Biblica® Open Lao Contemporary Version
1 ຊາມູເອນ 16
ຊາມູເອນເຈີມດາວິດ
ພຣະເຈົ້າຢາເວໄດ້ເວົ້າກັບຊາມູເອນວ່າ, “ເຈົ້າຈະຄ່ຳຄວນເລື່ອງທີ່ເຮົາປົດໂຊນອອກຈາກການເປັນກະສັດອິດສະຣາເອນອີກດົນປານໃດ? ບັດນີ້ ຈົ່ງເຕີມນ້ຳມັນໃຫ້ເຕັມເຂົາສັດ ແລະ ອອກເດີນທາງ; ເຮົາຈະສົ່ງເຈົ້າໄປພົບເຢຊີແຫ່ງເບັດເລເຮັມ. ເຮົາໄດ້ເລືອກລູກຊາຍຄົນໜຶ່ງຂອງລາວໃຫ້ເປັນກະສັດ”.
ແຕ່ຊາມູເອນໄດ້ຕອບວ່າ, “ຂ້ານ້ອຍຈະໄປໄດ້ຢ່າງໃດ? ຖ້າໂຊນຮູ້ຂ່າວ, ລາວຈະຂ້ານ້ອຍ”.
ພຣະເຈົ້າຢາເວກ່າວວ່າ, “ຈົ່ງເອົາງົວແມ່ໄປນໍາໂຕໜຶ່ງ ແລະ ເວົ້າວ່າ, ‘ຂ້າພະເຈົ້າມາເພື່ອຖວາຍເຄື່ອງບູຊາແກ່ພຣະເຈົ້າຢາເວ’. ຈົ່ງເຊີນເຢຊີໄປຮ່ວມການຖວາຍເຄື່ອງບູຊາ ແລະ ເຮົາຈະບອກໃຫ້ເຈົ້າຮູ້ວ່າຈະຕ້ອງເຮັດຫຍັງແດ່. ເຈົ້າຈົ່ງເຈີມຕັ້ງຄົນທີ່ເຮົາບອກໄວ້ໃຫ້ເຮົາ”.
ຊາມູເອນກໍໄດ້ປະຕິບັດຕາມສິ່ງທີ່ພຣະເຈົ້າຢາເວບອກໄວ້. ເມື່ອເພິ່ນມາຮອດເບັດເລເຮັມ ບັນດາຜູ້ອາວຸໂສຂອງເມືອງນັ້ນກໍຢ້ານກົວຈົນຕົວສັ່ນ. ພວກເຂົາໄດ້ຖາມເພິ່ນວ່າ, “ທ່ານມາຢ່າງສັນຕິບໍ?”
ຊາມູເອນຕອບວ່າ, “ແມ່ນແລ້ວ, ຂ້າພະເຈົ້າມາຢ່າງສັນຕິ; ມາເພື່ອຖວາຍເຄື່ອງບູຊາແກ່ພຣະເຈົ້າຢາເວ. ຈົ່ງຊຳລະຕົວ ແລະ ມາຮ່ວມຖວາຍເຄື່ອງບູຊາດ້ວຍກັນກັບເຮົາ”. ແລ້ວເພິ່ນກໍໄດ້ປະກອບພິທີຊຳລະໃຫ້ແກ່ເຢຊີ ແລະ ບັນດາລູກຊາຍຂອງລາວ ແລະ ເຊີນຄົນເຫລົ່ານັ້ນມາຮ່ວມໃນການຖວາຍເຄື່ອງບູຊາດ້ວຍ.
ເມື່ອພວກເຂົາມາຮອດ, ຊາມູເອນກໍເບິ່ງເອລີອາບ ແລະ ຄິດໃນໃຈວ່າ, “ຊາຍທີ່ຢືນຢູ່ຕໍ່ໜ້າພຣະເຈົ້າຢາເວຄົນນີ້ແນ່ນອນທີ່ພຣະອົງໄດ້ເຈີມຕັ້ງໄວ້”.
