Biblica® Open Lao Contemporary Version
2 ຂ່າວຄາວ 18
ມີກາອີຢາໄດ້ທຳນວາຍກ່ຽວກັບອາຮາບ
(1ກສ 22:1-28)
ບັດນີ ເຢໂຮຊາຟັດມີຄວາມຮັ່ງມີ ແລະ ມີກຽດຊື່ສຽງຫລາຍ ແລະ ເພິ່ນໄດ້ເຮັດພັນທະມິດກັບອາຮາບໂດຍການແຕ່ງງານ. ຫລາຍປີຕໍ່ມາເຢໂຮຊາຟັດໄດ້ລົງໄປພົບອາຮາບທີ່ເມືອງຊາມາເຣຍ. ອາຮາບໄດ້ຂ້າແກະ ແລະ ງົວຫລາຍໂຕເພື່ອຕ້ອນຮັບເພິ່ນ ແລະ ຄົນທີ່ຕິດຕາມເພິ່ນມານໍາ. ແລະ ເພິ່ນໄດ້ຊັກຊວນເຢໂຮຊາຟັດໄປໂຈມຕີເມືອງຣາໂມດກີເລອາດ. ກະສັດອາຮາບແຫ່ງອິດສະຣາເອນກ່າວຖາມເຢໂຮຊາຟັດແຫ່ງຢູດາຍວ່າ, “ທ່ານຈະໄປຕໍ່ສູ້ຣາໂມດ ກີເລອາດກັບຂ້າພະເຈົ້າບໍ?”
ເຢໂຮຊາຟັດໄດ້ຕອບວ່າ, “ຂ້າພະເຈົ້າກັບທ່ານກໍເປັນຄົນດຽວກັນ, ແລະ ຄົນຂອງຂ້າພະເຈົ້າກໍເປັນຄົນຂອງທ່ານ; ພວກເຮົາຈະຮ່ວມກັນກັບທ່ານໃນການສູ້ຮົບ” ແຕ່ເຢໂຮຊາຟັດໄດ້ເວົ້າກັບກະສັດອິດສະຣາເອນອີກວ່າ, “ພວກເຮົາຄວນຖາມພຣະເຈົ້າຢາເວກ່ອນ”.
ດັ່ງນັ້ນ ກະສັດແຫ່ງອິດສະຣາເອນຈຶ່ງໄດ້ເອີ້ນບັນດາຜູ້ທໍານວາຍສີ່ຮ້ອຍຄົນໃຫ້ເຕົ້າໂຮມກັນ ແລະ ໄດ້ຖາມພວກເພິ່ນວ່າ “ພວກເຮົາຄວນຈະໄປເຮັດສົງຄາມກັບຣາໂມດກີເລອາດຫລືບໍ່? ຫລື ເຮົາບໍ່ຄວນຈະໄປ?”
ພວກເຂົາໄດ້ຕອບວ່າ, “ຈົ່ງໄປເຖີດ, ເພາະພຣະເຈົ້າຈະມອບດິນແດນນັ້ນໄວ້ໃນມືຂອງທ່ານ”.
ແຕ່ເຢໂຮຊາຟັດໄດ້ຖາມວ່າ, “ບ່ອນນີ້ບໍ່ມີຜູ້ທຳນວາຍຂອງພຣະເຈົ້າຢາເວໃຫ້ຖາມເລີຍບໍ?”
ກະສັດອິດສະຣາເອນໄດ້ຕອບເຢໂຮຊາຟັດວ່າ, “ຍັງມີຢູ່ຄົນໜຶ່ງທີ່ພວກເຮົາສາມາດຖາມພຣະເຈົ້າຢາເວຜ່ານທາງລາວໄດ້, ແຕ່ຂ້າພະເຈົ້າກຽດຊັງລາວ ເພາະລາວບໍ່ເຄີຍທຳນວາຍເລື່ອງດີກ່ຽວກັບຂ້າພະເຈົ້າເລີຍ, ມີແຕ່ເລື່ອງຮ້າຍ. ລາວຄືມີກາອີຢາລູກຊາຍຂອງອິມລາ”. ເຢໂຮຊາຟັດໄດ້ຕອບວ່າ, “ທ່ານຢ່າໄດ້ເວົ້າຢ່າງນັ້ນເລີຍ”.
ດັ່ງນັ້ນ ກະສັດອິດສະຣາເອນຈຶ່ງໄດ້ເອີ້ນຂ້າລາຊະການຂອງຕົນຄົນໜຶ່ງມາ ແລະ ເວົ້າວ່າ, “ຈົ່ງນຳໂຕມີກາອີຢາລູກຊາຍຂອງອິມລາມາດຽວນີ້”.
