Biblica® Open Lao Contemporary Version
1 ຊາມູເອນ 25
ດາວິດ, ນາບານ ແລະ ອາບີກາຍ
ບັດນີ້ ຊາມູເອນກໍໄດ້ຕາຍໄປ ແລະ ຊາວອິດສະຣາເອນທັງໝົດກໍພາກັນໄວ້ທຸກໃຫ້ແກ່ເພິ່ນ; ແລ້ວຝັງສົບເພິ່ນໄວ້ທີ່ຣາມາບ້ານເກີດຂອງເພິ່ນ. ສ່ວນດາວິດແມ່ນຍ້າຍລົງໄປທີ່ຖິ່ນແຫ້ງແລ້ງກັນດານປາຣານ.1
ມີເສດຖີຄົນໜຶ່ງໃນມາໂອນ, ເຊິ່ງມີຊັບສົມບັດຢູ່ທີ່ກາເມນ. ລາວມີແບ້ໜຶ່ງພັນໂຕ ແລະ ແກະສາມພັນໂຕ, ໃນຂະນະລາວໄດ້ໄປທີ່ກາກເມນເພື່ອຕັດຂົນແກະ. ເສດຖີຄົນນີ້ມີຊື່ວ່ານາບານ ລາວເປັນເຊື້ອສາຍຂອງກາເຫລັບ ແລະ ເມຍຂອງລາວກໍມີຊື່ວ່າອາບີກາຍ. ນາງເປັນຄົນງາມ ແລະ ສະຫລາດ, ແຕ່ຜົວຂອງນາງເປັນຄົນໃຈແຄບ ແລະ ຫຍາບຄາຍ.
ຂະນະທີ່ດາວິດຢູ່ໃນຖິ່ນແຫ້ງແລ້ງກັນດານ, ເພິ່ນກໍໄດ້ຍິນວ່ານາບານກຳລັງຕັດຂົນແກະຢູ່. ດັ່ງນັ້ນ ລາວຈຶ່ງໄດ້ສັ່ງຊາຍໜຸ່ມສິບຄົນວ່າ, “ຈົ່ງໄປຫານາບານຢູ່ທີ່ກາກເມນ ແລະ ທັກທາຍລາວໃນນາມຂອງເຮົາ. ຈົ່ງເວົ້າກັບລາວວ່າ: ‘ຂໍໃຫ້ທ່ານມີອາຍຸຍືນຍາວ! ຂໍໃຫ້ທ່ານ ແລະ ຄອບຄົວຂອງທ່ານມີສຸຂະພາບດີ! ແລະ ຂໍໃຫ້ທຸກສິ່ງທີ່ເປັນຂອງທ່ານຈະເລີນຂຶ້ນ!
“ ‘ຂ້າພະເຈົ້າຮູ້ມາວ່າທ່ານກຳລັງຕັດຂົນແກະ. ພວກຂ້າພະເຈົ້າບໍ່ເຄີຍທຳຮ້າຍຄົນລ້ຽງແກະຂອງທ່ານເລີຍຂະນະທີ່ພວກເຂົາອາໄສຢູ່ທ່າມກາງພວກຂ້າພະເຈົ້າ ແລະ ຕະຫລອດເວລາທີ່ພວກເຂົາຢູ່ໃນກາກເມນກໍບໍ່ມີສິ່ງໃດຂາດຫາຍໄປ. ຂໍໃຫ້ຖາມຄົນຂອງທ່ານເບິ່ງວ່າເປັນເໝືອນທີ່ກ່າວມານີ້ບໍ. ເຫດສະນັ້ນ ຂໍທ່ານໄດ້ເອຶ້ອເຟຶ້ອແກ່ຄົນຂອງຂ້າພະເຈົ້າ, ເພາະພວກຂ້າພະເຈົ້າມາໃນງານລ້ຽງສະຫລອງນີ້. ຂໍໃຫ້ດາວິດລູກຊາຍຂອງທ່ານ ແລະ ຜູ້ຮັບໃຊ້ຂອງທ່ານແລ້ວແຕ່ຈະເອື້ອເຟື້ອພວກເຂົາ’ ”.
ເມື່ອບັນດາຄົນຂອງດາວິດມາຮອດ, ພວກເຂົາກໍບອກໃຫ້ນາບານຮູ້ຕາມນັ້ນໃນນາມຂອງດາວິດ. ຫລັງຈາກນັ້ນ ພວກເຂົາກໍລໍຟັງຄຳຕອບ.
