Biblica® Open Lao Contemporary Version
2 ຂ່າວຄາວ 16
ປີສຸດທ້າຍຂອງອາສາ
(1ກສ 15:17-24)
ໃນປີທີສາມສິບຫົກຂອງການປົກຄອງຂອງອາສາ, ກະສັດບາອາຊາແຫ່ງອິດສະຣາເອນໄດ້ມາຕໍ່ສູ້ຢູດາຍ ແລະ ໄດ້ສ້າງປ້ອມປ້ອງກັນທີ່ເມືອງຣາມາເພື່ອປ້ອງກັນບໍ່ຜູ້ໃດໜີໄປ ຫລື ເຂົ້າໄປໃນເຂດແດນຂອງກະສັດອາສາແຫ່ງຢູດາຍ.
ແລ້ວອາຊາໄດ້ນຳເງິນ ແລະ ຄຳອອກມາຈາກຄັງວິຫານຂອງພຣະເຈົ້າຢາເວ ແລະ ຈາກວັງຂອງເພິ່ນເອງ ແລະ ສົ່ງໄປໃຫ້ກະສັດເບັນຮາດາດແຫ່ງອາຣາມ, ຜູ້ທີ່ປົກຄອງຢູ່ທີ່ເມືອງດາມັສກັດ. ເພິ່ນໄດ້ກ່າວວ່າ, ກະສັດອາສາໄດ້ເວົ້າວ່າ, “ຂໍໃຫ້ພວກເຮົາເປັນພັນທະມິດກັນເໝືອນກັບພໍ່ຂອງພວກເຮົາທັງສອງ. ເບິ່ງແມ, ຂ້າພະເຈົ້າໄດ້ສົ່ງເງິນ ແລະ ຄຳນີ້ມາເປັນຂອງຂັວນແກ່ທ່ານ. ບັດນີ້ ຂໍໃຫ້ເຊົາເປັນພັນທະມິດກັບກະສັດບາອາຊາແຫ່ງອິດສະຣາເອນ ເພື່ອເພິ່ນຈະໄດ້ຖອຍທັບໄປຈາກຂ້າພະເຈົ້າ”.
ເບັນຮາດາດໄດ້ຕົກລົງກັບກະສັດອາສາ ແລະ ໄດ້ສົ່ງບັນດາຜູ້ບັນຊາການກອງທັບຂອງເພິ່ນໄປໂຈມຕີເມືອງຕ່າງໆຂອງອິດສະຣາເອນ. ພວກເຂົາໄດ້ເອົາຊະນະເມືອງອີໂຢນ, ດານ, ອາເບນເບັດມາອາກາ ແລະ ເມືອງທັງໝົດທີ່ເປັນບ່ອນເກັບສະບຽງອາຫານຂອງເນັບທາລີ. ເມື່ອກະສັດບາອາຊາໄດ້ຍິນເລື່ອງນີ້, ເພິ່ນກໍຢຸດສ້າງເມືອງຣາມາ ແລະ ປະວຽກງານຂອງເພິ່ນໄວ້. ແລ້ວກະສັດອາສາຈຶ່ງໄດ້ພາຊາວຢູດາທັງໝົດໄປນໍາ ແລະ ພວກເຂົາໄດ້ຂົນຫີນ ແລະ ໄມ້ທ່ອນຈາກເມືອງຣາມາໄປທີ່ບາອາຊາກໍາລັງໃຊ້ສ້າງເມືອງນັ້ນ. ເພິ່ນໄດ້ນໍາເອົາສິ່ງເຫລົ່ານີ້ໄປສ້າງເມືອງເກບາ ແລະ ມີຊະປາ.
