືອງເອຊີໂອນເກເບ, ເອລີເອເຊລູກຊາຍຂອງໂດດາວາຮູແຫ່ງມາເຣຊາໄດ້ທຳນວາຍຕໍ່ສູ້ເຢໂຮຊາຟັດວ່າ, “ຍ້ອນທ່ານໄດ້ເຮັດພັນທະມິດກັບອາຮາຊີຢາ, ພຣະເຈົ້າຢາເວຈະທຳລາຍສິ່ງທີ່ທ່ານໄດ້ສ້າງຂຶ້ນມານັ້ນ”. ແລ້ວກອງເຮືອກໍເພພັງ ແລະ ບໍ່ສາມາດອອກໄປແລ່ນເພື່ອເຮັດການຄ້າຂາຍໄດ້.8
Source notes (8)
- Footnote ພາສາເຮັບເຣີວ່າ ຊາວອຳໂມນ
- Footnote ສຳເນົາຕົ້ນສະບັບພາສາເຮັບເຣີບາງສະບັບ ແລະ ສະບັບ LXX. ແລະ Vulg. ວ່າ ອາຣາມ
- Footnote ຄື ທະເລຕາຍ
- Footnote ຫລື ດ້ວຍ
- Footnote ສຳເນົາຕົ້ນສະບັບພາສາເຮັບເຣີສ່ວນໃຫຍ່ວ່າ ຊາກສົບ
- Footnote ແປວ່າ ສັນລະເສີນ
- Footnote ຫລື ກອງເຮືອທີ່ສາມາດໄປ ຕາກຊິດ
- Footnote ພາສາເຮັບເຣີວ່າ ຍັງບໍ່ໄດ້ໄປ ຕາກຊິດ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.