ນາບານໄດ້ຕອບບັນດາຄົນຮັບໃຊ້ຂອງດາວິດວ່າ, “ດາວິດແມ່ນຜູ້ໃດ? ລູກຊາຍຂອງເຢຊີຄົນນີ້ແມ່ນຜູ້ໃດ? ທຸກມື້ນີ້ກໍມີລູກຈ້າງຫລາຍຄົນໄດ້ໜີຈາກນາຍຂອງຕົນໄປ. ເປັນຫຍັງເຮົາຈຶ່ງຈະເອົາເຂົ້າຈີ່ກັບນ້ຳ ແລະ ຊີ້ນທີ່ເຮົາຂ້າສຳລັບຄົນຕັດຂົນແກະຂອງເຮົາໄປໃຫ້ກຸ່ມຄົນທີ່ເຮົາບໍ່ຮູ້ຈັກເລີຍ?”
ຄົນຂອງດາວິດຈຶ່ງກັບມາລາຍງານທຸກຖ້ອຍຄຳທີ່ນາບານກ່າວ. ດາວິດໄດ້ເວົ້າກັບຄົນຂອງຕົນວ່າ, “ໃຫ້ທຸກຄົນຖືດາບຂອງຕົນ!” ດັ່ງນັ້ນ ທຸກຄົນຈຶ່ງຖືດາບ ແລະ ດາວິດເອງກໍພາຍດາບອອກເດີນທາງ. ມີພັກພວກປະມານ 400 ຄົນ ຕິດຕາມໄປ, ສ່ວນອີກສອງຮ້ອຍຄົນເຝົ້າເຄື່ອງຢູ່ທີ່ເບື້ອງຫລັງ.
ມີຄົນໃຊ້ຄົນໜຶ່ງຂອງນາບານໄດ້ໄປບອກອາບີກາຍ, ເມຍຂອງນາບານວ່າ, “ດາວິດໄດ້ສົ່ງຄົນຈາກຖິ່ນແຫ້ງແລ້ງກັນດານມາທັກທາຍນາຍຂອງພວກເຮົາ, ແຕ່ນາຍໄດ້ໝິ່ນປະໝາດຄົນພວກເຂົາ. ແທ້ຈິງແລ້ວຄົນຂອງດາວິດແມ່ນດີຕໍ່ພວກເຮົາຫລາຍ. ພວກເຂົາບໍ່ໄດ້ເຮັດອັນຕະລາຍແກ່ພວກເຮົາເລີຍ ແລະ ຕະຫລອດເວລາທີ່ພວກເຮົາຢູ່ກາງທົ່ງນາໃກ້ໆພວກເຂົານັ້ນ ກໍບໍ່ມີອັນໃດເສຍໄປຈັກຢ່າງ. ພວກເຂົາເປັນເກາະກຳບັງໃຫ້ພວກເຮົາທັງກາງເວັນ ແລະ ກາງຄືນຕະຫລອດເວລາທີ່ພວກເຮົາລ້ຽງແກະຢູ່ໃກ້ໆພວກເຂົາ. ຂໍໃຫ້ນາຍຄິດທົບທວນເບິ່ງວ່ານາຍຈະເຮັດຫຍັງໄດ້ແດ່, ເພາະໄພກຳລັງຈະມາເຖິງນາຍ ແລະ ຄອບຄົວຂອງນາຍທັງໝົດ. ນາຍຂອງພວກເຮົາເປັນຄົນຊົ່ວຮ້າຍບໍ່ຍອມຟັງຄຳຂອງຜູ້ໃດເລີຍ”.
ອາບີກາຍບໍ່ໄດ້ຊັກຊ້າ. ນາງຟ້າວຈັດເຂົ້າຈີ່ 200 ກ້ອນ, ເຫລົ້າອະງຸ່ນ 2 ຖົງໜັງ, ຊີ້ນແກະທີ່ເຮັດສຳເລັດແລ້ວຫ້າໂຕ, ເຂົ້າຂົ້ວ 5 ຊີ,2 ເຂົ້າໜົມໝາກອະງຸ່ນແຫ້ງ 100 ກ້ອນ ແລະ ເຂົ້າໜົມໝາກເດື່ອ 200 ກ້ອນ ແລະ ໃຊ້ລໍບັນທຸກເຄື່ອງເຫລົ່ານີ້ໄປ. ນາງໄດ້ສັ່ງບັນດາຄົນຮັບໃຊ້ຂອງຕົນວ່າ, “ຈົ່ງຟ້າວລ່ວງໜ້າໄປກ່ອນ; ຂ້ອຍຈະຕາມຫລັງພວກເຈົ້າໄປ”. ແຕ່ນາງບໍ່ໄດ້ບອກນາບານຜົວຂອງຕົນ.