ກະສັດອິດສະຣາເອນ ແລະ ກະສັດເຢໂຮຊາຟັດແຫ່ງຢູດາຍໄດ້ແຕ່ງກາຍເຕັມຍົດນັ່ງຢູ່ເທິງບັນລັງຂອງຕົນທີ່ລານຟາດເຂົ້າໃກ້ທາງເຂົ້າປະຕູເມືອງຊາມາເຣຍ, ໃນຂະນະທີ່ກຸ່ມຜູ້ທຳນວາຍກໍກ່າວທຳນວາຍໄປ ຢູ່ຕໍ່ໜ້າພວກເພິ່ນ. ຝ່າຍເຊເດກີຢາລູກຊາຍຂອງເຄນາອານາໄດ້ເຮັດເຂົາເຫລັກຂຶ້ນມາ ແລະ ລາວໄດ້ປະກາດວ່າ, “ພຣະເຈົ້າຢາເວກ່າວດັ່ງນີ້ວ່າ: ‘ເຈົ້າຈະຂວິດພວກອາຣາມດ້ວຍເຂົາເຫລັກນີ້ຈົນພວກເຂົາຖືກທຳລາຍໄປ’ ”.
ຜູ້ທຳນວາຍຄົນອື່ນທັງໝົດກໍກຳລັງທຳນວາຍຢ່າງດຽວກັນ. ພວກເຂົາເວົ້າວ່າ, “ຈົ່ງບຸກເຂົ້າໂຈມຕີຣາໂມດກີເລອາດ ແລະ ມີໄຊຊະນະ, ເພາະພຣະເຈົ້າຢາເວຈະມອບເມືອງນັ້ນໄວ້ໃນມືຂອງທ່ານ”.
ຄົນທີ່ໄປນຳມີກາອີຢາມານັ້ນໄດ້ເວົ້າກັບລາວວ່າ, “ເບິ່ງແມ, ຜູ້ທຳນວາຍຄົນອື່ນໆ ລ້ວນແຕ່ທຳນວາຍເປັນສຽງດຽວກັນວ່າກະສັດຈະຊະນະ. ຂໍໃຫ້ເຈົ້າກ່າວໄປໃນທາງທີ່ດີເຊັ່ນດຽວກັບພວກເຂົາ”.
ແຕ່ມີກາອີຢາໄດ້ເວົ້າວ່າ, “ພຣະເຈົ້າຢາເວມີຊີວິດຢູ່ສັນໃດ, ຂ້າພະເຈົ້າຈະບອກເພິ່ນຕາມສິ່ງທີ່ພຣະເຈົ້າໄດ້ບອກໃຫ້ຂ້າພະເຈົ້າເວົ້າສັນນັ້ນ”.
ເມື່ອລາວມາຮອດ, ກະສັດໄດ້ຖາມລາວວ່າ, “ມີກາອີຢາເອີຍ, ພວກເຮົາຄວນຈະໄປເຮັດສົງຄາມຕໍ່ສູ້ກັບຣາໂມດກີເລອາດ ຫລື ພວກເຮົາບໍ່ຄວນໄປ?”
ລາວໄດ້ຕອບວ່າ “ຈົ່ງບຸກໂຈມຕີ ແລະ ຈະມີໄຊຊະນະ ເພາະພວກເຂົາຈະຖືກມອບໄວ້ໃນມືຂອງທ່ານ”.
ກະສັດໄດ້ກ່າວກັບລາວວ່າ, “ເຮົາຈະຕ້ອງໃຫ້ເຈົ້າສາບານຈັກເທື່ອວ່າ ຈະບໍ່ບອກສິ່ງໃດຕໍ່ເຮົາ ແຕ່ຈົ່ງບອກຄວາມຈິງໃນນາມຂອງພຣະເຈົ້າຢາເວ?”
ແລ້ວມີກາອີຢາຕອບວ່າ, “ຂ້າພະເຈົ້າເຫັນອິດສະຣາເອນທັງໝົດກະຈັດກະຈາຍໄປຕາມເນີນພູຕ່າງໆເໝືອນດັ່ງແກະທີ່ບໍ່ມີຜູ້ລ້ຽງ ແລະ ພຣະເຈົ້າຢາເວໄດ້ກ່າວວ່າ ‘ຄົນເຫລົ່ານີ້ບໍ່ມີນາຍ. ຈົ່ງໃຫ້ທຸກຄົນກັບເມືອເຮືອນຢ່າງສັນຕິເຖີດ’ ”.
