Biblica® Open Lao Contemporary Version
1 ຊາມູເອນ 23
ດາວິດຊ່ວຍເມືອງເກອີລາ
ເມື່ອມີຄົນມາບອກດາວິດວ່າ, “ເບິ່ງແມ, ພວກຟີລິດສະຕິນມາຕໍ່ສູ້ກັບຊາວເກອີລາ ແລະ ກຳລັງປຸ້ນເດີ່ນຟາດເຂົ້າ”, ລາວຈຶ່ງຖາມພຣະເຈົ້າຢາເວ, ໂດຍກ່າວວ່າ, “ຂ້ານ້ອຍຄວນເຂົ້າໄປໂຈມຕີພວກຟີລິດສະຕິນບໍ?”
ພຣະເຈົ້າຢາເວໄດ້ຕອບລາວວ່າ, “ຈົ່ງໄປ, ໂຈມຕີຊາວຟີລິດສະຕິນ ແລະ ປ້ອງກັນເມືອງເກອີລາໄວ້”.
ແຕ່ຄົນຂອງດາວິດເວົ້າໄດ້ເວົ້າກັບລາວວ່າ, “ແມ່ນແຕ່ໃນຢູດາພວກເຮົາຍັງຢ້ານ. ຖ້າພວກເຮົາໄປເມືອງເກອີລາເພື່ອຕໍ່ສູ້ກັບກອງກຳລັງຂອງຟີລິດສະຕິນຈະໜ້າຢ້ານຫລາຍກວ່ານັ້ນຈັກເທົ່າໃດ!”
ດາວິດຈຶ່ງຖາມພຣະເຈົ້າຢາເວອີກຄັ້ງ ແລະ ພຣະເຈົ້າຢາເວໄດ້ຕອບລາວວ່າ, “ຈົ່ງໄປທີ່ເມືອງເກອີລາ, ເພາະເຮົາຈະມອບຊາວຟີລິດສະຕິນໄວ້ໃນມືຂອງເຈົ້າ”. ດັ່ງນັ້ນ ດາວິດ ແລະ ພັກພວກຂອງລາວຈຶ່ງໄປທີ່ເມືອງເກອີລາ ແລະ ໄດ້ສູ້ຮົບກັບຊາວຟີລິດສະຕິນ ແລ້ວຢຶດເອົາຝູງສັດລ້ຽງຂອງພວກເຂົາມາ. ດາວິດໄດ້ເຮັດໃຫ້ຊາວຟີລິດສະຕິນເສຍຫາຍໝັກ ແລະ ໄດ້ຊ່ວຍຊີວິດຊາວເມືອງເກອີລາໄວ້ໄດ້. (ເມື່ອປະໂລຫິດອາບີອາທາລູກຊາຍຂອງອາຮີເມເຫລັກໜີໄປຫາດາວິດທີ່ເມືອງເກອີລາ ລາວກໍໄດ້ເອົາເສື້ອຄຸມເອໂຟດຕິດໂຕໄປນຳ).
ໂຊນໄລ່ຕາມດາວິດ
ເມື່ອໂຊນຮູ້ຂ່າວວ່າດາວິດຢູ່ທີ່ເມືອງເກອີລາ ແລ້ວເພິ່ນກໍເວົ້າວ່າ, “ພຣະເຈົ້າໄດ້ມອບດາວິດໄວ້ໃນມືຂອງເຮົາແລ້ວ, ເພາະລາວເອງໄດ້ເຂົ້າມາຕິດກັບດັກຢູ່ໃນເມືອງທີ່ມີກຳແພງ ແລະ ປະຕູທີ່ແໜ້ນໜາຢ່າງນີ້”. ແລ້ວໂຊນກໍໄດ້ລະດົມພົນຂອງຕົນສຳລັບສູ້ຮົບ, ເພື່ອລົງໄປທີ່ເມືອງເກອີລາເພື່ອຈັບຕົວດາວິດກັບພັກພວກຂອງລາວ.