ຂະນະທີ່ນາງກຳລັງຂີ່ລໍມາຕາມທາງໄປສູ່ຮ່ອມພູເລິກ, ນາງກໍໄດ້ພົບດາວິດ ແລະ ຄົນຂອງເພິ່ນກໍາລັງມຸ່ງໜ້າມາຫານາງ. ດາວິດຫາກໍເວົ້າວ່າ, “ບໍ່ມີປະໂຫຍດທີ່ເຮົາເຝົ້າເບິ່ງແຍງຝູງສັດຂອງຄົນນີ້ໃນຖິ່ນແຫ້ງແລ້ງກັນດານ ເພື່ອບໍ່ໃຫ້ມີອັນໃດເສຍໄປຈັກຢ່າງ. ລາວຕອບແທນການດີຂອງເຮົາດ້ວຍການຊົ່ວ. ຖ້າຮອດມື້ເຊົ້າມາ, ເຮົາຍັງໄວ້ຊີວິດຜູ້ຊາຍທີ່ເປັນຄົນຂອງນາບານແມ່ນແຕ່ຄົນດຽວ, ຂໍພຣະເຈົ້າຈັດການກັບເຮົາ3ຢ່າງໜັກ!”
ເມື່ອອາບີກາຍໄດ້ເຫັນດາວິດ, ນາງຈຶ່ງຟ້າວລົງຈາກຫລັງລໍ ແລະ ໝອບກາບລົງໝູບໜ້າລົງທີ່ພື້ນຕໍ່ໜ້າດາວິດ. ນາງໄດ້ໝອບລົງທີ່ຕີນດາວິດ ແລະ ເວົ້າວ່າ: “ຂໍກະລຸນາ, ເຈົ້ານາຍຂອງຂ້ານ້ອຍ, ຂໍໃຫ້ຜູ້ຮັບໃຊ້ຂອງທ່ານໄດ້ເວົ້າກັບທ່ານ; ຂໍກະລຸນາຟັງສິ່ງທີ່ຜູ້ຮັບໃຊ້ຂອງທ່ານຈະເວົ້າ. ຂໍໃຫ້ເຈົ້ານາຍຂອງຂ້ານ້ອຍຢ່າໄດ້ສົນໃຈນໍານາບານຄົນຊົ່ວຮ້າຍນັ້ນເລີຍ. ລາວເປັນຄົນໂງ່ຊື່ເໝືອນກັບຊື່ຂອງລາວ, ຄວາມໂງ່ຂອງລາວຈະຕິດຕາມລາວໄປ. ສ່ວນຂ້ານ້ອຍຜູ້ຮັບໃຊ້ຂອງທ່ານ, ບໍ່ທັນໄດ້ພົບຄົນທີ່ທ່ານສົ່ງໄປ. ບັດນີ້, ເຈົ້ານາຍຂອງຂ້ານ້ອຍ, ເນື່ອງຈາກພຣະເຈົ້າຢາເວໄດ້ປ້ອງກັນບໍ່ໃຫ້ມືຂອງທ່ານເປື້ອນເລືອດດ້ວຍການລົງມືແກ້ແຄ້ນເອງ, ພຣະເຈົ້າຢາເວມີຊີວິດຢູ່ສັນໃດ ແລະ ທ່ານມີຊີວິດຢູ່ສັນໃດ, ຂໍໃຫ້ສັດຕູ ແລະ ຄົນທັງປວງທີ່ມຸ້ງຮ້າຍຕໍ່ທ່ານຈົ່ງເປັນເໝືອນນາບານສັນນັ້ນ. ແລະ ນີ້ຄືຂອງຂວັນທີ່ຜູ້ຮັບໃຊ້ຂອງທ່ານນຳມາມອບໃຫ້ແກ່ທ່ານ, ຂໍທ່ານຈົ່ງມອບໃຫ້ແກ່ຄົນທີ່ຕິດຕາມທ່ານດ້ວຍ.