ກະສັດອິດສະຣາເອນໄດ້ກ່າວກັບເຢໂຮຊາຟັດວ່າ “ຂ້າພະເຈົ້າບອກທ່ານແລ້ວບໍ່ແມ່ນບໍວ່າ ລາວບໍ່ເຄີຍທຳນວາຍເລື່ອງດີໆກ່ຽວກັບຂ້າພະເຈົ້າເລີຍ, ມີແຕ່ເລື່ອງບໍ່ດີເທົ່ານັ້ນ?”
ມີກາອີຢາເວົ້າຕໍ່ໄປວ່າ, “ເຫດສະນັ້ນ ຈົ່ງຟັງຖ້ອຍຄຳຂອງພຣະເຈົ້າຢາເວ: ຂ້າພະເຈົ້າເຫັນພຣະເຈົ້າຢາເວນັ່ງຢູ່ເທິງບັນລັງຂອງພຣະອົງພ້ອມທັງມີຝູງເທວະດາທັງໝົດກໍກຳລັງຢືນຢູ່ທີ່ຂ້າງຂວາ ແລະ ຂ້າງຊ້າຍຂອງພຣະອົງ. ແລ້ວພຣະເຈົ້າຢາເວໄດ້ກ່າວວ່າ, ‘ຜູ້ໃດຈະຫລອກຫລວງອາຮາບກະສັດແຫ່ງອິດສະຣາເອນໃຫ້ເຂົ້າໄປໂຈມຕີຣາໂມດກີເລອາດ ແລະ ເພິ່ນກໍຈະໄປຕາຍຢູ່ທີ່ນັ້ນ?’
“ເທວະດາຕົນໜຶ່ງເວົ້າຢ່າງນີ້, ແລະ ອີກຕົນໜຶ່ງກໍເວົ້າຢ່າງອື່ນ. ໃນທີ່ສຸດ, ກໍມີວິນຍານດວງໜຶ່ງກ້າວອອກໄປທາງໜ້າ, ຢືນຢູ່ຕໍ່ໜ້າພຣະເຈົ້າຢາເວ ແລະ ໄດ້ເວົ້າວ່າ, ‘ຂ້ານ້ອຍຈະໄປຫລອກຫລວງລາວ’.
“ພຣະເຈົ້າຢາເວໄດ້ຖາມວ່າ ‘ເຮັດແນວໃດ?’
“ລາວໄດ້ຕອບວ່າ ‘ຂ້ານ້ອຍຈະໄປເປັນວິນຍານຫລອກຫລວງໃນປາກຂອງບັນດາຜູ້ທໍານວາຍທຸກຄົນຂອງເພິ່ນ’.
“ພຣະເຈົ້າຢາເວໄດ້ກ່າວວ່າ ‘ຈົ່ງໄປເຮັດຢ່າງນັ້ນ, ເຈົ້າຈະຫລອກຫລວງລາວໄດ້ສຳເລັດ’.
“ດັ່ງນັ້ນ ພຣະເຈົ້າຢາເວຈຶ່ງໄດ້ໃສ່ວິນຍານຫລອກຫລວງໃນປາກຂອງບັນດາຜູ້ທໍານວາຍເຫລົ່ານີ້ຂອງເພິ່ນ. ພຣະເຈົ້າຢາເວມີດຳລັດໃຫ້ທ່ານປະສົບໄພພິບັດແລ້ວ”.
ແລ້ວເຊເດກີຢາລູກຊາຍຂອງເຄນາອານາຈຶ່ງເຂົ້າມາຕົບໜ້າມີກາອີຢາ ແລະ ຖາມວ່າ “ພຣະວິນຍານຈາກ1ພຣະເຈົ້າຢາເວອອກຈາກຂ້ອຍໄປເວົ້າກັບເຈົ້າໄດ້ຢ່າງໃດ?”
ມີກາອີຢາໄດ້ຕອບວ່າ “ເຈົ້າຈະຮູ້ໃນມື້ທີເຈົ້າໄປລີ້ຢູ່ໃນຫ້ອງຊັ້ນໃນ”.
ແລ້ວກະສັດແຫ່ງອິດສະຣາເອນໄດ້ສັ່ງວ່າ, “ຈົ່ງຈັບມີກາອີຢາ ແລະ ສົ່ງລາວໄປຫາອາໂມນຜູ້ປົກຄອງເມືອງ ແລະ ໄປຫາໂຢອາດລູກຊາຍຂອງເຮົາ, ແລະ ບອກວ່າ ‘ກະສັດກ່າວດັ່ງນີ້ວ່າ: ຈົ່ງຂັງຊາຍຜູ້ນີ້ໄວ້ໃນຄຸກ ແລະ ຢ່າເອົາຫຍັງໃຫ້ລາວ ນອກຈາກເຂົ້າຈີ່ກັບນ້ຳຈົນກວ່າເຮົາຈະກັບມາຢ່າງປອດໄພ’ ”.
