Biblica® Open Lao Contemporary Version
1 ເປໂຕ 3
ຜົວເມຍ
ໃນທຳນອງດຽວກັນນັ້ນ ເມຍທັງຫລາຍຈົ່ງຍອມເຊື່ອຟັງຜົວຂອງຕົນ ເພື່ອວ່າຖ້າຜົວບາງຄົນບໍ່ເຊື່ອຟັງພຣະຄຳຂອງພຣະເຈົ້າ ແຕ່ການປະຕິບັດຂອງເມຍກໍອາດຊະນະໃຈລາວໂດຍບໍ່ຕ້ອງເວົ້າຫຍັງຈັກຄຳ. ເມື່ອພວກເຂົາເຫັນຄວາມບໍລິສຸດ ແລະ ຄວາມຢຳເກງພຣະເຈົ້າໃນຊີວິດຂອງພວກເຈົ້າ. ຄວາມງາມຂອງພວກເຈົ້ານັ້ນຈະຕ້ອງບໍ່ມາຈາກການຕົບແຕ່ງພາຍນອກເຊັ່ນວ່າ: ການເຮັດຊົງຜົມທີ່ປານີດ, ໃສ່ເຄື່ອງປະດັບຄຳ ຫລື ເຄື່ອງນຸ່ງທີ່ງາມ. ແຕ່ໃຫ້ເປັນຄວາມງາມທີ່ຢູ່ພາຍໃນ ຄືຄວາມງາມທີ່ບໍ່ເສື່ອມສູນຂອງຈິດໃຈທີ່ອ່ອນນ້ອມ ແລະ ສະຫງົບ ເຊິ່ງມີຄຸນຄ່າໃນສາຍຕາຂອງພຣະເຈົ້າຫລາຍ. ເພາະນີ້ເປັນວິຖີທາງທີ່ບັນດາຜູ້ຍິງບໍລິສຸດໃນອະດີດ ຜູ້ທີ່ມອບຄວາມຫວັງໃຈໄວ້ໃນພຣະເຈົ້າເຄີຍນຳໃຊ້ເພື່ອຕົບແຕ່ງຕົນເອງ. ພວກເຂົາຍອມເຊື່ອຟັງຜົວຂອງຕົນ, ເໝືອນດັ່ງນາງຊາຣາທີ່ໄດ້ເຊື່ອຟັງອັບຣາຮາມ ແລະ ເອີ້ນເພິ່ນວ່ານາຍ. ຖ້າພວກເຈົ້າເຮັດສິ່ງທີ່ຖືກຕ້ອງ ແລະ ບໍ່ຢ້ານກົວຕໍ່ສິ່ງໃດ ພວກເຈົ້າກໍເປັນລູກຫລານຂອງນາງແລ້ວ.
ໃນທຳນອງດຽວກັນນັ້ນ ຝ່າຍຜົວທັງຫລາຍຈົ່ງຢູ່ກັບເມຍຂອງຕົນດ້ວຍຄວາມເອົາໃຈໃສ່, ຈົ່ງໃຫ້ກຽດເມຍໃນຖານະເປັນຜູ້ທີ່ອ່ອນແອກວ່າ ແລະ ເປັນຜູ້ທີ່ຈະຮັບຊີວິດ ເຊິ່ງເປັນຂອງປະທານແຫ່ງພຣະຄຸນ ເພື່ອຈະບໍ່ມີສິ່ງໃດຂັດຂວາງຄຳອະທິຖານຂອງພວກເຈົ້າທັງສອງ.
ທົນທຸກທໍລະມານຍ້ອນເຮັດດີ
ສຸດທ້າຍນີ້, ພວກເຈົ້າທັງຫລາຍຈົ່ງເປັນນ້ຳໜຶ່ງໃຈດຽວກັນ, ຈົ່ງເຫັນອົກເຫັນໃຈກັນ, ຈົ່ງຮັກເຊິ່ງກັນແລະກັນ, ຈົ່ງມີໃຈອ່ອນນ້ອມ ແລະ ຖ່ອມໂຕ. ຢ່າເຮັດຄວາມຊົ່ວຕອບແທນຄວາມຊົ່ວ ຫລື ຢ່າດ່າຕອບແທນຄົນທີ່ດ່າ. ໃນທາງກົງກັນຂ້າມ, ຈົ່ງຕອບແທນຄວາມຊົ່ວດ້ວຍຄຳອວຍພອນ ເພາະວ່າພຣະເຈົ້າໄດ້ເອີ້ນພວກເຈົ້າໃຫ້ເຮັດຢ່າງນີ້ ເພື່ອວ່າພວກເຈົ້າຈະໄດ້ຮັບພອນເປັນມໍລະດົກ. ເພາະ,
“ຜູ້ໃດກໍຕາມຮັກຊີວິດ
ແລະ ປາຖະໜາຈະເຫັນວັນທີ່ດີ
ພວກເຂົາຕ້ອງຮັກສາລີ້ນຂອງຕົນໃຫ້ພົ້ນຈາກຄວາມຊົ່ວ
ຮັກສາປາກຂອງຕົນໃຫ້ບໍ່ໃຫ້ເວົ້າຄຳຫລອກລວງ.
ພວກເຂົາຕ້ອງຫັນໜີຈາກຄວາມຊົ່ວ ແລະ ເຮັດຄວາມດີ
ພວກເຂົາຕ້ອງສະແຫວງຫາສັນຕິສຸກ ແລະ ຕິດຕາມສັນຕິສຸກນັ້ນ.
