Biblica® Open Lao Contemporary Version
2 ຂ່າວຄາວ 14
ແລ້ວອາບີຢາໄດ້ລ່ວງລັບໄປຢູ່ກັບບັນພະບຸລຸດຂອງເພິ່ນ ແລະ ໄດ້ຖືກຝັງໄວ້ໃນເມືອງຂອງດາວິດ. ອາສາລູກຊາຍຂອງເພິ່ນໄດ້ຂຶ້ນເປັນກະສັດແທນເພິ່ນ. ໃນສະໄໝຂອງເພິ່ນປະເທດຊາດກໍມີຄວາມສະຫງົບສຸກເປັນເວລາສິບປີ.
ກະສັດອາສາແຫ່ງຢູດາຍ
(1ກສ 15:11-12)
ອາສາໄດ້ເຮັດສິ່ງທີ່ດີ ແລະ ຖືກຕ້ອງໃນສາຍຕາຂອງພຣະເຈົ້າຢາເວ ພຣະເຈົ້າຂອງເພິ່ນ. ເພິ່ນໄດ້ລົບລ້າງແທ່ນບູຊາຂອງຄົນຕ່າງດ້າວ ແລະ ສະຖານບູຊາເທິງທີ່ສູງ, ເພິ່ນໄດ້ທໍາລາຍຫີນສັກສິດຖິ້ມ ແລະ ໄດ້ຕັດເສົາຂອງຮູບເຈົ້າແມ່ອາເຊຣາລົງ.1 ເພິ່ນໄດ້ສັ່ງປະຊາຊົນຢູດາໃຫ້ສະແຫວງຫາພຣະເຈົ້າຢາເວ, ພຣະເຈົ້າຂອງບັນພະບຸລຸດຂອງພວກເຂົາ, ແລະ ເຊື່ອຟັງກົດບັນຍັດ ແລະ ຂໍ້ຄຳສັ່ງຂອງພຣະອົງ. ເພິ່ນໄດ້ລົບລ້າງສະຖານບູຊາເທິງທີ່ສູງ ແລະ ແທ່ນເຜົາເຄື່ອງຫອມອອກຈາກທຸກເມືອງໃນຢູດາຍ, ແລະ ອານາຈັກຂອງເພິ່ນຈຶ່ງມີຄວາມສະຫງົບສຸກພາຍໃຕ້ການປົກຄອງຂອງເພິ່ນ. ເພິ່ນໄດ້ສ້າງເມືອງປ້ອມປ້ອງກັນຕ່າງໆຂອງຢູດາຍຂຶ້ນ, ເນື່ອງຈາກແຜ່ນດິນມີສະຫງົບສຸກແລ້ວ. ບໍ່ຜູ້ໃດມາສູ້ຮົບກັບເພິ່ນເປັນເວລາຫລາຍປີໃນຊ່ວງນັ້ນ, ເພາະພຣະເຈົ້າຢາເວໄດ້ໃຫ້ເພິ່ນພັກຜ່ອນ.
ອາສາໄດ້ກ່າວກັບຊາວຢູດາວ່າ, “ໃຫ້ພວກເຮົາສ້າງເມືອງເຫລົ່ານີ້ຂຶ້ນ ແລະ ເຮັດກຳແພງອ້ອມເມືອງໄວ້, ພ້ອມທັງເຮັດຫໍຄອຍ, ປະຕູ ແລະ ກອນປະຕູ. ດິນແດນຍັງເປັນຂອງພວກເຮົາ. ເພາະພວກເຮົາໄດ້ສະແຫວງຫາພຣະເຈົ້າຢາເວ ພຣະເຈົ້າຂອງພວກເຮົາ; ພວກເຮົາສະແຫວງຫາພຣະອົງ ແລະ ພຣະອົງຈຶ່ງໃຫ້ເຮົາມີຄວາມສະຫງົບສຸກຢູ່ທຸກດ້ານ”. ດັ່ງນັ້ນ ພວກເຂົາຈຶ່ງໄດ້ກໍ່ສ້າງ ແລະ ຈະເລີນຮຸ່ງເຮືອງຂຶ້ນ.
ອາສາກອງທັບທີ່ມີທະຫານສາມແສນຄົນຈາກເຜົ່າຢູດາ, ເຊິ່ງມີທະຫານຖືໂລ່ໃຫຍ່ ແລະ ຫອກ, ແລະ ມີທະຫານສອງແສນແປດສິບພັນຄົນຈາກເຜົ່າເບັນຢາມິນ ເຊິ່ງພວກເຂົາຖືໂລ່ນ້ອຍ ແລະ ທະນູ. ທະຫານທັງໝົດເຫລົ່ານີ້ເປັນນັກຮົບທີ່ກ້າຫານ.
