Biblica® Open Lao Contemporary Version
1 ຊາມູເອນ 22
ດາວິດທີ່ອາດຸນລຳ ແລະ ມີຊະປາ
ດາວິດຈຶ່ງໄດ້ອອກຈາກເມືອງກາດ ແລະ ໜີໄປທີ່ຖ້ຳອາດຸນລຳ. ເມື່ອບັນດາອ້າຍ ແລະ ຄົນໃນຄົວເຮືອນຂອງພໍ່ຂອງລາວໄດ້ຍິນຂ່າວ, ພວກເຂົາກໍມາພົບລາວຢູ່ທີ່ນັ້ນ. ບັນດາທຸກຄົນທີ່ມີບັນຫາຫຍຸ້ງຍາກ ຫລື ມີໜີ້ສິນ ຫລື ມີເລື່ອງບໍ່ພໍໃຈ ກໍເຂົ້າມາເປັນພັກພວກກັບດາວິດ ແລະ ດາວິດກໍກາຍເປັນຫົວໜ້າຂອງຄົນເຫລົ່ານີ້. ມີຄົນມາຢູ່ກັບດາວິດປະມານສີ່ຮ້ອຍຄົນ.
ດາວິດໄດ້ອອກຈາກທີ່ນັ້ນໄປທີ່ມີຊະປາໃນໂມອາບ ແລະ ໄດ້ເວົ້າກັບກະສັດແຫ່ງໂມອາບວ່າ, “ຂໍໃຫ້ພໍ່ແມ່ຂອງຂ້ານ້ອຍມາອາໄສຢູ່ກັບທ່ານຈົນກວ່າຂ້ານ້ອຍຈະຮູ້ວ່າພຣະເຈົ້າຈະເຮັດຫຍັງເພື່ອຂ້ານ້ອຍຕໍ່ໄປ?” ດັ່ງນັ້ນ ດາວິດຈຶ່ງໃຫ້ພໍ່ແມ່ຂອງຕົນມາອາໄສຢູ່ກັບກະສັດໂມອາບຕະຫລອດເວລາທີ່ເພິ່ນຢູ່ໃນທີ່ນັ້ນ.
ແຕ່ຜູ້ທຳນວາຍເມືອງກາດໄດ້ເວົ້າກັບດາວິດວ່າ, “ຢ່າພັກອາໄສໃນທີ່ໝັ້ນນີ້. ຈົ່ງກັບໄປທີ່ດິນແດນຢູດາ”. ດາວິດຈຶ່ງໄດ້ໄປທີ່ປ່າເຮເຣັດ.
ໂຊນຂ້າບັນດາປະໂລຫິດຂອງເມືອງໂນບ
ເມື່ອໂຊນໄດ້ຍິນຂ່າວວ່າມີຄົນພົບດາວິດກັບພັກພວກຂອງລາວ ແລະ ໂຊນນັ່ງຢູ່ກ້ອງຕົ້ນແປກຕາມາຣິກເທິງໂນນພູກີເບອາ, ມືຖືຫອກຢູ່, ພ້ອມກັບມີພວກທະຫານຢືນອ້ອມເພິ່ນ. ໂຊນໄດ້ເວົ້າກັບພວກເຂົາວ່າ, “ຈົ່ງຟັງ, ຄົນເບັນຢາມິນທັງຫລາຍ! ລູກຊາຍຂອງເຢຊີຈະໃຫ້ທີ່ດິນ ແລະ ສວນອະງຸ່ນແກ່ພວກເຈົ້າບໍ? ລາວຈະໃຫ້ພວກເຈົ້າເປັນນາຍພັນ ແລະ ນາຍຮ້ອຍບໍ? ນີ້ເປັນເຫດຜົນທີ່ເຮັດໃຫ້ພວກເຈົ້າສົມທົບກັນເປັນສັດຕູກັບເຮົາບໍ? ບໍ່ມີຜູ້ໃດມາບອກເຮົາເມື່ອລູກຊາຍຂອງເຮົາໄປເຮັດຄຳໝັ້ນສັນຍາກັບລູກຊາຍຂອງເຢຊີ. ບໍ່ມີຜູ້ໃດໃນພວກເຈົ້າທີ່ຫ່ວງໃຍເຮົາ ແລະ ບອກເຮົາວ່າລູກຊາຍຂອງເຮົາເອງທີ່ຍຸຍົງຄົນຮັບໃຊ້ຂອງເຮົາໃຫ້ມາດັກທຳຮ້າຍເຮົາ ເໝືອນຢ່າງທີ່ລາວເຮັດທຸກວັນນີ້”.