ແຕ່ພຣະເຈົ້າຢາເວໄດ້ເວົ້າກັບຊາມູເອນວ່າ, “ຢ່າຕັດສິນຈາກຮູບຮ່າງໜ້າຕາ ຫລື ສ່ວນສູງ, ເພາະເຮົາບໍ່ໄດ້ເລືອກຄົນນີ້. ພຣະເຈົ້າຢາເວບໍ່ໄດ້ເບິ່ງເໝືອນກັບທີ່ມະນຸດເບິ່ງ. ມະນຸດເບິ່ງທີ່ຮູບລັກສະນະພາຍນອກ, ແຕ່ພຣະເຈົ້າຢາເວເບິ່ງທີ່ຈິດໃຈ”.
ຫລັງຈາກນັ້ນ ເຢຊີຈຶ່ງສັ່ງໃຫ້ອາບີນາດາບມາຢູ່ຕໍ່ໜ້າຊາມູເອນ. ແຕ່ຊາມູເອນໄດ້ກ່າວວ່າ, “ພຣະເຈົ້າຢາເວບໍ່ໄດ້ເລືອກຄົນນີ້”. ເຢຊີຈຶ່ງເອີ້ນຊາມມາ, ແຕ່ຊາມູເອນກໍກ່າວວ່າ, “ພຣະເຈົ້າຢາເວບໍ່ໄດ້ເລືອກຄົນນີ້”. ເຢຊີໄດ້ໃຫ້ລູກຊາຍທັງເຈັດຄົນຂອງຕົນມາຢູ່ຕໍ່ໜ້າຊາມູເອນ, ແຕ່ຊາມູເອນກໍກ່າວວ່າ, “ພຣະເຈົ້າຢາເວບໍ່ໄດ້ເລືອກຄົນເຫລົ່ານີ້”. ດັ່ງນັ້ນ ຊາມູເອນຈຶ່ງໄດ້ຖາມເຢຊີວ່າ, “ທ່ານມີລູກຊາຍເທົ່ານີ້ບໍ?”
ເຢຊີຕອບວ່າ, “ຍັງມີລູກຫລ້າອີກຄົນໜຶ່ງ, ລາວກໍາລັງລ້ຽງແກະຢູ່”.
ຊາມູເອນກໍໄດ້ເວົ້າວ່າ, “ຈົ່ງໄປນໍາລາວມາ; ພວກເຮົາຈະບໍ່ນັ່ງລົງຈົນກວ່າລາວຈະມາ”.
ດັ່ງນັ້ນ ເຢຊີຈຶ່ງໃຫ້ຄົນໄປນໍາລາວມາ. ລາວເປັນເດັກໜຸ່ມຜິວພັນດີ ແລະ ແຂງແຮງ ແລະ ຮູບຮ່າງໜ້າຕາດີ.
ແລ້ວພຣະເຈົ້າຢາເວກໍໄດ້ເວົ້າວ່າ, “ແມ່ນຄົນນີ້; ຈົ່ງລຸກຂຶ້ນ ແລະ ເຈີມຕັ້ງລາວ”.
ຊາມູເອນຈຶ່ງຈັບເຂົາສັດທີ່ບັນຈຸນ້ຳມັນມາ ແລະ ເຈີມດາວິດຕໍ່ໜ້າອ້າຍທັງຫລາຍຂອງລາວ ແລະ ພຣະວິນຍານຂອງພຣະເຈົ້າຢາເວໄດ້ລົງມາເໝືອດາວິດດ້ວຍລິດເດດຕັ້ງແຕ່ມື້ນັ້ນເປັນຕົ້ນມາ. ແລ້ວຊາມູເອນກໍກັບໄປທີ່ຣາມາ.
ດາວິດຮັບໃຊ້ໂຊນ
ບັດນີ້ ພຣະວິນຍານຂອງພຣະເຈົ້າຢາເວໄດ້ອອກຈາກໂຊນ ແລະ ວິນຍານຊົ່ວ1ຈາກພຣະເຈົ້າຢາເວມາທໍລະມານໂຊນ.