ເຊຣາຊາວກູເຊຍົກທັບ2ອອກມາຕໍ່ສູ້ພວກເຂົາດ້ວຍກອງທັບທີ່ມີທະຫານໜຶ່ງລ້ານຄົນພ້ອມທັງລົດຮົບສາມຮ້ອຍຄັນ ແລະ ໄດ້ບຸກມາຮອດເມືອງມາເຣຊາ. ອາສາໄດ້ອອກມາປະເຊີນໜ້າກັບເຊຣາ ແລະ ພວກເຂົາໄດ້ຕັ້ງແນວສູ້ຮົບໃນຮ່ອມພູເຊຟາທາໃກ້ກັບເມືອງມາເຣຊາ.
ແລ້ວອາສາໄດ້ອະທິຖານຕໍ່ພຣະເຈົ້າຢາເວ ພຣະເຈົ້າຂອງເພິ່ນວ່າ, “ຂ້າແດ່ພຣະເຈົ້າຢາເວ, ບໍ່ມີຜູ້ໃດເໝືອນພຣະອົງທີ່ຈະຊ່ວຍຜູ້ທີ່ອ່ອນແອຕໍ່ສູ້ກັບຜູ້ມີກໍາລັງ. ຂ້າແດ່ພຣະເຈົ້າຢາເວ ພຣະເຈົ້າຂອງພວກຂ້ານ້ອຍ, ຂໍໂຜດຊ່ວຍພວກຂ້ານ້ອຍດ້ວຍ, ເພາະພວກຂ້ານ້ອຍເພິ່ງພາພຣະອົງ, ແລະ ພວກຂ້ານ້ອຍໄດ້ມາຕໍ່ສູ້ກອງທັບທີ່ໃຫຍ່ນີ້ໃນນາມຂອງພຣະອົງ. ຂ້າແດ່ພຣະເຈົ້າຢາເວ, ພຣະອົງເປັນພຣະເຈົ້າຂອງຂ້ານ້ອຍ; ຂໍຢ່າໃຫ້ມະນຸດຊະນະພຣະອົງເລີຍ”.
ພຣະເຈົ້າຢາເວໄດ້ເອົາຊະນະຊາວກູເຊຕໍ່ໜ້າອາສາ ແລະ ຊາວຢູດາ. ຊາວກູເຊໄດ້ປົບໜີໄປ, ແລະ ອາສາ ແລະ ກອງທັບຂອງເພິ່ນໄດ້ໄລ່ຕາມພວກເຂົາຈົນໄປຮອດເກຣາກ. ຊາວກູເຊລົ້ມຕາຍເປັນຈໍານວນຫລວງຫລາຍຈົນພວກເຂົາບໍ່ສາມາດຟື້ນຕົວຄືນມາໄດ້ອີກ; ພວກເຂົາຖືກຍ່ອງຕໍ່ໜ້າພຣະເຈົ້າຢາເວ ແລະ ກຳລັງຂອງພຣະອົງ. ທະຫານຢູດາໄດ້ຢຶດເຄື່ອງຂອງໄດ້ເປັນຈໍານວນຫລວງຫລາຍ. ພວກເຂົາກໍທຳລາຍໝູ່ບ້ານທັງໝົດທີ່ຢູ່ອ້ອມເຂດເມືອງເກຣາກ, ເພາະຄວາມຢ້ານກົວຂອງພຣະເຈົ້າຢາເວໄດ້ຢູ່ເໜືອພວກເຂົາ. ທະຫານຢູດາໄດ້ປຸ້ນໝູ່ບ້ານທັງໝົດເຫລົ່ານີ້, ເນື່ອງຈາກວ່າມີການປຸ້ນສະດົມຢ່າງຫລວງຫລາຍຢູ່ທີ່ນັ້ນ. ພວກເຂົາຍັງໄດ້ໂຈມຕີຄ້າຍຂອງຄົນລ້ຽງສັດ ແລະ ໄດ້ຕ້ອນເອົາຝູງແກະ, ຝູງແບ້ ແລະ ຝູງອູດເປັນຈໍານວນຫລາຍໄປນໍາດ້ວຍ. ແລ້ວພວກເຂົາກໍກັບຄືນມາທີ່ເຢຣູຊາເລັມ.
Source notes (2)
- Footnote ຄື ສັນຍະລັກຂອງເຈົ້າແມ່ອາເຊຣາ ເຊັ່ນດຽວກັບທີ່ອື່ນໆໃນ 2 ຂ່າວຄາວໄດ້ຕັດສັນຍາລັກຂອງຮູບເຈົ້າແມ່ອາເຊຣາລົງ
- Footnote ພາສາເຮັບເຣີວ່າ ດ້ວຍກອງທັບນັບແສນ ຫລື ດ້ວຍກອງທັບນັບພັນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.