ມີກາອີຢາກໍປະກາດວ່າ, “ຖ້າທ່ານກັບຄືນມາຢ່າງປອດໄພ, ພຣະເຈົ້າຢາເວບໍ່ໄດ້ກ່າວຜ່ານທາງຂ້ານ້ອຍ” ແລ້ວລາວກໍເວົ້າຕື່ມອີກວ່າ, “ທຸກຄົນຈົ່ງຈື່ຄຳເວົ້າຂອງຂ້ານ້ອຍໄວ້!”
ອາຮາບຖືກຂ້າທີ່ຣາໂມດກີເລອາດ
(1ກສ 22:29-36)
ດັ່ງນີ້ ກະສັດແຫ່ງອິດສະຣາເອນ ແລະ ເຢໂຮຊາຟັດກະສັດແຫ່ງຢູດາຍຈຶ່ງໄດ້ໄປທີ່ຣາໂມດກີເລອາດ. ກະສັດແຫ່ງອິດສະຣາເອນໄດ້ເວົ້າກັບເຢໂຮຊາຟັດວ່າ “ຂ້າພະເຈົ້າຈະປອມຕົວອອກໄປສູ້ຮົບ ແຕ່ໃຫ້ທ່ານນຸ່ງເຄື່ອງກະສັດຂອງທ່ານ”. ສະນັ້ນ ກະສັດແຫ່ງອິດສະຣາເອນກໍໄດ້ປອມຕົວ ແລະ ໄດ້ເຂົ້າໄປໃນສະໜາມຮົບ.
ຝ່າຍກະສັດອາຣາມໄດ້ສັ່ງຜູ້ບັນຊາການລົດມ້າຮົບຂອງເພິ່ນວ່າ “ຢ່າຕໍ່ສູ້ກັບຜູ້ໃດ, ບໍ່ວ່າຜູ້ໃຫຍ່ ຫລື ຜູ້ນ້ອຍ, ແຕ່ຈົ່ງຕໍ່ສູ້ກັບກະສັດອິດສະຣາເອນຜູ້ດຽວເທົ່ານັ້ນ”. ເມື່ອຜູ້ບັນຊາການລົດມ້າຮົບເຫລົ່ານັ້ນເຫັນເຢໂຮຊາຟັດ, ພວກເຂົາກໍຄິດວ່າ “ນີ້ເປັນກະສັດອິດສະຣາເອນ”. ດັ່ງນັ້ນ ພວກເຂົາຈຶ່ງຫັນມາໂຈມຕີເພິ່ນ, ແຕ່ເຢໂຮຊາຟັດຮ້ອງຂໍ ແລ້ວພຣະເຈົ້າຢາເວກໍຊ່ວຍເພິ່ນ. ພຣະເຈົ້າໄດ້ເຮັດໃຫ້ພວກເຂົາຖອຍຫ່າງອອກໄປຈາກເພິ່ນ. ເມື່ອຜູ້ບັນຊາການລົດຮົບໄດ້ເຫັນວ່າ ເພິ່ນບໍ່ແມ່ນກະສັດແຫ່ງອິດສະຣາເອນ; ພວກເຂົາຈຶ່ງຢຸດໄລ່ໂຈມຕີເພິ່ນ.
ແຕ່ມີຄົນໜຶ່ງໄດ້ຍິງລູກທະນູຂອງຕົນສຸມໄປ ແລະ ຖືກກະສັດອິດສະຣາເອນທີ່ບ່ອນຮອຍຕໍ່ຂອງເສື້ອເກາະ. ກະສັດຈຶ່ງບອກຜູ້ຂັບລົດມ້າຮົບຂອງເພິ່ນວ່າ, “ຈົ່ງຂັບລົດມ້າຮົບກັບຄືນ ແລະ ເອົາເຮົາອອກໄປຈາກສະໜາມຮົບນີ້. ເຮົາບາດເຈັບແລ້ວ”. ການສູ້ຮົບໄດ້ດຳເນີນໄປຢ່າງດຸເດືອດຕະຫລອດທັງວັນ ແລະ ກະສັດອິດສະຣາເອນໄດ້ຖືກປະຄອງຕົວຂຶ້ນໄວ້ໃນລົດມ້າຮົບໃຫ້ປະເຊີນໜ້າກັບຊາວອາຣາມຈົນເຖິງຕອນແລງ. ເມື່ອຕາເວັນຕົກດິນເພິ່ນກໍສິ້ນໃຈຕາຍໄປ.
Source notes (1)
- Footnote ຫລື ພະວິນຍານຂອງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.