“ຂໍໂຜດຍົກໂທດໃຫ້ແກ່ຄວາມຜິດຂອງຜູ້ຮັບໃຊ້ຂອງທ່ານດ້ວຍ. ເພາະພຣະເຈົ້າຢາເວ ພຣະເຈົ້າຂອງທ່ານຈະໃຫ້ທ່ານ ແລະ ເຊື້ອສາຍຂອງທ່ານເປັນກະສັດຕະຫລອດໄປຢ່າງແນ່ນອນ, ເພາະທ່ານໄດ້ຕໍ່ສູ້ໃນສົງຄາມຂອງພຣະເຈົ້າຢາເວ ແລະ ຂໍຢ່າໃຫ້ພົບການກະທຳຜິດໃນໂຕທ່ານເລີຍຕະຫລອດຊີວິດຂອງທ່ານ. ເຖິງແມ່ນຈະມີຄົນໄລ່ຕາມເອົາຊີວິດຂອງທ່ານ, ທ່ານກໍຍັງຄົງປອດໄພຢູ່ພາຍໃຕ້ການປົກປ້ອງຄຸ້ມຄອງຂອງພຣະເຈົ້າຢາເວ ພຣະເຈົ້າຂອງທ່ານ, ແຕ່ຊີວິດສັດຕູຂອງທ່ານຈະຫາຍໄປເໝືອນຖືກແກວ່ງຈາກສະລິງ. ເມື່ອພຣະເຈົ້າຢາເວເຮັດໃຫ້ສິ່ງດີງາມທັງໝົດແກ່ທ່ານຕາມຄຳສັນຍາ ແລະ ໄດ້ຕັ້ງທ່ານໃຫ້ເປັນຜູ້ນຳເໜືອອິດສະຣາເອນແລ້ວ, ທ່ານຈະບໍ່ໄດ້ເສຍໃຈທີ່ຂ້າຄົນໂດຍບໍ່ຈຳເປັນ ຫລື ລົງມືແກ້ແຄ້ນເອງ ແລະ ເມື່ອພຣະເຈົ້າຢາເວ ພຣະເຈົ້າຂອງທ່ານໄດ້ນຳຄວາມສຳເລັດມາໃຫ້ທ່ານແລ້ວ, ໂຜດລະນຶກເຖິງຜູ້ຮັບໃຊ້ຂອງທ່ານດ້ວຍ”.
ດາວິດໄດ້ຕອບອາບີກາຍວ່າ, “ຂໍຖວາຍສັນເສີນແດ່ພຣະເຈົ້າຢາເວ ພຣະເຈົ້າແຫ່ງອິດສະຣາເອນຜູ້ໄດ້ສົ່ງເຈົ້າມາພົບເຮົາໃນວັນນີ້. ຂໍພຣະເຈົ້າອວຍພອນເຈົ້າສຳລັບການຕັດສິນໃຈທີ່ດີຂອງເຈົ້າ ແລະ ສິ່ງທີ່ເຈົ້າໄດ້ຊ່ວຍປ້ອງກັນເຮົາບໍ່ໃຫ້ຂ້າຄົນໃນວັນນີ້ ແລະ ບໍ່ຕ້ອງແກ້ແຄ້ນໃຫ້ມືເປື້ອນເລືອດ. ບໍ່ດັ່ງນັ້ນ, ພຣະເຈົ້າຢາວ ພຣະເຈົ້າແຫ່ງອິດສະຣາເອນຜູ້ປ້ອງກັນບໍ່ໃຫ້ເຮົາເຮັດອັນຕະລາຍໃຫ້ເຈົ້າ, ຊີວິດຢູ່ສັນໃດ, ຖ້າເຈົ້າບໍ່ໄດ້ມາພົບເຮົາຢ່າງວ່ອງໄວ, ຄົນຂອງນາບານກໍຄົງບໍ່ມີຊີວິດເຫລືອລອດແມ່ນແຕ່ຄົນດຽວໃນເຊົ້າມື້ອື່ນສັນນັ້ນ”.
ແລ້ວດາວິດຈຶ່ງຮັບເອົາຂອງຂວັນຈາກນາງ ແລະ ເວົ້າວ່າ, “ຈົ່ງກັບໄປຢ່າງສັນຕິ. ເຮົາຮັບຟັງຄຳຂອງເຈົ້າ ແລະ ຈະເຮັດຕາມຄຳຮ້ອງຂໍຂອງເຈົ້າ”.