ແຕ່ໂດເອກຊາວເອໂດມ, ເຊິ່ງຢືນຢູ່ກັບຜູ້ຮັບໃຊ້ຂອງໂຊນ, ເວົ້າວ່າ, “ຂ້ານ້ອຍເຫັນລູກຊາຍຂອງເຢຊີມາພົບອາຮີເມເຫລັກລູກຊາຍຂອງອາຮີຕຸບຢູ່ທີ່ເມືອງໂນບ. ອາຮີເມເຫລັກໄດ້ຖາມພຣະເຈົ້າຢາເວໃຫ້ລາວ; ພ້ອມທັງໄດ້ມອບສະບຽງອາຫານ ແລະ ດາບຂອງໂກລີອາດຊາວຟີລິດສະຕິນໃຫ້ແກ່ລາວດ້ວຍ”.
ຫລັງຈາກນັ້ນ ໂຊນກໍໄດ້ສັ່ງໃຫ້ນໍາເອົາປະໂລຫິດອາຮີເມເຫລັກລູກຊາຍອາຮີຕຸບ ແລະ ຜູ້ຊາຍທຸກຄົນໃນຄອບຄົວຂອງພໍ່ຂອງລາວ, ທີ່ເປັນປະໂລຫິດຢູ່ທີ່ເມືອງໂນບມາພົບ ແລະ ພວກເຂົາທັງໝົດກໍໄດ້ເຂົ້າພົບກະສັດ. ໂຊນໄດ້ເວົ້າວ່າ, “ລູກຊາຍຂອງອາຮີຕຸບ, ຈົ່ງຟັງ”.
ອາຮີເມເຫລັກໄດ້ຕອບວ່າ, “ຂ້ານ້ອຍຟັງຢູ່, ເຈົ້ານາຍຂອງຂ້ານ້ອຍ”.
ໂຊນເວົ້າກັບລາວວ່າ, “ເປັນຫຍັງເຈົ້າກັບລູກຊາຍເຢຊີຈຶ່ງສົມທົບກັນຕໍ່ຕ້ານເຮົາ, ໃຫ້ອາຫານແກ່ລາວ ແລະ ມອບດາບໃຫ້ລາວ ແລ້ວຖາມພຣະເຈົ້າໃຫ້ລາວ, ລາວຈຶ່ງໄດ້ກະບົດ ແລະ ດັກຊຸ້ມໂຈມຕີເຮົາ, ເໝືອນຢ່າງທີ່ລາວເຮັດທຸກວັນນີ້?”
ອາຮີເມເຫລັກໄດ້ຕອບກະສັດວ່າ, “ມີຄົນໃດໃນບັນດາຜູ້ຮັບໃຊ້ຂອງທ່ານທີ່ສັດຊື່ຕໍ່ທ່ານເໝືອນດາວິດ ຜູ້ທີ່ເປັນລູກເຂີຍຂອງທ່ານ, ຜູ້ບັນຊາກອງທະຫານຄຸ້ມກັນທ່ານ ແລະ ເປັນທີ່ເຄົາລົບນັບຖືຢ່າງສູງໃນເຮືອນຂອງທ່ານ? ນີ້ເປັນຄັ້ງທຳອິດທີ່ຂ້ານ້ອຍໄດ້ຖາມພຣະເຈົ້າໃຫ້ກັບລາວບໍ? ບໍ່ແມ່ນຢ່າງນັ້ນແນ່ນນອນ! ຂໍທ່ານຢ່າໄດ້ກ່າວໂທດຂ້ານ້ອຍຜູ້ທີ່ຮັບໃຊ້ທ່ານກັບຄອບຄົວຂອງພໍ່ຂອງຂ້ານ້ອຍເຊັ່ນນີ້ເລີຍ, ເພາະຜູ້ຮັບໃຊ້ຂອງທ່ານບໍ່ຮູ້ອັນໃດເລີຍກ່ຽວກັບເລື່ອງທັງໝົດນີ້”.
