Biblica® Open Lao Contemporary Version
1 ຊາມູເອນ 29
ອາກີເຊສົ່ງດາວິດກັບໄປຊິກລັກ
ຊາວຟີລິດສະຕິນລະດົມກຳລັງທັງໝົດຢູ່ທີ່ອາເຟັກ ແລະ ຊາວອິດສະຣາເອນໄດ້ຕັ້ງຄ້າຍພັກຢູ່ທີ່ແຄມນ້ຳພຸໃນຢິດຊະເຣນ. ເມື່ອບັນດາຜູ້ມີອຳນາດປົກຄອງຂອງຟີລິດສະຕິນຍົກຂະບວນອອກໄປເປັນກອງຮ້ອຍ ແລະ ກອງພັນ, ດາວິດ ແລະ ຄົນຂອງເພິ່ນກໍໄດ້ຮ່ວມຂະບວນເປັນກອງຫລັງພ້ອມກັບອາກີເຊ. ຜູ້ບັນຊາການຟີລິດສະຕິນໄດ້ຖາມວ່າ, “ຄົນເຮັບເຣີເຫລົ່ານີ້ມາເຮັດຫຍັງຢູ່ບ່ອນນີ້?”
ອາກີເຊໄດ້ຕອບວ່າ, “ບໍ່ແມ່ນດາວິດຜູ້ເປັນອະດີດທະຫານຂອງກະສັດໂຊນແຫ່ງອິດສະຣາເອນບໍ? ລາວມາຢູ່ກັບເຮົາໄດ້ປີປາຍແລ້ວ ແລະ ເຮົາບໍ່ພົບຂໍ້ບົກພ່ອງຂອງລາວເລີຍ, ຕັ້ງແຕ່ລາວຈາກໂຊນມາ”.
ແຕ່ບັນດາຜູ້ບັນຊາການຟີລິດສະຕິນພາກັນໃຈຮ້າຍໃຫ້ອາກີເຊ ແລະ ເວົ້າວ່າ, “ຈົ່ງສົ່ງລາວກັບໄປ ເພື່ອລາວຈະໄດ້ກັບໄປບ່ອນທີ່ທ່ານໄດ້ກຳນົດໃຫ້. ຫ້າມບໍ່ໃຫ້ລາວໄປຊ່ວຍພວກເຮົາຮົບເດັດຂາດ, ບໍ່ດັ່ງນັ້ນລາວຈະທໍລະຍົດພວກເຮົາ ແລະ ໄປເຂົ້າຂ້າງນາຍເກົ່າຂອງຕົນ ລອງຄິດເບິ່ງວ່າລາວຈະໄດ້ຮັບຄວາມພໍໃຈຫລາຍເທົ່າໃດຈາກການນຳຫົວຂອງພວກເຮົາໄປມອບໃຫ້? ດາວິດຄົນນີ້ບໍ່ແມ່ນບໍທີ່ພວກເຂົາຟ້ອນລຳຮ້ອງເພງວ່າ:
“ ‘ໂຊນໄດ້ຂ້າສັດຕູເປັນພັນ,
ແລະ ດາວິດໄດ້ຂ້າສັດຕູເປັນໝື່ນ’?”
ດັ່ງນັ້ນ ອາກີເຊຈຶ່ງໄດ້ເອີ້ນດາວິດມາ ແລະ ເວົ້າກັບດາວິດວ່າ, “ພຣະເຈົ້າຢາເວມີຊີວິດຢູ່ສັນໃດ, ເຈົ້າເປັນຄົນທີ່ໜ້າເຊື່ອຖື ແລະ ເຮົາຈະດີໃຈຫລາຍຖ້າໄດ້ເຈົ້າເຂົ້າມາຮ່ວມກອງທັບກັບເຮົາສັນນັ້ນ. ຕັ້ງແຕ່ມື້ທີ່ເຈົ້າມາຫາເຮົາຈົນເຖິງວັນນີ້, ເຮົາບໍ່ພົບຂໍ້ບົກພ່ອງໃນໂຕເຈົ້າເລີຍ, ແຕ່ບັນດາຜູ້ມີອຳນາດປົກຄອງບໍ່ຍອມຮັບເຈົ້າ. ບັດນີ້ ຈົ່ງກັບໄປ ແລະ ໄປຢ່າງສັນຕິ; ຢ່າເຮັດຫຍັງໃຫ້ບັນດາຜູ້ມີອຳນາດປົກຄອງຂອງຟີລິດສະຕິນບໍ່ພໍໃຈເລີຍ”.
ດາວິດໄດ້ຖາມວ່າ, “ຂ້ານ້ອຍໄດ້ເຮັດຫຍັງຜິດ? ນັບແຕ່ມື້ທີ່ຂ້ານ້ອຍມາພົບທ່ານຈົນບັດນີ້ ທ່ານພົບສິ່ງໃດບໍ່ດີໃນໂຕຂ້ານ້ອຍບໍ? ເປັນຫຍັງຂ້ານ້ອຍຈຶ່ງອອກໄປສູ້ຮົບກັບສັດຕູຂອງທ່ານຜູ້ເປັນເຈົ້ານາຍຂອງຂ້ານ້ອຍບໍ່ໄດ້?”
ອາກີເຊໄດ້ຕອບວ່າ, “ເຮົາຮູ້ວ່າເຈົ້າເປັນທີ່ພໍໃຈໃນສາຍຕາຂອງເຮົາເໝືອນທູດຂອງພຣະເຈົ້າ; ແຕ່ຜູ້ບັນຊາການຟີລິດສະຕິນໄດ້ເວົ້າວ່າ, ‘ຫ້າມບໍ່ໃຫ້ລາວໄປຊ່ວຍພວກເຮົາຮົບເດັດຂາດ’. ເຈົ້າກັບບໍລິວານຂອງນາຍເຈົ້າຈົ່ງຕື່ນຂຶ້ນແຕ່ເຊົ້າ ແລະ ກັບໄປທັນທີເມື່ອຟ້າແຈ້ງ”.
ດັ່ງນັ້ນ ດາວິດກັບຄົນຂອງເພິ່ນຈຶ່ງຕື່ນຂຶ້ນແຕ່ເຊົ້າ ແລະ ກັບໄປທີ່ດິນແດນຟີລິດສະຕິນ, ສ່ວນກອງທັບຟີລິດສະຕິນແມ່ນໄດ້ເຄື່ອນໄປທີ່ຢິດຊະເຣນ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.