ເພາະຕາຂອງອົງພຣະຜູ້ເປັນເຈົ້າເຝົ້າເບິ່ງຄົນຊອບທຳ
ແລະ ຫູຂອງພຣະອົງຮັບຟັງຄຳອະທິຖານຂອງພວກເຂົາ,
ແຕ່ອົງພຣະຜູ້ເປັນເຈົ້າຫັນໜ້າຕໍ່ສູ້ບັນດາຜູ້ທີ່ເຮັດຊົ່ວ”.1
ຖ້າພວກເຈົ້າກະຕືລືລົ້ນໃນການເຮັດດີ ຜູ້ໃດຈະມາເຮັດຮ້າຍພວກເຈົ້າໄດ້? ແຕ່ເຖິງແມ່ນວ່າພວກເຈົ້າຕ້ອງທົນທຸກຍ້ອນເຮັດສິ່ງທີ່ຖືກຕ້ອງ ພວກເຈົ້າກໍໄດ້ຮັບພອນ. “ຢ່າຢ້ານກົວຕໍ່ການກະທຳຂອງພວກເຂົາ,2 ຢ່າວິຕົກກັງວົນໃຈເລີຍ”.3 ແຕ່ໃນໃຈຂອງພວກເຈົ້າຈົ່ງເຄົາລົບພຣະຄຣິດເຈົ້າວ່າເປັນອົງພຣະຜູ້ເປັນເຈົ້າ. ຈົ່ງຕຽມພ້ອມສະເໝີທີ່ຈະຕອບທຸກຄົນທີ່ຖາມພວກເຈົ້າເຖິງເຫດຜົນທີ່ພວກເຈົ້າມີຄວາມຫວັງຢ່າງນີ້. ແຕ່ຈົ່ງຕອບຢ່າງສຸພາບອ່ອນນ້ອມ ແລະ ໃຫ້ກຽດ. ຈົ່ງຮັກສາຈິດສຳນຶກໃຫ້ໃສສະອາດ ເພື່ອຜູ້ທີ່ກ່າວຮ້າຍຄວາມປະພຶດດີຂອງພວກເຈົ້າໃນພຣະຄຣິດເຈົ້ານັ້ນຈະໄດ້ລະອາຍໃຈທີ່ມາໃສ່ຮ້າຍພວກເຈົ້າ. ເພາະຖ້າເປັນຄວາມປະສົງຂອງພຣະເຈົ້າໃຫ້ພວກເຈົ້າທົນທຸກເນື່ອງຈາກການເຮັດດີກໍດີກວ່າທົນທຸກເພາະການເຮັດຊົ່ວ. ເພາະພຣະຄຣິດເຈົ້າໄດ້ຕາຍເພື່ອລຶບລ້າງບາບພຽງຄັ້ງດຽວເປັນການສິ້ນສຸດ ຄືຄົນຊອບທຳຕາຍເພື່ອຄົນອະທຳເພື່ອນຳພວກເຮົາທັງຫລາຍໄປເຖິງພຣະເຈົ້າ. ພຣະອົງຖືກປະຫານທາງຮ່າງກາຍ ແຕ່ພຣະອົງຖືກບັນດານໃຫ້ເປັນຄືນມາທາງພຣະວິນຍານ. ໂດຍທາງວິນຍານນັ້ນ4 ພຣະອົງຍັງໄດ້ໄປປະກາດແກ່ວິນຍານທັງຫລາຍທີ່ຖືກຂັງຄຸກຢູ່ດ້ວຍ. ໃນອະດີດບໍ່ເຊື່ອຟັງ ເມື່ອເວລາທີ່ພຣະເຈົ້າອົດທົນລໍຖ້າໃນສະໄໝຂອງໂນອາຂະນະທີ່ເພິ່ນສ້າງເຮືອ. ໃນເຮືອນີ້ມີຄົນທີ່ຢູ່ບໍ່ຫລາຍ ຄືແປດຄົນເທົ່ານັ້ນທີ່ພຣະເຈົ້າໄດ້ໃຊ້ນ້ຳຊ່ວຍພວກເຂົາໃຫ້ລອດ.5 ແລະ ນ້ຳນີ້ເປັນສັນຍາລັກການຮັບບັບຕິສະມາ ເຊິ່ງບັດນີ້ໄດ້ຊ່ວຍພວກເຈົ້າທັງຫລາຍໃຫ້ລອດພົ້ນເໝືອນກັນ ບໍ່ແມ່ນເປັນການກຳຈັດສິ່ງເປື້ອນເປິອອກຈາກຮ່າງກາຍ ແຕ່ເປັນການປະຕິຍານຕໍ່ພຣະເຈົ້າວ່າຈະຮັກສາຈິດສຳນຶກທີ່ດີ. ບັບຕິສະມາໄດ້ຊ່ວຍພວກເຈົ້າໃຫ້ພົ້ນໂດຍການເປັນຄືນມາຈາກຕາຍຂອງພຣະເຢຊູຄຣິດເຈົ້າ, ຜູ້ທີ່ໄດ້ເຂົ້າໃນສະຫວັນ ແລະ ບັດນີ້ກໍນັ່ງຢູ່ທີ່ເບື້ອງຂວາມືຂອງພຣະເຈົ້າໂດຍມີບັນດາເທວະດາ, ຜູ້ມີອຳນາດ ແລະ ອຳນາດທີ່ຢູ່ໃຕ້ພຣະອົງ.
Source notes (5)
- Footnote ພສສ 34:12-16
- Footnote ຫລື ຢ່າຢ້ານການຂົ່ມຂູ່ຂອງພວກເຂົາ
- Footnote ອຊຢ 8:12
- Footnote ຫລື ແຕ່ພຣະອົງເປັນຄືນມາໃນວິນຍານ 19 ໂດຍທາງວິນຍານນັ້ນ
- Footnote ຫລື ພຣະເຈົ້າຊ່ວຍຊີວິດພວກເຂົາໃຫ້ພົ້ນຈາກນ້ຳ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.