ຄົນຮັບໃຊ້ຂອງໂຊນໄດ້ເວົ້າວ່າ, “ເບິ່ງແມ, ວິນຍານຊົ່ວຈາກພຣະເຈົ້າມາທໍລະມານທ່ານ. ຂໍໃຫ້ເຈົ້ານາຍຂອງພວກຂ້ານ້ອຍສັ່ງຜູ້ຮັບໃຊ້ທີ່ນີ້ໃຫ້ຫານັກດີດພິນມາບັນເລງເພງ. ເມື່ອວິນຍານຊົ່ວຈາກພຣະເຈົ້າມາລົບກວນທ່ານ ແລ້ວສຽງພິນຈະໄດ້ເຮັດໃຫ້ຮູ້ສຶກດີຂຶ້ນ”.
ດັ່ງນັ້ນ ໂຊນກໍໄດ້ກ່າວກັບຄົນຮັບໃຊ້ຂອງຕົນວ່າ, “ຈົ່ງຫານັກຫລິ້ນພິນມາໃຫ້ເຮົາ”.
ຄົນໜຶ່ງໃນບັນດາຄົນຮັບໃຊ້ນັ້ນໄດ້ຕອບວ່າ, “ຂ້ານ້ອຍເຄີຍເຫັນລູກຊາຍຄົນໜຶ່ງຂອງເຢຊີແຫ່ງເບັດເລເຮັມຫລິ້ນພິນເກັ່ງ. ລາວເປັນນັກຮົບກ້າຫານ. ລາວເວົ້າມ່ວນ ແລະ ໜ້າຕາດີ ແລະ ພຣະເຈົ້າຢາເວຢູ່ກັບລາວ”.
ໂຊນຈຶ່ງໄດ້ສົ່ງຜູ້ນໍາຂ່າວໄປຫາເຢຊີ ແລະ ເວົ້າວ່າ, “ຂໍໃຫ້ສົ່ງດາວິດລູກຊາຍຂອງເຈົ້າ, ຜູ້ທີ່ລ້ຽງແກະມາໃຫ້ເຮົາ”. ເຢຊີຈຶ່ງໄດ້ສົ່ງດາວິດມາພ້ອມກັບແກະໜຸ່ມ ແລະ ໃຫ້ລໍໂຕໜຶ່ງບັນທຸກອາຫານ ແລະ ເຫລົ້າອະງຸ່ນໜຶ່ງຖົງໜັງມາໃຫ້ໂຊນ.
ດາວິດໄດ້ເຂົ້າພົບໂຊນ ແລະ ຮັບໃຊ້ກັບເພິ່ນ. ໂຊນພໍໃຈດາວິດຫລາຍ ແລະ ໄດ້ຕັ້ງດາວິດໃຫ້ເປັນໜຶ່ງໃນຜູ້ຖືອາວຸດຂອງເພິ່ນ. ໂຊນໄດ້ສົ່ງຂ່າວໄປຫາເຢຊີ, ໂດຍກ່າວວ່າ, “ຈົ່ງໃຫ້ດາວິດມາຮັບໃຊ້ກັບເຮົາເພາະເຮົາພໍໃຈລາວຫລາຍ”.
ເມື່ອໃດກໍຕາມທີ່ວິນຍານ ເຊິ່ງມາຈາກພຣະເຈົ້າມາລົບກວນໂຊນ ດາວິດກໍຈະເອົາພິນຂອງຕົນອອກມາ ແລະ ບັນເລງ. ຫລັງຈາກນັ້ນ ໂຊນກໍຈະຮູ້ສຶກສະບາຍໃຈຂຶ້ນ ແລະ ວິນຍານຊົ່ວກໍຈາກໄປ.
Source notes (1)
- Footnote ຫລື ວິນຍານແຫ່ງການເຮັດຮ້າຍ ເຊັ່ນດຽວກັບຂໍ້ 15 ແລະ 16
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.