ແຕ່ກະສັດໄດ້ເວົ້າວ່າ, “ອາຮີເມເຫລັກ, ເຈົ້າ ແລະ ຄອບຄົວຂອງພໍ່ຂອງເຈົ້າທັງໝົດຈະຕ້ອງຕາຍ”.
ແລ້ວກະສັດກໍໄດ້ສັ່ງທະຫານທີ່ຢູ່ທາງຂ້າງເພິ່ນວ່າ: “ຈົ່ງຫັນໄປ ແລະ ຂ້າປະໂລຫິດຂອງພຣະເຈົ້າຢາເວ ເພາະພວກເຂົາເຂົ້າຂ້າງດາວິດ. ພວກເຂົາຮູ້ວ່າດາວິດໜີເຮົາໄປ, ແຕ່ບໍ່ຍອມບອກເຮົາ”.
ແຕ່ບັນດາຂ້າລາຊະການຂອງກະສັດບໍ່ກ້າລົງມືຂ້າບັນດາປະໂລຫິດຂອງພຣະເຈົ້າຢາເວ.
ກະສັດຈຶ່ງໄດ້ສັ່ງໂດເອກວ່າ, “ເຈົ້າຈົ່ງຫັນໄປ ແລະ ຂ້າບັນດາປະໂລຫິດ”. ດັ່ງນັ້ນ ໂດເອກຊາວເອໂດມຈຶ່ງຫັນໄປຂ້າບັນດາປະໂລຫິດ. ໃນວັນນັ້ນລາວໄດ້ຂ້າ 85 ຄົນທີ່ໃສ່ເສື້ອຄຸມເອໂຟດຜ້າລິນິນ. ໂດເອກຍັງໄດ້ໄປຂ້າຄົນທົ່ວເມືອງໂນບ ເຊິ່ງເປັນເມືອງຂອງປະໂລຫິດ, ພ້ອມທັງຜູ້ຊາຍ, ແມ່ຍິງ, ເດັກນ້ອຍ, ເດັກອ່ອນ ແລະ ລວມທັງງົວ, ລໍ ແລະ ແກະຂອງເມືອງນັ້ນ.
ແຕ່ລູກຊາຍຄົນໜຶ່ງຂອງອາຮີເມເຫລັກ ເຊິ່ງເປັນລູກຊາຍຂອງອາຮີຕຸບ ຊື່ວ່າອາບີອາທາໄດ້ລອດໄປໄດ້ ແລະ ໜີໄປເຂົ້າຮ່ວມກັບດາວິດ. ອາບີອາທາໄດ້ເລົ່າໃຫ້ດາວິດຟັງວ່າ, ໂຊນໄດ້ຂ້າປະໂລຫິດຂອງພຣະເຈົ້າຢາວ. ແລ້ວດາວິດຈຶ່ງໄດ້ເວົ້າກັບອາບີອາທາວ່າ, “ໃນວັນນັ້ນ, ເມື່ອຂ້ອຍເຫັນໂດເອກຄົນເອໂດມຢູ່ທີ່ນັ້ນ ຂ້ອຍກໍຮູ້ວ່າລາວຈະໄປຟ້ອງໂຊນແນ່ນອນ. ຂ້ອຍຕ້ອງຮັບຜິດຊອບທີ່ເຮັດໃຫ້ຄອບຄົວຂອງເຈົ້າທັງໝົດຕ້ອງຕາຍ. ຈົ່ງຢູ່ທີ່ນີ້ກັບຂ້ອຍ; ຢ່າຢ້ານເລີຍ. ຜູ້ທີ່ຕ້ອງການຂ້າເຈົ້າກໍກຳລັງພະຍາຍາມຂ້າຂ້ອຍເໝືອນກັນ. ເຈົ້າຈະປອດໄພເມື່ອຢູ່ກັບຂ້ອຍ”.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.