ແຕ່ດາວິດຮູ້ແຜນການຂອງໂຊນ, ລາວຈຶ່ງເວົ້າກັບປະໂລຫິດອາບີອາທາວ່າ, “ຈົ່ງນຳເສື້ອຄຸມເອໂຟດອອກມາ”. ດາວິດໄດ້ເວົ້າວ່າ, “ຂ້າແດ່ພຣະເຈົ້າຢາເວ, ພຣະເຈົ້າແຫ່ງອິດສະຣາເອນ, ຜູ້ຮັບໃຊ້ຂອງພຣະອົງໄດ້ຍິນມາຢ່າງແນ່ນອນແລ້ວວ່າໂຊນໄດ້ວາງແຜນການເພື່ອຈະມາທຳລາຍລ້າງເມືອງເກອີລາເພາະຂ້ານ້ອຍຢູ່ທີ່ນີ້. ຊາວເມືອງເກອີລາຈະຈັບກຸມຂ້ານ້ອຍໄປມອບໃຫ້ກະສັດບໍ? ໂຊນຈະລົງມາແທ້ ເໝືອນທີ່ຜູ້ຮັບໃຊ້ຂອງພຣະອົງໄດ້ຍິນຂ່າວບໍ? ຂ້າແດ່ພຣະເຈົ້າຢາເວ, ພຣະເຈົ້າແຫ່ງອິດສະຣາເອນ, ໂຜດບອກຜູ້ຮັບໃຊ້ຂອງພຣະອົງດ້ວຍ”.
ແລະ ພຣະເຈົ້າຢາເວກໍໄດ້ເວົ້າວ່າ, “ລາວຈະມາ”.
ດາວິດຖາມອີກວ່າ, “ຊາວເກອີລາຈະຍອມມອບຂ້ານ້ອຍ ແລະ ພັກພວກຂອງຂ້ານ້ອຍໃຫ້ແກ່ໂຊນບໍ?”
ແລະ ພຣະເຈົ້າຢາເວກໍໄດ້ເວົ້າວ່າ, “ພວກເຂົາຈະເຮັດຢ່າງນັ້ນ”.
ດັ່ງນັ້ນ ດາວິດ ແລະ ພັກພວກຂອງຕົນປະມານຫົກຮ້ອຍຄົນ, ຈຶ່ງອອກຈາກເມືອງເກອີລາ ແລະ ສືບຕໍ່ເດີນທາງໄປຕາມບ່ອນຕ່າງໆ. ເມື່ອໂຊນໄດ້ຍິນຂ່າວວ່າດາວິດໜີໄປຈາກເກອີລາແລ້ວ, ເພິ່ນຈຶ່ງບໍ່ໄດ້ມາທີ່ເມືອງເກອີລາ.
ດາວິດໄດ້ໄປອາໄສຢູ່ໃນທີ່ໝັ້ນຕາມຖິ່ນແຫ້ງແລ້ງກັນດານ ແລະ ໃນພູເຂົາຕ່າງໆຂອງຖິ່ນແຫ້ງແລ້ງກັນດານສີເຟ. ໂຊນໄດ້ໄລ່ຕາມດາວິດທຸກມື້, ແຕ່ພຣະເຈົ້າບໍ່ໄດ້ມອບດາວິດໄວ້ໃນມືຂອງໂຊນ.
ໃນຂະນະຢູ່ທີ່ໂຮເຣັດໃນຖິ່ນແຫ້ງແລ້ງກັນດານສີເຟ, ດາວິດຮູ້ວ່າ1ໂຊນໄດ້ອອກໄລ່ຕາມເພື່ອຈະຂ້າລາວ. ແລ້ວໂຢນາທານລູກຊາຍຂອງໂຊນກໍໄດ້ອອກມາພົບດາວິດຢູ່ທີ່ໂຮເຣັດ ແລະ ຊ່ວຍລາວໃຫ້ເຂັ້ມແຂງຂຶ້ນໃນພຣະເຈົ້າ. ໂຢນາທານໄດ້ເວົ້າວ່າ, “ຢ່າຢ້ານເລີຍ, ໂຊນພໍ່ຂອງຂ້ອຍບໍ່ມີວັນເຮັດອັນຕະລາຍເຈົ້າໄດ້. ເຈົ້າຈະໄດ້ເປັນກະສັດອິດສະຣາເອນ ແລະ ຂ້ອຍຈະເປັນທີສອງຮອງຈາກເຈົ້າ. ແມ່ນແຕ່ພໍ່ຂອງຂ້ອຍກໍຮູ້ເລື່ອງນີ້”. ທັງສອງກໍໄດ້ເຮັດຄຳໝັ້ນສັນຍາກັນຕໍ່ໜ້າພຣະເຈົ້າຢາເວ. ແລ້ວໂຢນາທານກໍກັບຄືນເມືອ, ສ່ວນດາວິດຍັງຄົງຢູ່ທີ່ໂຮເຣັດຕໍ່ໄປ.