ເມື່ອນາງອາບີກາຍກັບຄືນເມືອຫານາບານ, ກໍພົບວ່ານາບານກຳລັງຈັດງານລ້ຽງໃຫຍ່ຢູ່ໃນເຮືອນປານງານລ້ຽງຂອງກະສັດ. ນາບານກຳລັງມ່ວນຊື່ນ ແລະ ເມົາຢ່າງໜັກ. ດັ່ງນັ້ນ ນາງຈຶ່ງບໍ່ໄດ້ເລົ່າສິ່ງໃດໃຫ້ລາວຟັງຈົນຮອດມື້ເຊົ້າ. ໃນຕອນເຊົ້າ, ເມື່ອລາວຊ່ວງເມົາແລ້ວ ເມຍຂອງລາວກໍໄດ້ເລົ່າເຫດການທຸກຢ່າງທີ່ເກີດຂຶ້ນໃຫ້ລາວຟັງ ແລ້ວລາວກໍຕົກໃຈຫລາຍ ແລະ ບໍ່ເໜັງຕີງເໝືອນກັບກ້ອນຫີນ. ປະມານສິບວັນຕໍ່ມາ, ພຣະເຈົ້າຢາເວໄດ້ລົງໂທດນາບານ ແລະ ລາວກໍຕາຍ.
ເມື່ອດາວິດໄດ້ຍິນວ່ານາບານຕາຍແລ້ວ, ເພິ່ນກໍເວົ້າວ່າ, “ສັນລະເສີນພຣະເຈົ້າຢາເວ, ຜູ້ໃຫ້ຄວາມເປັນທຳແກ່ຂ້ານ້ອຍແລ້ວເພາະລາວໄດ້ໝິ່ນປະໝາດຂ້ານ້ອຍ ແລະ ໄດ້ປ້ອງກັນຜູ້ຮັບໃຊ້ຂອງພຣະອົງບໍ່ໃຫ້ເຮັດຜິດ ແລະ ໃຫ້ນາບານໄດ້ຮັບໂທດສົມກັບຄວາມຜິດຂອງລາວ”.
ຫລັງຈາກນັ້ນ ດາວິດກໍໄດ້ສົ່ງຄົນໄປຂໍນາງອາບີກາຍມາເປັນເມຍ, ຄົນຂອງດາວິດໄດ້ມາທີ່ກາກເມນ ແລະ ເວົ້າກັບອາບີກາຍວ່າ, “ດາວິດໄດ້ສົ່ງພວກເຮົາມາຮັບທ່ານໄປເປັນເມຍຂອງເພິ່ນ”.
ນາງໄດ້ໝອບກາບໝູບໜ້າລົງທີ່ພື້ນ ແລະ ເວົ້າວ່າ, “ຂ້ານ້ອຍເປັນຜູ້ຮັບໃຊ້ຂອງທ່ານ ແລ້ວກໍພ້ອມທີ່ຈະຮັບໃຊ້ທ່ານ ແລະ ລ້າງຕີນໃຫ້ບັນດາຜູ້ຮັບໃຊ້ຂອງທ່ານ”. ອາບີກາຍຟ້າວຂຶ້ນລໍໄປກັບຜູ້ນໍາຂ່າວຂອງດາວິດ ໂດຍມີສາວໃຊ້ຫ້າຄົນຕິດຕາມໄປນໍາ ແລະ ນາງໄດ້ເປັນເມຍຂອງດາວິດ. ດາວິດຍັງໄດ້ແຕ່ງງານກັບນາງອາຮີໂນອາມຈາກຢິດຊະເຣນ ແລະ ນາງທັງສອງໄດ້ເປັນເມຍຂອງດາວິດ. ແຕ່ໂຊນໄດ້ຍົກມີການລູກສາວຂອງເພິ່ນ, ເຊິ່ງເປັນເມຍຂອງດາວິດໃຫ້ແກ່ປານຕີ4 ລູກຊາຍຂອງລາອິດຜູ້ມາຈາກການລິມ.
Source notes (4)
- Footnote ພາສາເຮັບເຣີວ່າ ປາຣານ
- Footnote ປະມານ 27 ກິໂລກຣາມ
- Footnote ສຳເນົາຕົ້ນສະບັບເຊັບຕູອາຈິນ ພາສາເຮັບເຣີວ່າ ກັບສັດຕູຂອງດາວິດ
- Footnote ພາສາເຮັບເຣີວ່າ ປັນທີ ເປັນອີກຮູບໜຶ່ງຂອງ ປັນທີເອນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.