ໃນເວລານັ້ນ ຜູ້ທຳນວາຍຮານານີໄດ້ໄປພົບກະສັດອາສາແຫ່ງຢູດາຍ ແລະ ກ່າວກັບເພິ່ນວ່າ, “ຍ້ອນທ່ານເພິ່ງພາກະສັດແຫ່ງອາຣາມ ແລະ ບໍ່ໄດ້ເພິ່ງພາພຣະເຈົ້າຢາເວ ພຣະເຈົ້າຂອງທ່ານ. ກອງທັບຂອງກະສັດແຫ່ງອາຣາມຈຶ່ງຖອຍໜີໄປຈາກມືຂອງທ່ານ. ຊາວກູເຊ1 ແລະ ຊາວລີເບຍມີກອງທັບອັນຍິ່ງໃຫຍ່ພ້ອມທັງລົດຮົບ ແລະ ທະຫານມ້າ2ເປັນຈຳນວນຫລວງຫລາຍບໍ່ແມ່ນບໍ? ແຕ່ເມື່ອທ່ານເພິ່ງພາພຣະເຈົ້າຢາເວ, ພຣະອົງກໍໄດ້ມອບພວກເຂົາໄວ້ໃນມືຂອງທ່ານ. ເພາະສາຍຕາຂອງພຣະເຈົ້າຢາເວໄດ້ເຝົ້າເບິ່ງໄປທົ່ວແຜ່ນດິນໂລກ ເພື່ອໃຫ້ກໍາລັງແກ່ຜູ້ທີ່ທຸ້ມເທ້ຢ່າງສຸດໃຈຕໍ່ພຣະອົງ. ທ່ານໄດ້ເຮັດໃນສິ່ງທີ່ໂງ່ຈ້າທີ່ສຸດ ແລະ ຕັ້ງແຕ່ບັດນີ້ໄປທ່ານຈະຕ້ອງເຮັດເສິກສົງຄາມຢູ່ເລື້ອຍໆ”.
ອາສາໄດ້ໃຈຮ້າຍໃຫ້ກັບຜູ້ທຳນວາຍ ເພາະໄດ້ກ່າວເລື່ອງນີ້; ເພິ່ນໄດ້ຈັບລາວໄປຂັງໄວ້ໃນຄຸກ. ໃນເວລາດຽວກັນນັ້ນ ອາສາກົດຂີ່ປະຊາຊົນບາງຄົນຢ່າງໂຫດຮ້າຍ.
ເຫດການຕ່າງໆໃນຊ່ວງການປົກຄອງຂອງອາສາ, ຕັ້ງແຕ່ຕົ້ນຈົນຈົບໄດ້ຖືກຂຽນໄວ້ໃນປື້ມຂອງບັນດາກະສັດແຫ່ງຢູດາຍ ແລະ ອິດສະຣາເອນ. ໃນປີທີສາມສິບເກົ້າຂອງການປົກຄອງຂອງເພິ່ນ ອາສາເປັນເຈັບປ່ວຍຢ່າງຮ້າຍແຮງດ້ວຍພະຍາດຢູ່ທີ່ຕີນຂອງເພິ່ນ, ເຖິງແມ່ນວ່າ ພະຍາດຂອງເພິ່ນຈະຮ້າຍແຮງ, ເພິ່ນກໍບໍ່ໄດ້ສະແຫວງຫາຄວາມຊ່ວຍເຫລືອຈາກພຣະເຈົ້າຢາເວ, ແຕ່ເພິ່ນເພິ່ງພາແພດໝໍເທົ່ານັ້ນ. ແລ້ວໃນປີທີສີ່ສິບເອັດຂອງການປົກຄອງຂອງເພິ່ນ ອາສາກໍໄດ້ຕາຍໄປ ແລະ ໄດ້ລ່ວງລັບໄປຢູ່ກັບບັນພະບຸລຸດຂອງເພິ່ນ. ພວກເຂົາໄດ້ຝັງເພິ່ນໄວ້ໃນອຸບມຸງທີ່ເພິ່ນໄດ້ເຮັດໄວ້ສຳລັບເພິ່ນເອງໃນເມືອງຂອງດາວິດ. ພວກເຂົາໄດ້ເອົາສົບເພິ່ນວາງໄວ້ເທິງກວຽນທີ່ຫໍ່ດ້ວຍເຄື່ອງເທດ ແລະ ນໍ້າມັນຫອມນາໆຊະນິດ ແລະ ພວກເຂົາກໍ່ໄຟກອງໃຫຍ່ຂຶ້ນເພື່ອໃຫ້ກຽດແກ່ເພິ່ນ.
Source notes (2)
- Footnote ຄື ປະຊາຊົນຈາກເຂດແມ່ນ້ຳນິນຕອນເທິງ
- Footnote ຫລື ພົນລົດຮົບ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.