ແຕ່ຊາວເມືອງຊິເຟໄດ້ນຳເລື່ອງນີ້ໄປບອກໂຊນຢູ່ທີ່ເມືອງກີເບອາວ່າ, “ດາວິດກຳລັງລີ້ຢູ່ທ່າມກາງພວກເຮົາໃນທີ່ໝັ້ນໂຮເຣັດ, ເທິງໂນນພູຮາກີລາ, ທາງໃຕ້ຂອງເຢຊິໂມນບໍ່ແມ່ນບໍ? ບັດນີ້, ຂ້າແດ່ກະສັດ, ຂໍເຊີນທ່ານໄປເຮັດຕາມທີ່ທ່ານພໍໃຈ ແລະ ພວກຂ້ານ້ອຍຈະຮັບຜິດຊອບໃນການມອບໂຕລາວໃຫ້ແກ່ທ່ານ”.
ໂຊນໄດ້ຕອບວ່າ, “ຂໍພຣະເຈົ້າຢາເວອວຍພອນເຈົ້າທີ່ເຈົ້າຫ່ວງໃຍເຮົາ. ຈົ່ງໄປ ແລະ ຊອກຫາຂໍ້ມູນເພີ່ມເຕີມ. ຈົ່ງຊອກເບິ່ງວ່າດາວິດມັກຢູ່ໃສ ແລະ ມີຜູ້ໃດເຫັນລາວຢູ່ທີ່ນັ້ນແດ່. ເຮົາຮູ້ມາວ່າລາວມີເລ້ຫລ່ຽມຫລາຍ. ຈົ່ງໄປຄົ້ນຫາທຸກບ່ອນທີ່ລາວລີ້ຢູ່ ແລ້ວກັບມາລາຍງານໃຫ້ເຮົາຮູ້ຢ່າງລະອຽດ. ຫລັງຈາກນັ້ນເຮົາຈະໄປກັບພວກເຈົ້າ; ຖ້າລາວຢູ່ເຂດນັ້ນ, ເຮົາຈະໄປຊອກເອົາໂຕລາວມາຈາກທຸກຕະກູນຂອງຢູດາໃຫ້ໄດ້”.
ດັ່ງນັ້ນ ຊາວເມືອງສີເຟຈຶ່ງໄດ້ເດີນທາງລ່ວງໜ້າໄປກ່ອນໂຊນ. ຝ່າຍດາວິດກັບພັກພວກຂອງຕົນແມ່ນຢູ່ໃນຖິ່ນແຫ້ງແລ້ງກັນດານມາໂອນ, ໃນອາຣາບາ ທາງໃຕ້ຂອງເຢຊິໂມນ. ໂຊນກັບພັກພວກຂອງເພິ່ນກໍເລີ່ມຊອກຫາ ແລະ ເມື່ອດາວິດຮູ້ຂ່າວ, ລາວຈຶ່ງໜີໄປທີ່ພູເຂົາ ແລະ ພັກຢູ່ໃນຖິ່ນແຫ້ງແລ້ງກັນດານມາໂອນ. ເມື່ອໂຊນຮູ້, ເພິ່ນກໍເຂົ້າໄປໃນຖິ່ນແຫ້ງແລ້ງກັນດານມາໂອນເພື່ອໄລ່ຕາມດາວິດ.
ໂຊນ ແລະ ດາວິດໄດ້ມາຮອດຄົນລະຟາກຂອງພູເຂົາໜ່ວຍດຽວກັນ ແລະ ດາວິດກັບພັກພວກກໍຟ້າວໜີໄປຈາກໂຊນ. ຂະນະທີ່ໂຊນກັບພົນຂອງເພິ່ນເລີ່ມຕີວົງລ້ອມເຂົ້າມາເພື່ອຈັບກຸມດາວິດກັບພັກພວກຂອງລາວ, ມີຜູ້ສົ່ງຂ່າວຄົນໜຶ່ງໄດ້ມາບອກໂຊນວ່າ, “ຈົ່ງກັບມາໄວໆ! ພວກຟີລິດສະຕິນມາປຸ້ນດິນແດນແລ້ວ”. ຫລັງຈາກນັ້ນ ໂຊນຈຶ່ງຢຸດຈາກການໄລ່ຕາມດາວິດ ແລະ ກັບໄປສູ້ຮົບກັບຊາວຟີລິດສະຕິນ. ດ້ວຍເຫດນີ້ບ່ອນນັ້ນຈຶ່ງໄດ້ຊື່ວ່າເສລາຮຳມາເລໂຄດ.2 ແລ້ວດາວິດກໍອອກໄປຈາກທີ່ນັ້ນ ແລະ ໄດ້ໄປອາໄສຢູ່ໃນທີ່ໝັ້ນແຫ່ງເອນເກດີ.
Source notes (2)
- Footnote ຫລື ລາວຢ້ານວ່າ
- Footnote ຫລື ສີລາແຫ່ງການແຍກຈາກກັນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.